არჩილ გეგეშიძე - "საგანგებო და სრულუფლებიანი ელჩი ამა თუ იმ სახელმწიფოში მთელი ქვეყნის წარმომადგენელია და არა მმართველი პარტიის"
"მას შემდეგ, რაც 1992 წელს საქართველოსა და ამერიკის შეერთებულ შტატებს შორის დიპლომატიური ურთიერთობა დამყარდა, ჩვენს ქვეყნებს შორის ურთიერთობა სულ უფრო მჭიდრო და ინტენსიური ხდება. ამ თვალსაზრისით, ახალ ეტაპზე გადასვლა იყო 2009 წელს სახელმწიფოებს შორის გაფორმებული "სტრატეგიული პარტნიორობის ქარტია", რის შედეგადაც ორმხრივი ურთიერთობა ინსტიტუციურ ჩარჩოში მოექცა. მის ფარგლებში მოხაზულია კონტურები, რა ძირითადი მიმართულებითაც უნდა გაღრმავდეს თანამშრომლობა; უახლოეს მომავალში ქარტიაში ასახული ყველა მიმართულება კონკრეტულ პროექტებად, პროგრამებად უნდა იქცეს. სუსტი წერტილი არა, მაგრამ ერთგვარი სირთულე, რაც ამ ურთიერთობების შემდგომ გაღრმავებას შეიძლება ახლდეს, არის ის არასახარბიელო ფონი, რომელიც შეიქმნა წინასაარჩევნო კამპანიის მიმდინარეობისას, როცა ყოფილი ოპოზიციური და დღევანდელი სახელისუფლებო პოლიტიკური ძალა, მედიის ნაწილისა და ოპონენტების მიერ წარმოჩენილი იყო, როგორც პოტენციურად ანტიდასავლური და უფრო პრორუსული. ეს ჯერ კიდევ შეინიშნება ვაშინგტონის პოლიტიკური ისტებლიშმენტის ზოგიერთ სეგმენტში და ამ მიმართულებით უფრო აქტიური მუშაობაა საჭირო, ეს სტერეოტიპი რომ გაქარწყლდეს; საჭიროა მკაფიოდ იქნას განმარტებული ქვეყნის საგარეო კურსის პრიორიტეტები და, შედეგად, ახალი ხელისუფლების მიმართ ვაშინგტონში დამკვიდრდეს სანდო პარტნიორის, სტრატეგიული მოკავშირის იმიჯი", - აცხადებს საქართველოს საგანგებო და სრულუფლებიანი ელჩი ამერიკის შეერთებულ შტატებში არჩილ გეგეშიძე გაზეთ "ყველა სიახლისთვის" მიცემულ ინტერვიუში სათაურით "აშშ, როგორც ჩანს, მართვის უფრო მომჭირნე მოდელზე გადადის".
"ლობისტური კომპანიის დაქირავების უფლება პრეზიდენტს აქვს, ოღონდ ეს არ უნდა მოხდეს სახელმწიფო სახსრების გამოყენებით. როგორც გაირკვა, წინასაარჩევნო პერიოდში მმართველი ძალა, პრეზიდენტის თანხმობით, "ერთიანი ნაციონალური მოძრაობის" სასარგებლოდ იყენებდა საბიუჯეტო სახსრებს. თვითონ ის ფაქტი, რომ პრეზიდენტი სააკაშვილი თავს ოპოზიციონერად განიხილავს, გვაძლევს ვარაუდის საფუძველს, რომ მის მიერ დაქირავებული ლობისტური კომპანიები ამჯერადაც "ერთიანი ნაციონალური მოძრაობის" პოზიციიდან ნაკარნახევი გზავნილების გამავრცელებლები იქნებიან", - აღნიშნავს რესპონდენტი.
"ამერიკის შეერთებულ შტა¬ტებში ჯერ კიდევ არ არის აღმოფხვრილი ეკონომიკური კრიზისის შედეგები, რომელიც 2008 წელს დაიწყო; ამიტომ, როგორც ჩანს, ქვეყანა მართვის უფრო მომჭირნე მოდელზე გადადის, მათ შორის საგარეო დახმარების კუთხით. დახმარების მოცულობის შემცირება ეხება არა მხოლოდ სამხრეთ კავკასიას, არამედ სხვა რეგიონებსა და ქვეყნებს. თუმცა, საქართველო რჩება ერთ სულ მოსახლეზე ამერიკული სამთავრობო დახმარების მიხედვით ერთ-ერთ მოწინავე სახელმწიფოდ... ხოლო ის ფაქტორი, რომ საქართველოს მიმართ დახმარება ყველა სფეროში მცირდება, გარდა სამხედროსი, კიდევ ერთხელ ადასტურებს, რა დიდი ყურადღება ეთმობა საქართველოსთან, როგორც სტრატეგიულ პარტნიორთან ურთიერთობას", - განმარტავს არჩილ გეგეშიძე.
"საგანგებო და სრულუფლებიანი ელჩი ამა თუ იმ სახელმწიფოში მთელი ქვეყნის წარმომადგენელია და არა მმართველი პარტიის ან მხოლოდ მისი მხარდამჭერი ელექტორატის. სამწუხაროდ, წინასაარჩევნო პერიოდში ამ უაღრესად მნიშვნელოვანი პრინციპის დაცვა ვერ მოხერხდა. ამჯერად ჩვენი პოზიცია სხვაგვარია: ქვეყანაში დემოკრატიული გარდაქმნები მიმდინარეობს და ეს დიპლომატიურ კორპუსზე, მისი მუშაობის სტილზეც უნდა აისახოს. საელჩოებმა საქმიანობა მთელი ქვეყნის, სახელმწიფოებრივი ინტერესების გათვალისწინებით უნდა წარმართონ. უცხოეთში საქართველოს დიპლომატიურ მისიებში მუშაობის გამოცდილება არ მაქვს, მაგრამ მაქვს საგარეო პოლიტიკის სფეროში მუშაობის ოცწლიანი გამოცდილება როგორც სამთავრობო, ისე არასამთავრობო ორგანიზაციებში. მაგალითად, წლების განმავლობაში ვიყავი სახელმწიფო კანცელარიის საგარეო პოლიტიკის ანალიზის ჯგუფის ხელმძღვანელი, პრეზიდენტ შევარდნაძის მთავარი მრჩეველი და ურთიერთობა მქონდა დიპლომატიური კორპუსის მაღალი რანგის წარმომადგენლებთან, როგორც ქვეყნის შიგნით, ისე უცხოეთშიც. ვტრიალებდი საქართველოს საგარეო პოლიტიკის შექმნის და წარმართვის `სამზარეულოში~ და ბევრ სხვა კოლეგასთან ერთად მოკრძალებული წვლილი შემქონდა იმ კურსის ჩამოყალიბებაში, რასაც დასავლური არჩევანი ჰქვია. ჩემთვის დიდი პატივია, ქართული სახელმწიფოსათვის ამ მეტად მნიშვნელოვან ეტაპზე წარმოვადგენდე ქვეყანას სახელმწიფოში, რომელიც დიდწილად განსაზღვრავს მსოფლიოს პოლიტიკურ ამინდს და, ამასთანავე, ჩვენი სტრატეგიული მოკავშირეა", - დასძენს რესპონდენტი.
