მცხეთის რეაბილიტაცია შეჩერებულია. რატომ შეჩერდა მცხეთის რეაბილიტაცია და არის თუ არა პრიორიტეტი ახალი ხელისუფლების გეგმებში მცხეთის რეაბილიტაციის პროექტი? ამ საკითხზე "ალია" მცხეთის მთავარ არქიტექტორს თამაზ მაჩხანიას ესაუბრა:

- ბ-ნო თამაზ, მცხეთის რეაბილიტაციის პროექტი შეჩრდა. ხომ ვერ გვეტყვით რატომ?
- რა არის, იცით? მე აქ დავინიშნე 19 ნოემბერს. ზოგიერთ რამეზე შეიძლება ვერ გიპასუხოთ.

- რაც თქვენ დაინიშნეთ, იმის შემდეგ თუ გქონიათ საუბარი პროექტის გაგრძელებაზე?
- არა, არ ყოფილა ასეთი რაღაც. არ ყოფილა საუბარი, რომ არის თანხა და რამე უნდა გაკეთდეს. ოფიციალურად არ ყოფილა და ახლა ისე ლაპარაკით ვინ რას ლაპარაკობს...

- 19 ნოემბრამდე სად მუშაობდით?
- ექვსი წელი უმუშევარი ვიყავი. ადრე ვმუშაობდი, ვიყავი მცხეთის რაიონის მთავარი არიტექტორის მოადგილე, მცხეთის რაიონის არქმშენინსპექციის უფროსი და მცხეთა-მთიანეთის არქმშენინსპექციის უფროსი. როცა ეს ბოლო გაუქმდა, მერე დავრჩი უმუშევარი.

- მცხეთის რეაბილიტაციის გეგმა არსებობდა და ამ გეგმის მიხედვით, რა ნაწილია დარჩენილი გასაკეთებელი?
- გუშინწინაც ვიყავი ასული ჯვარზე და იქიდან გადმოვხედე. დაახლოებით ერთი მეოთხედია გაკეთებული.

- ჯვარზე ასვლა რად უნდოდა, მთავარი არქიტექტორი ხართ და დოკუმენტურად არ იცით? ახლა თუ არის თქვენი სამსახურის პრიორიტეტებში განახლება?
- ეს ჩვენზე არ არის დამიკიდებული. ჩვენ რა შუაში ვართ. ვინც აფინასებდა, იმათ თუ ექნებათ შესაბამისი თანხები... იმათ თუ ექნებათ, განახლდება. ჩვენ რა შუაში ვართ.

- ვინ აფინასებდა?
- ადგილობრივი ბიუჯეტით არ ფინანსდებოდა, როგორც მე ვიცი.

- რეგიონალური განვითარების სამინისტროდან?
- არ ვიცი, ზუსტად რა თანხები იყო, საიდან ფინანსდებოდა. ერთი წუთით, ვიკითხავ და გეტყვით.
2 წუთის შემდეგ...
- აი, როგორც აქ ამბობენ, მეუბნებიან, ცენტრალური ბიუჯეტიდანაც იყოო და ხვადასხვა იმიდანაც... მე რომ ვყოფილიყავი მაშინაც, მეცოდინებოდა და ახლა ზუსტად არ ვიცი. მე რომ მოვედი, ეს უკვე დამთავრებული იყო.

- დამთავრებული თუ შეჩერებული?
- შეჩერებული, დიახ, ჰო, ბოდიში.

- ანუ, არც ის იცით, როდის განახლდება და ან განახლდება თუ არა, საერთოდ?..
- ჩვენ არაფერ შუაში ვართ. თუ იქნება დაფინასება, ალბათ, განახლდება.

P.S. "ალია" შეეცადა, რეგიონალური განვითარების სამინისტროში გადაემოწმებინა მცხეთის რეაბილიტაციის ბედი, თუმცა სამინისტროში ჩვენს ზარებს არ უპასუხეს.