ტელეკომპანია "ალ ჯაზირას" ვებგვერდი აქვეყნებს ფელიქს გადტკესა და გეიეტრი პარემესუორენის სტატიას საქართველოზე, სათაურით – "ქართული ფერმები ინდოელების შეჭრას აწყდებიან". როგორც სტატიის ავტორები წერენ, ათასობით პენჯაბელმა ფერმერმა შორეულ საქართველოში მიწები იაფად შეიძინა, რითაც ზოგიერთი ადგილობრივის გაღიზიანება გამოიწვია. 

"ლარისა მაისურაძე გაოცებული იყო, როცა საქართველოს დედაქალაქ თბილისიდან 25 კმ-ში, მის მიძინებულ სოფელთან ახლოს, უცხოელების მოულოდნელი მოზღვავება აღმოაჩინა, რომლებიც ტრაქტორებით გადაადგილდებიან", - ნათქვამია სტატიაში.

"არ ვიცოდი, რა ხდებოდა, ძალიან გაოცებული ვიყავი. ტრაქტორებს ინდოელი ფერმერები მართავდნენ", - ციტირებენ სტატიის ავტორები ლარისა მაისურაძის სიტყვებს, რომელმაც მათთან საუბრისას ასევე აღნიშნა - უჩვეულო ამ ყველაფერში ის იყო, რომ მას ვერასოდეს წარმოედგინა, თუ ამდენი უცხოელი მეზობელი ეყოლებოდა ესოდენ შორეული ქვეყნიდან.
"ინდოელები, რომლებიც მაისურაძემ თავის სოფელში ნახა, ბოლო თვეებში საქართველოში ჩამოსული იმ უამრავი ინდოელის პირველი ნაკადია, რომლებიც კავკასიის ამ რეგიონში სასოფლო-სამეურნეო მიწებს იძენენ", - ნათქვამია "ალ ჯაზირას" ვებგვერდზე გამოქვეყნებულ სტატიაში.

როგორც უცხოელი ჟურნალისტები აღნიშნავენ, საქართველოს მთავრობა ეძებს გზებს, გააძლიეროს შიდა სასოფლო-სამეურნეო წარმოება, რათა დაეხმაროს ქვეყანას ადგილობრივი პროდუქტის მოპოვებაში. ქართული ფერმების მცირე მიწების უმრავლესობა არ არის საკმარისი კომერციული წარმოებისთვის.

"სოფლის მეურნეობის წარმოება ქვეყნის მთლიანი შიდა პროდუქტის მაჩვენებლით 8,3%-მდე დაეცა, მაშინ, როცა 2006 წელს 12,8% იყო. საქართველომ გააფართოა იმიგრაცია სოფლის მეურნეობის ნოუ-ჰაუთი და უცხოელებისთვის სამეურნეო მიწების მიყიდვით, რამდენაც ქვეყნის უხვი და სასოფლო-სამეურნეო პოტენციალი სწორად არ იყო ათვისებული ადგილობრივი ფერმერების მიერ", - აღნიშნულია "ალ ჯაზირას" ვებგვერდზე გამოქვეყნებულ სტატიაში.

თუმცა, - როგორც ჟურნალისტები წერენ, - ბევრი ქართველი უცხოელი ფერმერების მოზღვავებას "შემოჭრად" მიიჩნევს. მონაცემების თანახმად, 2012 წლიდან მოყოლებული საქართველოში ათასობით ინდოელი ფერმერის იმიგრირება მოხდა, ძირითადად პენჯაბის ჩრდილოეთ შტატიდან.

როგორც "ალ ჯაზირასთან" საუბრისას, მაისურაძე აცხადებს, რთული იყო ახალჩამოსულებთან ურთიეთობის დამყარება, თუმცა დიდი დრო არ დასჭირვებია იმის მისახვედრად, რომ ისინი "სასიამოვნო ხალხი" იყვნენ.

"მინდვრებში სასმელი წყალი არ არის, ამიტომ ისინი ყოველთვის აქ მოდიან წყლის დასალევად. წყალს ვასმევთ, ისინი კი თავიანთ ბოსტანში მოყვანილ პომიდორს ან კარტოფილს მაძლევენ. ძალიან სასიამოვნო ხალხია, შრომისმოყვარე და მშვიდი", - აცხადებს მაისურაძე.

როგორც სტატიის ავტორები წერენ, რამანდეპ სინგჰ პალანი, პენჯაბელი სინგჰი ფერმერი, მაისურაძის სახლის უკან გადაჭიმული 30 ჰექტარი მიწის მფლობელია. ერთადერთი მიზეზი, რის გამოც პალანმა საქართველოში მიწა შეიძინა, მისი ღირებულებაა – საქართველოში მიწა ძალიან იაფი ღირს.

"ერთი ჰექტარის შეძენა 1 000-1 500 აშშ დოლარად შემიძლია. ვერც კი წარმომიდგენია, პენჯაბში ასე იაფად რაიმეს შოვნა. ფასებს ვერც კი შეადარებთ. პენჯაბში ჩემი მიწის ერთი ჰექტარი გავყიდე და იმ ფულით საქართველოში 200 ჰექტარი მიწის ყიდვა შემიძლია", - ამბობს პალანი, რომელსაც საქართველოში ნაყიდ მიწაზე ხორბალი, კარტოფილი, ნიორი, ხახვი და სხვა ბოსტნეული მოჰყავს.

"დიდებულია აქაური ნიადაგი. ძალიან კარგია იმ მოსავლისთვის, რომლის მოყვანაც აქ გვინდა. აქაური ნიადაგი დიდად არ განსხვავდება ჩვენი სამშობლოს ნიადაგისგან, - ამბობს 42 წლის პალანი და ხუმრობანარევი ტონით ამატებს, - ნამდვილი პენჯაბელი ვარ. ყველა ჩვენგანი დაგეშილია უფრო და უფრო მეტი მიწის შეძენაზე. არცერთი პენჯაბელი არ არის კმაყოფილი კუთვნილი მიწით".
სტატიის ავტორები აღნიშნავენ, რომ მიუხედავად იმისა, ინდოელი ფერმერი ქართული ცხოვრების სტილისთვის მიჩვევას ცდილობს, მაინც აწყდება სირთულეებს. ენა და კულტურა "განსხვავებულია", კერძები კი "მწარე არ არის".

"ალ ჯაზირას" ვებგვერდზე გამოიქვეყნებულ სტატიაში ნათქვამია, რომ პალანმა საქართველოში, სოფლის მეურნეობაში ინვესტირების შესაძლებლობაზე საიმიგრაციო სააგენტოს მიერ გაზეთში გამოქვეყნებული განცხადებით შეიტყო. კომპანია Crown Immigration-ის სარეკლამო პოსტერებს თბილისის გარეუბნაში, მდებარე "თბილისი მოლშიც" წააწყდებით.
როგორც სტატიის ავტორები აღნიშნავენ, კომპანიის აღმასრულებელი დირექტორის დარამიტ სინგჰ საინის განცხადებით, სააგენტოს მეშვეობით საქართველოში გასული წლიდან მოყოლებული 2 ათასი ფერმერი ჩამოვიდა.

"აქ ყველაფერი გამჭვირვალეა და, ინდოეთისგან განსხვავებით, კორუფცია არ ყვავის. თუ ყველაფერი კარგად იქნება, უფრო მეტი ინდოელი ჩამოვა", - აცხადებს საინი.
"ალ ჰაზირას" ჟურნალისტთა ინფორმაციით, სააგენტო პენჯაბში ასევე გეგმავს ქართულ-რუსულენოვანი სკოლის გახსნას, რათა პანჯაბელი ფერმერები თავიანთ ახალ სამშობლოში ჩამოსვლამდე მოამზადონ.

როგორც სტატიაშია აღნიშნული, ბოლოდროინდელი მოვლენების განვითარებით ყველა არ არის კმაყოფილი. "მცირე და საშუალო მიწების მფლობელი ქართველი ფერმერები ჩივიან, რომ მაშინ, როცა ხელისუფლება სოფლის მეურნეობაში უცხოური ინვესტიციების მოზიდვას უწყობს ხელს, ადგილობრივ ფერმერებს არ ეხმარება", - ნათქვამია ფელიქს გადტკესა და გეიეტრი პარემესუორენის სტატიაში.

"წარსულში ხელისუფლება არაფერს აკეთებდა სოფლის მეურნეობისთვის. მათთვის ეს არ იყო პრიორიტეტული სფერო. ამან ფერმერების გაკოტრება გამოიწვია, რამაც მათ უცხოელებისთვის მცირე თანხად მიწის გაყიდვის გარდა, სხვა არჩევანი არ დაუტოვა", - აცხადებს რაულ ბაბუნაშვილი "საქართველოს ფერმერთა კავშირის" დამფუძნებელი.
როგორც სტატიის ავტორებენ წერენ, 71 წლის ბაბუნაშვილი ასევე აღიარებს ადგილობრივი მიწათმოქმედების არაადეკვატურობას, თუმცა აცხადებს, რომ მთავრობამ ფოკუსირება უცხოელების ნაცვლად, ქართველებზე უნდა მოახდინოს.

"ქართველი ფერმერები უნარ-ჩვევებისა და ნოუ-ჰაუს ნაკლებობას განიცდიან. ჩვენ არ გაგვაჩნია სამშენებლო ინფრასტრუქტურაში ინვესტირების რესურსები. სწორედ ამიტომ ჩამორჩებიან ქართველი ფერმერები მაშინ, როცა ინდოელები ფერემები ჩამოდიან და მათ მიწებს იაფფასებში იტაცებენ", - აცხადებს ბაბუნაშვილი, რომელიც ასევე დასძენს, რომ მას არ გააჩნია ზუსტი ციფრი, რამდენ ინდოელს აქვს საქართველოში შეძენილი მიწა, თუმცა ის დაუყოვნებლივ მოითხოვს ხელისუფლებისგან ქმედებებს, შეაჩეროს უცხოელების მხრიდან სასოფლო-სამეურნეო მიწების შეძენა.
"ჩვენ უნდა შევაჩეროთ ინდოეთიდან მიწის მყიდველთა შემოჭრა. მე ამას შემოჭრას ვუწოდებ, რადგან ისინი მასობრივიდან ჩამოდიან", - აცხადებს ბაბუნაშვილი "ალ-ჯაზირას" ჟურნალისტებთან საუბრისას.

როგორც სტატიაშია აღნიშნული, სოფლის მეურნეობის მინისტრ დავით კირვალიძესთვის დასმულ კითხვაზე, ახდენდა თუ არა ხელისუფლება ქართველი ფერმერების საჭიროების იგნორირებას, კირვალიძემ განაცხადა, რომ ქართველი ფერმერები წინა მთავრობისთვის არ იყვნენ პრიორიტეტულნი. თუმცა, როგორც მინისტრი აცხადებს, 2012 წლის ოქტომბრის არჩევნების შემდეგ, ახალი მთავრობა ყურადღებას უთმობს სოფლის მეურნეობის სექტორს.

"ჩვენ ვცდილობთ, ქართველი სოფლის მაცხოვრებლები ბიზნესს დავუბრუნოთ. ამისთვის უდიდეს ინვესტიციებს ვახდენთ და შედეგებს მომდევნო თვეებში იხილავთ. ამიტომ გთხოვთ, 7-8 თვის შემდეგ დაბრუნდეთ", - განუცხადა კირვალიძემ "ალ ჯაზირას" ჟურნალისტებს.

სტატიაში ნათქვამია - როგორც მინისტრი აღნიშნავს, პრემიერ-მინისტრ ბიძინა ივანიშვილის მთავრობამ, წინა ბიუჯეტთან შედარებით, სოფლის მეურნეობის დაფინანსება 60%-ით გაზარდა. იანვარში კი შეიქმნა 600 მილიონი აშშ დოლარის ღირებულების ფონდი, რომელიც დაბალპროცენტიან კრედიტებს გასცემს ფერმერებისთვის. საქართველო საკვები პროდუქტის 80%-ის იმპორტს ახდენს, რაც ნეგატიურად აისახება ქვეყნის ეკონომიკაზე. "ეს ნამდვილი აბსურდია. ქართველ ფერმერებს ძალიან კარგი ბუნებრივი რესურსები აქვთ: ნიადაგი, წყალი და კლიმატი", - აცხადებს სოფლის მეურნეობის მინისტრი ამის თაობაზე.

სტატიის ავტორები წერენ, რომ კირვალიძე ქართველი ფერმერებისთვის პირობების გაუმჯობესებაზე საუბრობს, თუმცა გვერდს არ უვლის უცხოელებზე საუბარს. "ჩვენ მივესალმებით ყველანაირ ინვესტიციას – უცხოურს, ადგილობრივსა თუ შინაურს. მიველსამებით თითოეულ ინვესტორს, რომელიც ჩვენთან გრძელვადიანი ურთიერთობის დამყარებას აპირებს", - აცხადებს კირვალიძე.
სტატიაში ასევე ნათქვამია, რომ რანჯუ სინგჰმა, რომელიც საქართველოში 150 ჰექტარ მიწას ფლობს, ბიზნესის წარმოების კიდევ ერთი შესაძლებლობა აღმოაჩინა პენჯაბელი იმიგრანტების მოზღვავებით.

"ახალჩამოსულებისთვის იაფფასიან სასტუმროსა და სასადილოს ვამუშავებთ. საქართველოში ჩამოსულები აქ მოსვლას შეძლებენ, რათა თავი ისე იგრძნონ, როგორც საკუთარ სახლში. აქ ისინი პენჯაბის დიალექტზე საუბარს, პენჯაბური კერძების მირთმევასა და თბილისში მცხოვრები სხვა პენჯაბელების გაცნობას შეძლებენ", - ამბობს სინგჰი. თუმცა, სინგჰი საქართველოში თავს ისე ვერ გრძნობს, როგორც საკუთარ სახლში, - წერენ სტატიის ავტორები.

"ქართველები ძალიან სასიამოვნო ხალხია. მაგრამ ჩვენ განვსხვავდებით მათგან. მათ სხვა კულტურა და რელიგია აქვთ. თუმცა, აქ ბიზნესის წარმოების კარგი შესალებლობებია", - ციტირებენ სტატიის ავტორები ინდოელი სინგჰის სიტყვებს.