საქართველომ შარშან ეკონომიკური ზრდის თვალსაზრისით ბოლო წლების საუკეთესო შედეგს მიაღწია, მიუხედავად იმისა, რომ დეკემბერში გარკვეული ვარდნა შეინიშნებოდა. „საქსტატის“ წინასწარი შეფასებით, 2019 წლის დეკემბერში, წინა წლის შესაბამის პერიოდთან შედარებით, მთლიანი შიდა პროდუქტის ზრდამ 3.8 პროცენტი შეადგინა, ხოლო 2019 წლის საშუალო რეალური ზრდა 5.2 პროცენტით განისაზღვრა.

სტატისტიკის ეროვნული სამსახურის ინფორმაციით, 2019 წლის დეკემბერში, წინა წლის შესაბამის პერიოდთან შედარებით, ზრდა შეინიშნებოდა შემდეგ საქმიანობებში: დამამუშავებელი მრეწველობა, ტრანსპორტი და დასაწყობება, საბითუმო და საცალო ვაჭრობა, ავტომობილებისა და მოტოციკლების რემონტი, სასტუმროები და რესტორნები. ხოლო მშენებლობის სექტორში კლება დაფიქსირდა.

მიუხედავად იმისა, რომ დეკემბერში ტემპი შენელდა, საქართველოში მაინც მოსალოდნელზე მაღალი ეკონომიკური ზრდა დაფიქსირდა. ამ მაჩვენებლს არავინ ელოდა არც მთავრობა და არც საერთაშორისო ორგანიზაციები. წლის დასაწყისში პროგნოზი 4.5 პროცენტს, ხოლო შემდეგ 4.8 პროცენტს შეადგენდა.

საყურადღებოა, რომ საერთაშორისო სავალუტო ფონდის შეფასებით, საქართველოს უახლოესი 2020-2024 წლების განმავლობაში ექნება ყველაზე მაღალი, დაახლოებით 5 -პროცენტიანი ეკონომიკური ზრდა ექნება, ევროპისა და რეგიონის ქვეყნებთან შედარებით.

ფინანსისტ გიორგი ცუცქირიძეს მიაჩნია, რომ 2019 წელს ეკონომიკური ზრდა იყო საკმაოდ დივერსიფიცირებული როგორც მრეწველობის, ისე მომსახურების მიმართულებით.

„ეკონომიკის დარგობრივ ჭრილში რეალური ზრდის მნიშვნელოვანი ტემპები დაფიქსირდა როგორც გადამამუშავებელი მრეწველობის და ტრანსპორტის, ასევე ვაჭრობის, სასტუმროების და რესტორნების, კავშირგაბმულობის სფეროებში. ამასთსნ, წლის პირველ კვარტალში მშენებლობის სექტორში კლების შემდეგ, მნიშვნელოვნად მაღალი ზრდა დაფიქსირდა, რასაც ხელი შეუწყო სახელმწიფო კაპიტალური ხარჯების ზრდამ.

მაკროეკონომიკურ ჭრილში, რაც ყველაზე მნიშვნელოვანია, ეკონომიკურ ზრდას ხელი შეუწყო საგარეო ვაჭრობის გაუმჯობესებამ, რაც საქონლის ექსპორტის რეკორდული მაჩვენებლით, 3,771.5 მლნ აშშ დოლარით აღინიშნა და შესაბამისად, თითქმის ნახევარი მილიარდი დოლარით (489 მლნ აშშ დოლარით) შემცირდა სავაჭრო დეფიციტიც“, - აღნიშნა ცუცქირიძემ.

საკმაოდ პოზიტიური შემართბით შეხვდნენ მაღალ შედეგს ეკონომიკის სამინისტროში, როგორც უწყების ხელმძღვანელმა ნათია თურნავამ განაცხადა, 2019 წლის 5.2%-იანი ზრდა, ბოლო წლებში ყველაზე მაღალია და აჩვენებს, რომ მიუხედავად არასახარბიელო საგარეო და შიდა ფაქტორების ნეგატიური ზეგავლენისა, ეკონომიკა საკმაოდ მდგრადი აღმოჩნდა.

„ალბათ გვახსოვს, რომ 2019 წლის დასაწყისში საერთაშორისო სავალუტო ფონდის პროგნოზით, საქართველოს ეკონომიკური ზრდა მხოლოდ 4.5%-ს შეადგენდა, რაც განპირობებული იყო რეგიონში არსებული გამოწვევებითა და ზოგადად, გლობალური ეკონომიკის ნელი განვითარებით. თუმცა, როგორც ვხედავთ, საბოლოო ჯამში ეს პროგნოზი არ გამართლდა და ჩვენი ეკონომიკური ზრდა გაცილებით უფრო მაღალია“, - განაცხადა თურნავამ.

მისივე თქმით, მოლოდინზე უფრო მაღალი ეკონომიკური ზრდა, პირველ რიგში, ქვეყნის მიზანმიმართული ეკონომიკური პოლიტიკის შედეგია.

„ჩვენი ეკონომიკური პოლიტიკა მიმართულია ქართული წარმოების კონკურენტუნარიანობის ამაღლებისკენ საერთაშორისო არენაზე და სწორედ ექსპორტი გახლდათ 2019 წელს ჩვენი ეკონომიკური ზრდის მთავარი მამოძრავებელი ძალა, რადგან 2019 წელს ექსპორტი აღწევს ბოლო ათწლეულების მანძილზე რეკორდულ მაჩვენებელს - 3 771.5 მლნ. დოლარს გადააჭარბა. სწორედ ექსპორტი არის ის მამოძრავებელი ძალა, რომელმაც ასეთი მაღალი ეკონომიკური ზრდა მოგვიტანა. ეს ნიშნავს, რომ ჩვენი ეკონომიკური გუნდის პოლიტიკის შედეგად, ქართული წარმოება ხდება უფრო მეტად კონკურენტუნარიანი, უფრო მეტად ძლიერი და ფეხს იკიდებს პირველ რიგში, ევროპულ ბაზრებზე “, - აღნიშნა ეკონომიკის მინისტრმა.