ცოტა ხნის წინ პარლამენტარმა აკაკი (აკო) მინაშვილმა, პარლამენტის ტრიბუნიდან განაცხადა, არ მინდა იმ ქვეყანაში ცხოვრება, სადაც კახა თარგამაძე აპირებს დაბრუნებას და ცხოვრებასო... "ყველა სიახლე" დაუკავშირდა მოსკოვში მცხოვრებ ყოფილ შინაგან საქმეთა მინისტრ კახა თარგამაძეს, რომელიც მრავალ საინტერესო და სკანდალურ ფაქტზე გვესაუბრა:
- ბატონო კახა, ცოტა ხნის წინ პარლამენტარმა აკაკი მინაშვილმა განაცხადა, არ მინდა იმ ქვეყანაში ცხოვრება, სადაც კახა თარგამაძემ უნდა იცხოვროსო.
- აკო მინაშვილს გადაეცით, დროზე გაიქცეს საქართველოდან! მინაშვილს ათასი სიბინძურე და დანაშაული აქვს ჩადენილი, ისევე როგორც მის ნაციონალ სიდედრს. შეიძლება აკო სიდედროვიჩ მინაშვილს კახა თარგამაძემ პასუხი გასცეს? ვინ არის აკო მინაშვილი, რა გაუკეთებია ქვეყნისთვის, ბოროტების გარდა? კახა თარგამაძე ხელისუფლებაში და შს მინისტრის პოსტზე ქუჩიდან არ მოსულა. სწორედ ჩემი მინისტრობისას შეძლო ორგანიზებულ დანაშაულთან ბრძოლის დეპარტამენტმა კრიმინალური ბანდებისა და მაფიოზური დაჯგუფებების ალაგმვა საქართველოში. ასე რომ, გამასწროს სიდედრის კარაქიანი პურით გასუქებულმა აკო მინაშვილმა მანდედან, თორემ თავბედს ვაწყევლინებ...
- ბატონო კახა, გავრცელებული ინფორმაციით, 2001 წელს, თქვენი მინისტრობისას, ირაკლი ოქრუაშვილმა, გიორგი არველაძემ და პეტრე ცისკარიშვილმა შუაღამისას პატიმარი გამოიყვანეს საკნიდან და სასტიკად სცემეს. ამ პირების წინააღმდეგ სისხლის სამართლის საქმე არ აღძრულა. რატომ დააფარეთ ხელი დამნაშავეებს?
- დიახ, მათ პატიმარს სასტიკად სცემეს და აიძულებდნენ, შეეცვალა ჩვენება. ის პატიმარი ცისკარიშვილის გატაცების ერთ-ერთი მონაწილე იყო. ამ საქმეს მე კი არა, მიხეილ სააკაშვილი აფარებდა ხელს. მე ანგარიში გავუწიე იმას, რომ შეიძლებოდა ქვეყანაში დაღვრილიყო სისხლი და ამას მოვერიდე. მიხეილ სააკაშვილისთვის უცხო ქვეყნების სპეცსამსახურებს რომ არ დაეჭირა მხარი, მას არაფერს დავუთმობდი. მქონდა და მაქვს ძალიან სერიოზული ინფორმაცია მიხეილ სააკაშვილისა და მისი გუნდის მოღალატური გეგმების და სქემების შესახებ, შემეძლო ეს ყველაფერი ხმამაღლა მეთქვა ჩემი გადადგომის დღეს, მაგრამ შევარდნაძემ ამიკრძალა ამ თემაზე საუბარი. ორი წლის წინ კი თვითონვე განაცხადა, კახა თარგამაძე შს მინისტრის თანამდებობიდან რომ არ გადამდგარიყო, "ნაციონალური მოძრაობა" ვერ მოვიდოდა ხელისუფლებაში, თარგამაძეს წინააღმდეგობა რომ გაეწია, ფიზიკურად გაანადგურებდნენო. მიხეილ სააკაშვილი კი ხელისუფლებაში სახელმწიფო გადატრიალების გზით მოვიდა. 2003 წლის "ვარდების რევოლუცია" იყო სახელმწიფო გადატრიალება შევარდნაძის ძალოვანი უწყების ხელმძღვანელ პირთა მონაწილეობით.
- ბიძინა ივანიშვილს თუ იცნობთ?
- ამ 9 წლის განმავლობაში ჩვენს ქვეყანაში მიმდინარე ყველა პოლიტიკურ პროცესს ვაკვირდებოდი, არ მქონდა იმედი, რომ რომელიმე ოპოზიციური ძალა მიხეილ სააკაშვილს მოერეოდა და ამის შესახებ ლევან გაჩეჩილაძეს ვეუბნებოდი კიდეც. როგორც კი ბიძინა ივანიშვილი გამოჩნდა პოლიტიკაში, ვთქვი, მოვიდა სააკაშვილის აღსასრული-მეთქი. ბატონ ბიძინას არასდროს შევხვედრივარ, მაგრამ ვიცი, რომ ყველაფერს ისე გააკეთებს, როგორც საქართველოს და ქართველ ხალხს წაადგება და ჩემს მონატრებულ ქვეყანას ფეხზე დააყენებს. არჩევნებში "ქართული ოცნების" წარმატება კი ქართველი ხალხის თანადგომამ და ბიძინა ივანიშვილის სახელმა განაპირობა. მიხეილ სააკაშვილის მხარდამჭერმა ამერიკამ კარგად დაინახა 29 სექტემბერს ქუჩაში გამოსული 500 ათასი კაცი, და ზესახელმწიფო იძულებული შეიქნა, ეს რეალობა გაეთვალისწინებინა. ბედნიერი ვარ, რომ ბოლოს და ბოლოს, ქართველებში ღირსებამ გაიღვიძა და დესპოტი, ჯალათი და მოძალადე ხელისუფლება არჩევნების გზით შეცვალა.
- რა დამსახურებისთვის მიანიჭეთ თავის დროზე გენერლის წოდება თამაზ თამაზაშვილს, რომელსაც ყოფილი ხელისუფლება არჩევნებამდე კრიმინალად, ნარკობარონად და "კანონიერ ქურდებთან" დაახლოებულ პირად მოიხსენიებდა?
- თამაზ თამაზაშვილი მებრძოლი და შეუპოვარი ხასიათის გამო დავნიშნე კახეთის მხარის პოლიციის უფროსად. მან შეძლო კახეთი კრიმინალებისგან გაეწმინდა და დამსახურებულად მიიღო გენერლის წოდება. სააკაშვილი და ნაციონალები მას სიძის, ირაკლი ღარიბაშვილის გამო გადაემტერნენ, თანაც, თამაზაშვილმა იცოდა, როგორ ყიდდა ნარკოტიკებს მიხეილ სააკაშვილის ხელისუფლება და ესეც ერთ-ერთი მიზეზი იყო თამაზაშვილის დაპატიმრების.
- როგორც შინაგან საქმეთა ყოფილი მინისტრი, რას ურჩევდით ახალ მინისტრ ირაკლი ღარიბაშვილს?
- პირველ რიგში, ვულოცავ და წარმატებებს ვუსურვებ! შემიძლია ამ ახალგაზრდა კაცს ვურჩიო, რომ არ აჰყვეს მიხეილ სააკაშვილისა და მისი გუნდის პროვოკაციებს. ვიცი, რომ ირაკლი ღარიბაშვილი ყველა იმ პროფესიონალს გამოიყენებს, რომლებიც მუშაობდნენ შევარდნაძის და სააკაშვილის ხელისუფლებაშიც. პირველ რიგში, მან უნდა გააძლიეროს ოპერატიული სამსახური, შემოიკრიბოს ერთგული და პროფესიონალი კადრები და ერთიანი ძალით ამოძირკვონ საქართველოში ნაციონალური რეჟიმი.
- წინა ხელისუფლების წარმომადგენლებმა განაცხადეს, რომ შს მინისტრის მოადგილე ალეკო ტაბატაძე კრიმინალია და ნარკოტრაფინგში არის შემჩნეული...
- კრიმინალები და ნარკომანები თვითონ ეგენი არიან. სააკაშვილს პოლიტიკაში გამოჩენის პირველივე დღიდან ვებრძოდი, ვიცოდი, ეს კაცი იმიტომ იყო მოსული პოლიტიკაში, რომ გაენადგურებინა საქართველო, გაესხვისებინა ტერიტორიები და ქართველები მორალურად გაეტეხა. ჩვენი ბრალია, რომ მას მივეცით საშუალება, თავისი გეგმის ლამის 90 პროცენტი შეესრულებინა...
- ეს სერიოზული ბრალდებაა...
- რომელ ბრალდებაზე მელაპარაკებით? სააკაშვილი რომ ამბობს, ადრე გაცილებით უარესი კრიმინოგენური მდგომარეობა იყოო, ბლეფია. გადავხედოთ სტატისტიკას და ვნახოთ, რა მდგომარეობა იყო ამ მხრივ 2003 წლამდე და როგორია მას შემდეგ: მკვლელობებისა და მძიმე დანაშაულის რიცხვი გაზრდილია მკვეთრად: პატიმრების რაოდენობა იმხანად იყო 6 ათასი, ახლა არის 4-ჯერ მეტი. წლების წინ პატიმრების რიცხვმა 6 300-ს რომ მიაღწია, შევარდნაძეს ამნისტია გამოვაცხადებინეთ. კომუნისტების მმართველობის პერიოდში, როცა საქართველოში 5,5 მილიონი კაცი ცხოვრობდა, ამის მესამედი პატიმარიც კი არ გვყავდა. მიხეილ სააკაშვილის გაკეთებული სტატისტიკა ისეთივე ბლეფია, როგორც თვითონ მიშაა ბლეფი. 100 ათას კაცზე პატიმრების რაოდენობით ევროპაში ყველა ქვეყანას გავუსწარით და ასეთი კაცი დემოკრატიაზე ლაპარაკობს და ალეკო ტაბატაძეს, უწესიერეს კაცს ლანძღავს? სააკაშვილის გუნდი იმიტომ დაუპირისპირდა ტაბატაძეს, რომ არ სურთ, შსს-ში პროფესიონალები მოხვდნენ. ცოტა ხნის წინ ოპერატიული მუშაკები ადამიანებს ყოველგვარი მტკიცებულების გარეშე აპატიმრებდნენ. დღეს კი ამას ვერავინ გაბედავს. ადამიანს რომ დაიჭერ, უნდა დაუმტკიცო დანაშაული, დანაშაულის დამტკიცებას კი პროფესიონალები სჭირდება. მიხეილ სააკაშვილმა შსს-ს სახით შექმნა გესტაპო, რომელიც ქართველი ერის წინააღმდეგ იბრძოდა. მიხეილ სააკაშვილის ხელისუფლებამ 300 ათასი მამაკაცი გაატარა ციხეში 9 წლის განმავლობაში. ამის დოკუმენტი მაქვს. ეს არის საქართველოს მამაკაცთა 42 პროცენტი. იცით, ეს რას ნიშნავს? - ამით ქართული გენოფონდი გაანადგურეს. არსებობდა გეგმა, რის მიხედვითაც ქართული გენოფონდი უნდა განადგურებულიყო და საქართველოში უნდა ეცხოვრა 700 ათას კაცს. ჩამოსახლებული უცხოტომელები კი, ცხადია, მიხეილ სააკაშვილს მისცემდნენ ხმას. 2000 წელს ვიცოდი ეს ყველაფერი და ისიც, რომ ეს გეგმა მიხეილ სააკაშვილს უნდა განეხორციელებინა. ეს ყველაფერი დოკუმენტურად, ქაღალდზე მაქვს ნანახი. მე მოვახერხე და მოვიპოვე ეს დოკუმენტი...
- ქართული გენოფონდის განადგურების გეგმის შესახებ ინფორმაცია თქვენ გარდა კიდევ თუ ჰქონდა ვინმეს?
- დიახ, ეს დოკუმენტი ექსპრეზიდენტ ედუარდ შევარდნაძეს აქვს. მიხეილ სააკაშვილმა თავის ბანდიტურ ჯგუფთან ერთად პასუხი უნდა აგოს ქართველი ხალხის გენოციდისთვის და კანონის მთელი სიმკაცრით დაისაჯოს.
- ბატონო კახა, ნაციონალები ამბობენ, რომ იმხანად, როცა თქვენ შს მინისტრი იყავით, ადამიანები ფანჯრებიდან ცვიოდნენ...
- ამას ამბობდა მიხეილ სააკაშვილი დაქირავებულ ჟურნალისტებთან ერთად, ვისაც მიხეილ სააკაშვილი ჩემი საწინააღმდეგო სტატიების გამოქვეყნებაში წლების განმავლობაში ოფიციალურად უხდიდა ხელფასს... ასეთი რამ მოხდა შოთა კვირაიას მინისტრობისას - ფანჯრიდან გადახტა პატიმარი. ჩემი მინისტრობისას კი ქალაქის სამმართველოს ფანჯრიდან გადახტა ადამიანი გაქცევის მიზნით. ამის გამო რამდენიმე პოლიციელი მივეცი პასუხისგებაში. ეს იყო და ეს. თქვას მიშამ, თუ რამე იცის ამ "ჩამოცვენილ" ხალხზე. გვარებს რატომ არ ასახელებს? როგორ ფიქრობთ, ფაქტები რომ ჰქონოდა, არ გამოიყენებდა? მიშა მკვლელ პოლიციელებს აწინაურებდა, კახა თარგამაძე კი პოლიციელებს დაუდევრობის გამო აპატიმრებდა...
- მერაბ ჟორდანიამ საფეხბურთო კლუბ "თბილისის დინამოს" წილის დაბრუნების სურვილი გამოთქვა და ისიც აღნიშნა, რომ მას კუთვნილი ქონება უკანონოდ წაართვით...
- მერაბ ჟორდანია ევროპის საფეხბურთო ჩემპიონატის ფინალური მატჩის დღეს კიევში შემხვდა. ისე გაუხარდა, ლამის ხელები დამიკოცნა და ასეთი რამ თუ აწუხებდა, ერთი სიტყვა მაინც ხომ უნდა ეთქვა? მერაბ ჟორდანია ორჯერ ჰყავდა დაკავებული სააკაშვილს და ორჯერვე ფული წაართვა, გვარიანად გაფცქვნა. ჟორდანიამ ის წართმეული მილიონები მოსთხოვოს მიშას, იმას ნუკი ითხოვს, რაც არასდროს ყოფილა მისი. მაგას, იცით, რა დაემართება? ერთი ქართული ანდაზისა არ იყოს: თაგვმა თხარა, თხარაო, კატა გამოთხარაო! ორჯერ ხომ დაიჭირა მიხეილ სააკაშვილმა, ახლა იმდენს იზამს ბატონი მერაბი, მესამედაც დააჭერინებს თავს, ოღონდ ახლა ახალ ხელისუფლებას. რაც შეეხება "დინამოს", ყველა დოკუმენტი აქვს ჩემს ერთ-ერთ მოადგილეს და დარწმუნებული ვარ, თქვენს გაზეთს მიაწვდის.
- თქვენ რუსეთის მოქალაქე ხართ, რამ გაიძულათ ამ ნაბიჯის გადადგმა?
- ეს მაიძულა ჩემმა სინდისმა. მიხეილ სააკაშვილი შიშობდა, რომ მე მექნებოდა პოლიტიკაში ჩართვის პრეტენზია. წამომიყენეს ასეთი მოთხოვნა: თუ არ გექნება საქართველოს მოქალაქეობა, მიშა დარწმუნდება, რომ კონტრრევოლუციას არ მოაწყობ და პოლიტიკურ ასპარეზზე არ გამოჩნდებიო. წინააღმდეგ შემთხვევაში, ყველა ჩემს მოადგილეს და დაახლოებულ პირს დაიჭერდნენ. მართლაც დაიწყეს ჩემი ახლო ნათესავების, სამეგობრო წრის და ჩემი მოადგილეების დევნა. საქართველოს მოქალაქეობა იმიტომ დავთმე, რომ მეგობრები, ნათესავები და ჩემი მოადგილეები მიხეილ სააკაშვილის ტერორისგან გადამერჩინა. 2013 წლის 5 იანვრის შემდეგ, როცა მიხეილ სააკაშვილის ბუნდღა არ იქნება პრეზიდენტის პოსტზე, ჩამოვალ და ჩემს მონატრებულ ქართველებს ჩავეხუტები. ჩემი ქვეყნისთვის ცუდი არაფერი გამიკეთებია, გარდა იმისა, რომ ვებრძოდი სააკაშვილს და მის ბანდიტურ დაჯგუფებას. მე აუცილებლად დავიბრუნებ საქართველოს მოქალაქეობას, პრეტენზია არა მაქვს რაიმე თანამდებობაზე, აღარც ასაკი მიწყობს ხელს. მიხეილ სააკაშვილმა 46 წლისა გამიშვა პენსიაზე და ახლა 57 წლის ვარ!
- არ გაქვთ სურვილი, მიხეილ სააკაშვილს შეხვდეთ?
- როცა მე საქართველოში ჩამოვალ, მიხეილ სააკაშვილი უკვე აღარ იქნება პრეზიდენტი და ვიცი, სადაც შევხვდები (იცინის).
- სად შეხვდებით?
- მიხეილ საკაშვილი ავტორია იმ რეჟიმისა, რომელიც მძინვარებდა საქართველოში და რომლის შედეგადაც ათასობით ადამიანი, დატანჯული და დაჩაჩანაკებული, გაჭირვებისგან გმინავდა. მიხეილ სააკაშვილი ციხეში უნდა ჩაჯდეს. მე სააკაშვილს საკანში მოვინახულებ!
