სამშენებლო სექტორსა და ეროვნულ ბანკს შორის კამათი არ წყდება. ორივე მხარე მუდმივად თავისი პოზიციის დაცვითაა დაკავებული. საქმეში უკვე მთავრობის წევრებიც ჩაერთვნენ.

ფინანსთა მინისტრობის კანდიდატის ივანე მაჭავარიანის აზრით, სამშენებლო სექტორში კლება მხოლოდ საბანკო რეგულაციებით არ იყო გამოწვეული. მისი აზრით, სამშენებლო სექტორში ე.წ „გაფუჭებული სესხების“ პროცენტული მაჩვენებელი იმდენად მცირე იყო, რომ განსაკუთრებულ დარეგულირებას არ საჭიროებდა, რაც საბოლოოდ ეროვნულმა ბანკმაც გაიზიარა. გარდა ამისა, ბოლო ორი თვეა, რაც სამშენებლო სექტორში არის სოლიდური ზრდა და მშპ-ს მატების ერთ-ერთი მნიშვნელოვანი კომპონენტი სწორედ სამშენებლო სექტორს უჭირავს.

„იყო შეხვედრა დეველოპერებთან, ბანკებთან და ამ სფეროში მოხდა „შერბილება“. იპოთეკური სესხები ამ ეტაპზე დაახლოებით 25%-ით იზრდება. სამშენებლო სექტორში 16- თვიანი კლების შემდეგ, ვხედავთ ზრდას“, - განაცხადა მაჭავარიანმა.

იგივე მოსაზრება დააფიქსირა ორიოდე დღის წინ ეროვნული ბანკის პრეზიდენტმა კობა გვენეტაძემაც. მთავარი ბანკირი თვლის, რომ რეგულაციამ ქვეყანაში დეველოპერული დარგი გააჯანსაღა.

„სამშენებლო სექტორი, ბოლო ეკონომიკურ ზრდაში, ერთ-ერთი ყველაზე მნიშნელოვანი კონტრიბუტორი იყო, რაც არ ეთანხმება მოსაზრებას, თითქოს ამ რეგულაციამ ეს სექტორი დააზიანა. პირიქით, ამ რეგულაციამ ეს სექტორი გააჯანსაღა. ზრდა არის საკმაოდ კარგი და მისი კონტრიბუციაც ეკონომიკურ ზრდაში გრძელდება“, - აცხადებს ეროვნული ბანკის პრეზიდენტი.

მისივე თქმით, ხშირად არის ხოლმე საუბრები იმასთან დაკავშირებით, თუ როგორ აისახება ეს წესი სამშენებლო სექტორზე, რაც გვენეტაძის შეფასებით, აბსოლუტურად უსაფუძვლოა.

„თუ შევხედავთ საცალო პროდუქტებს, წლიური ზრდა იყო საკმაოდ კარგი, პორტფელის ზრდის მთავარი მამოძრავებელი იყო იპოთეკური სესხები. წლიური ზრდა იყო 24,4%, რაც საკმაოდ კარგი მაჩვენებელია. ლარშია საკმაოდ კარგი ზრდა, რაც ასევე მოწყვლადობას ამცირებს“, - აცხადებს კობა გვენეტაძე.

სამშენებლო კომპანიების წარმომადგენლები კი აცხადებენ, რომ იანვრიდან ამოქმედებულმა რეგულაციამ, რომელმაც გაართულა სესხის აღება, მკვეთრად შეამცირა გაყიდვები, მენაშენეთა ასოციაციის ხელმძღვანელი ირაკლი როსტომაშვილი სებ-ის პრეზიდენტის მოსაზრებას არ ეთანხმება და ამბობს, რომ რეგულაციების გარეშე სექტორი უფრო უკეთ იქნებოდა.

„რეგულაციები შემდგომ შედარებით შეამსუბუქეს, თუმცა რეგულაციებით სამშენებლო სექტორს უზარმაზარი ზარალი მიაყენეს. რაც ლარის კურსთან დაკავშირებით ხდება, სწორედ ეს არის იმის კარგი სურათი, ეროვნული ბანკი როგორ მუშაობს. მე არქიტექტორი და მშენებელი ვარ, ვუყურებ შედეგს, ხოლო ჩემთვის შედეგი არის ცუდი და საერთოდ რომ არაფერი გაეკეთებინათ, უკეთესი იქნებოდა.

სებ-ში მაშინაც ვერ გამცეს პასუხი რეგულაცია რატომ შემოიღეს, ამ სექტორში რა პრობლემა იყო? რეგულაცია რომ შემოგაქვს ხომ გინდა რაღაც გამოასწორო? მოქალაქეების 99.9% ვინც სესხს იღებდა, მას ემსახურებოდა კიდეც. არ იყო პრობლემა და რატომ შემოიღეს? მგონია, რომ ეროვნული ბანკი ცუდად მუშაობს“, - განაცხადა როსტომაშვილმა.

რეგულაციები მშენებელთათვის 2019 წლის 1-ლი იანვრიდან ამოქმედდა, რამაც ფიზიკურ პირებზე საფინანსო ორგანიზაციების მხრიდან სესხის გაცემის პროცესი გაართულა. როგორც დეველოპერები და მშენებლები განმარტავენ, სესხის აღების წესის გამკაცრებამ სამშენებლო სექტორზე უარყოფითი გავლენა იქონია და გაყიდვები შეუმცირა.