იანვრიდან მოყოლებული ქვეყნის მაშტაბით და განსაკუთრებით დედაქალაქში ბინები ყიდვა-გაყიდება ძალიან გართულდა. მიზეზი ახალი საბანკო რეგულაციებია. ამ მხრივ პრობლემა აქვთ ემიგრანტებსაც, რომლებიც შემოსავალი აქვთ, მაგრამ რამდენადაც მას ვერ ადასტურებენ, სესხი არ უმტკიცდებათ, ერთიანი თანხა კი უძრავი ქონების შესაძენად არავის აქვს.

მშენებელთა ნაწილი ვარაუდობს, რომ ბინების გაძვირება შექმნილი სიტუაციის გამო უახლოეს 2-3 წელიწადში წარმოუდგენელია. არათუ ახალ აშენებულ ბინებზე, მოთხვონა და ფასი შემცირებულია ძველ სახლებსა და კორპუსში მდებარე საცხოვრებელ ფართზეც. რამდენადაც რეალიზაციამ საგრძნობლად იკლო, უძრავი ქონების მფლობელები გაძვირებისგან თავს ყველანაირად იკავებენ, თუმცა იმასაც ცდილობენ ფასი როგორმე შეინარჩუნონ.

უძრავი ქონების სააგენტოს წარმომადგენლები საუბრისას აცხადებენ, რომ ხშირად ახალი აშენებული ბინის ფასსა და ძველი ბინის ღირებულებას შორის განსხვავება მინიმალურია, რაც მყიდველში ინტერესს აღარ იწვევს.

უძრავი ქონების პორტალ SS.ge-დან გამოთხოვილი ინფორმაციის თანახმად, ძველი აშენებული ბინების ფასი ზოგიერთ უბანში შემცირებულია.

მაგალითად, დიდუბე-ჩუღურეთის რაიონში ძველი (მეორადი) ბინის ფასი (1 კვადრატული მეტრი) დაახლოებით 350 დოლარიდან იწყება მაშინ, როდესაც რამდენიმე თვის წინ 400 დოლარი იყო.

ისანი-სამგორში კვადრატული მეტრის ფასი 350 დოლარიდან იწყება მაშინ, როდესაც მინიმალური ფასი 400 დოლარი იყო. გლდანი-ნაძალადევის რაიონში კი 1 კვადრატულის ფასი 500 დოლარიდან იწყება. 500 დოლარიდანაა ბინის ფასი ძველ თბილისში, ხოლო ყველაზე ძვირი ფასი ვაკე-საბურთალოს რაიონშია, სადაც ბინის ფასი 550 დოლარიდან იწყება, მაშინ როდესაც რამდენიმე თვის წინ მინიმალური თანხა 600 დოლარი იყო.

აღნიშნული ფასი საბოლოო არ არის და ხშირად მყიდველსა და მეპატრონეს შორის ხდება ფასის დაკლება. გარდა ამისა, ხშირია განცხადება, სადაც წერია, რომ ფასი საბოლოო არაა და შეიძლება შეთანხმება. ამიტომ რთულია ბინის მინიმალური ფასი დაადგინო.

როგორც უძრავი ქონების სააგენტო „კიბეს“ დირექტორი ნელი გოგუაძე „ბიზნესპრესნიუსთან“ ადასტურებს, მეორადი ბინების გაყიდვა შემცირებულია.

„მეორადი ბინა თითქმის ყველა შემთხვევაში სარემონტოა, გარემონტებული კი იშვიათად არის და ის ახალაშენებული თეთრი კარკასის ფასს უტოლდება. მოთხოვნა შემცირდა, ხოლო ფასები იგივე დარჩა, რაც საბანკო რეგულაციამდე იყო. ამიტომ მისდამი ინტერესი თანდათან ქრება“, - ამბობს გოგუაძე.

უძრავი ქონების სააგენტოების მფლოებელები ადასტურებენ, რომ მოთხოვნის კლებამ ფასი დააბალანსა და ეს ვითარება შესაძლოა, გარკვეული პერიოდის განმავლობაში შენარჩუნდეს. ბინები, რომლებიც ახალი რეგულაციების შესაბამისად არის აშენებული, ცხადია, უფრო ძვირი უნდა ღირდეს, მაგრამ დეველოპერები მაქსიმალურად ცდილობენ არსებული ფასის შენარჩუნებას. სხვანაირად გაყიდვა გაუჭირდებათ.

„ისედაც არის პრობლემა, რეალიზაცია საგრძნობლად შემცირდა. ალბათ, დროთა განმავლობაში ბინები გაძვირდება, განსაკუთრებით, როცა მიწოდების მხრივ შეიქმნება პრობლემა, მაგრამ მსგავსი ტენდენცია ჯერჯერობით ვერ გამოიკვეთება. გაძვირებას რა აზრი აქვს, თუკი მყიდველი არ არის, ამან უფრო დააბალანსა ფასი, მაგრამ ბაზარს მაინც ჰყავს უფრო გადახდისუნარიანი კლიენტი, რაც ბანკისთვისაც მისაღებია და რისკიც ნაკლებია“, - აღნიშნა გოგუაძემ.