ამ რამდენიმე დღის წინ "ერთიანი ნაციონალური მოძრაობის" პრესსპიკერად ჩიორა თაქთაქიშვილი პარლამენტის ვიცე-სპიკერმა მიხეილ მაჭავარიანმა წარადგინა და თანაც ქალაბატონ ჩიორას 2008-2012 წლების მოწვევის პარლამენტის აღმოჩენა უწოდა. აღმოჩენისა არაფერი ვიცი, მაგრამ ქალბატონი თაქთაქიშვილი ამ წლების განმავლობაში დიდი ენაწყლიანობით მაინცდამაინც არ გამოირჩეოდა. შესაბამისად, გვარიანად გასაკვირი იყო მისი პრესსპიკერობა.
ამ ბოლო დღეების განმავლობაში კარგად ვნახეთ, რომ რამდენიმე ტექსტი, განსაკუთრებით მთავარი პოლიტიკური ოპონენტის მისამართით, კარგად დაუზეპირებია და ხშირ-ხშირადაც იმეორებს, მაგრამ ჟურნალისტებთან ურთიერთობას, როგორც ჩანს, მაინც გაურბის. პრესსპიკერად წარდგენისას განაცხადა, მედია ჩვენი პარტიის საქმიანობის შესახებ ყველაფერს წვრილად შეიტყობსო, მაგრამ მასთან ორდღიანი უშედეგო რეკვის და მოკლე ტექსტური შეტყობინებების წერის შემდეგ მივხვდით, რომ ჩიორამაც მოგვატყუა, გაპრემიერმინისტრებული ვანო მერაბიშვილისა არ იყოს, რომელიც ქართველ ჟურნალისტებს კი დაგვპირდა, მარტო რუს ჟურნალისტებს აღარ ვაძლევ ინტერვიუს და თქვენს კითხვებსაც ვუპასუხებო, მაგრამ ჯერჯერობით მაინც ბოდიშის მოუხდელად გვაქცევს ზურგს. როგორც ჩანს, გვარიანად შეცდა "ნაციონალური მოძრაობა" ჩიორას პრესსპიკერად დანიშვნით, არ აპირებს ეს ქალბატონი ჟურნალისტებთან ურთიერთობას, არადა, ყველა წესით და კანონით მეტი არც არაფერი ევალება.
