ამერიკელებს უნდა ესმოდეთ, რომ საქართველო მნიშვნელოვანია, - ამის შესახებ „ინტერპრესნიუსთან“ კომენტარში ამერიკის შეერთებული შტატების ყოფილმა სახელმწიფო მდივანმა, ეროვნულ-დემოკრატიული ინსტიტუტის (NDI) თავმჯდომარე მადლენ ოლბრაიტმა განაცხადა.
ამასთან, როგორც თბილისში ვიზიტით მყოფმა ოლბრაიტმა სააგენტოს განუცხადა, იმედი აქვს, რომ ქართველებიც ხვდებიან, რაოდენ მნიშვნელოვანია ამერიკასთან ურთიერთობები.
„ჩვენ კარგი ურთიერთობები გვაქვს. ვფიქრობ, ეს მნიშვნელოვანი ურთიერთობებია. ამერიკელებს უნდა ესმოდეთ, რომ საქართველო მნიშვნელოვანია. იმედი მაქვს, რომ ქართველებიც ხვდებიან, თუ რაოდენ მნიშვნელოვანია ეს ურთიერთობები. რაც შეეხება ახალი ადმინისტრაციის პოლიტიკას, უნდა აღვნიშნო, რომ ის საკანონმდებლო აქტი, რომლითაც საქართველოს მხარდაჭერა მოხდა, კონგრესიდან წამოვიდა. კონგრესმა გამოყო ფული. საქართველოს ბევრი მხარდაჭერი ჰყავს კონგრესში და მე მათ ამაში მხარს ვუჭერ. რუსეთის საფრთხის ფონზე ქართველებს გააზრებული უნდა ჰქონდეთ თავიანთი ეროვნული ინტერესები და საქართველოს მნიშვნელობა თავისი ხალხისთვის“, - განაცხადა მადლენ ოლბრაიტმა.
