– ჩვენთან პიარი ხანდახან, სამწუხაროდ, ნეგატიურად ითვლება. არადა, პიარი საზოგადოებასთან ეფექტური ურთიერთობაა და პოლიტიკოსი ვალდებულიცაა, რომ პიარი “ჰქონდეს”, რადგან ხალხთან ეფექტური კომუნიკაციის გარეშე პოლიტიკური პარტიის არსებობა წარმოუდგენელია. ადრე პიარი საჭირო არ იყო, რადგან ადამიანები თანამდებობებზე ინიშნებოდნენ. დღეს კი, პოლიტიკოსი განყენებულად, ანუ პიარის გარეშე არ არსებობს.

მაშასადამე, პიარი ერთგვარად დემოკრატიის პირმშოა?
– დიახ, ასე გამოდის.

ბატონო სოსო, რა ამის პასუხია და, საქართველოში ყველაზე ეფექტური პიარი რომელ პოლიტიკურ ორგანიზაციას აქვს?
– პოლიტიკურ ასპარეზზე ,,ქართული ოცნების” გამოჩენამდე, ამ კუთხით, რასაკვირველია “ნაციონალური მოძრაობა” ლიდერობდა და პიარშიც ყველაზე უკეთ ერკვეოდა. სწორედ ამით აიხსნება, რომ მმართველი გუნდი სხვადასხვა რეიტინგში ლიდერობს. პიარ-კამპანიების დროს “ნაციონალები” აქცენტს იმ პროექტებზე აკეთებენ, რომლებიც განახორციელეს, ან რის გაკეთებასაც მომავალში აპირებენ.

პიარის ინსტრუმენტებს სხვა პარტიებიც იყენებენ, თუმცა გარკვეული პერიოდის განმავლობაში, მათ პიარის მთელი არსენალის გამოყენების საშუალება არ ჰქონდათ იმიტომ, რომ პიარ-ტექნოლოგიების ამუშავებას არცთუ ცოტა ფინანსები სჭირდება... „ქართული ოცნების” გამოჩენის შემდეგ, ამ მხრივ კონკურენცია მხოლოდ ქვეყნის შიგნით, პარტიებს შორის კი არა, ქვეყნის გარეთაც შეიცვალა და უცხოური ლობისტი კომპანიების დაქირავება ამ კონკურენციის ნაწილია – პოლიტიკაში ბიძინა ივანიშვილის გამოჩენამდე აშშ-ის კონგრესში ლობისტები მხოლოდ სახელისუფლებო პარტიას ჰყავდა. ახლა კი, ლობისტები ,,ქართულ ოცნებასაც” ჰყავს, რაც იმას ნიშნავს, რომ “ქართული ოცნებისა” და “ნაცმოძრაობის” კონკურენცია აშშ-ის კონგრესის კულუარებში მიმდინარეობს.

27 მაისს “ქართული ოცნება” “თავისუფლების მოედანზე” მრავალათასიანი მიტინგის გამართვას გეგმავს. არის თუ არა ეს საარჩევნოპიარ-კამპანიის ნაწილი?
– ნებისმიერი აქცია თუ გამოსვლა, გარკვეულწილად, პიარია და 27 მაისს დაგეგმილი “ქართული ოცნების” მიტინგიც, რასაკვირველია, საზოგადოებასთან ურთიერთობის ხერხი და წინასაარჩევნო მოძრაობის დასაწყისია, ანუ ამ ნაბიჯით “ქართული ოცნება” შეეცდება, თავის მომხრეებში გარკვეული მუხტი შეიტანოს და მათი კონსოლიდაცია მოახდინოს.

“ნაცმოძრაობისა” და “ქართული ოცნების” გარდა, სხვა პარტიების პიარ-სტრატეგიაზე რას იტყვით?
– ძირითადად, “ლეიბორისტები”, “ახალი მემარჯვენეები” და “ქრისტიან-დემოკრატები” აქტიურობენ, თუმცა ის სტრატეგია, რომელიც ამ პარტიებს აქვთ არჩეული, ცოტა ბუნდოვანი, გაუგებარი და, შეიძლება ითქვას, არასისტემურია. ამ პარტიებმა ახალ პოლიტიკურ რეალობაში თავიანთი ნიშა ჯერ ვერ იპოვეს და ის პიარ-კამპანია, რომელსაც ეწევიან, დამარცხებისთვისაა განწირული.

სოციოლოგიური კვლევები არის თუ არა პიარ-ტექნოლოგიების შემადგენელი ნაწილი? 
– სოციალური კვლევები მხოლოდ პიარის კი არა, პროპაგანდის ძალიან კარგი საშუალებაა. ამიტომ, სოციალური კვლევის შედეგები ყველა პარტიამ აქტიურად უნდა გამოიყენოს. სხვა თუ არაფერი, ეს შედეგები პარტიის მომხრეებს ამხნევებს. ამასთან, მერყევ ელექტორატზეც, ანუ იმ ადამიანებზე, ვისაც გადაწყვეტილება ჯერ არ მიუღიათ, კარგად მუშაობს.

ბატონო სოსო, შეგიძლიათ, დამისახელოთ პოლიტიკოსი, რომელიც არასწორმა პიარმა ,,ჩაიძირა”?
– პოლიტიკური ავანსცენიდან გასვლა კონკრეტულ პიარ-შეცდომაზე არაა დამოკიდებული. ყოველ შემთხვევაში, ამ საკითხს უფრო კომპლექსურად განვიხილავ...

გარეგნობა, როგორც ვიცი, პიარის ერთ-ერთი მნიშვნელოვანი ნაწილია. სხვათა შორის, პარლამენტის ე.წ. შინაგანაწესში შედისცვლილება, რომლის მიხედვითაც, დეპუტატის ჩაცმულობა გარკვეულ ჩარჩოებში უნდა ჯდებოდეს.. 
– პოლიტიკოსისთვის ჩაცმა ძალიან მნიშვნელოვანი ატრიბუტია. პარლამენტსა და ოფიციალურ შეხვედრებზე პოლიტიკური მოღვაწის ჩაცმა მკაცრ ნორმებს უნდა ექვემდებარებოდეს. აქციებზე კი, პოლიტიკოსი თავისი ჩაცმით ხალხისგან არ უნდა გამოირჩეოდეს.

ბოლოს, ბატონო სოსო, საქართველოსა და მსოფლიოში პიარის ელემენტებს, თქვენი აზრით, ყველაზე კარგად რომელი პოლიტიკოსიიყენებს?
– საქართველოში ასეთი ძალიან ბევრია. ამიტომ, კონკრეტულად არავის დავასახელებ. რაც შეეხება მსოფლიოს, პიარის კლასიკური პროდუქტი ბარაკ ობამაა.