პარლამენტის თავმჯდომარე დავით უსუფაშვილი ყველა დაინტერესებულ მხარეს მოუწოდებს, აქტიური მონაწილეობა მიიღონ შინაგან საქმეთა სამინისტროს რეფორმასთან დაკავშირებით პარლამენტში წარდგენილი საკანონმდებლო პაკეტის განხილვაში.
როგორც უსუფაშვილმა ბიუროს სხდომაზე განაცხადა, ხორციელდება სამართალდამცავი სისტემის ძალიან მნიშვნელოვანი რეფორმა და მზად არიან, ყველა დასაბუთებული მოსაზრება გაიზიარონ.
"მივმართავ ყველას, ვისაც აღნიშნული საკითხი აინტერსებს, აქტიური მონაწილეობა მიიღონ პროექტის განხილვაში, ვინაიდან პირველი მოსმენისას ავტორებმა ბევრი მოსაზრება გაიზიარეს. მეორე მოსმენით საკითხის განხილვა კომიტეტში ამ კვირას არის დაგეგმილი. მინდა ყველას მივმართო, ვისაც თემის მიმართ აქვს ინტერესი, აქტიური მონაწილეობა მიიღონ განხილვის პროცესში. მხოლოდ ზოგადი განცხადებებით ნუ შემოვიფარგლებით – კარგია თუ ცუდი წარმოდგენილი პროექტი. ხდება სამართალდამცავი სისტემის ძალიან მნიშველოვანი რეფორმა და დაინტერესებული ვართ, გავიზიაროთ ყველა დასაბუთებული მოსაზრება. პარლამენტში კანონპროექტები იმიტომ განიხილება, რომ განხილვის პროცესში დავხვეწოთ ყველა საკითხი, რომელზეც დასაბუთებული მოსაზრება გამოითქმევა", - განაცხადა უსუფაშვილმა.
შსს-ს რეფორმირებასთან დაკავშირებული ცვლილებები პარლამენტმა გასულ კვირას პირველი მოსმენით მიიღო.
