უზენაესი სასამართლოს თავმჯდომარეობის კანდიდატის საკითხზე მმართველი გუნდის პრეზიდენტთან შეხვედრის თარიღი კვლავ უცნობია.
როგორც "ინტერპრესნიუსს" საპარლამენტო უმრავლესობის ერთ-ერთმა ლიდერმა, ეკა ბესელიამ განუცხადა, აღნიშნულ საკითხზე პრეზიდენტთან შეხვედრის დრო და თარიღი გარკვეული არ არის. თუმცა, მისივე თქმით, მიზანშეწონილია კონსულტაციები რაც შეიძლება მალე დაიწყოს. ბესელიას განცხადებით, პირველი შეხვედრა უნდა დაეთმოს არა კონკრეტული კანდიდატურების განხილვას, არამედ მათი შერჩევის კრიტერიუმებს.
"პირველი შეხვედრისას კორექტული და მართებული იქნება არა პირდაპირ კანდიდატურების განხილვა, არამედ მთავარი თემა უნდა იყოს, თუ რა წესით და რა კრიტერიუმებით მოხდება შერჩევა. როდესაც საუბრობენ იმის თაობაზე, რომ უზენაესი სასამართლოს თავმჯდომარეობის კანდიდატის წარდგენა პრეზიდენტის პრეროგატივაა და ის არის უფლებამოსილი კანდიდატი დაასახელოს, მინდა ყველას შევახსენო, რომ გადაწყვეტილებას იღებს პარლამენტი და სწორედ პარლამენტი იღებს პასუხისმგებლობას, როდესაც წარმოდგენილ კანდიდატურას მისცემს ხმას. ამიტომ აუცილებელია პრეზიდენტთან წინასწარი კონსულტაცია და შეთანხმება", - აცხადებს ეკა ბესელია.
დეპუტატის თქმით, ევროპის ბევრ ქვეყანაში ასეთი ტიპის გადაწყვეტილებები მიიღება პოლიტიკური კონსესუსის შედეგად.
უზენაესი სასამართლოს თავმჯდომარის პოსტზე კონსტანტინე კუბლაშვილს უფლებამოსილების ვადა თებერვალში ეწურება.
