უკრაინაში ე.წ. "გაი"-ს რეფორმა დაიწყო. დაწყებულია საპატრულო სამსახურში თანამშრომელთა მიღება, რომლებიც სწორედ, აღნიშნულ ავტოინსპექტორებს შეცვლიან. თავდაპირველად, შსს-ს რეფორმირება კიევის მასშტაბით განხორციელდება, შემდეგ კი - მთელ ქვეყანაში. "ლიგა.ნეტ"-ის ინფორმაციით, ამის შესახებ დღევანდელ პრესკონფერენციაზე უკრაინის შს მინისტრის მოადგილემ, ეკატერინე ზღულაძემ განაცხადა.
მისივე თქმით, "გაი"-ს ამჟამინდელი ყველა თანამშრომელი სამსახურს დატოვებს. "ჩვენ ვასრულებთ სამუშაოს, რომელიც უკვე დღეს შეცვლის კიევში წესრიგს. ამისთვის ვეძებთ მამაკაცებსა და ქალებს. უფრო ქალებს, თუ შეიძლება", - აღნიშნა დღეს ზღულაძემ.
პატრულის კანდიდატები უნდა იყვნენ 21-35 წლამდე სრული საშუალო, ან უმაღლესი განათლებით, უნდა ჰქონდეთ მართვის მოწმობა და არ უნდა იყვნენ ნასამართლევი.
პატრულის თანამშრომლის საშუალო ხელფასი 6-დან 8 ათას გრივნამდე იქნება. განაცხადების მიღება 6 თებერვლიდან იწარმოებს, სამთვიან კურსებზე სწავლა კი მარტიდან დაიწყება.
