ფარული მოსმენების გასაღების თემაზე დებატები ხვალ პარლამენტის პლენარულ სხდომაზე გადაინაცვლებს. პარლამენტს ორი საკანონმდებლო პაკეტი წარედგინება. დეპუტატები განიხილავენ და კენჭს უყრიან როგორც ბესელია-ფოფხაძე-სესიაშვილის პროექტს, ასევე ვახტანგ ხმალაძის საკანონმდებლო ინიციატივას. კენჭისყრის შედეგად გაირკვევა, რომელ ვარიანტს დაამტკიცებს საბოლოოდ პარლამენტი.
აღნიშნული კანონპროექტების მისაღებად საჭიროა დამსწრეთა უმრავლესობის ხმები. არსებული ინფორმაციით, საპარლამენტო უმრავლესობის უმეტესობა ხმის მიცემას ბესელია-ფოფხაძე-სესიაშვილის პროექტისათვის აპირებს, რომლის მიხედვითაც გასაღები რჩება შინაგან საქმეთა სამინისტროს და კიდევ ერთი გასაღები პერსონალურ მონაცემთა დაცვის ინსპექტორს ეძლევა.
ბესელია-ფოფხაძე-სესიაშვილის საკანონმდებლო პაკეტი კრიტიკის საგანი იყო იურიდიულ საკითხთა კომიტეტის სხდომაზე. მასთან დაკავშირებით შენიშვნები აქვთ როგორც დეპუტატებს, ასევე არასამთავრობო ორგანიზაციების წარმომადგენლებს და თავად პერსონალურ მონაცემთა დაცვის ინსპექტორს.
