ნორვეგია ე.წ. ხელშეკრულებას საერთაშორისო სამართლის პრინციპების დარღვევად მიიჩნევს

ნორვეგია ე.წ. ხელშეკრულებას საერთაშორისო სამართლის პრინციპების დარღვევად მიიჩნევს

ნორვეგიის საგარეო საქმეთა მინისტრი ბორგე ბრენდე რუსეთსა და ოკუპირებულ აფხაზეთს შორის გაფორმებულ ე.წ. ხელშეკრულებას გამოეხმაურა.

"არ ვაღიარებ ე.წ. „შეთანხმებას მოკავშირეობისა და სტრატეგიული პარტნიორობის შესახებ“, რომელიც რუსეთის ფედერაციასა და საქართველოს ოკუპირებულ ტერიტორია აფხაზეთს შორის იქნა გაფორმებული. ნორვეგია ურყევად უჭერს მხარს საქართველოს სუვერენიტეტსა და ტერიტორიულ მთლიანობას“ - განაცხადა ბორგე ბრენდემ.

მისი შეფასებით, მოსკოვის აღნიშნული ქმედება წინააღმდეგობაში მოდის საერთაშორისო სამართლის პრინციპებთან. 

„შეთანხმება წინააღმდეგობაში მოდის საერთაშორისო სამართლის პრინციპებთან. ასევე, არღვევს საქართველოს სუვერენიტეტსა და ტერიტორიულ მთლიანობას, რაც კიდევ უფრო ართულებს საქართველოსა და სეპარატისტულ რეგიონებს შორის არსებული კონფლიქტის მოგვარებას“, - განაცხადა ბრენდემ.

ამასთან, ნორვეგიული მხარე მოუწოდებს რუსეთს, შეასრულოს 2008 წლის 12 აგვისტოს ცეცხლის შეწყვეტის შესახებ მიღებული შეთანხმებითა და 2008 წლის 8 სექტემბრის შეთანხმებით აღებული ვალდებულებები.

„რუსეთმა უნდა გააუქმოს გადაწყვეტილება სეპარატისტული რეგიონების დამოუკიდებლობის აღიარების თაობაზე და გამოიყვანოს ჯარები საქართველოს ტერიტორიიდან“, -  განაცხადა ნორვეგიის საგარეო უწყების ხელმძღვანელმა.