"ვერ ვიქნები იმ ადამიანის მხარდამჭერი, ვინც პატიმარს თითით შეეხება"

იუსტიციის მინისტრი თეა წულუკიანი საქართველოს ციხეებში არსებულ მდგომარეობაზე კომენტარს აკეთებს.

მისი თქმით, ქართულ ციხეებში სისტემური პრობლემები აღარ არსებობს, თუმცა ცალკეულ შემთხვევებზეც ყურადღებაა გასამახვილებელი.

"ქართულ ციხეებში სისტემური პრობლემები აღარ არსებობს იმ გაგებით, რომ დღეს არ არის ციხესა და ციხის კედლებში ის კულტურა, რომელიც წინა ხელისუფლების დროს იყო - ადამიანის წამება, დასრულებულია. თუკი მოხდა ცალკეული შემთხვევები, სამართალდამცავი ორგანოებიდან და ამ შემთხვევაში პროკურატურიდან რეაგირება სწრაფი, ეფექტიანი და მკაცრი უნდა იყოს. გამოძიება უნდა მიმდინარეობდეს არა მხოლოდ იმაზე, თუ რა კანონით აკრძალული ნივთი ჰქონდა პატიმარს, არამედ იმით, მას როგორ მოექცა ციხის დაწესებულება.

ჩვენ ორჯერ უკვე წარსულში სტრასბურგის სასამართლომ დაგვსაჯა იმისათვის, რომ ალიევისა და შამაევის საქმეზე წინა ხელისუფლებას სანქციები ჰქონდა დაკისრებული. როდესაც პატიმარსა და ადმინისტრაციას შორის ხდება კონფლიქტი, იქ ხელისუფლება მხოლოდ პატიმრის წინააღმდეგ იძიებდა საქმეებს და არა ადმინისტრაციის წინააღმდეგ. ამ შემთხვევაში მსგავსი ხარვეზი არ უნდა იყოს დაშვებული და ძიება ორივე მხარის წინააღმდეგ უნდა იყოს დაწყებული",- განაცხადა თეა წულუკიანმა.    

სახალხო დამცველმა გლდანის მერვე დაწესებულებაში პატიმრების მიმართ არაადამიანურ მოპყრობაზე 24 ნოემბერს ისაუბრა.