მიხეილ სააკაშვილმა “რესპუბლიკელი” ლევან ბერძენიშვილი საკუთარ გუნდში მიიწვია. სააკაშვილი ლევან ბერძენიშვილს ფრანქფურტში შეხვდა.
ამის შესახებ ლევან ბერძენიშვილმა სოციალურ ქსელში თავად დაწერა:
„სერიიდან – ცვეტში მომხდარი ამბები: ვზივარ ჩემთვის ფრანქფურტში, მოვიდა სააკაშვილი, საჯაროდ მომიბოდიშა, საქართველოსთვის თავდადებული მებრძოლი მიწოდა და წავიდა. აღარ ვარ რუსეთის საელჩოსთან “შნურით” მიბმული”, – დაწერა ლევან ბერძენიშვილმა.
საქართველოს ყოფილი პრეზიდენტი მას სოციალურ ქსელშიც გამოეხმაურა:
“მე გამიხარდებოდა, რომ განათლების საკითხებში გია ვაშაძემ ლევან ბერძენიშვილს სთხოვოს მრჩევლობა და ამ მიმართულების წაყვანა”, – დაწერა მიხეილ სააკაშვილმა საკუთარ Facebook-გვერდზე.
შეგახსენებთ, 2007 წლის 7 ნოემბრის მოვლენების შემდეგ, მიხეილ სააკაშვილის ხელისუფლების წარმომადგენლები მედიაში გავრცელებულ აუდიოჩანაწერებზე დაყრდნობით ამტკიცებდნენ, რომ “რესპუბლიკური პარტიის” ერთ-ერთი ლიდერი ლევან ბერძენიშვილი რუსეთის ოფიციალურ წარმომადგენლებთან თანამშრომლობდა.
