ხორავას ქუჩაზე მოზარდების მკვლელობის საქმის სასამართლო განხილვა დასრულდა. მოსამართლე ეკა არეშიძე განაჩენის გამოსატანად სათათბიროდ გავიდა. სისხლის სამართლის მოსამართლე განაჩენს დღეს 11:00 საათზე გამოაცხადებს. დღევანდელ სხდომაზე მოსამართლე მხოლოდ ბრალდებულებთან დაკავშირებით განსაზღვრავს გამამტყუნებელ განაჩენს გამოიტანს თუ გამამართლებელს.

ამის შემდეგ კი მოსამართლე კიდევ ერთ სხდომას ჩანიშნავს, სადაც თუ გამამტყუნებელ განაჩენს გამოიტანს, ბრალდებულებს სასჯელის ვადას განუსაზღვრავს. სასამართლოს მოლოდინშია დაზარალებული ოჯახები. მოკლული დავით სარალიძეს მამას, ზაზა სარალიძეს აქვს მოლოდინი, რომ მოსამართლე საქმეს წინასწარ გამოძიებაში დააბრუნებს.

for.ge ზაზა სარალიძეს ესაუბრა.

ირაკლი შოთაძე ამბობს, რომ სასამართლო განაჩენს ელოდება, რის შემდეგად თავად მიიღებს კონკრეტულ სამართლებრივ გადაწყვეტილებას. რა მოლოდინით გაქვთ, როგორი იქნება სასამართლოს განაჩენი?

ზაზა სარალიძე: დაველოდოთ რა გადაწყვეტილებას მიიღებს მოსამართლე. ორივე ბრალდებულთან მიმართებაში უნდა გამოიტანოს გამამტყუნებელი განაჩენი, მაგრამ ძალიან დიდი იმედი მაქვს, რომ მოსამართლე მიიღებს გონივრულ გადაწყვეტილებას, არ დაუშვებს ბოლომდე გაიზიაროს სახელმწიფო ბრალდების მიერ წარმოდენილი მტკიცებულება და მხოლოდ ეს ორი ადამიანი მისცეს პასუხისგებაში. მოსამართლემ საქმე უნდა დააბრუნოს წინასწარ გამოძიებაში, რადგან იკვეთება სხვა პირების დანაშაუალი.

სხვა პირებში ვის გულისხმობთ, მიხეილ კალანდიას და იმ არასრულწლოვანს, რომელიც იმ დღეს იყო დაჭრილი?

– არა მხოლოდ. საქმე მხოლოდ იმაში არ მდგომარეობს ვინ ჩაიდინა მკვლელობა, საქმე ისაა ვინ იყო მკვლელობის ორგანიზატორი, ვინ დაურეკა მიხეილ კალანდიას და ვინ შეკრიბა ეს გუნდი. დიახ, ეს ადამიანი უნდა დაისაჯოს და ეს არის მირზა სუბელიანის შვილი, რომელიც იყო ორგანიზატორი ამ მკვლელობის. ინციდენტის ერთ–ერთი მონაწილე არასრულწლოვანი, რომელიც დაჭრილი იყო, საქმის ეს ნაწილი არ არის გამოძიებული. ასევე, იკვეთება ძალიან ბევრის ბრალეულობა, როგორიც არის ადამიანის განსაცდელში მიტოვება, შეუტყობინებლობა და ა.შ.

მთავარი პროკურორი ამბობს, რომ მისი სურვილია დაზარალებულ ოჯახებთან შეხვედრა და პროკურატურის გეგმებზე საუბარი. რატომ ფიქრობთ, რომ პროკურატურას არ უნდა ამ საქმის გამოძიება და, რომ საგამოძიებო სტრუქტურა არ არის დაზარალებულის მხარეს?

– რაც ირაკლი შოთაძემ და მანამდე მალხაზ კაპანაძემ განაცხადეს, თითქოს ბრალდებულები არ თანამშრომლობდნენ გამოძიებასთან და 6 თვე დუმილის უფლებით სარგებლობდნენ,  ამ განცხადებების შემდეგ ვრწმუნდები, რომ ბატონებს: შოთაძეს და კაპანაძეს საერთოდ არც გადაუშლიათ და არც წაუკითხავთ საქმის მასალები, რადგან საქმეში არსებობს ერთ–ერთი ბრალდებულის ფარული ჩანაწერი, რომელიც მოსამართლის მიერ იქნა ნებადართული. ახლა ვსვამ კითხვას, საიდან მოიტანეს ამ ბატონებმა, რომ 6 თვის განმავლობაში ბრალდებულებს არ მიუციათ ჩვენება? ბარლდებულმა ტყუილი ილაპარაკა, თუ სიმართლე, ეს სხვა საქმეა, მაგრამ ჩვენება მისცა. რატომ უნდა ამ ხალხს საზოგადოების შეცდომაში შეყვანა? – პასუხი მარტივია. იმიტომ, რომ ამით ცდილობენ ჩემს დისკრედიტაციას, მაგრამ არ გამოუვათ. პროკურატურა იმდენს იზამს, რომ საბოლოო ჯამში თვითონ გაასაჯაროვებს ყველა მასალას. გამაგებინეთ ასეთი უნამუსობა როგორ უნდა თქვას მთავარმა პროკურორმა და ქალაქის პროკურორმა, რომ თურმე ბრალდებულს არ მიუცია ჩვენება. რას ჰქვია არ მიუცია?!

რატომ უნდა იყოს პროკურატურის ინტერესში თქვენი დისკრედიტაცია და არა ლევან დადუნაშვილის ოჯახის?

– საზოგადოებაში გაჩნდა ეჭვი, რომ თითქოსდა ჩემსა და დადუნაშვილის ოჯახს შორის რაღაცა დაპირისპირება არის. არა, ეს აზრადაც არ გაივლოს ვინმემ. ჩვენ ორივე შვილმოკლული ოჯახით ვართ. ლევან დადუნაშვილის მკვლელი იდენტიფიცირებულია და განსასჯელის სკამზე ზის. რა თქმა უნდა, პროკურატურასთან ლევან დადუნაშვილის ოჯახს არ უნდა ჰქონდეს კითხვები. ჩემს შემთხვევაში სხვა ვითარებაა. ჩემი შვილი მოკლა ოთხმა ადამიანმა და ხმა არ ამოვიღო?! არ მოვითხოვო შვილის მკვლელის დასჯა?! პროკურატურას უნდა, რომ გამაჩუმოს, ჩამომაშოროს ჩემი შვილის საქმეს, მაგრამ არ გამოუვათ. ხალხო გამიგეთ, ჩემი შვილის მკვლელები გარეთ დადიან და პროკურატურა ამას არ იმჩნევს.

27 მაისს აქციაზე ძალიან ბევრი პოლიტიკური პარტიის წარმომადგენელი გამოჩნდა მოწოდებით – დაისაჯონ მკვლელები, ესენი არიან ადამიანები, რომლებმაც შექმნეს გირგვლიანის, რობაქიძის, გამცემლიძის, ვაზაგაშვილის და სხვების საქმეები. არ ფიქრობთ, რომ ამ ჯგუფის მიერ პოლიტიკური მოტივით ხდება თქვენი შვილის საქმის გამოყენება?

– რა თქმა უნდა, მეც ვხვდები, რომ ვიღაც–ვიღაცეები დაინტერესებული არიან ამ საქმით. პირდაპირ გეტყვით, რომ „ნაციონალურ მოძრაობაზე“ არის გართულება. როგორც კი პროკურატურისგან ვიგრძენი ზეწოლა, რადგან შეურაცხმყოფელი იყო პროკურატურის ქმედება ამ საქმეში, მაშინ „ტვ.პირველის“ ეთერში ვახო სანაიას გადაცემიდან მივმართე შს მინისტრს გიორგი გახარიას, რომ მსურდა მასთან შეხვედრა და საქმის დეტალებზე საუბარი, იმ დეტალებზე, რომელიც მე მოვიპოვე ამ საქმეზე და დღესაც ველოდები გამოხმაურებას. მმართველ გუნდს მივმართე, ვთხოვე დახმარება, მაგრამ არავინ არ გამომეხმაურა.

ბატონი შოთაძე გააქტიურდა მას შემდეგ, რაც გავმართე აქციები და საზოგადოებას ვთხოვე დახმარება. მანამდე სად იყო შოთაძე, როცა 6 თვეა გავკივივარ, რომ ჩემი შვილის მკვლელები ქუჩაში დადიან-თქო?! ძალიან კარგი თუკი პოლიტიკურ ნაწილში გადაჰყავთ ეს საქმე, რადგან მე ვითხოვ ჩემი შვილის მკვლელობის საქმის გახსნას და იმ ადამიანების დაკავებას, რომლებმაც გააყალბეს ეს საქმე. ახლა თქვენ დაგისვამთ კითხვას, ვისთვის მიმემართა?! მე არ მიმიმართავს კონკრეტულად რომელიმე პოლიტიკური პარტიისთვის. მე მივმართე საზოგადოებას და ვთხოვე დამიდგნენ გვერდში.

არ მინდა ვინმემ შეურაცხყოფად მიიღოს, მაგრამ შეხვედრაზე დამიბარა სოფო კილაძემ, არც ვიცოდი ვინ იყო. არ არის ჩემში პოლიტიკა. თუ იმ აქციაზე პოლიტიკური პარტიები იმიტომ მოვიდნენ, რომ გამოიყენონ ჩემი შვილის მკვლელობის საქმე, მაპატიოს საზოგადოებამ, მაგრამ მიმიფურთხებია იმ პოლიტიკოსებისთვის და პოლიტიკური პარტიისთვის. მე ვემიჯნები ამ საქმის პოლიტიკური მოტივით გამოყებას, ამას არ დავუშვებ. მე საზოგადოებას ვთხოვე დახმარება. ჩემი გადასაწყვეტი არ არის ვის რა პოლიტიკური შეხედულება აქვს.

როდესაც „რუსთავი 2“, როგორც მხარე დაინტერესებულია ამ საქმით, უკვე აშკარაა, რომ იკვეთება პოლიტიკური დაინტერესება, ისევე როგორც ზვიად კუპრავას აქტიურობა, რომელიც ცნობილია სკანდალური ბარლდებებით, რომელიც შემდეგ არ დასტურდება, ბევრი უზუსტობა იყო ფოთის მაჟორიტარი დეპუტატის შვილის საქმეში. ეს ყველაფერი ქმნის სურათს, რომ ვიღაცა დაინტერესებულია ამ საქმის პოლიტიკური მხარით...

– გეთანხმებით, რომ ჩნდება კითხვა - რატომ კუპრავა? მკითხეს ისიც, რატომ არის ჩემი შვილის საქმით დაინტერესებული „ნაციონალური მოძრაობა“ და „რუსთავი 2“. ზვიად კუპრავა ჩემი ძალიან ახლობელია, ჩემი ოჯახის წევრია, უფლებაც არ ჰქონდა გვერდით არ დამდგომოდა. კუპარავას გარდა არავინ არ მოსულა ჩემთან და არ უთქვამს: „ზაზა მე შენს გვერდით ვარ, თუ წინააღმდეგი არ ხარ ჩავერთვები გამოძიების საქმეში“. უარი მეთქვა? ზვიად კუპრავას პოლიტიკური შეხედულება ჩემი გადასაწყვეტი არ არის. მე ვკითხე მას, მართლა არის თუ არა „ნაციონალური მოძრაობის“ წევრი, მითხრა, რომ არც ერთ პოლიტიკურ პარტიაში არ ვარო. თუ ადამიანი ემხრობა „ნაციონალურ მოძრაობას“, ან „ქართულ ოცნებას“, დავუშალო თუ რა გავაკეთო? მართლა ვერ ვხვდები. კიდევ ერთხელ, მე არ დავუშვებ ჩემი შვილის საქმის პოლიტიკური მიზნებისთვის გამოყენებას.

თქვენ ახსენეთ ყოფილი ხელისუფლების დროს მოკლული ახალგაზრდების საქმე, მაშინ ყველა ამ საქმეში პირდაპირ მთავრობის ხალხი იყო ჩართული. მაგრამ ჩემი შვილის მკვლელები არანაირი პოლიტიკოსები არ არიან, ესენი არიან არასრულწლოვნები, რომლებმაც რაღაცა სისულელის გამო დაიწყეს ჩხუბი და მოკლეს ორი ბიჭი. ანუ, თავიდანვე არ იყო ეს საქმე პოლიტიკური მოტივით ნაკარნახევი.

რაც შეეხება „რუსთავი 2“–ს , ყველა ჟურნალისტს გიხდით მადლობას გვერდში დგომისთვის. „რუსთავი 2“ იყო პირველი ტელევიზია, რომელმაც დაიწყო ამ საქმის გაშუქება. არც ერთ ტელევიზიას არ დავუშლი, რომ დამეხმაროს საქმის გამოძიებაში. ძალიან დიდი მადლობელი ვარ „საზოგადოებრივი მაუწყებლის“, რომლემაც მიიღო გადაწყვეტილება ჩაატაროს ჟურნალისტური გამოძიება. იმედია ხელს არ შეგვიშლიან და ფილმი გავა ეთერში. ჩემთვის ყველა ჟურნალისტი ერთი ხართ, თქვენ მიდგეხართ გვერდში, რომ საქმე არ მიიჩქმალოს. პოლიტიკოსებს არ მივცემ უფლებას, რომ ჩემი შვილის საქმე პოლიტიკური მოტივით გამოიყენონ. ეს გამორიცხულია.