ბოლო პერიოდში ვრცელდება ინფორმაცია იმის შესახებ, რომ დასავლეთი საქართველოში ახალ პოლიტიკურ დასაყრდენს ქმნის. ქართულ პოლიტიკაში დასავლური ფლანგის გააქტიურების კონკრეტული თარიღიც სახელდება - 2017 წლის იანვრის ბოლო, ან თებერვლის დასაწყისი.
როგორც ამბობენ, ახლად შექმნილი პროდასავლური მოძრაობა დასავლეთისთვის ახალი დასაყრდენი იქნება. აქ საზოგადოება იხილავს დიპლომატებს, მოქმედ პოლიტიკურ ლიდერებს, სხვადასხვა სფეროს წარმომადგენლებს.
ახალი ძალისთვის მთავარი „წითელი ხაზი“ პრორუსული გზა იქნება. ამ მოძრაობას პოლიტიკური მხარდაჭერა ექნება როგორც ევროპიდან, ისე-აშშ-დან. მათ შორის, საუბარია დასავლურ ფინანსურ კაპიტალზეც.
გავრცელებული ინფორმაციით, პროდასავლური ერთობა ქართული პოლიტიკისთვის თავისი შინაარსით ახალი მოვლენა იქნება. მისი გამოჩენა აქტუალობას შეიძენს იმ ფონზეც, როცა 8 ოქტომბრის შემდეგ დამკვიდრდა აზრი, თითქოს ქართული პოლიტიკა პროდასავლური სეგმენტისგან გაიწმინდა. იგულისხმება ირაკლი ალასანიას დროებით წასვლა პოლიტიკიდან და რყევები „რესპუბლიკურ პარტიაში“. აღნიშნული პოლიტიკური სუბიექტების დაჩრდილვის შემდეგ ერთადერთი დასავლური ძალის პრეტენზია ოპოზიციაში „ნაციონალებს“ გაუჩნდათ.
პარალელურად, ჩვენს საზოგადოებაში ისმის შეშფოთება პრორუსული ძალების გაძლიერების თაობაზე. ჩნდება მოლოდინი, იქნებ, დადგა დრო, დასავლეთმა ან ფული ჩადოს, ან რაიმე სხვა ქმედებით გადაფაროს პრორუსული ძალების აქტიურობა?! როგორც ჩანს, არასაკმარისი და უკუშედეგის მომტანია იმ არასამთავრობოების დაფინანსება, რომელთა იმედადაც დარჩენილი იყო დასავლეთი.
თუმცა აქ პრობლემა დაფინანსებაშია. იმის გათვალისწინებით, რომ პროდასავლურ ან პროაღმოსავლურ ძალებს ჩვენს ქვეყანაში პოლიტიკური ძალების დაფინანსება ეკრძალებათ, საინტერესოა, როგორ მოახდენს დასავლეთი ამ პროცესის სტიმულირებას? ეს მოხდება ღიად თუ ფარულად? საჭიროებს კი ჩვენი ქვეყანა ახალ პროდასავლურ ძალას?
პოლიტოლოგი ვახტანგ ძაბირაძე For.ge-სთან საუბარში აცხადებს, რომ წინასწარ არავინ იცის, ვინ რას შექმნის, ამიტომ პირდაპირ თქმა, რომ ახალი პოლიტიკური დასაყრდენის შექმნაში დასავლეთი მონაწილეობს, ცოტა რთულია. თუმცა პოლიტოლოგი ადასტურებს, რომ ახალი პოლიტიკური ძალის მოთხოვნილება ჩვენს საზოგადოებაში ნამდვილად არსებობს და ამაზე მიუთითებს არჩევნების შედეგებიც. სხვაგვარად იმის ახსნა, თუ რატომ მიიღეს პაატა ბურჭულაძემ და სხვა პარტიებმა ხმების ის რაოდენობა, რაც მიიღეს, შეუძლებელია.
„ახალ პოლიტიკურ ძალაზე მოთხოვნილება კიდევ უფრო გაძლიერდება. აქ ლაპარაკია არა მაინცდამაინც პროდასავლურობაზე, ან არაპროდასავლურობაზე, არამედ ახალი პოლიტიკური ძალის მკვეთრ საჭიროებაზე. ეს ძალა აუცილებლად შეიქმნება და არ ვიცი, იანვრის ბოლოს გამოჩნდება, თებერვლის დასაწყისში, თუ მარტში. ყოველ შემთხვევაში, გაზაფხულისთვის აუცილებლად რაღაც პოლიტიკური ძალა უნდა გამოჩნდეს. დღესდღეობით „ქართული ოცნების“ ალტერნატივა არის მხოლოდ „ნაცმოძრაობა“, ანუ პოლიტიკური ძალა, რომელიც ხალხის უმრავლესობისთვის მიუღებელია. ხვალ ასეთივე დამოკიდებულება შეიძლება ჩამოყალიბდეს „ქართული ოცნების“ მიმართ. ამიტომ, რაც დრო გავა, მოთხოვნილება ახალ პოლიტიკურ ძალაზე გაიზრდება და ეს ძალაც აუცილებლად გამოჩნდება“, - აღნიშნა ვახტანგ ძაბირაძემ და უარყო მოსაზრება იმის თაობაზე, რომ ქართველმა ხალხმა პროდასავლურ ძალებს უთხრა უარი „რესპუბლიკელებისა“ და „თავისუფალი დემოკრატების“ სახით.
პოლიტოლოგის თქმით, ქართველმა ამომრჩეველმა არა მარტო ამ ორ პარტიას უთხრა უარი, არამედ - სხვა ძალებსაც და მხოლოდ ორი პოლიტიკური ძალა შევიდა პარლამენტში. ამიტომ იმის თქმა, რომ ამით დასავლეთს უთხრეს უარი, სწორი არ არის - ხალხმა არსებულ პოლიტიკურ სპექტრს უთხრა უარი. თუმცა, ვახტანგ ძაბირაძე მაინც მიიჩნევს, რომ ახლადშექმნილი პოლიტიკური ძალა, სავარაუდოდ, სწორედ პროდასავლური იქნება.
„8 ოქტომბრის არჩევნებმა დაგვანახა, რომ სწორედ პროდასავლურებმა მიიღეს გაცილებით მეტი ხმები, გნებავთ, პარლამენტს გარეთ დარჩენილებმა, გნებავთ, პარლამენტში შესულებმა, ვიდრე სხვა ძალებმა, ან გაურკვეველი ორიენტაციის მიმართულების პოლიტიკურმა სუბიექტებმა. თუკი არჩევნების შედეგების მიხედვით ვიმსჯელებთ, ამომრჩევლებმა უარი უთხრეს ზუსტად იმ ძალებს, რომელთაც არ ჰქონდათ მკვერად გამოხატული დასავლური ორიენტაცია. მე არ მესმის, „ქართული ოცნება“ რატომ არ არის პროდასავლური?! 2012 წლიდან მოყოლებული დღემდე, მთელი მისი საგარეო ორიენტირი მიმართულია დასავლეთისკენ. ასევე, „ნაცმოძრაობა“ პროდასავლურ პარტიად ითვლება და რატომ ჰგონიათ ზოგიერთებს, რომ 8 ოქტომბრის შემდეგ სწორედ პროდასავლურ ძალებს უჭირთ? ეს არ მესმის. სხვა საკითხია, რომ „ნაცმოძრაობას“ საგარეო ორინტაციის გამო კი არ უთხრა მოსახლეობამ უარი, არამედ საშინაო პოლიტიკის, ქვეყანაში ჩადენილი უმსგავსობების გამო“.
რაც შეეხება „ქართულ ოცნებას“, პოლიტოლოგის განმარტებით, „ოცნება“ რეიტინგს იმიტომ კი არ კარგავს, რომ ის პროდასავლურია, არამედ იმიტომ, რომ ის პრობლემები, რისი მოგვარების იმედიც ჩვენ გვქონდა, რეალურად ვერ შეასრულა. ამდენად, საგარეო ორიენტაცია ქართველი ამომრჩევლისთვის პირველი კატეგორიის პრობლემა არ არის, ჩვენს ამომრჩველს სულ სხვა ტიპის პრობლემები აწუხებს და არჩევანს ამ პრობლემების მოგვარებისთვის აკეთებს და არა საგარეო ორიენტაციის მიხედვით.
უბრალოდ, საგარეო ორიენტაცია წამოწეულია პოლიტიკოსების მხრიდან მხოლოდ იმიტომ, რომ საშინაო პრობლემებზე არ ილაპარაკონ. საგარეო ორიენტაციაზე საუბარი ძალზე მარტივია, არც არავინ შემოგედავება, არც არავინ მოგთხოვს პასუხს. ამ დროს საგარეო ორიენტაცია კი არა, ქვეყანაში გამეფებულია სიდუხჭირე, ეკონომიკა ნულს ქვემოთაა და ხალხი დღე და ღამე სამუშაოს დაეძებს.
„რესპუბლიკელების“ ერთ-ერთი ლიდერი ლევან ბერძენიშვილი ახალი პროდასავლური ძალების საჭიროებას ქვეყანაში ვერ ხედავს. იგი მიიჩნევს, რომ საჭიროა, უკვე არსებული დასავლური ძალების კონსოლიდირება და გაძლიერება. მისი თქმით, თუ ვინმეს ჰგონია, რომ ძველი პროდასავლური პარტიები უნდა გაუქმდეს და ახალი უნდა შეიქმნას, ეს არ მოხდება. არც ის მოხდება, რომ, თუკი „რესპუბლიკელებს“ არ აძლევენ ხმას, რომელიღაც „ჭე“ კლასის „რესპუბლიკელებს“ მისცემენ ხმას.
„ვერ გავიგე, რას ნიშნავს ახალი პროდასავლური ძალა? უკვე არსებულ პროდასავლურ ძალებს არ მოგვცემენ ხმას და ახლადშექმნილს მისცემენ? სხვაგვარი დასავლური ძალები არსებობენ? არა მგონია, დასავლეთი ამით ინტერესდებოდეს საქართველოში. უბრალოდ, ვფიქრობ, საქართველოში ვიღაც ე.წ. პროდასავლური პარტიის შექმნას აპირებს, მაგრამ ქართველი ხალხის ინტერესი თუ არ იქნა, დასავლეთი კი არა, ვერავინ ვერაფერს შექმნის ჩვენს ქვეყანაში. მსგავსი ზღაპრების არასოდეს მჯეროდა და არც ახლა მჯერა. დასავლეთი აქ არაფერ შუაშია. საქართველოში პოლიტიკური პარტიები იქმნება ზუსტად ჩვენივე საჭიროების მიხედვით.
დღევანდელი ვითარება ადასტურებს, რომ პროდასავლურ ძალებს, რომლებიც მხოლოდ თავისი პროდასავლურობით იყვნენ ცნობილნი, საზოგადოებამ უარი უთხრა. ხალხმა მხარი დაუჭირა დასავლურ-არადასავლურ გაურკვეველ ძალას, რომელიც, სინამდვილეში, დასავლურია, აღმოსავლური თუ იქსი, არავინ იცის. ამან გამოიწვია კრიზისი პროდასავლურ პარტიებში, მაგრამ დღესაც ხელოვნურად ახალს ვერავინ შექმნის. მე ყოველთვის მაოცებდა ახალ ქართველებს სად გააჩენდნენ, რომელ ქარხანაში? რაც ვართ, ეს ვართ. გინდათ, გადააწყვეთ ეს სისტემა, გინდათ, გადმოაწყვეთ, ისევ იმავე ხალხად დავრჩებით. რასაც ვერ ვაკეთებთ ქართველები, იმას სხვა როგორ გააკეთებს?“ - აცხადებს ლევან ბერძენიშვილი For.ge-სთან საუბარში .
მისივე თქმით, კანონის თანახმად, დასავლეთსა და აღმოსავლეთს საქართველოში პოლიტიკური მოღვაწეობის უფლება არ აქვს. უფრო მეტიც, დასავლეთს არ აქვს ისეთი ინტერესი, რომ აქ რაიმე ძალა შექმნას. რაც შეეხება ფარულ კავშირებს, ლევან ბერძენიშვილი აცხადებს, რომ ფარული ალიანსების შესახებ არაფერი იცის და საკუთარი პარტიის მაგალითზეც შეუძლია გვითხრას, რომ „რესპუბლიკელებს“ არც ღიად და არც ფარულად არავინ არასდროს არ ეხმარებოდა.
ამდენად, „რესპუბლიკელების“ ერთ-ერთი ლიდერი ასკვნის, რომ ისევ ჩვენი ქართველები შექმნიან დასავლეთს ამოფარებულ ე.წ. პროდასავლური მოძრაობას, რომელიც შესაძლოა, ისეთივე უდღეური აღმოჩნდეს, როგორც პაატა ბურჭულაძის პარტია. ამ პარტიას არ აღმოაჩნდა არსებობის პერსპეტივა, მიუხედავად იმისა, რომ ბურჭულაძე ირწმუნებოდა, არ მივდივარ პოლიტიკიდანო. თუმცა იმის შემდეგ საერთოდ არ გვინახავს ბატონი პაატა.
ლევან ბერძენიშვილის განმარტებით, მართალია, ჩვენს პოლიტიკაში მოხდა სერიოზული რყევა, მაგრამ, როგორც „რესპუბლიკური პარტია“, ისე „თავისუფალი დემოკრატები“ არსებობენ და ორივე მათგანი რებრენდინგს ცდილობს.
