თბილისი იმდენად გადაიტვირთა ზემაღალი შენობებით, რომ თავად მშენებლებიც კი შეაწუხა. ისინი შექმნილი ვითრებიდან გამოსავლის ძიებაში არიან, არადა დედაქალაქში აგრესიული მშენებლობა, დედაქალაქის ხელმძღვანელობასთან ერთად, სწორედ მათი დამსახურებაა. ახლა დეველოპერები მკაცრი შეზღუდვების მომხრედ გვევლინებიან.

მაგალითად, უძრავი ქონების კომპანია „რედიქსის“ დამფუძნებელი ლაშა პაპაშვილი ამბობს, რომ დღეს რეგიონებში ახალი პროექტები არ ვითარდება, თბილისში კი მშენებლობის ბუმია. პაპაშვილის თქმით, ზოგადად უძრავი ქონება გრძელვადიანი ინვესტიციაა და მოითხოვს გრძელვადიან ფულს, ამიტომ კომპანები ვერ რისკავენ ისესხონ ძვირი ფული და რეგიონებში ჩადონ. ბიზნესმენი თქმით, შესაბამისად ნაკლები აქტივობაა რეგიონებში. პაპაშვილის აზრით, მართალია ბევრს არ მოეწონება, მაგრამ ერთ-ერთი გამოსავალი თბილისში ახალი მშენებლობების აკრძალვაა.

„ძალიან უნდა მოუჭირონ თბილისს და ავტომატურად გადანაწილდება რეგიონებში, პირდაპირ არ ვგულისხმობ, რომ იძულება უზრუნველყოფს მშენებლობებს, მაგრამ უფრო მეტი ინტერესი გამოჩდნება“, - აცხადებს პაპაშვილი და თბილისში საცხოვრებელი კორპუსების განვითარების ტენდენციაზეც საუბრობს. მისი თქმით, კომპანიებს მიაჩნიათ, რომ მარტივია საცხოვრებელი კორპუსების მშენებლობა და ამიტომ ყველა საცხოვრებელ ფართებს აშენებს. დღეს თბილისში დაუგეგმავი და არასწორი განაშენიანება ხდება და აუცილებელია განვითარების ტემპების და მიმართულების კონტროლი.

„მენაშენეთა ასოციაციის“ ხელმძღვანელი ირაკლი როსტომაშვილი კი რეგიონების მხრივ პერსპექტივას ნაკლებად ხედავს.

„რეგიონში უძრავი ქონების ბაზარს მყიდველი არ ჰყავს. მშენებლობა მოსახლეობის შესაძლებლობაზეა დამოკიდებული. ყველა სამშენებლო კომპანიის ნატვრაა, ბევრი მდიდარი ადამიანი ცხოვრობდეს ქვეყანაში, მაგრამ რეალობა, სამწუხაროდ, სხვაა“, - აღნიშნავს როსტომაშვილი.

ჯერჯერობით ახლო მომავლის პერსპექტივა ისაა, რომ დედაქალაქის ცენტრში „კა-2“ კოეფიციენტის შეზღუდვის გამო სამშენებლო კომპანიების უმეტესობას არჩევანის გაკეთება გარეუბნების სასარგებლოდ მოუწევს. ეს იქნება წინაპირობა, რომ გარეუბანი უფრო მეტად განვითარდეს და იქ ცხოვრება პრესტიჟული გახდეს. შეიძლება, მოთხოვნა მეტროს მიმდებარე ტერიტორიებზეც გაჩნდეს. ამასთან, აითვისონ ყველა ის უბანი, სადაც კომუნისტურ პერიოდში მიტოვებული წარმოებებია. როსტომაშვილი ვარაუდობს, რომ ამ ტერიტორიებზე მშენებლობის ბუმი გაჩნდება.

„მასობრივი მშენებლობების ფონზე გარეუბნებიც უფრო მოწესრიგდება და პრესტიჟიც აიწევს. ვაკე-საბურთალოს შემდეგ, საინტერესო და კარგად განვითარებადი მეჩვენება ვარკეთილი-ვაზისუბნისა და გლდანი-ნაძალადევის მიმართულება. ასეთი შეიძლება იყოს საბურთალოს ზედა ნაწილიც, ჯიქიას ქუჩის მიმდებარე ტერიტორია და სხვა. ყველა ის ადგილი, სადაც საზოგადოებრივი ტრანსპორტი კარგად არის განვითარებული. არ გამოვრიცხავ - მეტროებთან მდებარე საცხოვრებელ კორპუსებზე მეტი მოთხოვნა გაჩნდეს, როგორც ეს განვითარებულ ქვეყნებშია“, - აცხადებს როსტომაშვილი.

უძრავი ქონების ექსპერტი შოთა გუჯაბიძეც ადასტურებს, რომ მაღლივი კორპუსების მშენებლობამ შეიძლება პერიფერიებისკენ გადაინაცვლოს, მაგრამ ზომიერების დაცვა იქაც საჭიროა.

„საერთოდ, „კა-1“ კოეფიციენტით განისაზღვრება შენობის ფუძის მოცულობა, მისი სიდიდე, ხოლო „კა-2“ კოეფიციენტი განსაზღვრავს შენობის საერთო მოცულობას. შესაბამისად, თუ მშენებელს კოეფიციენტის მომატების უფლება ექნება, ის სართულებს დაამატებს და უფრო მაღალ შენობას ააგებს.

ქალაქის ცენტრში „კა-2“ კოეფიციენტის შეზღუდვა, ძირითადად, კორპუსების სიმაღლეზე აისახება. ამ რეგულაციით მივიღებთ იმას, რომ ქალაქის ცენტრი მაღალი შენობებით არ გადაიტვირთება და მისი იერსახე შენარჩუნდება. აქ არ არის ლაპარაკი მხოლოდ დედაქალაქის არქიტექტურულ მთლიანობაზე, მაღალი კორპუსების სიმრავლე იწვევს ეკოლოგიურ პრობლემებს, იჩრდილება ხედები, ბოლოს და ბოლოს, აღარ გვექნება სიტუაცია, როდესაც ერთი მეზობლის სარეცხი მეორის აივანს ფარავს“, – აცხადებს გუჯაბიძე.

მისი აზრით, დაუშვებელია ისტორიული ქალაქის ცენტრალურ უბნებში მაღალსართულიანი შენობები შენდებოდეს იმ ინტენსივობით, როგორც თბილისში შენდება.