„მომღერლებში ხშირია, როდესაც კარგი ხმის პატრონს დროზე ადრე ამღერებენ და მერე დროზე ადრე უფუჭდება ხმა. სიმღერის გაკვეთილს თუ გაითვალისწინებენ და ნელ–ნელა, ძალების მომწიფების პროპორციულად შემოვლენ პოლიტიკაში, მგონია, რომ გუნდისთვის უკეთესი იქნება“, – აცხადებს for.ge–სთან საუბრისას პოლიტოლოგი რამაზ საყვარელიძე, რომლის განცხადებით, პაატა ბურჭულაძის პოლიტიკურ გუნდში შთამბეჭდავი ფიგურები არ არიან.

for.ge რამაზ საყვარელიძეს ესაუბრა.

პაატა ბურჭულაძე პოლიტიკაში სანდრო გირგვლიანის საკითხით შემოდის, მან პირობა მისცა მოკლულის მამას, რომ გააქრობს მურუსიძის სინდრომს. ბურჭულაძე არ არის ერთადერთი, რომლიც ამ თემით შემოდის ქართულ პოლიტიკაში. ბატონო რამაზ, რამდენად სწორი სვლაა სანდრო გირგვლიანის მკვლელობის საქმით პოლიტიკაში შემოსვლა, მით უმეტეს, რომ ეს თემა უკვე გამოყენა „ქართულმა ოცნებამ“?

რამაზ საყვარელიძე: ეს ელემენტი, რომ ვიღაცის მიმართ დაშვებული ტრაგიკული შეცდომა, შეიძლება მერე პოლიტიკამ თავის პროცესში ჩართოს, ახალი არ არის და დიდად გასაკვირიც. პრინციპში, როგორც ადრე იყო მისაღები ასეთი ნაბიჯის გადადგმა, ისევეა ახლაც. ბურჭულაძემ, შეიძლება ითქვას, რომ მთლიანი პოლიტიკის წამყვან ფაზად წარმოადგინა უკონფლიქტო, ერთმანეთთან ჰარმონიული და შერიგებაზე ორიენტირებული პოლიტიკა, რომ დაპირისპირება არ უნდა არსებობდეს და ამ დროს ორიენტაცია აღებულია გირგვლიანის ტრაგედიაზე და საერთოდ - სამართლიანობის აღდგენაზე. როგორ უნდა აღდგეს სამართლიანობა დაპირისპირების გარეშე, ეს ძალიან საინტერესოა.

ბურჭულაძე ამბობს, რომ ისინი არ მოდიან უმრავლესობაში, არამედ მოდიან ხელისუფლებაში, მაგრამ გუნდი, რომელიც მან წარმოადგინა, შეძლებს ხელისფულებაში მოსვლას?

- პოლიტიკური ძალა, რომელიც მაქსიმუმისთვის არ იბრძვის, მინიმუმსაც არ მიიღებს. რაც შეეხება გუნდს, ეს ძალიან საყურადღებო რამ გახლავთ იმ მხრივ, რომ ქვეყანას მართავს გუნდი. ამიტომ, ძალიან დიდი მნიშვნელობა აქვს გუნდს. არ ვიცი რამდენად უწევს ანგარიშს ამ ნიუანსებს ამომრჩეველი, მაგრამ ის, რომ გუნდში ძალიან შთამბეჭდავი ფიგურები არ არიან ეს ფაქტია.

თუმცა, რამდენიმე ცნობილი ფიგურა არის...

– გეთანხმებით, მაგრამ ისეთი, რომ მთელი გუნდი ტოვებდეს ე.წ. ლიდერის შთაბეჭდილებას და მოსახლეობა დაარწმუნონ იმაში, რომ ეს გუნდი თავის თავზე აიღებს მმართველობას და მათი მმართველობა შედეგიანი იქნება, ამ გუნდს გაუჭირდება. ძალიან ბევრი ახალი სახეა, მაგრამ გუნდის არც ერთ წევრს არ აქვს ხელისუფლებაში ყოფნის გამოცდილება.

ჩვენ ორჯერ ვნახეთ რამდენად მნიშვნელოვანია გამოცდილების პრობლემა. იყო ზვიად გამსახურდიას ხელისფლება, რომელიც პრაქტიკულად გამოუცდელი ადამიანებისგან იყო მთლიანად დაკომპლექტებული და ვერ შეინარჩუნა ძალაუფლება. მეორე გახლავთ „ქართული ოცნების“ ხელისუფლება, სადაც აგრეთვე ხელისუფლებაში ყოფნის გამოცდილება ძალიან ცოტას აქვს. ამ დროს სააკაშვილის გუნდში იყვნენ ადამიანები, რომლებიც შევარდნაძიდან მოყოლებული სწავლობდნენ სახელმწიფო მანქანის მართვას და ამან დიდი როლი შეასრულა ძალაუფლების ფლობაში. ასე რომ, ხელისუფლებაში ყოფნის ფაქტორს დიდი მნიშვნელობა აქვს.

როგორც წესი, ქართველი ამომრჩეველი არჩევანს აკეთებს ახალ სახეზე და ფაქტია, რომ ასეთმა არჩევანმა პოლიტიკური ვითარება ვერ შეცვალა უკეთესობისკენ. ამის ფონზე დღევანდელი მდგომარეობით რა შანსი აქვს ამ გუნდს?

- არც ამ შემთხვევაშია გამორიცხული, რომ არჩევანი გაკეთდეს ბურჭულაძის ფონზე.

როგორც ახალ სახეზე და არა როგორც პოლიტიკოსზე?

- საქართველოში ამის დიდი დიფერენციაცია არ ხდება. დიდად გამოკვეთილი არ არის რას ითხოვენ იმ პროფესიის ადამიანისგან, რომელსაც პოლიტიკოსი ჰქვია. ბევრი რამ დამოკიდებულია პროცესებზე. მიმაჩნია, რომ თავად ბურჭულაძის პოლიტიკური კარიერისთვის, რომელიც ვვარაუდობ, რომ 4 წელიწადზე არ არის გათვლილი და უფრო ხანგრძლივ პერიოდზეა ორიენტირებული, უფრო გამართლებული იქნება, თუ მეორე ოპოზიციური ძალის ნიშას დაიკავებს. მომძლავრდება, როგორც პოლიტიკური გუნდი, შეიძენს გამოცდილებას და შემდეგი რაუნდისთვის მართლაც შეეძლება მართვის ძირითად სადავეებთან მისვლა.

რამდენად აქვს შანსი, რომ გახდეს მეორე ოპოზიციური ძალა ქვეყანაში, იმ ფონზე, როდესაც პოლიტიკურ ველზე ახალი გუნდით შემოდის გიორგი ვაშაძე?

- ვნახოთ, როგორი იქნება ვაშაძის გუნდი, მაგრამ ბურჭულაძის პარტიის ყრილობა საკმაოდ შთამბეჭდავი სანახავი იყო. ძალიან დიდი ფინანსური რესურსი და ორგანიზაციული რესურსი ეტყობოდა ყრილობას. არ ვიცი საიდან აქვთ ეს გამოცდილება, მაგრამ ფაქტია, რომ ასპარეზზე შემოდის ერთ-ერთი დიდი დაფინანსების მქონე პოლიტიკური პარტია, რაც პირობაა იმისა, რომ პოლიტიკაში თავისუფალი და ენერგიული მოძრაობა გარანტირებული აქვს.

მაგრამ ვიმეორებ, ხელისფლებაში მოსვლა ერთია, ძალიან ადვილიც კია ხშირად, თუ ადამინები გენდობიან და უდავოდ ენდობიან, არის ნდობის ღირსიც, მაგრამ აჩქარება შეიძლება არ იყოს საჭირო, მაშინ, როდესაც გვაქვს პოლიტიკური გამოუცდელობის გაკვეთლები. მენანება ეს პარტია, არ მინდა მოხდეს ის, რაც მომღერლებში ხშირია, როდესაც კარგი ხმის პატრონს დროზე ადრე ამღერებენ და მერე დროზე ადრე უფუჭდება ხმა. ასე რომ, სიმღერის გაკვეთილს თუ გაითვალისწინებენ და ნელ-ნელა, ძალების მომწიფების პროპორციულად შემოვლენ პოლიტიკაში, მგონია, რომ გუნდისთვის უკეთესი იქნება.

ბურჭულაძის გამოსვლაში დიდი დოზით ისმოდა ხელისუფლების კრიტიკა, შესაბამისად ჩნდება კითხვა, რატომ არ ჰქონდა კითხვები „ნაციონალური მოძრაობის“ ძალადობის მიმართ და რატომ არ ჰქონდა კითხვა მაშინ, იგივე მურუსიძის მიმართ? პრინციპში ეს არის ლეგიტიმური კითხვა, რომელიც შეიძლება დაისვას პაატა ბურჭულაძის წინაშე...

- აბსოლუტურად ლოგიკური კითხვაა, მაგრამ შეიძლება თქვას, რომ იმ დროს არ ჰქონდა მას პოლიტიკისკენ გამოხედვის საშუალება და თავის საქმით იყო დაკავებული, მაგრამ ალბათ, ეს ნაძალადევი პასუხები იქნება. მაშინ მოსახლეობასთან აქტიური იყო „იავნანათი“ და იცოდა რა ხდებოდა საქართველოში. მგონია, რომ ამ კითხვაზე პასუხი უნდა გასცეს, მით უმეტეს, რომ თავისი პირველი გამოსვლა პრინციპში იმეორებდა კიდევაც ნაციონალების ფორმულას.

არაფორმალურ მმართველობას გულისხმობთ?

– რა თქმა უნდა, იმიტომ, რომ ეს ნაციონალების ძირითადი არგუმენტია დღევანდელ ხელისფლებასთან მიმართებაში. ამან გააჩინა განცდა იმისა, რომ ბურჭულაძის პარტია ხომ არ არის ამოზდილი ნაციონალურ ნიადაგზე? მიუხედავად იმისა, რომ მის გამოსვლაში ნაციონალური ხაზი აღარ იყო, კრიტიკის ელემენტები გაჩნდა ნაციონალების მიმართ, პასუხები მაინც გასაცემია. მეორე მხრივ სიმართლე გითხრათ, ეს ფინანსური რესურსებიც და კარგი ორგანიზაციაც კითხვის ნიშნებს აჩენს ჩემში, საიდან აქვს ან ერთი ან მეორე პარტიას, რომელსაც გამოცდილება არ აქვს?

რა ეჭვები გაქვთ, საიდან არის ამხელა ფინანსური რესურსი?

- ძალიან საინტერესო ფრაგმენტი იყო, დიდი ხანია „რუსთავი 2“ არ მამჩნევს, მაგრამ ყრილობაზე მომადგნენ და ყრილობის შეფასება მთხოვეს, სიმართლე გითხრათ გამეცინა. ფაქტია, რომ „რუსთავი 2“–იც აქტიურად არის ჩართული ამ პროცესში. ბუნებრივია, კითხვის ნიშნები ჩნდება და ვისურვებდი, რომ დამაჯერებელი პასუხი იყოს გაცემული მათი მხრიდან.

პაატა ბურჭულაძის გამოსვლაში ხაზგასმული იყო ევროპული ორიენტაცია და ევროკავშირის წევრობა, ეს ადასტურებს, რომ ამ პოლიტიკურ ძალას გამოკვეთილი პროდასავლური ორიენტაცია აქვს? თქვა, რომ ბრიუსელში, ვაშინგტონშიც და მოსკოვშიც იმუშავებენ იმისთვის, რომ საქართველომ აღადგინოს ტერიტორიული მთლიანობა...

– დღეს არც ერთ პოლიტიკოსს სხვა შანსი გარდა იმისა, რომ ევროპისკენ წავიდეს, არ აქვს. მე პირადად გეოპოლიტიკურ ორიენტაციასთან დაკავშირებით კითხვა არ მიჩნდება. ორიენტაცია ყველას ევროპული ექნება, მაგრამ ევროპულთან ერთად, როგორი იქნება ამ პოლიტიკოსების რუსეთთან ურთიერთობა, ეს არის საინტერესო.