„არავითარი გაყალბების გეგმა ხელისუფლებაში არ იწერება, განსხვავებით იმ გამყალბებლებისგან, რომლებიც მუდმივად აყალბებდნენ არჩევნებს“, - აცხადებს for.ge-სთან საუბრისას პარლამენტის ვიცე-სპიკერი, მანანა კობახიძე, რომლის განცხადებით, არავითარი რევოლუციური სცენარი ქვეყანაში არ იქნება.

for.ge მანანა კობახიძეს ესაუბრა.

IRI-ის და NDI-ის კვლევებდან ჩანს, რომ მესამე ძალა არ არსებობს, ანალოგიური ვითარება იყო 2003 წელსაც, რის შედეგადაც მივიღეთ რევოლუცია. როგორ ფიქრობთ, ამ სოციოლოგიური კვლევის მიზანი რევოლუციური გარემოს შექმნაა?

მანანა კობახიძე: IRI-ის და NDI-ის კვლევებს დიდი ხანია ეჭვის თვალით ვუყურებ. არა იმიტომ, რომ ამ ინსტიტუტებს პატივს არ ვცემ - არა, პატივს ვცემ, ძალიან საინტერესო პროექტები აქვთ განხორციელებული და დღესაც ახორციელებენ, თანამშრომლობენ პარლამენტთან. მაგრამ, ერთია ვინ ატარებს და ვინ უკვეთავს ამ კვლევას, რამდენად სანდოა ეს ინფორმაცია და რამდენად შეგვიძლია ანალიზის საფუძველზე დავეყრდნოთ ამ მონაცემების სისწორეს.

ვფიქრობ, რომ ძალიან დიდი ხანია ამ კვლევებმა ნდობა დაკარგა. სამწუხაროდ, უკვე იუმორის ჟანრშიც კი შეიძლება ზოგჯერ საუბარი. ნამდვილად ვერ დავიჯერებ, რომ ამ ქვეყანაში ნათელაშვილს უფრო მაღალი რეიტინგი აქვს, ვიდრე პრემიერ-მინისტრს, რომელიც ნამდვილად სარგებლობს ძალიან მაღალი ნდობით. მიუხედავად იმისა, რომ ის სულ რამდენიმე თვეა რაც პრემიერია, ძალიან მაღალი შეფასებები აქვს ჩვენი პარტნიორებისგან.

არ მგონია, ჩვენი საზოგადოების გემოვნება ასეა იყოს შეცვლილი, რომ შალვა ნათელაშვილს, რომელიც ყველამ ძალიან კარგად იცის, რომ პირდაპირ ბმაში არის „ნაციონალურ მოძრაობასთან“, ანუ სააკაშვილთან,  უფრო ენდობონენ და მოსწონდეთ, ვიდრე გიორგი კვირიკაშვილი.

გასაგებია, მაგრამ როგორ ხსნით სახელისუფლებო პარტიასა და „ნაციონალურ მოძრაობას“ შორის არსებულ თანაბრობას, ამგვარი სურათის შექმნა ადასტურებს, რომ ქვეყანაში რევოლუციური სცენარი მზადდება?

- ეს სცენარი შეიძლება სააკაშვილის გუნდში მუშავდება, მაგრამ არავითარი რევოლუციური სცენარი არ იქნება. რა თქმა უნდა, რეალისტურად ვაფასებ სიტუაციას და ვიტყვი, რომ „ნაციონალური მოძრაობა“ ის ძალაა, რომელიც ნამდვილად ყველაფერზეა წამსვლელი, თუკი მათ საშუალება მიეცემათ. საუბრები ნატო-ზე, ევროკავშირზე, სტრატეგიულ პარტნიორობაზე, ეს ყველაფერი იმისთვის სჭირდებათ, რომ ამ ნიშნით წაეპოტინონ ხელისუფლებას, თითქსოდა დასავლური ღირებულებების ერთგულნი არიან, მაგრამ ფაქტია, თუკი რაიმე უფლების დარღვევა შეიძლებოდა, ყველა უფლება ირღვეოდა მათი მმართველობის წლებში. ვერ ამოშლიან ამ მძიმე წარსულს. ზოგს ოჯახები გაუნადგურეს, ზოგსაც სიცოცხლე წაართვეს, წამება და ღირსების შელახვა, ეს კონკრეტული ადამიანების ისტორიაა და რა კავშირი აქვს ამ ყველაფერს დემოკრატიასთან და დასავლურ ღირებულებებთან?

მათი მიზანია ვირტუალური რეალობის შექმნა, რომ პროდასავლურები არიან და ვიღაც პრორუსია. მათი სურვილია ასეთი ნიშა მოუძებნონ „ქართულ ოცნებას“. ეს უკვე ძალიან მოძველებული სცენარია, ამისი არ სჯერათ არც დასავლეთში და არც საქართველოში. რა სცენარიც არ უნდა მოიფიქრონ, რა თქმა უნდა, საზოგადოება ადეკვატურ პასუხს გასცემს. დიახ, ეს კვლევები არ არის სანდო. ის ორგანიზაციები ვინც ამ კვლევებს ატარებენ, პირდაპირ ბმაში არიან „ნაციონალურ მოძრაობასთან“.

თუმცა, თქვენი ოპონენტები ამტკიცებენ, რომ ხელისუფლებაში მზადდება გეგმა, როგორ შეიძლება გაყალბდეს არჩევნების შედეგები.

- არავითარი გაყალბების გეგმა არ იწერება ხელისუფლებაში, განსხვავებით იმ გამყალბებლებისგან, რომლებიც მუდმივად აყალბებდნენ არჩევნებს, „მოქალაქეთა კავშირის“ თუ „ნაციონალური მოძრაობის“ დროს. სტაჟიანი გამყალბებლები ჰყავთ.

ვინ არიან სტაჟიანი გამყალბებლები?

- ყველამ კარგად იცის ვინც არიან. სამწუხაროდ, არ მოხერხდა ის, რომ არჩევნების გაყალბებისთვის ამ ადამიანებისთვის პასუხი მოეთხოვათ. გაყალბების მთელი ტექნოლოგიები იყო საქართველოში. დღეს ამაზე აღარ არის საუბარი. უამრავი მექანიზმია შემუშავებული იმისათვის, რომ არჩევნები ჩატარდეს გამჭვირვალედ. დიახ, ჩვენ გვაქვს პრეტენზია, რომ 2012 წლისგან განსხვავებით არჩევნები იყოს გამჭვირვალე. 2012 წელს ბიძინა ივანიშვილმა მოახერხა და ძალიან სერიოზულ ბრძოლაში დაამარცხა რეჟიმი, მაგრამ ეს არ იყო თავისუფალი არჩევნები. იცით რა გზაზე გვიწევდა სიარული.

დღეს სხვა რეალობაა, ადამიანებმა უნდა გააკეთონ თავისუფალი არჩევანი. რა თქმა უნდა, ყველანაირად შეეცდებიან არიონ სიტუაცია, მაგრამ მეორეა საზოგადოება და ხელისუფლება როგორ პასუხობს ამას. ერთი რამ კარგად უნდა იცოდნენ, რომ ადამიანები, რომლებიც დღემდე ვერ დასაქმდნენ და განაწყენებული არიან, არ მგონია, რომ ისინი „ნაციონალური მოძრაობის“ ამომრჩეველი გახდნენ. ძალიან კარგად იციან რას ნიშნავს ამ ძალის ხელისუფლებაში დაბრუნება.

თქვენ ფიქრობთ, რომ „ნაციონალური მოძრაობა“ ამ რაოდენობით ვერ მოვა პარლამენტში?

- ერთი რამ ვიცი, რომ „ნაციონალური მოძრაობა“ ძალიან უმნიშვნელო მანდატს მიიღებს, რადგან თავისუფალი არჩევნების პირობებში თავისუფალი საზოგადოება მოძალადეებს არ აირჩევს. ამიტომ, დარწმუნებული ვარ, რომ მათ მანდატების ძალიან მინიმალური რაოდენობა ექნებათ. ასე რომ, ძალიან სასაცილოა მათი მოლოდინები და ილუზიები ხელისფლებაში დაბრუნების.

რა თქმა უნდა, „ქართულ ოცნებას“ სერიოზულად მოუწევს ბრძოლა იმისათვის, რომ საზოგადოებამდე მიიტანოს გაკეთებული საქმეები. სამწუხაროდ, ბევრი რამ გაკეთდა, რაც საზოგადოების დიდმა ნაწილმა არ იცის. როგორც ჯანდაცვის კუთხით, ასევე სოფლის მეურნეობის, განათლების თუ ბიზნესის ხელშეწყობის კუთხით.

გამორიცხავთ პროცესების რევოლუციური სცენარით განვითარებას, მაგრამ არ გამორიცხავთ, რომ ეს გეგმა მზადდებოდეს „ნაციონალური მოძრაობაში?

- არ გამოვრიცხავ, მაგრამ გამოვრციხავ, რომ ჯანსაღმა და თავისუფალმა საზოგადოებამ აირჩიოს მოძალადე. მათ შორის იმ ადამიანებმა, ვინც შეიძლება უკმაყოფილო იყო „ქართული ოცნებით“. ეს ადამიანები არ გახდებიან „ნაციონალური მოძრაობის“ ამომრჩევლები.

თქვენ არ ენდობით ამ სოციოლოგიურ კვლევებს, მაგრამ თქვენი ოპონენტები „თავისუფალი დემოკრატები“ ამბობენ, რომ კვლევა ასახავს ქვეყანაში არსებულ რეალობას...

- მათ, რომ თავის დროზე არ დაეტოვებინათ კოალიცია, დღეს ასე არ ისაუბრებდნენ და იტყოდნენ, რომ როგორც 2012 წელს აკლდა ობიექტურობა ამ კვლევებს, ისეთივე სიტუაციაა დღესაც. სამწუხაროდ, ნდობას ვერ იმსახურებს ეს კვლევები და დამერწმუნეთ, რომ იგივე პოზიციას გაიზიარებდნენ ჩემი კოლეგებიც „თავისუფალი დემოკრატებიდან“. უბრალოდ დღეს ოპოზიციაში არიან და უკვე სანდო გახდა კვლევები მათთვის.

„თავისუფალი დემოკრატების“ მსგავსად მმართველ გუნდთან ოპონირების რეჟიმში არიან რესპუბლიკელები. ჩვენთან ინტერვიუში ლევან ბერძენიშვილი ამბობს, რომ ვისურვებდი ნაკლებად მკაცრი იყოს კანონი თუნდაც უგულავასთან მიმართებაშიო. ბოლო პერიოდში „რესპუბლიკური პარტია“ კრიტიკას არ აკლებს „ქართულ ოცნებას“ და ამასვე ადასტურებს პარლამენტის თავმჯდომარის ბოლო ხმაურიანი განცხადებაც. შეიძლება ითქვას, რომ „რესპუბლიკური პარტია“ პრობლემა გახდა სახელისუფლებო გუნდისთვის?

- ეს არის სწორედ არაზუსტი, როდესაც ხაზს ვავლებთ, რომ „ქართული ოცნება“ არ არის პროდასავლური. დიახ, „ქართული ოცნება - დემოკრატიული საქართველო“ არის მკვეთრად გამოხატული პროდასავლური ორიენტაციის პარტია. აქ კითხვის ნიშანი არ დგას და ხელოვნურად ამის დასმა საჭირო არ არის. შესაბამისად, პრობლემას ვერ ვხედავ ამ პარტიასთან ურთიერთობის, ყოველ შემთხვევაში დღევანდელი მოცემულობით.

რაც შეეხება საარჩევნო კონკურენციას, ბუნებრივია, რომ იქნება კონკურენცია, მაგრამ კონკურენცია უნდა იყოს ჯანსაღი და სამართლიანი, ისეთი როგორსაც ჩვენი ქვეყანა იმსახურებს.

და ბოლოს, საარჩევნო სიაში იქნებით?

- ყველაფერი იმის მიხედვით იქნება, როგორც პარტია გადაწყვეტს. არც მაშინ მიკითხავს სად არის ჩემი ადგილი-თქო, მაგრამ სადაც საჭირო იყო, იქ მოინახა ეს ადგილი. ახლაც არ ვსვამ ამ კითხვას. ამას გადაწყვეტს პოლიტსაბჭო და რა თქმა უნდა, საზოგადოებაც იქნება ინფორმირებული.