ფრაქცია „რესპუბლიკელებსა“ და ადამიანის უფლებათა დაცვის კომიტეტის თავმჯდომარეს, ეკა ბესელიას შორის კონფლიქტი მწვავდება, სასწორზე კი, ბაღების რეფორმა დევს.

იმ შემთხვევაში თუკი, რესპუბლიკელები „ადრეული და სკოლამდელი აღზრდისა და განათლების შესახებ“ კანონპროექტთა პაკეტს მხარს არ დაუჭერენ, „ქართულ ოცნებას“ ცვლილებების გატანისთვის 76 ხმის მობილიზაცია დასჭირდება, რაც პარლამენტში შექმნილი ახალი პოლიტიკური რეალობის გათვალისწინებით, რთული იქნება.

რესპუბლიკელები ბაღების რეფორმას მიესალმებიან, თუმცა, კანონპროექტის მე-20 მუხლის პათოსს არ იზიარებენ, რომელიც ბაღებში, ბავშვთა ჯგუფების ასაკობრივი კატეგორიის მიხედვით ფორმირებას ითვალისწინებს. რესპუბლიკელები თვლიან, რომ ალტერნატიულ პედაგოკასთან დაკავშირებით მსგავსი აკრძალვა არ უნდა იყოს, რადგან მსოფლიო დონის ბაღებს პრობლემები შეექმნება. მათ შორის, „ვალდროფის ბაღს“.

როგორც for.ge-ს ფრაქცია „რესპუბლიკელების“ წევრმა, ნოდარ ებანოიძემ განუცხადა, ის   რეფორმის განხორციელებას მხარს უჭერს, რადგან ეს დარგი ბედის ანაბარად არის მიტოვებული, თუმცა, ჯგუფების ასაკობრივი კატეგორიით დაყოფა არ უნდა მოხდეს.

კანონმდებელი აცხადებს, რომ მას ამ თემებთან დაკავშირებით შეხვედრა Unicef-ის წარმომადგენლებთან ჰქონდა და მათ ასაკობრივ ცენზე აკრძალვები არ აქვთ.

„ეს კანონპროექტი მნიშვნელოვანია, შესაბამისად, მისი განმარტებითი ბარათი ასეთი შიშველი არ უნდა იყოს.  „ვალდროფის ბაღის“ აღზრდის პედაგოგიკა ამბობს, რომ როცა ჯგუფში სხვადასხვა ასაკის ბავშვია, უფროსი უმცროსზე ზრუნავს. თუმცა, ამ შემთხვევაში, პედაგოგიური სტანდარტი დაცულია. რაიმე გათვლა და დასკვნა არ არსებობს, არის თუ არა სისტემის შეცვლა დამაზიანებელი, ან პირიქით?! ასეთი ბაღები არის როგორც ავსტრიაში, გერმანიაში, ასევე საფრანგეთში, შვეიცარიასა და ამერიკაში. ანუ, იქ სადაც, ეს დარგი წარმატებულია. კითხვებს ჯიუტად არავინ არ სვამს, თუმცა,  პასუხებს ვერ ვღებულობთ“, - აცხადებს დეპუტატი.

ებანოიძე განმარტავს, რომ 20-ე მუხლით გათვალისწინებული რეგულაციებით, „ვალდროფის ბაღსა“ და „ტყის შვილებს“ კანონიერად მუშაობის უფლება აღარ ექნებათ, რადგან მათი სწავლების  მეთოდიკა ასაკობრივ განსხვავებას ითხოვს.

„20 წელზე მეტია, ეს ბაღები არსებობს და იქ ბავშვების მოხვედრის დიდი კონკურსია.  რა პოლიტიკური მიზანი უნდა გვქონდეს, თავი ერთი საბავშვო ბაღის კოლექტივს რომ მოვაწონოთ? ამომრჩეველი ბავშვები ხომ არ არიან?  ჩემთვის გაუგებარია, ეკა ბესელია ასეთ წინააღმდეგობას რატომ წევს. თუკი დასკვნები არსებობს, რომელიც ჩემს მოთხოვნას აქარწყლებს, წამაკითხოს, ყრუ და ბრმა არ ვარ, რომ არ გავითვალისწინო. ახირება არ მაქვს, მაგრამ კითხვას ვსვამ და პასუხებს ვითხოვ. თუკი საკითხზე ხმის მიცემა არ მინდა, მაშინ ფინანსური გაანგარიშების დადებას მოვითხოვ. კერძოდ, ამ რეფორმას ფინანსურად როგორ უზრუნველყოფენ?! ეს ცვლილებები ძალაში 2017 წლიდან შედის და ის უფრო სრულყოფილი უნდა იყოს“, - აცხადებს ებანოიძე, რომლისგან განსხვავებული პოზიცია აქვს მის თანაფრაქციელს, თემურ ნერგაძეს.

for.ge-სთან საუბარში ნერგაძე ამბობს, რომ განსხვავებული ასაკის ბავშვების ერთად ყოფნა ცუდია და ეს ფსიქოლოგიური ამბავია.

მისი ცნობით, კლასიკური ფსიქოლოგიის კორიფეები ამბობენ, რომ პატარა ასაკის ბავშვებს შორის განსხვავება დიდია.

„3-4 წლის ბავშვებს შორს განსხვავება უფრო დიდია, ვიდრე 25-26 წლის ადამიანებს შორის. თუკი სპეფიციფიკური გარემო და პროგრამა არ იქნა, აღზდის კუთხით, სხვადასხვა ასაკის ბავშვების ერთად ყოფნა რეკომენდირებული არ არის. ჩემი ფრაქციელები ამბობენ, რომ ვინც კანონპროექტი შემოიტანა, მას სპეციალისტების დასკვნა უნდა წარმოედგინა. ჩემს ფრაქციის წევრებს ჰკითხეთ რა უნდათ, მაგრამ ამავე დროს, ისინი ამბობენ, რომ სასწავლო პროცესი რაც უფრო მრავალფეროვანი იქნება, მით უფრო კარგი იქნება. ამის თაობაზე მე ცოტა სხვა აზრის ვარ“, - დასძენს ნერგაძე, რომელსაც ევროინტეგრაციის კომიტეტის თავმჯდომარე ლევან ბერძენიშვილი ეხმაურება.

ლევან ბერძენიშვილი for.ge-სთან საუბარში აცხადებს, რომ საკითხს თემურ ნერგაძე არ ეთანხმება, რომელიც ბავშვთა ფსიქოლოგიის ექსპერტია.

„ვალდორფის სკოლებს“ ვეთანხები, სადაც ლექციები წამიკითხავს. ძალიან კარგად ვიცი, რომ „ვალდორფის ბაღს“ ეკა ბესელიას მსგავსი მოღვაწე ვერ აკრძალავს, რადგან ის მსოფლიო დონის ბაღია. რაც შეეხება ნერგაძეს, საუბარი კლასიკურ ფილოლოგიაზე რომ იყოს, მეც მეწყინებოდა, რომ აზრს არ მეკითხებიან. რეალურად თემურის აზრი არაფერს არ შეცვლის“, - აცხადებს ბერძენიშვილი.

კანონმდებელი ბესელიას მოუწოდებს რესპუბლიკელების მიერ წარდგენილი ალტერნატიული წინადადება გაითვალისწინოს, რომლის მიხედვით, ალტერნატიული პედაგოგიური პრინციპების სააღმზრდელო და საგანმანათლებლო პროგრამის მქონე დაწესებულება უფლებამოსილია, მათი პედაგოგიკის საფუძვლებიდან გამომდინარე მრავალასაკიანი ჯგუფები ჩამოაყალიბოს.

„მხარეებს ვთავაზობთ, რომ ჩვენი ალტერნატივა გაიზიარონ. ბევრი ბაღი დარტყმის ქვეშ აღმოჩნდება, მათ შორის, „ვალდროფის ბაღი“. ეს მეთოდიკა მსოფლიოში აკრძალული არსად არ არის და საქართველომ რატომ უნდა აკრძალოს? - ეს პოლიტიკური საკითხი არ არის, არამედ პრინციპის ამბავია. ბესელიას მიაჩნია, რომ იმუშავა, საკითხი იცის და სხვების აზრი არ აინტერესებს“, - ამბობს ბერძენიშვილი.

რესპუბლიკელების პოზიციას ადამიანის უფლებათა დაცვის კომიტეტის თავმჯდომარე ეკა ბესელია არ იზიარებს და ირწმუნება, რომ არცერთი ბაღი არ დაიხურება და ყველას ვადა ექნება, რომ ავტორიზაციამდე ინფრასტრუქტურა კანონის შესაბამისად მოაწესრიგოს.

ბესელია ფიქრობს, რომ რესპუბლიკელების მხრიდან არასწორი განცხადებები გაკეთდა.

„არ ვიცი, ეს შეგნებულად კეთდება თუ იმის გამო, რომ ამ რეფორმის არსი არ იციან?! ამ კანონპროექტზე მუშაობა ორი წლის მანძილზე მიმდინარეობდა და მათი მხრიდან ინტერესი არ იყო. ამ ცვლილებებზე გაერო-ს სპეციალისტები ძალიან დიდი ხანი მუშაობდნენ და ამ პროცესში ყველა ჩართული იყო. მათ შორის, ექსპერტები, არასამთავრობო სექტორი და ყველა სამინისტრო. ყველა სიტყვაზე შეჯერება ხდებოდა. ის, რომ დასკვნები არ არის, არასერიოზულია“, - განუცხადა for.ge-ს ბესელიამ.

დეპუტატი ყურადღებას მე-20 მუხლზე ამახვილებს და ინტერესდება, პირველი კლასელი ბავშვი მესამე კლასელთან რატომ არ არის და სკოლაში ასაკობრივი დაყოფა რატომ ხდება.

„ბავშვებს ასაკობრივი სწავლება სკოლაში სჭირდებათ და ბაღში - არა? რომელიმე ბაღში პარაფსიქოლოგია რომ დაფუძნდეს, ეს უნდა დავუშვათ? ბავშვებზე ვლაპარაკობთ თუ რაზე? „ვალდორფის ბაღმა“ ითხოვა, რომ შერეული ჯგუფები 25-მდე გაზრდილიყო. ეს არ შეიძლება, რადგან შერეული ასაკის ბავშვები ისედაც არსებობს და მაშინ, რა რეფორმას ვატარებთ? - ეს რეფორმა იმიტომ გვინდა, რომ სწავლება ბავშვის ინდივიდუალურ განვითრებას მოვარგოთ. სწავლება სხვადასხვა ასაკის ბავშვებმა ერთად როგორ უნდა გაირონ? ჩემთვის ბევრი კითხვა არის, რესპუბლიკელები აქამდე სად იყვნენ? ამ ერთი ფორმულირების გამო, ამხელა რეფორმას ხმას არ აძლევენ? რეალურად, თუ მათ შეთანხმება უნდათ იმ პრინციპების ფარგლებში, რაც მივიღეთ, მზად ვართ, ვისაუბროთ“, - აცხადებს კანონმდებელი.

ბესელია საკითხზე საუბრისას აქცენტს პოლიტიკურ მხარეებზეც აკეთებს და for.ge-ს კითხვის საპასუხოდ ამბობს, რომ შეიძლება ითქვას, რომ პარლამენტში საკანონმდებლო პროცესი პოლიტიკურ ჭრილში გადავიდა.

„თუ მომავლის განათლებაზე ვსაუბრობთ, მაშინ რესპუბლიკელები წამგებიან პოზიციაში არიან. თუ ხმების დემონსტრირება ხდება, მაშინ მათ ამისთვის  წამგებიანი თემა აირჩიეს. არავის არ ვურჩევდი, რომ ასეთი ღირებული რეფორმა საჯილდაო ქვა გახდეს.  რასაც რესპუბლიკელები აყენებენ, ეს პრინციპების საკითხია და ამაზე პარლამენტს გადაწყვეტილება უკვე მიღებული აქვს და საკითხი პროცედურულად არასწორად დადგა. თუკი „რესპუბლიკური პარტია“ ამ რეფორმას მხარს არ დაუჭერს, ისინი არჩევნებზე მიდიან და ამომრჩეველს პასუხი გასცენ, ამ რეფორმას მხარი რატომ არ დაუჭირეს“, - აცხადებს ბესელია, რომელიც დარწმუნებულია, რომ რეფორმა არ ჩავარდება და ცვლილებები 76 დეპუტატის ხმას მოიპოვებს.

დათმობაზე წასვლა რესპუბლიკელებს მოუწევთ თუ ბესელიას, ეს კენჭისყრაზე გამოჩნდება, მაგრამ ხუთშაბათის რიგგარეშე სხდომაზე, საკანონმდებლო პაკეტი კენჭისყრაზე არ დადგა. როგორც ჩანს, შესაბამისი გადაწყვეტილება ფრაქცია „ქართულ ოცნებაში“ მიიღეს, თუმცა, საკითხზე კონსესუსის მიღწევა რამდენად მოხდება, ამის პროგნოზი რთულია, რადგან თავდაპირველად, ცვლილებების თაობაზე ერთმანეთს ბესელია-ებანოიძე დაუპირისპირდნენ, პროცესში კი, უკვე სრულიად რესპუბლიკური ფრაქცია ჩაერთო, ვინაიდან, ხუთშაბათის ბიუროს სხდომაზე, ბესელიასთან კონფლიქტში ძმები ბერძენიშვილები შევიდნენ.