ფარული ჩანაწერების გასაჯაროვების მუქარები თითქმის ყოველ დღეს ისმის, სახელმწიფო კი, კიბერდანაშაულის წინაშე უსუსურია. პარლამენტის თავდაცვის კომიტეტის თავმჯდომარე ირაკლი სესიაშივილი განმარტავს, რომ მსოფლიოში ასეთი ტიპის დანაშაულები მეგასახელმწიფოებმა ვერ გახსნეს, რადგან ინტერნეტსივრცე უკიდეგანოა და იქ დამნაშავის პოვნა ძალიან რთულია.

ქვეყანაში არსებულ პოლიტიკურ ნაღმებზე, for.ge ირაკლი სესიაშვილს ესაუბრა:

პარლამენტმა პლენარულ სხდომაზე სახელმწიფო უსაფრთხოების სამსახურის მიერ მომზადებული პირველი ანგარიში უნდა განიხილოს, რომელიც რესპუბლიკელების შეფასებით ზოგადია და კონკრეტიკა აკლია. ვახტანგ ხმალაძე წინადადებით გამოდის, რომ სტანდარტი იქნეს შემუშავებული იმისა, მომავალში ეს ანგარიში თუ რა ინფორმაციას უნდა მოიცავდეს. მათ პათოსს იზიარებთ?

- ზოგადად, ნებისმიერი სტანდარტის დაწესება ცუდი იდეა არ არის. ეს მიდგომა „ნდობის ჯგუფის“ საქმიანობასთან მიმართებაში მეც მაქვს. ამ წინადადებას მეც გავიზიარებ, მაგრამ უსაფრთხოების სამსახურის საქმიანობა იმდენად სპეციფიკურია, მისი სტანდარტებში მოქცევა ალბათ, გაჭირდება. უწყების მუშაობის 90% საიდუმლო საქმიანობასთან არის დაკავშირებული და ყველა საქმის შესახებ დეტალურ ინფორმაციას უბრალოდ, ვერ გავეცნობით. ამიტომ, ეს სტანტარდიზაცია მარტივი საქმე არ იქნება. ზოგადად, პირველი ანგარიში საშუალებას გვაძლევს, რომ შემდგომში დოკუმენტი უფრო დახვეწილი იყოს. ალბათ, უსაფრთხოების სამსახურის ხელმძღვანელებმა, მათ შორის, ლევან იზორიამ ის ხარვეზები და სურვილები დაინახა, რაც დეპუტატებს აქვთ, რომ ასეთი ანგარიშები შინაარსობრივად უფრო მკაფიოდ და კონკრეტულად იყოს გადმოცემული. ერთმანეთისგან უნდა ვისწავლოთ. მთავარია, ამის სურვილი გვქონდეს და რა თქმა უნდა, ამ პოლიტიკურ ნებას ვხედავ.

ე.წ. ოდეერების ინსტიტუტი პრობლემას თქვენი ხელისუფლების პირობებშიც წარმოადგენს. ლევან იზორიამ დაადასტურა, რომ „უსაფრთხოების ოფიცერი“ თსუ-ში მივლენილი იყო. თამარ კორძაიამ for.ge-სთან საუბარში აღნიშნა, რომ „თუკი საჯარო ინფორმაციაა, რომ თსუ-ში ე.წ. უსაფრთხოების ოფიცერი არსებობდა, ის მინიმუმ იმას ელოდა, რომ კომიტეტის სხდომაზე ისეთი უწყებების სიას მიიტანდნენ, თუ სად არსებობდა „უსაფრთხოების ოფიცერი“ და რომ, ისინი სამსახურიდან გაშვებულნი არიან“...

- სამწუხაროდ, როგორც ჩანს, თამარ კორძაია ინფორმირებული არ არის. ყველა დეპუტატმა საკუთარი საქმე რომ გააკეთოს, არც თუ ისე ბევრი კითხვა იქნება დასმული. თამარ კორძაიას კითხვაზე პასუხი რამდენიმე თვის წინ მივიღე. ამ საკითხით დავინტერესდი, უწყებას მოვთხოვე და გამომიგზავნეს. ის ხელშეკრულება, რომელიც კორძაიამ ახსენა, სრულიად საჯაროა. ეს ხელშეკრულება მედიის წარმომადგენლებსაც კი ვაჩვენე. ეს ინსტიტუტი დღეს სრულიად გამჭვირვალეა და ხელშეკრულებაში უფლება-მოვალეობები გაწერილია. ამიტომ, კორძაიას მიერ დასმული კითხვის მიზეზია, მისი ამ საკითხში არჩახედვა. რა თქმა უნდა, დეპუტატს კითხვების დასმის უფლება აქვს, მაგრამ ეს კითხვები მე არ გამჩენია.

„ოდერეების“ გარდა, გადაუჭრელ პრობლემას ფარული ჩანაწერები წარმოადგენს, რომლის გავრცელების მუქარები თითქმის ყოველ დღე ისმის. თქვენ ხელისუფლებას წარმოადგენთ და გკითხავთ, რას ფიქრობთ, ამ კადრებს ვინ ავრცელებს, რა მიზნით ავრცელებს?

- ფარულ ჩანაწერებთან დაკავშირებით გამოძიება მიმდინარეობს და ამ პროცესში ჩართული არიან კომპეტენტური ორგანოები. პირველ რიგში ხელისუფლებაა დაინტერესებული, რომ გახმაურებული საქმეები გამოძიებული იქნეს, რადგან ეს ჩვენი პრესტიჟის საკითხიცაა, მაგრამ ეს ძალიან რთული თემაა. კიბერდანაშაულების გამოძიება მეგასახელმწიფოებს უჭირთ. თუკი შესაძლებელია, რომ ეს საქმეები გამოძიებული იქნეს და დამნაშავეები დასჯილი, საზოგადოებას ეჭვი არ უნდა გაუჩნდეს, რომ აქ სახელწმიფოს ინტერესი არ არის, რადგან ამ პროცესში FBI-ია ჩართული. თუკი ვინმეს ქართული სპეცსამსახურების მიმართ ეჭვი და უნდობლობა აქვს, მათ ეს ეჭვი FBI-ს მიმართაც ხომ არ ექნებათ?

ძნელია იმაზე საუბარი, ამ ყველაფრის უკან ვინ დგას, მაგრამ პირადი ცხოვრების ამსახველი ფარული ჩანაწერების გამომზეურება და ამით ადამიანების დაშანტაჟება ვის ინტერესებში შედის? თქვენ ირწმუნებით, რომ ამ ყველაფერის უკან ხელისუფლება არ დგას, ვისი კვალი იკვეთება?

- პირველ რიგში, ეს ის ჯგუფია, რომელსაც მოსახლეობის დატერორება სურს, რათა მათ დაუცველობის განცდა გაუჩინონ. ასევე იკვეთება პოლიტიკური მიზანი, რომ არჩევნებამდე მოსახლეობა დაძაბული იყოს და ხელისუფლებას ზიანი მიადგეს. ყველამ იცის, რომ ეს ჩანაწერები წინა ხელისუფლების მიერ არის ჩაწერილი, მაგრამ საზოგადოება პასუხს ახალ ხელისუფლებას სთხოვს და ამ პირების დასჯას ითხოვს, რაც ძალიან რთული ამბავია. როგორც ჩანს, ვიღაცას სურს, რომ ამ კადრების გამომზეურება ვიღაცას დაბრალდეს. არ გამოვრიცხავ, რომ წინა ხელისუფლების მაღალი თანამდებობის პირებს, რომლებიც გაქცეული არიან, ამ კადრებს შანტაჟის მიზნით იყენებენ. ამ შანტაჟს შესაძლოა, მოთხოვნებიც მოჰყვეს. ამ კადრების გავრცელება იმის ინტერესებშია, ვისაც ქვეყანაში სტაბილურობა არ აწყობს და სურს, ხელისუფლებას ზიანი მიაყენოს, ხოლო მოსახლეობა სტერსის ქვეშ ამყოფოს.

თქვენს ნუსხაში უცხო ქვეყნის სპეცსამსახურები არ დაგისახელებიათ. მათ შორის, რუსეთი. „გირჩი“ ვარაუდობს, რომ შესაძლოა, ეს კადრები რუსეთის სპეცსამსახურების ხელშიც იყოს და ისინი პოლიტიკოსების დაშანტაჟებას ამ ფორმით ცდილობდნენ. ამას გამორიცხავთ?

- ეს შეიძლება, სხვადასხვა ქვეყნის სპეცსამსახურებიც იყვნენ, რომელთაც ამ ქვეყანაში არასტაბილურობის შექმნა სურთ.

წინა ხელისუფლებაზე აპელირებთ, რომელთა დროსაც ამ კადრების ჩაწერა მოხდა, თუმცა, თქვენ დამნაშავეები არ დასაჯეთ, დღეს კი, ნაციონალები გსაყვედურობენ და გთხოვენ, რომ დამნაშავეები გამოავლინოთ და პასუხისგებაში მისცეთ...

- ე.წ. კასრების საქმეზე 191 სისხლის სამართლის საქმე აღიძრა და 124 საჯარო მოხელის მიმართ სისხლის სამართლის დევნა განხორციელდა. მათ შორის, მაღალი თანამდებობის პირები იყვნენ. ერთი მხრივ, „ნაციონალური მოძრაობა“ ყელმოღერებით ამ პირების დასჯას ითხოვს, მეორე მხრივ, როცა ამ ადამიანებს ვსჯით, მათ პოლიტპატიმრებს უწოდებენ. რაღაცას თან ითხოვდე და თან სხვას ლაპარაკობდე, იმაზე მიანიშნებს, რომ მათ პოლიტიკური ინტერესები ამოძრავებთ.

შექმნილ ვითარებაში, ფარულ ჩანაწერებთან დაკავშირებით, დროებითი საგამოძიებო კომისიის შექმნის თაობაზე, რას ფიქრობთ?

- არ მგონია, რომ დღეს, რომელიმე დეპუტატმა ან პოლიტიკურმა ჯგუფმა ისეთი ურთულესი საქმის გახსნა შეძლოს, როგორიც კიბერდანაშაულია. ეს ვერ წარმომიდგენია. მით უმეტეს, ამ პროცესში საერთაშორისო ორგანიზაციები ჩართული გვყავს. ნათელია, რომ ოპოზიციას სურს, ეს საკითხი პოლიტიკური მიზნებისთვის გამოიყენოს. თავის დროზე, „ნაციონალური მოძრაობა“ საგამოძიებო კომისიის შექმნას ისეთ საკითხებზე ითხოვდა, სადაც უშუალოდ, ნაციონალები იყვნენ დამნაშავეები. ფაქტობრივად, ისინი საგამოძიებო კომისიას საკუთარი დანაშაულების „გაპრავებისთვის“ გვთავაზობდნენ. ამ პოლიტიკურ პროვოკაციას ვერ დავთანხმდები.

არ ფიქრობთ, რომ თუკი ამ კადრების გასაჯაროვება გაგრძელდება, ქვეყანაში მძიმე პროცესები განვითარდება, რადგან ამ კადრების უკან ადამიანების პირადი ცხოვრება დგას? განცდა არ გრჩებათ, რომ ფარული ჩანაწერების წინაშე სახელმწიფო და ხელისუფლება უსუსურია?

- მსოფლიოში ასეთი ტიპის დანაშაულები მეგასახელმწიფოებმა ვერ გახსნეს, რადგან ინტერნეტ სივრცე უკიდეგანოა და იქ დამნაშავის პოვნა ძალიან რთულია. წინა ხელისუფლებამ ქვეყანაში ძალიან ბევრი ნაღმი დატოვა და როგორც ჩანს, ეს ჩვენი სახდელია. ბოლო ოთხი წლის მანძილზე, ბრძოლა რამდენიმე ფრონტზე გვიწევს. თუკი საზოგადოება ვითარებას ჯანსაღად გააანალიზებს, მიხვდება, რომ ხელისუფლება მეტ-ნაკლებად ამ გამოწვევებს უმკლავდება. არის ნაღმები, რომლებიც ჩვენს გარეშე, ავტომატურად თუ მართვით ფეთქდება და ეს ნამსხვრევები ჩვენც გვხვდება. ამ მავნებლებსა და დამნაღველებს პასუხი არჩევნების გზით უნდა გავცეთ.