პარლამენტის ევროინტეგრაციის კომიტეტის თავმჯდომარე ლევან ბერძენიშვილი „ევროპის სახალხო პარტიის“ თავმჯდომარის, ჯოზეფ დოლის შეფასებებს ეხმაურება და განმარტავს, რომ ვიზალიბერალიზაციის სამოქმედო პროგრამაში არჩევნები და არჩევნების ჩატარება ნახსენები არასოდეს არ ყოფილა. მისი თქმით, საქართველო დავალებების შესრულების თვალსაზრისით, ლიდერია და ვიზის ტექნიკური საკითხით პოლიტიკური ამოცანების მიღწევა შეუძლებელია. კანონმდებელი ნაციონალებს აფრთხილებს, რომ თუკი ევროპულ ფრონტზე წარმატება არ იქნება, მაშინ არჩევნებზე წარმატებას პრორუსული ძალები მიაღწევენ.

ევროინტეგრაციის გზაზე ქვეყნის წინაშე არსებულ საფრთხეებსა და მოლოდინებზე, for.ge რესპუბლიკელ ლევან ბერძენიშვილს ესაუბრა:

ჯოზეფ დოლი საქართველოს სტუმრობს, თუმცა, ქვეყანაში ვიზიტამდე, მან განცხადება გააკეთა, რომ EPP საქართველოს ვიზალიბერალიზაციას მხარს მხოლოდ საპარლამენტო არჩევნების დამოუკიდებლად ჩატარების შემთხვევაში დაუჭერს. რა კავშირი აქვს უვიზო მიმოსვლას არჩევნებთან?

- ჯოზეფ დოლი „ევროპის სახალხო პარტიის“ თავმჯდომარეა, რომელიც საკუთარ პოზიციას გამოხატავს, თუმცა, ის EPP-ს საპარლამენტო ფრაქციის განწყობას რამდენად გამოხატავს, ვერ გეტყვით, რადგან მიმდინარე წლის იანვარსა და თებერვლაში, „სახალხო პარტიის“ ფრაქციამ საკუთარი მხარდაჭერა მკაფიოდ გამოხატა, რომ საქართველოს ვიზალიბერალიზაცია მიენიჭოს. ტექნიკურად, ეს საკითხი „ლიბე“-ს კომიტეტმა უნდა განიხილოს, რომლის თავმჯდომარეც სოციალისტია, თუმცა, საკითხზე მომხსენებელი EPP-ს ბულგარელი წარმომადგენელი, ქალბატონი გაბრიელაა. მას შემდეგ, რაც საკითხი ამ კომიტეტში განიხილება, მასზე მსჯელობა ევროპარლამენტის პლენარულ სხდომაზე გაიმართება. პლენარულ სხდომაზე შესაძლოა, საკითხის განხილვა ივნისში მოხდეს და საბოლოო გადაწყვეტილებაც მიღებული ივნისში იქნეს. ჩვენ ამას ასე ველოდებით.

ვიზალიბერალიზაციის სამოქმედო პროგრამაში არჩევნები და არჩევნების ჩატარება ნახსენები არასოდეს არ ყოფილა. საქართველომ ყველა ტექნიკური დავალება, რომელიც მიიღო, შეასრულა. შეიძლება ითქვას, რომ დავალებების შესრულების თვალსაზრისით, საქართველო ლიდერია. ამიტომ, ჩვენთვის ვიზალიბერალიზაციის არჩევნებთან დაკავშირება ძალიან მოულოდნელი იყო. ფაქტობრივად, ეს განცხადება ისე ჟღერდა, რომ არჩევნებს დავაკვირდებით და თუკი მოგვეწონება, ანუ, თუ „ნაციონალური მოძრაობა“ გაიმარჯვებს, მაშინ ვიმსჯელებთო. ასეთი რაღაც მოულოდნელია და დიპლომატიური არ არის. როგორც ჩანს, ეს გადამწყვეტ მნიშვნელობას ვერ იქონიებს. მიუხედავად იმისა, რომ ევროპის პარლამენტში EPP ყველაზე დიდი ჯგუფია, ის ნახევარზე მეტი არ არის, რომ მან ყველა გადაწყვეტილების დაბლოკვა შეძლოს. ყველაზე მთავარია ის, რომ პარტიის შიგნით ყველა იმ განწყობაზე არ არის, რაზეც პარტიის თავმჯდომარეა.

თქვენ ამბობთ, რომ ვიზალიბერალიზაციის სამოქმედო გეგმაში არჩევნები ნახსენები საერთოდ არ იყო, მაშინ ამ საკითხის წამოწევა რატომ ხდება? პრობლემების შექმნა ვის ინტერესებში შედის?

- არჩევნები ვიზასთან დაკავშირებული არასოდეს არ ყოფილა, ის გათვალისწინებულია ასოცირების ხელშეკრულებაში, რომელიც ამბობს, რომ თუ არჩევნები თავისუფლად და სამართლიანად ტარდება, ეს კარგია, ხოლო თუ არჩევნები ობიექტურად არ ტარდება, ხელშეკრულება შესაძლოა, გაუქმდეს კიდეც. ასე რომ, ევროპას არჩევნებზე ზემოქმედების დემოკრატიული მექანიზმები ასოცირების ხელშეკრულებაში აქვს. ამიტომ, დაშვებულია შეცდომა და ეს ვინ გააკეთა, ამაზე მარჩიელობას არ დავიწყებ. როგორც ჩანს, ჯოზეფ დოლს რაღაც ინფორმაცია მიწოდებული ჰქონდა, რადგან ის ამ ყველაფერს კითხულობდა. საინტერესოა, რომ ის განცხადებას ფრანგულ ენაზე კითხულობდა, ეს ტექსტი კი, ჩვენ ვერ მოვიპოვეთ. „რუსთავი 2“ ტექსტს ინგლისურ ენაზე იძლევა. ანუ, ის, რაც დოლიმ წაიკითხა, ის ტექსტი არავის არ აქვს და მან რეალურად რა თქვა, არ ვიცით. რა თქმა უნდა, მას ისეთი რაღაც აქვს ნათქვამი, რაც „რუსთავი 2“-ს ეჩვენება, მაგრამ თუკი ამ დამოკიდებულებას საქართველოში მხარდამჭერი ჰყავს, ეს საკუთარი მოქალაქეების წინააღმდეგ წასვლას და იმის გადავადებას ნიშნავს, რაც ივნისში უნდა მივიღოთ. ეს რუსეთის ინტერესებში შედის და როგორც ჩანს, რომელიღაც ოპოზიციური პარტიის ინტერესებშიცაა, რომ არიქა, ხელისუფლებას წარმატება არ ჰქონდეს. ეს ხელისუფლების ამბავი არ არის, რადგან მას ჯიბეში დიპლომატიური პასპორტი უდევს, ისევე როგორც „ნაციონალურ მოძრაობას“. ვიზალიბერალიზაცია ქართველ ხალხს ეკუთვნის და გვინდა, რომ ჩვენს მოქალაქეებს საჩუქარი გავუკეთოთ. ამ ყველაფრისთვის ბევრი ნაბიჯი როგორც ამჟამინდელმა ხელისუფლებამ, ასევე მისმა წინამორბედებმა გადადგეს. აქამდე გვესმოდა, რომ ეს ყველაფერი ნაციონალების გაკეთებულია. ამ პროცესში გარკვეული წვლილი მათაც მიუძღვით და ეს არ უნდა დავუკარგოთ, მაგრამ ლომის წილი ახალ ხელისუფლებას აქვს. როგორც ჩანს, მათ იმის თქმის უნარი აქვთ, თქვან, რომ კარგია, თუკი ამ პროცესის გადავადება მოხდება.

ვიზალიბერალიზაციის პროცესის გადადება კარგია მათთვის, რადგან საარჩევნო წელია და „ნაციონალურ მოძრაობას“ არ აწყობს, უვიზო მიმოსვლის ამოქმედება ხელისუფლებას დაუკავშირდეს? გასული წლის დეკემბერში, მმართველი გუნდი ნაციონალებს ამ პროცესის წინააღმდეგ ნაბიჯების გადადგმაშიც ადანაშაულებდა...

- ამ ყველაფერს ვხედავდით, მაგრამ ისინი აცხადებდნენ, რომ რაღაც გვეშლებოდა, რადგან ისინი ამ პროცესის მომხრენი იყვნენ. ერთი-ორი ნაციონალი დავინახე, რომლებიც ბედნიერი არიან იმით, რომ თურმე, ეს არ იქნება და კარგია. მოსაზრებები გაჩნდა, რომ ვიზალიბერალიზაცია ხელისუფლების კონტროლის მექანიზმია. მათ ვახსენებ, რომ ევროპას ხელისუფლების კონტროლის მექანიზმი აქვს და მას ასოცირების ხელშეკრულება ჰქვია. შესაძლოა, ადგილი აქვს EPP-ს ერთი ჯგუფის აკვიატებას, შეცდომას და ნაციონალების მხარდაჭერის სურვილს, მაგრამ ამის მიუხედავად, „სახალხო პარტიის“ ქილიკს არ დავიწყებ. „ნაციონალური მოძრაობა“ იმას არ უფიქრდება, რომ თუკი ევროპულ ფრონტზე წარმატება არ გვექნება, მაშინ არჩევნებზე წარმატებას პრორუსული ძალები მიაღწევენ. ოღონდ კი, ნაციონალებმა წინააღმდეგობა ხელისუფლებას გაუწიონ და უნდათ, მწვანე შუქი ნინო ბურჯანაძესა და ირმა ინაშვილს აუნთონ, რაც ტრაგიკული შეცდომაა და მათ წინააღმდეგ მოქმედებს. „ნაციონალურ მოძრაობაშიც“ კი, გონიერი კაცი ამ წამოწყებას მხარს არ დაუჭერს.

ვიზის ტექნიკური საკითხით პოლიტიკური ამოცანების მიღწევა შეუძლებელია. ამ შეცდომაში ის პატიოსანი კაცი რომ შეიყვანეს, არ მიკვრის, რადგან ის ასეთ განცხადებებს პირველად არ აკეთებს. შარშან, ჯოზეფ დოლიმ განცხადება გააკეთა, რომ საქართველოში პოლიტპატიმრები არიან. თუკი ჯოზეფ დოლი საქართველოს იმიტომ სტუმრობს, რომ ხელისუფლებას სილა გააწნას, ეს ამოდენა პარტიისთვის სწორი არ არის.

თქვენ თქვით, რომ „ნაციონალური მოძრაობა“ მწვანე შუქს ნინო ბურჯანაძესა და ირმა ინაშვილს უნთებს. ბურჯანაძემ აღნიშნა, რომ ქართველი ხალხი შეცდომაში შეჰყავთ და მათ ვიზალებარალიზაციასთან დაკავშირებით, ცრუ მოლოდინებს უქმნიან...

- ბურჯანაძემ თავისთვის შანსი დაინახა, რომ ვიზალიბერალიზაციას ცრუ უწოდოს, რომელიც ხელში გვიჭირავს. ვიღაცეები იმისთვის ზრუნავენ, რომ ბურჯანაძეს ამის თქმის საშუალება ჰქონდეს. ბურჯანაძესა და პუტინზე მზე და მთვარე არავის არ ამოსდის, მაგრამ ვიღაცეები წინააღმდეგობას ქართველ ხალხს უწევენ და პრორუსულ ძალებს ეხმარებიან. ოპოზიციაში ჩვენც ვიყავით და შეიძლება, შეცდომები ჩვენც დავუშვით, მაგრამ ქვეყნის წარმატება საერთოა. ამ სამუშაოების დიდი ნაწილი ვიქტორ დოლიძემ ჩაატარა, რომელიც ამჟამად, ოპოზიციონერია და ის ამ საკითხისთვის ისევე ისე იბრძვის, როგორც ჩვენ. ხანდახან, უფრო მეტადაც კი, რადგან მეტს იცნობს და მეტი შეუძლია. თუ მაინცდამაინც პოლიტიკური დივიდენდები აღელვებთ, მათ შევახსენებ, რომ ვიზალიბერალიზაცია მოლდოვამ მიიღო, მაგრამ იმ ხელისუფლებამ არჩევნები წააგო. ეს არჩევნებში გამარჯვების გარანტია არ არის. ნუ ფიქრობენ, რომ ეს ჩვენ კოალიციას გვჭირდება. ჩემი სტუდენტები იმ ბედნიერ დღეს ელოდებიან, როცა ფეხს დაკრავენ და 29 ევროდ ევროპაში ჩაფრინდებიან.

ევროპარლამენტარების კრიტიკის და ნაციონალების შეტევების საპასუხოდ, ხელისუფლება რამდენად ადეკვატურია?

- ხელისუფლების მიერ გადადგმული ბოლო ნაბიჯები ძალიან ადეკვატურია. EPP-ზე თავდასხმა და იმის თქმა არ მოხდა, რომ არიქა, ისინი მიშას აგენტები არიან. სამთავრობო პოზიცია აწონ-დაწონილი და ზომიერი იყო. გახარებული და მადლიერი არავინ არ იყო, მაგრამ ჯოზეფ დოლზე აზრი ჩამომიყალიბდა, რომ პოლიტიკოსები არიან ძალიან დიდები და ძალიან მნიშვნელოვანები, მაგრამ პარტიის თავმჯდომარეები სხვადასხვანაირები არიან. „რესპუბლიკურ პარტიაში“ ხუთი თავმჯდომარე იყო და მათ შორის უკეთესი-უარესი ვინ იყო, ყველა ვიცი. მარტენსის შემდეგ, დოლი დიდი წინსვლა არ იყო და ამ პოლიტიკოსზე მაღალი აზრის არ ვარ.

თუმცა, ჯოზეფ დოლის EPP-ს წევრებზე რა გავლენა აქვს? მას უნარი აქვს, რომ ვიზალიბერალიზაციის მხარდაჭერა საფრთხის ქვეშ დააყენოს?

- 2013 წლამდე, ის ევროპარლამენტში EPP-ს ფრაქციის ხელმძღვანელი იყო. დოლი იმავე პოზიციაზე რომ იყოს, ეს უფრო მძიმე და საშიში დარტყმა იქნებოდა, მაგრამ ვიცით, რომ „სახალხო პარტიაში“ აზრები გაყოფილია და ამ საკითხს კენჭს ყველა ერთნაირად არ უყრის. ამ საკითხის განხილვას ტექნიკურად როგორ გადადებენ, არ ვიცით, რადგან ეს კომიტეტზეა შესული და ამის გადადება ძნელია.

საფრთხე არის, რომ კომიტეტში საკითხი ჩავარდეს?

- დიახ, საფრთხე არის, რომ ჩავარდეს სწორედ იმიტომ, რომ ახლა კი არა, მერე უნდა მივცეთო და მერე კენჭისყრა არ იქნება და საქართველოს საკითხი საერთოდ დამთავრდება. ზოგიერთი ადამიანი საქართველოს ამ საფრთხეში აყენებს, მაგრამ დარწმუნებული ვარ, ევროპარლამენტარები, მათ შორის, EPP-სა და „ალდე“-ს წევრები, სადაც აზრები გაყოფილია, ვითარებაში გაერკვევიან. რაც შეეხებათ „მწვანეებს“, „კონსერვატორებსა“ და „სოციალისტებს“, ისინი ჩვენს ინტერესებს უფრო მტკიცედ იცავენ და EPP-ს უპირისპირდებიან, რის გამოც შესაძლოა, მათ მეტი მობილიზება ჰქონდეთ და საყოველთაო ხმებიც მივიღოთ. დარწმუნებული ვარ, რომ „ლიბე“-ს კომიტეტში ეს საკითხი გავა და დოლის განცხადება მწარე, მაგრამ წარსულის გამოცდილება იქნება.

6 აპრილს, ჰოლანდიაში რეფერენდუმია დანიშნული უკრაინას ასოცირების თაობაზე რატიფიკაცია უნდა მისცენ თუ არა. ასევე ინგლისში დანიშნულია ევროკავშირთან დაკავშირებული ურთიერთობის რეფერენდუმი. ამ რეფერენდუმების შედეგი ერთმანეთთან მჭიდროდ დაკავშირებულია და მთლიანობაში, შესაძლოა, ყველამ ერთად პრობლემა ევროპულ ინტეგრაციას შეუქმნან. ზოგიერთები ცეცხლს ეთამაშებიან და ეს სასარგებლო არავისთვის არ არის. ხანდახან, იმის ახსნას ცდილობენ, რომ ეს EPP-ს ამბავი კი არ არის და საბაბებს ეძებენ, რაც ასე არ არის. ქართველები ტერორისტები არ ვართ და ევროპის აფეთქებას არ ვაპირებთ, არამედ იქ ჩასვლას, სწავლას და დათვალიერებას ვგეგმავთ. ევროპაში კარგი ხალხის გაგზავნას ვაპირებთ, რადგან ცუდი ხალხი ისედაც ჩავიდა. ბოლოს და ბოლოს, რუსეთზე და 37 მანეთიან ბილეთზე საუბარი ხომ უნდა დამთავრდეს და 39 ევროიან მილანზე და ბერლინზე საუბარი ხომ უნდა დაიწყოს? ვიზა მთელი ქვეყნის წარმატებაა და ვინც ამას ასე ვერ ხედავს, ის ხალხი მეცოდება, რადგან იმ ტოტს ჭრიან, რომელზეც სხედან. შესაძლოა, ეს ყველაფერი „ნაციონალურ მოძრაობას“ ძალიან ცუდად მოუბრუნდეს, რადგან თუკი რამე მოხდება, დამნაშავის ძებნა არ გაჭირდება და მათკენ თითის გაშვერა სრულიად სამართლიანად მოხდება.

მაპატიეთ, მაგრამ რაღაცეები გვინახავს, რაღაცეები ვიცით და რაღაცეები დოკუმენტირებული გვაქვს, ქვეყნის შიგნით თუ გარეთ, საქართველოს ამ საქმეში ვინ როგორ უშლიდა ხელს - რომელი პოლიტიკური პარტიები, ვისი თხოვნით, ვისი დაფინანსებით და ვისი ინტერესებით მოქმედებდნენ, ეს ყველაფერი ვიცით.

თუკი ეს ყველაფერი იცით და ადგილი აქვს სახელმწიფოს წინააღმდეგ ქმედებებს, ამ ფაქტებზე საჯაროდ რატომ არ საუბრობთ?

- იმიტომ არ ვსაუბრობთ, რომ შემთხვევით, მტრად ის არ გამოვაცხადოთ, ვინც მტერი არ არის. არ მინდა, რომ ამ მონაცემებზე დაყრდნობით მთელ პარტიას და მათ ამომრჩეველს ჩრდილი მივაყენო, რადგან ყველა ასე არ ფიქრობს. დროა, გაერკვნენ. დავინახე, რომ უკრაინის ხშირი სტუმარი ვაშაძე ამ განცხადებით აღფრთოვანებული იყო, მაგრამ მასაც არ უთქვამს, რომ ვიზალიბერალიზაცია არ სურს. ისე თქვან, როგორც ფიქრობენ. თქვან, რომ ვიზალიბერალიზაცია მხოლოდ იმ შემთხვევაში მოგვცენ, როცა ხელისუფლებაში ჩვენ მოვალთო. თუკი ამის თქმა უნდათ, ეს გარკვევით თქვან. მათ ეს აქტივობა ბუმერანგივით უკან მოუბრუნდებათ. მესმის, რომ პოლიტიკურად ცდებიან, მაგრამ შესაძლოა, ეს შეცდომა მათთვის კატასტროფული იყოს. თუკი საქართველო უვიზო მიმოსვლას არ მიიღებს, ეს კარგი არავისთვის არ იქნება, მაგრამ მათთვის შესაძლოა, გადამწყვეტად ცუდი იყოს. ეჭვი არ მეპარება, რომ ქვეყანა მათაც უყვართ და ისინი უცხო ქვეყნის აგენტები არ არიან. უბრალოდ, მათ ეჩვენებათ, რომ ხელისუფლებაში პრორუსული ძალები არიან და ევროპასთან დაახლოებას ხელს უშლიან. აქ ლოგიკა სად არის, არ ვიცი. ვფიქრობ, რომ ისინი არ აზროვნებენ.

მათ იმიტომ ვუფრთხილდებით და იმ დოკუმენტებზე იმიტომ არ გესაუბრებით, რომ აქ სატრაბახო არაფერია. თუკი ისინი იმას მიაღწევენ, რომ უვიზო მიმოსვლა არ იყოს, ეს ყველასთვის ცუდი იქნება. თუკი ისინი ხელისუფლებაში იმით მოვლენ, რომ რა კარგია, ქვეყანას წინასვლაში ხელი შევუშალეთო, მათ ტაშს არავინ არ დაუკრავს. როდესაც „რუსთავი2“-მა დაინახა, რომ საქართველო უვიზო მიმოსვლას იღებს, ეთერში ისეთი ხალხი დასვეს, რომლებზეც თქვეს, რომ ეს პროცესი მათი დამსახურება არისო. ბრიუსელში ძალიან კარგი ელჩი გვყავს, რომელიც ტელევიზიების იშვიათი სტუმარია, სამაგიეროდ, ხშირი სტუმარია ყოფილი ელჩი. ახლა სამადაშვილი რა შუაშია? გავიგეთ, რომ ერთმანეთი ექსპერტები ჰგონიათ, მაგრამ ვინც საქმეს აკეთებს, იმას მოუსმინონ. სამადაშვილმა საქმე გააკეთა და ისტორიულად დიდი მადლობა, მაგრამ დღეს ხომ სხვა არის? ისე არ არის, რომ თუკი ადამიანი „ნაცმოძრაობის“ წევრი არ არის, საქმეს ვერ აკეთებს. მართლა, ვიქტორ დოლიძემ ვერ გააკეთა? თედო ჯაფარიძემ? გგონიათ, რომ ბრიუსელსა და სტრასბურგში მართლა საშოპინგოდ დავდივარ და საშოპინგოდ უკეთესი ქალაქები არ ვიცი?!