ფრაქცია - „რესპუბლიკელების“ თავმჯდომარე დავით ბერძენიშვილი კოალიციაში ნომერ პირველ პარტიად „ქართულ ოცნებას“ ასახელებს და მეორე ძალად „რესპუბლიკურ პარტიას“ მიიჩნევს, თავად „ქართული ოცნება“ კი, პარტნიორების პათოსს არ იზიარებს და მიანიშნებს, რომ მთავრობაში მინისტრების ყოფნა პარტიულობით განპირობებული არ არის.

პრემიერ-მინისტრ გიორგი კვირიკაშვილსა და „რესპუბლიკური პარტიის“ ლიდერებს შორის გამართული შეხვედრის შემდეგ, გაცხადდა, რომ „ქართული ოცნება“ და რესპუბლიკელები მომავალი თანამშრომლობისთვის ორპარტიულ შეთანხმებას გაფორმებენ, თუმცა, ეს დოკუმენტი რას ითვალისწინებს, ამის თაობაზე კონკრეტული განმარტებები არ კეთდება და დამატებით ინფორმაციას არც კოალიციაში შემავალი სხვა სუბიექტები ფლობენ.

for.ge-სთან საუბარში დავით ბერძენიშვილი აცხადებს, რომ ეს არის ხედვები იმის თაობაზე, ქვეყნის ევროატლანტიკური არჩევანი როგორ უნდა უზრუნველყონ და ასვეე „რაღაც შეფერხებული თვითმართველობის რეფორმა როგორ განვითარდეს, რომ ტემპები დაჩქარდეს“.

კანონმდებელის განმარტებით, თუკი ეს ორი პარტია შეთანხმდა, ის მთლიან კოალიციას ამცნობს, რომ ამა და ამ საკითხებში ერთიანი და შეთანხმებული არიან, რომელიც კონკრეტულ საკითხებს და კონკრეტულ პასუხისმგებლობებს ეხება.

„ბევრი კიდევ სხვა საკითხია, მაგრამ ვერბალურ გამოხატვაზე მეტი სიმკაცრე უნდა იყოს. ასევე ევროატლანტიკური არჩევანი მკაფიო უნდა იყოს. დემოკრატიული სტრუქტურების, ხედვების, კონცეფციების ჩამოყალიბების მთელი წყებაა, რაზეც უნდა შევთანხმდეთ. ხუთპარტიულ კოალიციაში მთავრობაში ორი პარტიის წარმომადგენლები არიან და რესპუბლიკელებს ძალიან სერიოზულ სფეროებზე პასუხისმგებლობა გვაქვს აღებული. ამიტომ, „ქართული ოცნება“ და რესპუბლიკელები უფრო მჭიდრო თანამშრომლობას შესაძლებლად მივიჩნევთ და ამ თემებზე მოლაპარაკებას დავიწყებთ, მაგრამ ეს იმას არ ნიშნავს, რომ შეთანხმება აუცილებლად იქნება. ვფიქრობ, რომ „ქართული ოცნება“ და რესპუბლიკელები შეძლებენ, ისეთი მნიშვნელოვანი შეთანხმების მიღწევას, რომელიც კოალიციის სხვა სუბიექტებისთვის მისაღები იქნება“, - ამბობს ბერძენიშვილი.

კანონმდებელი პრემიერთან გამართულ შეხვედრას ეხმაურება და აღნიშნავს, რომ მოლოდინი იყო, რესპუბლიკელები გაიქცეოდნენ, სკანდალს მოაწყობდნენ და მათ გააგდებდნენ, მაგრამ გამგებთან გასაგდებები შეხვედრაზე თავის ფეხით რატომ მიდიან, ამაში ლოგიკის პოვნა ძნელია.

„ამ სახის თემები არც კი განხილულა. პირიქით, ძალიან კორექტული საუბარი იყო და შედეგიც ნათელია. როგორც სხვებისთვის არ არის საწყენი, რომ „ქართული ოცნება“ კოალიციის პირველი პარტიაა, ისე არავისთვის არ არის საწყენი, რომ დღეს, „რესპუბლიკური პარტია“ მეორე პარტიაა, რადგან მთავრობასა და პარლამენტში წარმომადგენლები ჰყავს. ამას მას შემდეგ ყოველთვის ვამბობ, რაც რესპუბლიკელებმა აღმასრულებელ ხელისუფლებაზე პასუხისმგებლობა ავიღეთ. სამი რესპუბლიკელი მინისტრი რომ არის და მთავრობაში სულ ორი პარტიის მინისტრები არიან, ეს, რა თქმა უნდა, „ქართული ოცნების“ და „რესპუბლიკური პარტიის“ მიერ წარმოდგენილი კოალიციური მთავრობაა. ევროპულ კოალიციებში ყველაზე მეტი საპარლამენტო მანდატის მქონე პარტიას პირველი პარტია ჰქვია. მომდევნო მანდატის მქონეს - მეორე პარტია. ანუ, ხშირად, პირველ პარტიას პრემიერის პარტიას ეძახიან, ხოლო მეორეს პარლამენტის თავმჯდომარის პარტიას. ამ ევროპულ ფორმულირებას ვგულისხმობ, როცა პირველ და მეორე პარტიას ვეძახი და არა ხარისხობრივ შედარებებს. ევროპულ პოლიტიკურ ლექსიოკონში ეს ელემენტარული წესია“, - დასძენს ბერძენიშვილი.

ფრაქცია „რესპუბლიკელების“ თავმჯდომარეს განცხადების ამ პათოსში ფრაქცია „ქართული ოცნების“ თავმჯდომარე გია ვოლსკი არ ეთანხმება.

როგორც for.ge-ს ვოლსკიმ განუცხადა, მას კოალიციაში რიგითობა საერთოდ არ ესმის. მისი თქმით, შეიძლება, მინისტრი არ გყავდეს, მაგრამ მარგი ქმედების კოეფიციენტი მაღალი გქონდეს.

„კოალიციურობაში ადგილებზე დაყენება სწორად არ მიმაჩნია და ამ შემთხვევაში, არც ამ შეფასებას არ ვეთანხმები. მინისტრი თუ არის, ის იმიტომ კი არ არის, რომ „რესპუბლიკური პარტიის“ წევრია, არამედ გათვალისწინებული გარემოებები და პირადი მონაცემებებია. აქ კოალიციური მთავრობა არ არის და მინისტრები შერჩეული არიან კოალიციის გარკვეული სუბიექტებისგან. კარგია, რომ ბატონ დავითს ასეთი ოპტიმისტური განწყობა გააჩნია და მზადყოფნას გამოხატავს, კოალიციურ რეჟიმში იმუშაოს. თუმცა, მინისტრების მთავრობაში ყოფნა არანაირად არ არის პარტიულობით განპირობებული“, - აცხადებს ვოლსკი.

ვოლსკი ორმხრივ შეთანხმებას ეხმაურება და ამბობს, რომ ალბათ, რესპუბლიკელებს ამაზეც რაღაც პირობები გააჩნიათ, რაზეც მას სრული ინფორმაცია ჯერჯერობით არ აქვს.

„იმედია, ისეთი გონიერი ადამიანები და მათ შორის, როგორიც დავით უსუფაშვილია, საინტერესო პირობებს დააყენებენ, მაგრამ კოალიციურობისთვის მნიშვნელოვანია, რომ საერთო კოალიციური ხედვები გვქონდეს, როგორც ეს პრემიერ-მინისტრმა განაცხადა“, - ამბობს ვოლსკი.

მოსალოდნელია თუ არა კოალიციის დაშლა, ამის თაობაზე ვოლსკი აცხადებს, რომ მრავალფეროვნება, რომელიც გარკვეულწილად არსებობს, ყოველთვის უფრო მომგებიანია.

„განსაკუთრებით, წინა საარჩევნო პერიოდში. ჩვენ უნდა ვიზრუნოთ, რომ კოალიცია შევინარჩუნოთ და თუკი დამატებით პირობებზეა შეთანხმება საჭირო, ეს რესპუბლიკელებთან იქნება თუ სხვა პარტიებთან, ყოველგვარი აჟიოტაჟის და პოლიტიკური სპეკულაციების გარეშე უნდა განვიხილოთ“, - აღნიშნავს კანონმდებელი.

პირველ-მეორე ნომრობაზე აპელირებს ვიცე-სპიკერი მანანა კობახიძეც. for.ge-სთან საუბარში კობახიძე აცხადებს, რომ თუკი საუბარია, ფრაქციის წევრთა და მინისტრების რაოდენობაზე, არითმეტიკული თვალსაზრისით, შეიძლება, პირველ-მეორე ნომრობა ასე დალაგდეს, თუმცა, ვინაიდან, ჯერჯერობით, შეთანხმებები არ გაფორმებულა და რაიმე სხვა დოკუმენტზე არ არის საუბარი გარდა იმისა, რაც 2012 წლის დეკლარაციის სახით არსებობს, შეიძლება, ასეთმა განცხადებამ დანარჩენი პარტნიორები გაანაწყენოს.

კობახიძის მოსაზრებით, ჯერჯერობით, კოალიცია ერთიანია და პრემიერმა ხაზი გაუსვა, რომ ეს ერთიანობა შენარჩუნებული უნდა იყოს და მუშაობა კოალიციურ რეჟიმში უნდა გაგრძელდეს.

„ვინმეს გასვლაზე და დაშლაზე საუბარი არ არის. საარჩევნო სუბიექტებს შორის უშუალოდ რა შეთანხმებები გაფორმდება, ეს ძალიან მნიშვნელოვანია. ეს იქნება ორმხრივი თუ მრავალმხრიანი თანამშრომლობა, შესაბამისი დოკუმენტები უნდა გაფორმდეს და ყველაზე მნიშვნელოვან პრინციპულ საკითხებზე უნდა შევთანხმდეთ, რაც ეროვნულ ფასეულობებზე, პრინციპებზე დამყარებულ თანამშრომლობას ეფუძნება. ასევე ისეთ მნიშვნელოვან საკითხებზე როგორიც არის ევროინტეგრაცია, ევროკავშირში გაწევრიანება. იმ სუბიექტების პოზიციები მკაფიო უნდა იყოს, ვინც ამის გარშემო გავერთიანდებით. ნებისმიერი ორმხრივი შეთანხმება მრავალმხრივ ფორმატში განხილული უნდა იყოს, ვინც კოალიციაში იქნებიან“, - აცხადებს კობახიძე.

კანონმდებელი შეთანხმების გაფორმებას მიესალმება და ამბობს, რომ ფორმალიზება და წერილობითი დოკუმენტების შექმნა მნიშვნელოვანია, რათა ყველამ იცოდეს, რა ღირებულებების, რა პრინციპების გარშემო ერთიანებდებიან და რა არის ისეთი, რომელსაც არასოდეს გადაუხვევენ და რა არის მთავარი, რომლის გარშემოც სრული კონსესუსია.

აღსანიშნავია, რომ დავით ბერძენიშვილის განცხადების შეფასებისგან თავს იკავებენ კონსერვატორები, ხოლო „ეროვნული ფორუმი“ პრემიერ-მინისტრის, ბიძინა ივანიშვილის მიერ შემოღებულ წესზე აპელირებს.

როგორც for.ge-ს პარტიის წევრმა, დეპუტატმა, თემურ მაისურაძემ განუცხადა, პირველ-მეორე ნომრობაზე „ეროვნულ ფორუმს“ ასეთი შეხედულებები არასოდეს ჰქონია და „ეროვნულ ფორუმს“ მიაჩნდა, რომ თანაბარი სუბიექტები უნდა ყოფილიყვნენ.

„როცა ივანიშვილი პრემიერი იყო, მან ურთიერთობის ისეთი წესი შემოიტანა, რომელიც ძალიან მარტივი და ყველასთვის გასაგები იყო. რა საკითხიც არ უნდა ყოფილიყო, ის განიხილებოდა და თუკი საკითხი საკამათო იყო, კენჭისყრა ჩატარდებოდა და გადაწყვეტილება ასე მიიღებოდა. ეს წესი ყოველთვის იყო. გუშინ რა შეთანხმება იქნა მიღებული და საიდან გამომდინარეობს, ამაზე ასე საუბარი ძნელია. როცა ინფორმაცია არ გაქვს, ექსპერტის ტონში საუბარი სწორი არ არის“, - აცხადებს მაისურაძე.

დეპუტატი შეთანხმებასაც ეხმაურება და აღნიშნავს, რომ შესაძლებელია, ორპარტიული შეთანხმებაც არსებობდეს, თუკი ის რაღაც მიზანს ისახავს და ეს ამ ორი პარტიის ხელით უფრო კარგად კეთდება.

„ოჯახი რომ წარმოიდგინოთ, სადაც ხუთი სუბიექტია. ფუნქციიდან და მიზნებიდან გამომდინარე, ყველაფერი შეიძლება არსებობდეს, მაგრამ თამაშის წესები ყველასთვის შეთანხმებული უნდა იყოს. ორ პარტიას შორის მიღებული შეთანხმება რაღაც განსაკუთრებულს უნდა გულისხმობდეს. ჩვენ გვაინტერესებს, 2016 წლის არჩევნების შემდეგ ქვეყნის განვითარების გეგმა როგორი იქნება, ჩვენ ვჭირდებით თუ არა ერთმანეთს ამ ხედვაში და რისთვის უნდა ვიყოთ ერთად?! თავდაპირველად, ასეთი რაღაცეები უნდა იყოს გამოკვეთილი, რომ ვიცოდეთ, ერთმანეთს ვეხმარებით თუ - ვერა. კოალიციის პირველი შეთანხმების მიზანი გასაგები იყო, რადგან ხელისუფლება იყო შესაცვლელი, ახლა სტრატეგიული გეგმა რა არის? კვოტებზე საუბარს მანამდე არ ვაპირებთ, სანამ არ გვეცოდინება, ერთმანეთისთვის რას ვაკეთებთ და სად შეგვიძლია ერთმანეთს დავეხმაროთ?!“, - დასძენს მაისურაძე.

რაც შეეხება „მრეწველების“ მოსაზრებებს, ისინი პოლიტსაბჭოს სხდომამდე შეფასებების გაკეთებისგან თავს იკავებენ და მცირე კომენტარით შემოიფარგლებიან. დარგობრივი ეკონომიკისა და ეკონომიკური პოლიტიკის კომიტეტის თავმჯდომარე ზურაბ ტყამალაძე ფიქრობს, რომ მისი მხრიდან ცოტა არასერიოზულია იმაზე საუბარი, რომ სექტემბერში ხელშეკრულება უნდა გაფორმდეს.