„ვფიცავარ, რომ არანაირი კავშირი არ მაქვს იმ სიბინძურესთან, რომელზეც საუბრობენ. ასევე, საქვეყნოდ ვფიცავარ, რომ ბოლომდე მივიყვან ჩემს დაწყებულ საქმეს“, - აცხადებს for.ge-სთან საუბრისას დიასპორის საკითხებში სახელმწიფო მინისტრის ყოფილი მოადგილე სანდრო ბრეგაძე, რომლის განცხადებით, თანამდებობიდან მხოლოდ იმიტომ გადააყენს, რომ შეუთანხმებლად დაიწყო ბრძოლა ერთსქესიანთა ქორწინების წინააღმდეგ.

for.ge გთავაზობთ ინტერვიუს სანდრო ბრეგაძესთან.

რა კავშირი გაქვთ გელა ღურწკაიასთან, რომელმაც „ქრონიკა +“-ის რედაქციაში მიიტანა მეხსიერების ბარათი, სადაც ეკა ბესელიას პირადი ცხოვრების ამსახველი კადრები იყო აღბეჭდილი?

სანდრო ბრეგაძე: ჩემთვის შეურაცხმყოფელი არის ამ საკითხზე საუბარიც კი. მოვუწოდებ მთავარ პროკურატურას, სასწრაფო წესით გამოაქვეყნოს იმ შემკვეთების ვინაობა, რომლებმაც მონაწილეობა მიიღეს ამ სიბინძურეში. მაქვს ინფორმაცია, რომ ქართველთმოძულე ძალები და კონკრეტულად, ნაციონალები ცდილობენ როგორმე გადაფარონ ჩემი გადადგომის რეალური მიზეზი.

თქვენს გადადგომამდე მოხდა ამ კადრების დაკავშირება თქვენთან...

- მათ სურთ, რომ ნებისმიერი ხერხით შეაჩერონ ჩვენი ბრძოლა ერთსქესიანთა ქორწინების დაკანონების წინააღმდეგ. ამიტომაც გადავდექი თანამდებობიდან და წავედი ყველანაირ მსხვერპლზე. პირადად ჩემთვის ეს საკითხი არის ჩვენი შვილების, მორალისა და ზნეობის საკითხი.

ამ საკითხზე აუცილებლად ვისაუბრებთ, მაგრამ ჯერ მიპასუხეთ, რა კავშირი გაქვთ ღურწკაიასთან, იცნობთ მას?

- არა.

ერთ-ერთ სატელევიზიო ინტერვიუში თქვენ აღნიშნეთ, რომ 2012 წლის შემდეგ არ გინახავთ გელა ღურწკაია...

- სამეგრელოს რეგიონში დაახლოებით 20-30 ათას ადამიანს ვიცნობ. შეიძლება ვიღაცას ოდესღაც ჩემთვის ხელი ჰქონდეს ჩამორთმეული, მაგრამ როგორც ჩემმა მეგობრებმა მითხრეს, 2012 წლის შემდეგომ ეს პიროვნება საერთოდ არ გამოჩენილა არც ერთ ასპარეზზე. მე არ მქონია მასთან არანაირი ურთიერთობა. რაც შეეხება თვითონ პრობლემას, პირადი ცხოვრების კადრების გავრცელებაზე არის ძალიან პატარა სასჯელი -1 წლამდე პატიმრობა. მოვუწოდებ საქართველოს პარლამენტს, რომ შევიდეს ცვლილება კანონში და დაახლოებით, 15-წლიანი სასჯელი დაეკისროს პირს, რომელიც ამ დანაშაულს ჩაიდენს. თავის დროზე „ნაციონალურმა მოძრაობამ“ დანერგა საშინელი პრაქტიკა, როდესაც ადამიანებს ფარულად უღებდნენ და შემდგომში ამ ჩანაწერებით აშანტაჟებდნენ. მოდით, პირდაპირ ვთქვათ, რომ ეს კადრები არც თქვენ გაგქვთ ნანახი და არც მე.

ნამდვილად არ მაქვს ნანახი და არც მაქვს ამის სურვილი. სწორედ ამიტომ მინდა გკითხოთ, რატომ დაუკავშირდა თქვენს სახელეს ამ კადრების ისტორია? გავრცელებული ინფორმაციით მსგავსი საკითხები სწორედ თქვენს ოფისში წყდებოდა...

- შესაძლოა, ეს კადრები საერთოდ არ არსებობდეს.

და პროკურატურამ არარსებულ კადრებზე დაიწყო გამოძიება?

- არ ვიცი. გეუბნებით, რომ შესაძლოა, არც არსებობდეს-თქო. ვამბობ იმას, რასაც ვფიქრობ. ადამიანს ვაყენებთ უხერხულ მდგომარეობაში. საერთოდ, ბინძურ ადამიანებს არაფრად ადარდებთ დედას, შვილს და მშობელს მიაყენონ შეურაცხყოფა იმით, რომ რაღაცა არარსებულ თემებზე დაუწყონ საუბარი. არა მგონია, რომ ქალბატონ ეკა ბესელიას სასირცხვილო, ან მაკომპრომეტირებელი რამ ჩაედინოს, ამაში დარწმუნებული ვარ. შეიძლება ვიღაცას აწყობს ხალხმა იფიქროს, რომ რაღაცა სასწაული არსებობს იგივე სანდრო ბრეგაძეზე, ან ნებისმიერ სხვა ადამიანზე. ამ დროს რეალურად ეს არ იყოს.

რაც შეეხება ლადო სადღობელაშვილს და მისი აქტიურობას, რა კავშირი გაქვთ მასთან?

- თქვენ ისე გამოგყავთ, რომ მე ვყოფილვარ ამ ქვეყნის რუხი კარდინალი. ეს არის აბსოლუტურად გადამეტებული შთაბეჭდილება ჩემს შესახებ. რაც შეეხება ლადო სადღობელაშვილს, ის გახლდათ გაერთიანებული ოპოზიციის ერთ-ერთი აქტიური ახალგაზრდა, რომელსაც ჯერ კიდევ „თანასწორობის ინისტიტუტიდან“ ვიცნობ, როდესაც უკომპრომისოდ ებრძოდნენ სააკაშვილის რეჟიმს.

ლადო სადღობელაშვილისთვისაც შეურაცხმყოფელი იქნება ვინმემ მისი სახელი დაუკავშიროს რომელიმე პოლიტიკურ ჯგუფს, რადგანაც ასეთი რამ ბუნებაში არ არსებობს. თუ ადამიანები პოლიტიკურად აქტიურობენ, ეს მათი პირადი ინიციატივაა. თუმცაღა ერთი რამ შემიძლია ვთქვა, რომ „თავისუფალმა თაობამ“ სასიკვდილო დარტყმა მიაყენა როგორც „ნაციონალურ მოძრაობას“, ასევე მისგან კონტროლირებად „თავისუფალი ზონის“ ექსტრემისტულ დაჯგუფებას.

ანუ, თქვენ არ გემორჩილებათ ლადო სადღობელაშვილი?

- მე საერთოდ ბევრი ძალები მემორჩილება აშშ-ში, საფრანგეთში.

თქვენზე ამხელა წარმოდგენა ნამდვილად არ მაქვს, მაგრამ მიპასუხეთ მოქმედებს თუ არა თქვენი დავალებით სადღობელაშვილი?

- ნუ აყენებთ ახალგაზრდა ადამიანს შეურაცხყოფას.

თქვენ თვლით, რომ შეურაცხყოფაა, როდესაც ამბობენ, რომ თქვენთან არის კავშირში?

- შეურაცხყოფაა, როდესაც ამბობენ, რომ ჩემს დავალებებს ასრულებს. ეს არის შეურაცხმყოფელი.

გარდა იმისა, რომ სადღობელაშვილის აქტიურობა თქვენთან არის დაკავშირებული, ამბობენ, რომ მის აქტიურობასაც თქვენ აფინანსებთ. ამ ბრალდებაზე რას იტყვით?

- არა მარტო ლადო სადღობელაშვილს, არამედ მსოფლიოში ბევრ არასამთავრობო ორგანიზაციებს ვაფინანსებ. არასერიზულია ამაზე საუბარი, როდესაც სერიოზული კითხვა დამისვით, სერიოზულად გიპასუხეთ. ჩემთვის აბსოლუტურად ნათელია ყველაფერი ის, რაც ხდება. ნამდვილად არ ვაპირებ აყოლას იმაზე, რაც ბოკერიას თავში მოიხარშა.

გია ხუხაშვილი ამბობს, რომ ამ სკანდალში კილაძე ბრეგაძეზე ბევრად ჭკვიანი აღმოჩნდაო...

- გია ხუხაშვილს ურჩევნია იმ კორუფციულ სქემებს და პიქსელის შენობაში ნაწრომებ შავ-ბნელ მოლაპარაკებებს მიხედოს, რომლითაც „ნაციონალური მოძრაობის“ არაერთი ბანდიტი ბიზნესმენი გადაურჩა სამართლიან პასუხისმგებლობას. ხუხაშვილმა პირდაპირ განაცხადა, რომ ბიზნესმენები მას აღსარებას აბარებდნენ, რომელი პადრე მყავს ხუხაშვილი, რომ მას აბარებენ აღსარებას?! თავის წარსულ მიხედოს და ვურჩევ, რომ ჭკვიანად იყოს. შეიძლება საკმაოდ ცუდ მდგომარეობაში აღმოჩნდეს. ხუხაშვილებმა გააფუჭეს ჩვენი ბრძოლა „ნაციონალური მოძრაობის“ წინააღმდეგ.

როგორ ფიქრობთ, ელისო კილაძე რატომ უკავშირებს ამ სკანდალურ ისტორიას თქვენს სახელს?

- ვფიქრობ, ქალბატონი კილაძე შეცდომაშია შეყვანილი, მაგრამ ეს ყველაფერი შეგიძლიათ ქალბატონ ელისოს ჰკითხოთ.

ბატონო სანდრო, თუკი ის ცილს გწამებთ, რატომ არ მიმართეთ ცილისწამებისთვის პროკურატურას?

- იცით, იქ არ იყო გაცხადებული, რომ ეს სანდრო ბრეგაძემ ჩაიდინა. გამოთქმული იყო ვარაუდი რამდენიმე პიროვნებაზე. ვარაუდის გულისთვის კი, არავინ არ ისჯება. ნამდვილად არ ვაპირებ, რომ ვიღაცეებს ტყუილ-უბრალოდ ვუჩივლო სასამართლოში, მაგრამ არაერთხელ ვთქვი, მას შემდგომ, რაც დაიწყებოდა ჩემი უკომპრომისო ბრძოლა ერთსქესიანთა ქორწინებისა და ანტიდისკრიმინაციული კანონის გაუქმების წინააღმდეგ, ქართველთმოძულე ძალები დაიწყებდნენ ჩემს წინააღმდეგ პროვოკაციას.

ვინ არიან ეს ქართველთმოძულე ძალები?

- ამის სათავეში არის გიგა ბოკერია. მეტსაც გეტყვით, „რესპუბლიკური პარტია“ თავის გადაწყვეტილებას უთანხმებს გიგა ბოკერიას.

რა საკითხებს უთანხმებენ ბოკერიას?

- იმ საკითხებს, რომელიც შეეხება ეროვნულ საკითხებს. თუნდაც ერთსქესიანთა ქორწინებასთან დაკავშირებით გიგა ბოკერიას და „რესპუბლიკური პარტიის“ პოზიცია იდენტურია. ეს პოზიცია მათ ერთობლივად შეიმუშავეს.

თქვენ გაქვთ მტკიცებულება იმისა, რომ ბოკერიამ და „რესპუბლიკელებმა“ ერთობლივად შეიმუშავეს ეს პოზიცია?

- მტკიცებულება როგორ, ჩანაწერი გჭირდებათ თუ ხელმოწერილი დოკუმენტი?

მტკიცებულება, რითაც დასტურდება თქვენი განცხადება, ეს ძალიან მნიშვნელოვანი განცხადებაა...

- მე მაქვს დაზუსტებული ინფორმაციები. თქვენ გავიწყდებათ, რომ მე გახლდით სახელმწიფოს ერთ-ერთი უმაღლესი თანამდებობის პირი. რა თქმა უნდა, სახელმწიფო უმაღლესი თანამდებობის პირს აქვს ისეთი ინფორმაციები, რომელიც არ აქვს ჩვეულებრივ ადამიანს.

თუკი „რესპუბლიკელები“ კოაბიტაციაში არიან გიგა ბოკერიასთან, მაშინ რატომ რჩებიან კოალიციაში, რატომ არ გარიცხეს კოალიციიდან?

- ეს კოალიცია არც ჩემი შექმნილი არ არის და არც ჩემი უფლება-მოსილებაა კოალიციის დაშლა. ეს უნდა კითხოთ კოალიციის ხელმძღვანელებს. ყველამ ყველაფერი იცის „რესპუბლიკელების“ თაობაზე. კარგად იციან, რომ მათი თანამშრომლობა „ნაციონალურ მოძრაობის“ თავისუფლების ინსტიტუტის ფრთასთან იყო და არის ისევე, როგორც „ნაციონალური მოძრობის“ მიერ კონტროლირებად არასამთავრობო ორგანიზაციებთან, როგორიც არის კაპიტანი გიგაური, ლომჯარია, ე.წ. საზოგადო მოღვაწეები გოგი გვახარია, გიგი თევზაძე, გია ნოდია და ა.შ. შეიძლება პიროვნულად მაინცდამიანც არ უყვარდეთ ერთმანეთი, მაგრამ მათ ჰყავთ საერთო პატრონი. ის საერთო პატრონი რა დავალებასაც მისცემს, იმ დავალებას ასრულებენ.

ვინ არის ეს სერთო პატრონი?

- ეს საერთო პატრონი დღეს საქართველოში არ იმყოფება. დიახ, მე შემიძლია ცალსახად გითხრათ, რომ გიგა ბოკერია და „რესპუბლიკური პარტია“ აქტიურად თანამშრომლობს მთელ რიგ საკითხებში და ასევე, აქტიურად იბრძვიან ყველა ქართული და ეროვნული გადაწყვეტილების წინააღმდეგ.

ერთი მაგალითი დამისახელეთ?

- როდესაც ჩვენ საკონსტიტუციო შესწორება შევიტანეთ საქართველოს პარლამენტში, მხოლოდ ორო პარტია წავიდა წინააღმდეგი. ასევე, როდესაც საქართველოს პატრიარქს გაუგონარი შეურაცხყოფა მიაყენა ბატონმა ვაჭარაძემ, მე გამოვედი მის წინააღმდეგ, ხოლო ვაჭარაძის დამცველთა რიგებში ვიხილეთ მხოლოდ „რესპუბლიკელები“ და „ნაციონალები“. კიდევ უფრო შორს წავალ, როდესაც ვანო მერაბიშვილის ხელმძღვანელობით გლდანის ეკლესია დაარბია ახალაიას და სანოძის სპეცრაზმმა, მაშინ გიგა ბოკერია და ლევან ბერძენიშვილი მხარს უჭერდნენ ეკლესიის დარბევას.

ბატონო სანდრო, თქვენ იყავით მინისტრის მოადგილე და თუკი იცოდით ამ კავშირების შესახებ, რატომ მაშინ არ ამბობდით, როდესაც იყავით ხელისუფლებაში, ან ხელისუფლების შიგნით თუ გქონდათ ამის თაობაზე საუბარი? ტრადიციად დამკვიდრდა საქართველოში, ხელისუფლების კრიტიკას იწყებენ მაშინ, როდესაც თანამდებობას ტოვებენ...

- ჩემი თანამდებობაზე მოღვაწეობის პერიოდში მუდმივად ვაკრიტიკებდი „რესპუბლიკურ პარტიას“. შემიძლია ამის დოკუმენტებიც მოგაწოდოთ, სადაც არის პოლემიკა ჩემსა და დავით ზურაბიშვილს შორის, ასევე ჩემსა და თინა ხიდაშელს შორის. 2012 წელს ქართული ოპოზიციის წარმომადგენლები გავერთიანდით ბიძინა ივანიშვილის გარშემო იმისათვის, რომ დაგვემარცხებინა სააკაშვილის რეჟიმი. ეს ამოცანა შევასრულეთ. ამის შემდგომ ჩვენს შორის იყო პირობა, რომ მომავალ არჩევნებში ყველა პარტია ცალ-ცალკე გავიდოდა და აღარ იქნებოდა კოალიციური რეჟიმი. ამავე დროს, ძალიან გთხოვთ, მე ნუ წამომიყენებთ ბრალდებას.

მე არ გიყენებთ ბრალდებას, მე ვსვამ კითხვებს...

- ეს ბრალდებაა, როდესაც ამბობთ, რომ თანამდებობის წასვლის შემდგომ აკეთებთ ამ განცხადებას. თანამდებობაზე ყოფნის დროს არაერთხელ დავაყენე საკითხი, რომ „რესპუბლიკური პარტია“ არ უნდა იყოს კოალიცია „ქართული ოცნების“ შემადგენლობაში. სხვათა შორის, ყოფილ პრემეირ-მინისტრთან ბატონ ირაკლი ღარიბაშვილთან არაერთხელ მქონდა საუბარი „რესპუბლიკური პარტიის“ შესახებ და მის ნეგატიურ როლზე, რაშიც ხშირ შემთხვევაში მეთანხმებოდა ყოფილი პრემიერი. სწორედ, „რესპუბლიკელები“ გახდნენ ერთ-ერთი მნიშვნელოვანი შემადგენელი ნაწილი იმისა, რომ ირაკლი ღარიბაშვილი იძულებული გახდა წასულიყო თავისი თანამდებობიდან.

მინდა გითხრათ, რომ არანაირი პიროვნული დავა „რესპუბლიკურ პარტიასთან“ არ გამაჩნია. არ მძულს ბატონი დავით უსუფაშვილი და არც ერთი რესპუბლიკელი. ჩემთვის მიუღებელი არის ის პოლიტიკური იდეოლოგია, რომელსაც ისინი ატარებენ. ეს მიუღებელია ჯერ კიდევ იმ დროიდან, როდესაც ებრძოდნენ საქართველოს პირველ კანონიერ პრეზიდენტს ბატონ ზვიად გამსახურდიას და მის იდეოლოგიას.

„თავდაცვის მინისტრმა პრემიერი არჩევანის წინაშე დააყენა და ულტიმატუმი წაუყენა, რომლის მიხედვით ან მე, ან ხიდაშელი უნდა აერჩია“, - ამბობთ თქვენ. რა ულტიმატუმი წაუყენა ხიდაშელმა პრემიერს?

- როდესაც პარლამენტში შევედი საკონსტიტუციო შესწორების ინიციატივით, ეს არ იყო შეთანხმებული კოალიციის ყველა წევრ სუბიექტთან და ამ შემთხვევაში „რესპუბლიკელებს“ განსხვავებული პოზიცია გააჩნდათ. თინა ხიდაშელმა დასვა კოალიციური დისციპლინის საკითხი და ბრალი დამდო იმაში, რომ მე მივდიოდი კოალიციის ერთ-ერთი პარტიის ინტერესების წინააღმდეგ. შემდგომში დაამატა, რომ ჩემი თვითნებობა უკვე ყელში ამოვიდა. ამიტომ, მე უნდა გადავმდგარვიყავი თანამდებობოდან, წინააღმდეგ შემთხვევაში „რესპუბლიკელები“ იფიქრებდნენ ღირდა თუ არა ამ გუნდში ყოფნა. ამ შემთხვევაში, ჩემი გუნდი გავანთავისუფლე იმ ტვირთისგან, რასაც სანდრო ბრეგაძე ჰქვია. მე ასე დამიყენეს საკითხი - მოკლე დროის განმავლობაში თუ არ გავჩერდებოდი და თავად არ დავწერდი განცხადებას, მაშინ თავად დაწერდნენ განცხადებას ჩემი განთავისუფლების შესახებ.

შეგიძილიათ დაასახელოთ პიროვნება, ვინც ასე დაგიყენათ საკითხი?

- ძირითადად ეს იყო მინისტრთა კაბინეტის წევრები. მათ გადმომცეს პრემიერ-მინისტრის პოზიცია.

თქვენ ამბობთ, რომ ერთსქესიანთა ქორწინების გამო მოხდა თქვენი განთავისუფლება, მაგრამ თქვენთან დაპირისპირებული მხარე ამბობს, რომ თქვენი თანამდებობა შეეწირა დეპუტატის პირადი ცხოვრების კადრების თემას...

- ჩემი მოწინააღმდეგეები თავის გასამართლებად ხვალ იტყვიან, რომ ჩემი თანამდებობა შეეწირა სირიის ხელისუფლებასთან კავშირს. ამ სისულელეზე სერიოზულად რომ გიპასუხოთ, ამით არც თქვენ ჩაგაყენებთ უხერხულ მდგომარეობაში და არც ჩემს თავს.

გავრცელდა ინფორმაცია რომ გელა ღურწკაიამ თქვენ დაგასახელათ...

- მე ვფიქრობ, რომ სულ მალე, რომელიმე მარგინალური პოლიტიკური ჯგუფი, ან ანგაჟირებული პერსონა 11 სექტემბრის ტერაქტში დამდებს ბრალს. მე მოუწოდე პროკურატურას დ ალბათ, პროკურატურა უახლოეს ხანებში დაასახელებს იმ ადამიანებს, რომლებიც ამ სიბინძურეში იყვნენ ჩარეული.

საინტერესოა, რატომ ითქვა, რომ სადრო ბრეგაძე დგას ამის უკან, რატომ თქვენდა არა სხვა. თქვენ რა ვერსია გაქვთ?

- როგორც კი გამოვედი ერთსქესიანთა ქორწინების აკრძალვის ინიციატივით, მეორე-მესამე დღეს დაიწყო ეს პიარი. მიუხედავად იმისა, რომ გიგა ბოკერია ჩემი პოლიტიკური მოწინააღმდეგა, პატივს ვცემ მის ნიჭს, რომელსაც ის კეთილი საქმეებისთვის არ იყენებს. მშვენივრად გეგმავს ამ პიარ-აქციებს. ისიც ვიცი, რომ ბატონმა ბოკერიამ „რუსთავი 2“-ს დაავალა, რომ ჩემს წინააღმდეგ უნდა გავიდეს შეკევთილი სიუჟეტი.

ვფიცავარ ჩემს სარწმუნეობას, გადამყენეს იმიტომ, რომ შეუთანხმებლად დავიწყე ბრძოლა ერთსქესიანთა ქორწინების წინააღმდეგ. ასევე, ვფიცავარ, რომ არანაირი კავშირი არ მაქვს იმ სიბინძურესთან, რომელზეც საუბრობენ. ასევე, საქვეყნოდ ვფიცავარ, რომ ბოლომდე მივიყვან ჩემს დაწყებულ საქმეს. თანამდებობიდან გადამაყენონ კი არა, კოცონზეც რომ დამწვან ჯორდანო ბრუნოსავით, ციხეში, რომ ჩამაგდონ და ჩამალპონ მერაბ კოსტავასავით, მაინც ბოლომდე მივიყვან ამ საკითხს.