კოალიცია - „ქართულ ოცნებაში“ „მრეწველები“ და „რესპუბლიკელები“ ერთმანეთს დაუპირისპირდნენ, ტყიბულის მაჟორიტარი დეპუტატი ელისო ჩაფიძე კი, ხელისუფლებას. ამ ეტაპზე, ბერძენიშვილ-თოფაძის საპარლამენტო გუნდები პოლიტიკური განცხადებების გაკეთებას თავს არიდებენ და პოლიტსაბჭოს სხდომას ელოდებიან, ჩაფიძე კი, სოლიდარობის ნიშნად ტყიბულში გაფიცულ მეშახტეებთან ერთად იმყოფება.

რა პროცესები ვითარდება კოალიციაში, ამის გარკვევის მიზნით, for.ge ფრაქცია „ქართული ოცნების“ თავმჯდომარეს, გია ვოლსკის ესაუბრა:

„რესპუბლიკელებსა“ და „მრეწველებს“ შორის არსებული დაპირისპირება სახეზეა. რა ხდება კოალიციაში?

- „რესპუბლიკელებმა“ და „მრეწველებმა“ პირად ურთიერთობებთან დაკავშირებით, კომენტარების გაკეთებისგან თავი შეიკავეს. ალბათ, შეფასებებისგან თავს მეც შევიკავებ იმდენად, რამდენადაც არაკორექტული მიმართვების მომსწრენი გავხდით. რა და როგორ მოხდა, ისტორიას არ მივყვები, მაგრამ გოგი თოფაძემ შიდა და საგარეო საკითხებზე ისაუბრა, რაც გარკვეულწილად, სახელმწიფო პოლიტიკის მთავარ მიმართულებას სცილდება. ჩვენს წიაღში ამ საკითხებზე კითხვები წარმოიშვა, რომელსაც რეზონანსი საერთაშორისო დონეზე არ ჰქონია. თუკი კითხვები არსებობს, მას პასუხების გაცემა უნდა, რომელსაც პოლიტსაბჭო პასუხს გასცემს.

თქვენ ამბობთ, რომ დაპირისპირების შეფასება არ გსურთ, თუმცა, ორივე მხარის განცხადებებმა კოალიცია დააზიანა, რადგან თოფაძემ ისაუბრა, რომ საგარეჯოს არჩევნები გაყალბდა და ამ პროცესში ჯარი იქნა გამოყენებული, ხოლო დავით ბერძენიშვილმა თოფაძის განცხადებები თავდაცვის მინისტრის წინააღმდეგ დაწყებულ კამპანიად შეაფასა, რომელიც საქართველოს ხელისუფლებიდან ევროინტეგრაციის ფონზე ყველაზე აქტიურია...

- ეს არასწორი შეფასება მგონია, რადგან თოფაძემ თინა ხიდაშელი იმიტომ ახსენა, რომ საგარეჯოს არჩევნებზე საუბრობდა და არა იმიტომ, რომ ის ევროპულ და ევროატლანტიკურ ფორუმზე იყო წარმოდგენილი, ან გარკვეული პოზიცია გააჩნია. ეს ორი თემა ერთმანეთისგან უნდა გავმიჯნოთ.

თუკი თქვენ ფიქრობთ, რომ თავდაცვის მინისტრის წინააღმდეგ ანტიკამპანია არ მიმდინარეობს, მაშინ „რესპუბლიკელებს“ ამ თემის წამოწევა რაში დასჭირდათ?

- თოფაძემ არასწორი ქმედება ხიდაშელს მიაწერა და არჩევნებთან დაკავშირებით, ნებისმიერი სხვა პირი რომ ყოფილიყო, მაშინ იმაზეც იტყოდა. საგარეო მიმართულების პრივატიზება სწორად არ მიმაჩნია. ხიდაშელთან დაკავშირებით გამოთქმული შეფასებები საარჩევნო თემას ეხება და არა - საერთაშორისო პოლიტიკას.

ვინაიდან, გოგი თოფაძე სკანდალურ განცხადებებს აკეთებს, მისი შეჩერების მცდელობა არ გქონიათ?

- რა საკვირველია, ამ საკითხებზე ლაპარაკი გვქონდა და ტელეეთერით ზურაბ ტყემალაძე გამოვიდა და თქვა, რომ „მრეწველებს“ საგარეო კურსზე ის პოზიცია აქვთ, რომელსაც კოალიციამ ხელი მოაწერა. თუკი კოალიციის დეკლარაციის გარკვეულ პრინციპებს რაიმე კომენტარები გადასცდა, ეს „მრეწველების“ პოზიციად არ უნდა განვიხილოთ.

თუმცა, გოგი თოფაძემ for.ge-სთან ინტერვიუში ისაუბრა იმაზე, რომ სერგეი ლავროვი საქართველოს თბილად იხსენებს, ხოლო ვლადიმერ პუტინი მიიჩნევს, რომ პრობლემა ჰქონდა არა საქართველოსთან, არამედ სააკაშვილთან. ამას გარდა, თოფაძე რუსეთთან დიალოგის აღდგენის მომხრეა. ფაქტია, რომ ეს ადამიანი ამ თემებზე ღიად საუბრობს...

- მას იმ გაგებაში ნაკლებად ვეთანხმები, რომ ვინმე თბილად საუბრით რუსეთის რეალურ პოლიტიკას გამოხატავს. რუსეთის მხრიდან რბილად და თბილად საუბარი „რბილი ძალის“ პოლიტიკის შემადგენელი ნაწილია. რუსეთთან ურთიერთობა საკმაოდ რთულ ვითარებაში გვიხდება და ვფიქრობ, რომ ჩვენი პოლიტიკა სწორია. ვინმეს თბილი საუბარი ის არ არის, რაც სერიოზული პოლიტიკის შეფასებისთვის შეიძლება გამოყენებული იქნეს. „მოსკოვს ცრემლების არ სჯერა“.

თქვენ კოლეგებს, რომ სჯერათ? თქვენმა ხელისუფლებამ ასოცირების ხელშეკრულების ხელმოწერით და ვალდებულებების აღებით აჩვენა, რომ ევროატლანტიკური კურსის მომხრეა, თუმცა, თქვენს კოალიციაში არიან ადამიანები, რომლებიც სხვაგვარად ფიქრობენ. ერთია ის, რომ მათ დეკლარაციას ხელი მოაწერეს, მაგრამ მეორეა - რას საუბრობენ. შესაძლოა, თუნდაც, საგარეო მიმართულების გამო, კოალიციის შემადგენლობა გადაიხდოს?

- თუკი ვინმე იმ კურსის საწინააღმდეგოდ აშკარად გამოვა, რომელიც კოალიციას გააჩნია, რა თქმა უნდა, ის არ შეიძლება განვიხილოთ როგორც პარტნიორი, მაგრამ კითხვები გაჩნდა და სრული პასუხები ჯერჯერობით არ გვაქვს. თუკი ვინმე ამ ნიშნით კოალიციის დატოვებას მოინდომებს, გზა ხსნილია, თუმცა, „მრეწველებს“ ამ სურვილს მაინცდამაინც ვერ ვატყობ. კითხვები, რაც გაჩნდა, მათზე პასუხები უნდა მოვისმინოთ.

გოგი თოფაძემ for.ge-სთან ინტერვიუში აღნიშნა, რომ ნატო აგრესიული სამხედრო ბლოკია, სადაც საქართველოს არ იღებენ და ქვეყანა ნეიტრალური უნდა გახდეს. მისი მხრიდან ეს პირდაპირი გზავნილები არ არის?

- პირდაპირ გზავნილებად ამასაც ვერ ჩავთვლი. რეალობაა, რომ ნატოსთან თანამშრომლობის ის ხარისხი გაგვაჩნია, რაც შეიძლება ამ პერიოდისთვის საქართველოს გააჩნდეს, თუნდაც - სამშვიდობო მისიებში მონაწილეობა. ეს ბრძოლაა საერთაშორისო ტერორიზმის და დანაშუალების წინააღმდეგ, რომელიც თითოეულ ქართულ ოჯახს ეხება. საკითხს ისე არ შევაფასებდი, რომ ჩვენ ნატო არ გვღებულობს. ნატოს ღია კარის სტრატეგიული ხედვა არსებობს და როცა ნატო გარკვეულ ნაბიჯს არ დგამს, ეს შეიძლება დროში გაწელილი პროცესი იყოს, მაგრამ ეს მიზანს არ აზიანებს. ჩვენი ურთიერთობის ხარისხი და მიზანი ისაა, რაც საქართველოს სჭირდება.

ჩვენი პოლიტიკური პარტნიორები საქართველოს უსაფრთხოებაზეც ბევრს ფიქრობენ. ამ თემაზე დიდი საკამათო არაფერია. თუ დღეს არ გვღებულობენ, ხვალ მიგვიღებენ, მაგრამ ჩვენც რაღაც საშინაო დავალებები შესრულებელი გვაქვს. ნატო მხოლოდ სამხედრო ორგანიზაცია არ არის და აქ მთელი რიგი საკითხებია, რომელიც მხოლოდ საქართველოზე დამოკიდებული არ არის და საერთაშორისო პოლიტიკური კონიუნქტურა გარკვეულ გადაწყვეტილებებს განაპირობებს, რომელიც მოცემული მომენტისთვის ქვეყნისთვისაა საჭირო და სასარგებლო. ხვალ შეიძლება, ეს მომენტი აბსოლუტურად სხვანაირად ჩამოყალიბდეს.

რამდენად არის შესაძლებელი, რომ „მრეწველებსა“ და „რესპუბლიკელებს“ შორის არსებული დაპირისპირება „რესპუბლიკური პარტიის“ გამარჯვებით და კოალიციაში დომინანტობით დასრულდეს?

- დომინანტობას შეიძლება ვინმე ითხოვს, მაგრამ ეს ჩემთვის ცნობილი არ არის. ობიექტური პირობებიდან გამომდინარე, „ქართული ოცნება“ ლიდერია, თუნდაც რაოდენობის მიხედვით, მაგრამ როდესაც პოლიტსაბჭოზე საკვანძო საკითხების განსახილველად ვსხდებით, იქ დომინანტი არავინ არ არის და ყველა სუბიექტი ერთი და იმავე რაოდენობის მონაწილით არის წარმოდგენილი. შესაბამისად, გადაწყვეტილება კოლექტიურად მიიღება და ერთმანეთს ანგარიშს ვუწევთ და ეს მომავალშიც ასე უნდა გაგრძელდეს.

ვინაიდან, „რესპუბლიკელებზე“ ვსაუბრობთ, გკითხავთ. „რესპუბლიკური პარტია“ უმრავლესობის წევრების თავდასხმის ობიექტები ხშირად არიან. მათ შორის, ზაზა პაპუაშვილის თავდახმის ობიექტიც გახდა. არ ფიქრობთ, რომ ვინაიდან ხელისუფლებას წარმოადგენთ, თანაგუნდელების მიმართ შეფასებები უფრო ზომიერი უნდა იყოს?

- ვფიქრობ, რომ უფრო ზომიერი უნდა იყოს, მაგრამ ხშირ შემთხვევაში, იმ თემებზე თავის შეკავება არ ღირს, რაც ცალკეულ დეპუტატებს გააჩნიათ. სხვა პოლიტიკურ რეალობაში ვცხოვრობთ და ფარდის მიღმა არაფერი მიმდინარეობს. ერთი საკითხია, თუნდაც პაპუაშვილის განცხადებები რეალობას რამდენად შეესაბამება, მაგრამ „რესპუბლიკელებს“ თავისი მხარდამჭერები ჰყავს და ვერც იმას ვიტყოდი, რომ ისინი ასე ცალსახად არ უყვართ. მხოლოდ პაპუაშვილის განცხადებას ვაფასებთ, მაგრამ ცალკეული პირების მიერ მკვახე განცხადებებიც მომისმენია, რაც მიუღებელია და საუბრის მანერა მნიშვნელოვნად დასახვეწია, მათ შორის - „რესპუბლიკური პარტიის“ წარმომადგენლებისაც, მაგრამ ეს ცალკეულ გამოვლინებებად განიხილება. რეალობა არსებობს, რომლის მიხედვით უნდა ვიმსჯელოთ. საზოგადოებას სერიოზული პრობლემები აქვს ეკონომიკურ სფეროში და კოალიციური მრავალფეროვნება თუ მრავალი აზრის ჭიდილი მნიშვნელოვანია, თუნდაც ადამიანური სიყვარული ერთმანეთში არ იყოს. ეს გაცილებით მომგებიანია, ვიდრე საკითხების მიმართ ერთგვაროვანი დამოკიდებულება. არჩევანი ასეთია - ან ერთ ხაზზე სწორება უნდა იყოს და მარჯვნივ-მარცხნივ გადადგმული ნაბიჯი უნდა ისჯებოდეს, ან პლურალიზმი უნდა იყოს. საზოგადოება იმას უნდა მიეჩვიოს, რომ არის საკითხები, რაზეც შეიძლება კოალიციის წევრებს ერთი და იმავე პოზიცია არ გააჩნდეთ.

„რესპუბლიკელები“ თავდასხმის ობიექტები რატომ ხდებიან - პიროვნული ურთიერთობების პრობლემაა, თუ?

- იმ ერთობას ყველა უნდა მოუფრთხილდეს, რომელიც გაგვაჩნია და რომელიც მნიშვნელოვანწილად, საქართველოს ინტერესებითაა განპირობებული. ადამიანური ურთიერთობების მაღალ დონეს ვისურვებდი, მაგრამ თუ არ არის, ადამიანებს ერთმანეთს ძალით ვერ შეაყვარებ. რეალობაა, რომ ქვეყნის ინტერესებს ერთობა სჭირდება, სადაც შეიძლება აზრთა სხვადასხვაობა იყოს.

ეს ერთობა 2016 წლის საპარლამენტო არჩევნებზეც იქნება შენარჩუნებული?

- სასურველია, ასე იყოს.

შესაძლებელია, რომ კოალიციაში „სოციალისტები“ და „მწვანეთა პარტია“ შევიდნენ?

- მათი რესურსები შესაფასებელია. რესურსები თავად უნდა შეაფასონ და თუკი მათ მოსაზრება ექნებათ, რომ შეუძლიათ, კოალიციაში დამოუკიდებელი სუბიექტის სტატუსი მიიღონ, ეს არა მხოლოდ ადამიანური დამოკიდებულებით უნდა დაასაბუთონ.

არჩევნებამდე რვა თვე რჩება და კოალიციურ შეთანხმებაზე, სიებზე და ა.შ. კონსულტაციებს რატომ არ იწყებთ?

- არჩევნებისთვის მნიშვნელოვანია ისეთი გუნდის ჩამოყალიბება, რომელიც ბრძოლისუნარიანი და მოგებისუნარიანი იქნება, მაგრამ უფრო მეტი მნიშვნელობა აქვს იმას, რომ იმ ადამიანების ღვაწლი დაფასდეს, რომლებმაც 2012 წელს გამარჯვება მოიპოვეს და ამ ადამიანებმა საკუთარი მომავალი უფრო მკაფიოდ უნდა განჭვრიტონ. ამის შემდეგ შეიძლება იმაზე საუბარი, რა ცვლილებები განხორციელდება გუნდში. პრემიერ-მინისტრობის დროს ბიძინა ივანიშვილმაც თქვა, რომ გუნდი გადანაწილებული როგორც არ უნდა იყოს, ეს იქნება პარლამენტი, მთავრობა თუ კერძო ბიზნესი, ერთ გუნდად უნდა დარჩეს. გარდა იმისა, რომ გუნდის წევრების მუშაობა შედეგიანი უნდა იყოს, ისინი კონსტრუქციულებიც უნდა იყვნენ.

რამდენად შესაძლებელია, რომ საარჩევნო სიებში მოქმედი მინისტრებიც იყვნენ?

- ცვლილებებზე საუბარი არ შეიძლება დაიწყოს მანამდე, სანამ ყველაფერი მკაფიოდ ჩამოყალიბებული არ იქნება. უფრო მეტი მუშაობაა საჭირო, ვიდრე ხვალინდელ დღეზე ფიქრი, რადგან ხვალინდელი დღე იმის მიხედვით ჩამოყალიბდება, რა ხარისხის იქნება გაწული სამუშაო.

რაც შეეხება ელისო ჩაფიძეს, რომელმაც პარლამენტის ტრიბუნიდან კრიტიკული განცხადება გააკეთა და ტყიბულში გაფიცულ მეშახტეებზე ისაუბრა. თქვენ ამ პრობლემით არ ინტერესდებით? ჩაფიძე აცხადებს, რომ მის წინააღმდეგ კამპანია მიმდინარეობს, რომლის თაობაზეც ისაუბრებს და გვარებსაც დაასახელებს....

- საკითხებზე ღია საუბარია საჭირო. ელისოსგან ველოდები, ვის დასახელებას აპირებს. ელისო ჩვენი გუნდის წევრია და მას თავისი მოსაზრებები აქვს, თუმცა, ჩვენი საქმიანობის პრინციპებს მისი განცხადებები არ სცილდება. ფრაქციის რეგლამენტში არ წერია, რომ დეპუტატი არ უნდა გამოვიდეს, თუმცა, ეს განცხადებები გუნდის ინტერესებს არ უნდა უპირისპირდებოდეს. რასაც ელისო ამბობს, შეიძლება, კორექტულობის თვალსაზრისით გამართული არ არის, მაგრამ ის ფაქტი, რომ მეშახტეებს მეტი ყურადღება სჭირდებათ, ამას ნებისმიერი ჩვენთაგანი იტყვის. მას შემდეგ, რაც ტყიბულმა მაღალმთიანი პუნქტის სტატუსი დაკარგა, მეშახტეებს სერიოზული ზარალი მიადგათ და მათ ისედაც მწირი ხელფასი დაებეგრათ არა 10 პროცენტით, არამედ 20 პროცენტით. დანარჩენი პრობლემები დამსაქმებელსა და მუშას ეხება. ამ შემთხვევაში, დასაქმებულის მხარე უნდა დავიჭიროთ განსაკუთრებით იმ პრინციპებიდან გამომდინარე, რასაც „ქართული ოცნება“ აღიარებს. ესაა მემარცხენეობა და თუნდაც მემარჯვენეობა იყოს, დასაქმებულის მხრიდან მეშახტეები მეტ ლოიალობას და ყურადღებას იმსახურებენ, რადგან მუშას რაც უფრო მეტს გაუკეთებ, მეტი შედეგი იქნება.

როგორც ჩანს, ჩაფიძე თქვენზე განაწყენებულია, რადგან მან ტრიბუნიდან ყოფილ პრემიერს, ბიძინა ივანიშვილსაც მიმართ და იკითხა - „ბატონო ბიძინა, რის გამო ისჯებიან ტყიბულელები?“...

- გააჩნია, ფორმას. ალბათ, ვიღაცამ შეცდომაში შეიყვანა, რომ თითქოს, გარკვეული პიროვნება აქტიურობს და მიაჩნია, რომ ეს მისი ალტერნატივაა, რაც სინამდვილეს არ შეესაბამება. რაც არ უნდა იყოს, ელისო ჩაფიძეს პარტიისთვის და კოალიციისთვის ღვაწლი და ნამუშავარი აქვს და არ შეიძლება, მის უკან რაღაც პროცესები მიდიოდეს. თუკი მას ვინმე არწმუნებს, რომ მის ზურგს უკან რაღაც პროცესები ხორციელდება, შეცდომაშია შეყვანილი. ჩაფიძემ არაერთხელ თქვა, რომ თუკი მასთან დაკავშირებით პარტიას სხვა გადაწყვეტილება აქვს, მზად არის, პარტიას მხარში ამოუდგეს და დაეხმაროს, მაგრამ ამას ჩემი ავტორიტეტის ხარჯზე ნუ გააკეთებთო, რასაც აბსოლუტურად ვეთანხმები.

რაც შეეხება მეშახტეების და საგადასახადო შეღავათების საკითხს, როგორც კი, ელისო ჩემთან მოვიდა და ეს თემა მითხრა, მას შევთავაზე, რომ ერთიანი პოზიცია ჩამოგვეყალიბებინა, რომელსაც მე და ის ხელს მოვაწერდით, რომელიც საქმიანი იქნებოდა და არა ხმაურიანი განცხადება. ამ საქმიანი წერილით მთავრობის შესაბამის სტრუქტურებს მივმართავდით და ამ წერილში ჩამოყალიბებული ჭკვიანური გეგმის რეალიზაციისათვის მუშაობას დავიწყებდით. მისგან კონკრეტულ წერილს ველოდები, კონკრეტულად, საქმე რაში მდგომარეობს და რა შეღავათი შეიძლება დავუშვათ. მისგან ამ წერილს იმ დღესვე ველოდებოდი, რადგან მითხრა, რომ მზად ჰქონდა. ეს წერილი არ მიმიღია, თუმცა, ჩვენი საუბრის შემდეგ, საღამოს, ფინანსთა სამინისტროსთან კონსულტაციები დავიწყე და ისინი გავაფრთხილე, რომ ჩემი და ელისოს წერილს მიიღებდნენ, რათა საკითხის განხილვა ფართო შემადგენლობით მომხდარიყო - ან ფინანსთა სამინისტროში, ან ეკონომიკის სამინისტროსთან, ან პრემიერ-მინისტრთან. მათ გაფრთხილება მიიღეს, საკითხისთვის მოემზადნენ და საქმიანი მიმართვის ნაცვლად, მივიღე არა წერილი, რომელზეც ხელი უნდა მომეწერა, არამედ საგაზეთო განცხადება, სადაც პირადად მე არაკორექტულად მომმართავს და ცოტა არ იყოს, გაოცებულიც და ნაწყენიც დავრჩი.

თუკი თქვენ მას საქმიანი წერილის მომზადება შესთავაზეთ, მან პოზიცია რატომ შეიცვალა?

- ელისოზე განაწყენებულმა მუშაობა არ შევწყვიტე, მუშაობა გავაგრძელეთ და პოზიცია ჩამოვაყალიბეთ. საბიუჯეტო შესაძლებლობები დავითვალეთ და შემიძლია გითხრათ, რომ ყველა ადამიანი, ვინც 2016 წლის იანვრამდე, ანუ, „მთის კანონის“ ძალაში შესვლამდე, საგადასახადო შეღავათებით სარგებლობდა, საგადასახადო შეღავათები შეუნარჩუნდებათ და არა მხოლოდ ტყიბულის მეშახტეებს. ვაპირებ, რომ მომავალ ბიუროზე ეს ინიციატივა შევიტანო, თუმცა, გული დამწყდება, თუკი ამ საკითხს ელისო გამოეთიშება, მაგრამ როგორც ჩანს, უკვე გამოეთიშა. მას უნდა, ისე გამოჩნდეს, თითქოს, ეს ღია წერილის შედეგია. შესაძლებელია, მან დაუშვა, რომ ეს მაინც მოხდებოდა და თავისი წვლილი უნდა ეჩვენებინა.

ანუ, თქვენ ფიქრობთ, რომ მან საკუთარი განცხადება საკუთარ ამომრჩეველზე გათვალა?

- რა იყო, არ ვიცი. იმედი მაქვს, რომ ეს რაღაც ემოციური გამოსვლა იყო. პირდაპირ გეტყვით, რომ ეს ჩემს წინააღმდეგ გამოსვლა იყო და კვირიკაშვილისა და ივანიშვილის ხსენება ფორმალობა იყო. ეს ერთი წერილი არ იყო, მას რამდენიმე მოჰყვა. მგონია, რომ ეს ემოციურიც არის და არც იმას გამოვრიცხავ, რომ მას არასწორი ინფორმაცია მიაწოდეს ისეთი წყაროსგან, რომელსაც თავად ენდობა, მაგრამ არ მინდა, ის ერთი წუთითაც დავუშვა, რომ ეს არის პოპულისტური განცხადება თუ ნაბიჯები. ვიმუშავე და ამით გარკვეულ შედეგს მივაღწიე. მეშახტეებს კომპანიის მიმართ არგმუნტირებული და საფუძვლიანი პრეტენზიები გააჩნიათ, რომელმაც შესაბამისი სამუშაო პირობები ამდენი ხნის მანძილზე ვერ უზრუნველყო.

მეშახტეების პრობლემები აქტუალური პერიოდულად ხდება. გასაგებია, რომ ამ კომპანიებთან თქვენს ხელისუფლებას ხელშეკრულება დადებული არ აქვს, მაგრამ მაშინ, როცა დასაქმებულის უფლებები ირღვევა, მთავრობა დამსაქმებელს ვალდებულებების შესრულებას რატომ არ სთხოვს და უფრო მომთხოვნი რატომ არ არის?

ამ მიმართულებით ჩაფიძის აქტივობას მხარს ვუჭერ. მაჟორიტარი დეპუტატები სწორედ ამიტომ არიან, რომ ამომრჩეველს მხარი დაუჭირონ, მაგრამ დამსაქმებელ-დასაქმებულს შორის დავა ხელისუფლების მიმართულებით არ უნდა გადმოიყვანო. ჩაფიძეს საკუთარ განცხადებებში დავით ბეჟუაშვილი მოხსენებული არ ჰყავს.

თუკი ეს ასეა, ეს შემთხვევითია?

- მინდა ვიფიქრო, რომ ეს შემთხვევითობაა.