„ძალიან მალე ჩატარდება ყრილობა და ახვლედიანი ოფიციალურად აღარ იქნება პოლიტსაბჭოში. ბუნებრივია, ეს კაცი წინასწარ ამბობს, რომ „ქართულ ოცნებაში“ არიან ნიანგები და ამიტომ წამოვედიო“, - აცხადებს for.ge-სთან საუბრისას ფსიქოლოგი, ზურაბ ბიგვავა.

რატომ არ არის ერთიანი იდეოლოგია „ქართულ ოცნებაში“ და არის თუ არა პოლიტიკური ძალის პარტიული მახასიათებელი საბჭოთა იდეოლოგია? ამ საკითხებთან დაკავშირებით for.ge ზურაბ ბიგვავას ესაუბრა.

ბატონო ზურაბ, რამდენად არგუმენტირებულია ის ბრალდებები, რომელზეც საუბრობს პოლიტსაბჭოს წევრი არმაზ ახვლედიანი? ის ამბობს, რომ „ქართულ ოცნებას“ არ აქვს იდეოლოგია...

ზურაბ ბიგვავა: არმაზ ახვლედიანი სამი წელი იყო აღმასრულებელი მდივანი, თუ ამდენი „ბებერი ნიანგი“ ბუდობდა, სად იყო ეს კაცი ამდენი ხანი? თუ ასეთი პრინციპული წინააღმდეგი იყო ამ იდეოლოგიური მიმართულების, ერთი თვის წინ კი არ უნდა დაებრახუნებინა მუშტი, არამედ ადრე უნდა გაგვეგო ის, რასაც დღეს ამბობს. აღმასრულებელი მდივნის პოსტიდან გადაყენების შემდეგ ლაპარაკი, ცოტა, ცუდი ტონია. თავის მხრივ, ლოგიკას ვერ დავუწუნებთ რამაზ ახვლედიანს. საკმაოდ ლოგიკურად მსჯელობს, ისეთ თემებზე გაამახვილა ყურადღება, რაც ჰაერიდან არ არის მოტანილი.

მაგალითად?

- ერთი და იგივე მოვლენა შეიძლება განსხვავებული სტატუსით დაახასიათო. ის რომ „ქართულ ოცნებაში“ არ არის ერთიანი იდოლოგიური ხედვა, ერთიანი პარტიული კომუნიკაციური მოდელი, ეს თვისთავად ცხადია. ეს არის პარტიული კოალიცია, რომელიც ერთი ღირებულების გარშემო გაერთიანდა და რომელსაც საკმაოდ ეფექტურად მიაღწია. რა თქმა უნდა, ბევრ განსხვავებულ საკითხებზე არის განსხვავებული იდეოლოგიური ხედვა, ამაში განსაკუთრებულს ვერაფერს ვხედავ.

სწორედ განსხვავებულ იდეოლოგიურ ხედვაზე საუბრობს, როგორც პრობლემაზე და სწორედ ამ პროცესს უწოდებს არადემოკრატიულს ახვლედიანი...

- სასაცილოა. რა არის დემოკრატიის არსი? - დემოკრატიის არსიც სწორედ ის არის, რომ ადამიანებს შეუძლიათ თავისუფლად გამოხატონ თავიანთი მოსაზრებები.

გარედან მაყურებლის თვალსაზრისით შეიძლება ითქვას, რომ „ქართულ ოცნებას“ არ აქვს იდეოლოგია?

- იდეოლოგიის არქონაც იდეოლოგიაა, მაგრამ „ქართულ ოცნებას“ არ აქვს ჩამოყალიბებული იდეოლოგიური კლიშე.

ეს არის პრობლემა, თქვენ როგორ ფიქრობთ?

- არ მგონია, რომ პრობლემა იყოს, იმიტომ, რომ „ქართულ ოცნებას“ ძირითადი ღირებულებების მიმართ აქვს ერთიანი დამოკიდებულება - ძალადობა და არაადამიანური მოპყრობა, ეს არის მთავარი რამ, რასაც ემიჯნება მმართველი ძალა. ისინი ორიენტირებული არიან ადამიანების კეთილდღეობაზე. კოალიციას თავისი იდეოლოგები უნდა ჰყავდეს და იდეოლოგიურად უნდა ჩამოყალლიბდნენ, მაგრამ ძნელია.

რადგან „რესპუბლიკურ პარტიას“ თავისი იდეოლოგიური კლიშე აქვს, ალბათ, მრეწველებსაც, ესენი ერთმანეთისგან განსხვავდებიან, მაგრამ ეს არ ნიშნავს, რომ ეს არის არადემოკრატიული პროცესი. რაც შეეხება „ბებერი ნიანგების“ არსებობას, ცოტა უხერხულია და ვფიქრობ, რომ არაეთიკურიც, მით უმეტეს მაშინ, როცა გამოდიხარ ამ სიტუაციიდან და გარედან იწყებ საკუთარი გუნდის კრიტიკას. ვფიქრობ, ამ სიტუაციაში არმაზ ახვლედიანის მოქმედებას გამართლება არ აქვს.

კიდევ ერთი საკითხი, რაზეც ახვლედიანი საუბრობს, ეს არის კოალიციაში საბჭოთა მენტალობის მქომე პირები, რომლებიც პარტიის განვითარებას აფერხებენ. საბჭოთა მენტალობის ადამიანები არიან კოალიციაში?

- კოალიციაში არიან ორმოცდაათ წელს გადაცილებული ადამიანები, საჭოთა დროს ნაცხოვრები არიან, მაგრამ არ არის აუცილებელი, რომ მაინც და მაინც სტალინისტები იყვნენ. ჩემი აზრით, იგივე გოგი თოფაძესთან დაკავშირებითაც ცოტა გაბუქებულია სიტუაცია, მაგრამ სულაც არ ნიშნავს, რომ ეს პოლიტიკური ძალის პარტიული მახასიათებელი და, რომ ისინი საბჭოთა იდეოლოგიის მატარებლები არიან.

ახვლედიანის განცხადებები და ბრალდებები რამდენად მოქმედებს კოალიციის რეიტინგზე?

- რა თქმა უნდა, შიგნიდან გამოსული ინფორმაცია კონფლიქტის შესახებ, ყოველთვის უარყოფითად მოქმედებს და ამიტომაც არის ჩემი აზრით გაუმართლებელი ახვლედინის განცხადებები. თვეების განმავლობაში იყო ამ კოალიციის აღმასრულებელი მდივანი, ეს საკმაოდ დიდი თანამდებობაა, პოლიტსაბჭოზე წყდებოდა ყველა საკითხი და შეეძლო იქ დაეფიქსირებინა თვისი მოსაზრება.

კაცი რომელიც იქ იყო სამი წელი, ერქვა აღმასრულებელი მდივანი, არაფერი უთქვამს და ახლა, როცა უკვე საქმე-საქმეზე მიდგა, ძალიან მალე ჩატარდება ყრილობა და ახვლედიანი ოფიციალურად აღარ იქნება პოლიტსაბჭოში, ბუნებრივია, ეს კაცი წინასწარ ამბობს, რომ „ქართულ ოცნებაში“ არიან „ნიანგები“ და ამიტომ წამოვედიო. ეს უნდა ეთქვა მაშინ, როდესაც აღმასრულებელი მდივნის თანამდებობას იკავებდა, აი, მაშინ იქნებოდა გამართლებული.

ფიქრობთ, რომ ის განაწყენებული პოზიციიდან საუბრობს?

- ჩემი აზრით ასეა. თუმცა არ არის გამორიცხული, რომ რაღაცა ნაწილი შეიძლება სიმართლე იყოს. რა თქმა უნდა, ვიღაცა იქნება, ვინც რეტროგრადულად აზროვნებს, ან არიან საბჭოთა დროინდელი ადამიანები, რომლებიც საჭოთა დროს ცხოვრობდნენ და რომლებსაც გარკვეული თავისებური მოსაზრება აქვთ. კოალიციაში არიან ისეთებიც და ასეთებიც, მაგრამ გაცილებით მეტია ისეთი, ვინც ნორმალურად აზროვნებს, ფიქრობს ადამიანებზე და ქვეყანაზე.