ოპოზიციონერი დეპუტატი მიხეილ მაჭავარიანი ირწმუნება, რომ „ნაციონალური მოძრაობა“ ქვეყნისთვის ვიზა-ლიბერალიზაციის მიცემის წინააღმდეგ არ გამოდის და ევროპაში მსგავს მესიჯებს არ გზავნის. კანონმდებელი ამბობს, რომ უვიზო მიმოსვლას პროევროპული ძალები თავის სასიკეთოდ გამოიყენებენ და 2016 წლის არჩევნებზე, „ქართული ოცნებისგან“ განსხვავებულ შედეგსაც დადებენ.

მმართველი გუნდის ბრალდებებსა და ნაციონალების გეგმებზე, for.ge მიხეილ მაჭავარიანს ესაუბრა.

პრემიერმა განაცხადა, რომ „ნაციონალური მოძრაობის“ წევრებმა - დავით ბაქრაძემ და გიორკი კანდელაკმა ევროპელ პოლიტიკოსებს სთხოვეს, საქართველოს უვიზო მიმოსვლა არ მისცენ. რას უპასუხებთ, ბრალდებებს?

- თუკი ვიზა-ლიბერალიზაციას და ევროპასთან ინტეგრაციას ხელს რაიმე უშლის, ეს საქართველოს მთავრობის უნიათო პოლიტიკაა. თავის დროზე, ვიზა-ლიბერალიზაციის პროცესი ჩვენს მიერ დაწყებულია და როგორც პროევროპულ პარტიას უვიზო მიმოსვლა ჩვენ უფრო გვჭირდება, რადგან ამით მომავალ არჩევნებზე მეტ სარგებელს ჩვენ უფრო მივიღებთ, ვიდრე ეს უუნარო ხელისუფლება.

ამ მთავრობის დიაგნოზი ყველასთვის ნათელია. ეს მთავრობა თანამოქალაქეებს კი არ აერთიანებს, არამედ ყოველი მათი განცხადება მიზნად საზოგადოების დაყოფასა და დაპირისპირებას ემსახურება. მმართველი გუნდი ყოველთვის უკან იყურება და არა - წინ. შემიძლია, ამის ნათელი მაგალითი წარმოგიდგინოთ. როცა „ნაციონალური მოძრაობის“ ოფისებზე თავდასხმები ხდებოდა, პრემიერ-მინისტრმა ძალადობრივი განცხადება გააკეთა, პარტნიორებთან კი სხვა განცხადება გააგზავნა. ღარიბაშვილი ძალიან ცუდ მდგომარეობაში აღმოჩნდა, რადგან იოჰანეს ჰანმა გიგი წერეთელსა და გიორგი კანდელაკს წერილი აჩვენა და უთხრა - აი, პირიქით, თქვენს პრემიერს როგორი განცხადება გაუკეთებიაო. წერილში ღარიბაშვილი საუბრობდა, თითქოს, ოპოზიციას თანამშრომლობას სთავაზობდა. ჩემმა კოლეგებმა იოჰანეს ჰანს ის აჩვენეს, რაც მთავრობის სხდომაზე, რეალურად, ღარიბაშვილმა ილაპარაკა.

ევროპაში ამბების ჩატანის გამო, იუსტიციის მინისტრმა, თეა წულუკიანმა სახელმწიფოსთვის ძირგამომთხრელ საქმიანობაში დაგადანაშაულათ...

- ეს ტყულია. მთავრობა ცდილობს, რომ საკუთარი უნიათობა გაამართლოს. წულუკიანმა კანდელაკს უთხრა, რომ ევროპაში გაგზავნილი მეილები უკან გიბრუნდებაო, მაგრამ ევროსაბჭოში, რეზოლუციის განხილვის დროს გამოჩნდა, ევროსაბჭოს დეპუტატები ვის ინფორმაციას უფრო ენდობიან. ისინი რომელიმე მხარეს უაპელაციოდ არ დაიკავებენ. ევროპის ვერც ერთი მაღალჩინოსანი ვერ მოიძებნება, რომელიც იტყვის, რომ პირიქით, ჩვენ ვიზა-ლიბერალიზაციას არ ვითხოვდით. ჩვენს დელეგაციას ეს უნდა გაკეთებინა და უნდა ეჩვენებინა თუ არა, რომ ღარიბაშვილი იტყუება? - იქ ჩვენი დელეგაცია ვიზა-ლიბერალიზაციის მხარდასაჭერად იყო ჩასული, რადგან ეს პროცესი პრაგმატულად ჩვენზე იმუშავებს. მთავრობის ემისარი - აბაშიძე კარასინთან იმყოფებოდა და ჩვენთვის სასიცოცხლოდ მნიშვნელოვანია, რომ უვიზო მიმოსვლის მონიჭება მოესწროს, რადგან აბაშიძესა და მის მსგავსებს ვიზების გამარტივება პირველად რუსებთან უფრო ურჩევნიათ, ვიდრე ევროპასთან.

ამ მთავრობის პათოსია - რუსეთი მაინც შორსაა, რუსეთი მაინც ახლოსაა და ერთმორწმუნეები არიანო. ამას ის ადამიანები ამბობენ, რომელთაც ქართული ეკლესიის ავტოკეფალიის გაუქმება ავიწყდებათ. ღარიბაშვილმა ძალიან კარგად იცის, თბილისში, ფედერიკა მოგერინთან რა მწარე საუბარიც გაიმართა.

„რა მწარე საუბარზე“ აპელირებთ? თქვენ მსგავს ინფორმაციებს ვინ გაწვდით?

- შეხვედრაზე, ღარიბაშვილს ევროკავშირის წარმომადგენლებმა პირდაპირ უთხრეს, რომ თუკი მთავრობა თავისუფალი მედიის - „რუსთავი 2“-ის წინააღმდეგ წამოწყებულ პოლიტიკას არ შეეშვებოდა, რომელიც თეთრი ძაფით ნაკერია, პრობლემები იქნებოდა. ამას გარდა, შეხვედრაზე საუბარი წინასაარჩევნო გარემოს შეეხო, სადაც ხელსუფლების გარდა, ყველა მტრად არის გამოცხადებული. საზოგადოების დაყოფა მიდის.

მსგავსი პოლიტიკა არც თქვენი ხელისუფლებისთვის იყო უცხო...

- ეს ისტორია გავლილი მაქვს და ყველაფერი ძალიან კარგად მახსოვს. საზოგადოება დღეს უფრო მომზადებულია, ვიდრე თუნდაც, 25 წლის წინ იყო. თუკი ვიზა-ლიბერალიზაციას რაიმე ემუქრება, ეს გამოწვეულია ამ მთავრობის უუნარობის და უცოდინრობის გამო. ისეთი განცდა მაქვს, ეს ყველაფერი სპეციალურად ხომ არ ხდება, რომ ქვეყანაში ევროპის მიმართ ნიჰილიზმი გაჩნდეს. თქვენ ხომ კარგად იცით, რომ „ქართულ ოცნებაში“ უფრო მეტი რუსეთის მომხრეა, ვიდრე ევროპის.

თქვენ ამბობთ, რომ ხელისუფლება ევროპის მიმართ ნიჰილიზმს აჩენს, მაგრამ თუკი ამ გრძელ გზაზე რაიმე სერიოზული ნაბიჯი გადაიდგა, ეს ამ ხელისუფლების პირობებში მოხდა - ასოცირების ხელშეკრულება გაფორმდა და ქვეყანამ უვიზო მიმისვლის მინიჭების მიზნით, რეფორმები გაატარა, რომელსაც ევროპელები დადებითად აფასებენ...

- ამაში ვერ დაგეთანხმებით. არ დაგავიწყდეთ, რომ ვიზა-ლიბერალიზაცია მოლდოვამ უკვე მიიღო. საქართველოს ყველა შანსი ჰქონდა, რომ უვიზო მიმოსვლა წელს მიეღო. მოლდოვის მაგალითი რომ არა, ამ შენიშვნას მივიღებდი. რეფორმების გატარების კუთხით, მოლდოვა უფრო უკან იყო, ვიდრე საქართველო. პრემიერივით კი არ გატყუებთ. საქართველოს ვიზა-ლიბერალიზაცია აუცილებლად უნდა ჰქონდეს.

თქვენ გვარწმუნებთ, რომ ქვეყნისთვის უვიზო მიმოსვლის მიცემის მომხრე ხართ, რადგან პროდასავლურ ძალებს ეს გჭირდებათ. რისთვის გჭირდებათ?

- მოქალაქეებმა რომ ნახონ, ქვეყანის პროევროპულ არჩევანს პერსპექტივა აქვს. რეიტინგები გამოქვეყნდა, რომლის გათვალისწინებით, იმ ადამიანთა რიცხვი შემცირებულია, ვინც მხარს ევროპაში გაწევრიანებას უჭერს. ამ ვითარებას ხელისუფლების ქმედებებს ვუკავშირებ, რომელიც ამბობს, რომ ასოცირების ხელშეკრულებას ხელი მოვაწერეთ, მაგრამ მერე რა, ეკონომიკას რა ეშველაო?! ეს ხომ, მთავრობის რიტორიკაა, ისევე როგორც რუსეთი ახლოსაა, ევროპა შორსო.

ორჯერ გაიმეორეთ, რომ მთავრობის რიტორიკაა - „ევროპა შორსაა, რუსეთი ახლოს“. შეგიძლიათ, გვითხრათ, ამას მთავრობის რომელი წევრი ამბობს? მსგავსი რაღაც არცერთი მინისტრისგან არ მომისმენია, ყოველ შემთხვევაში, არ მახსოვს და იქნებ, თქვენ შეგვახსენოთ...

- ეს მთავრობის ზოგადი ხაზია, რომელიც ადამიანების განწყობაში აისახება. აბა, ადამიანების განწყობა საიდან ყალიბდება? თქვენ მეკითხებით, ამას რომელი ჩინოვნიკი ამბობს? - როცა საუბარი ევროპის დიდ ბაზარზეა, მთავრობას აქცენტი რუსულ ბაზარზე გადააქვს. ჩვენთვის პოლიტიზირებული, 100 მილიონიანი ბაზარი უფრო მნიშვნელოვანია, თუ 600 მილიონიანი ევროპული ბაზარი? - 2013 წელს, საქართველოში, ავტომობილების ექსპორტიდან 700 მილიონი დოლარი შემოვიდა. იცით, 2014 წელს, ღვინო-მწვანილიდან რამდენი შემოვიდა? – 240 მილიონი დოლარი. ანუ, სამჯერ უფრო ნაკლები, ვიდრე ავტომობილების ბიზნესიდან.

თუკი თქვენს მიერ მოყვანილი ციფრები რეალობას შეესაბამება, ავტომობილების ჰაბის კიდევ უფრო გაფართოება, რატომ არ ხდება?

- ეს კითხვა მეც მაქვს.

ამ მთავრობას ბევრი საკრიტიკებელი აქვს, მაგრამ თქვენ განსაკუთრებულ აქცენტს მათ პრორუსულობაზე აკეთებთ. თქვენმა იარლიყმა - „ქართული ოცნება“ „რუსეთუმეა“, 2012 წელს არ გაჭრა და ისევ იგივე პოლიტიკას რატომ მიმართავთ?

- 2012 წლის არჩევნებზე, გარდამტეხი როლი კადრებმა მოახდინა. ამასთანავე, ხალხის დამოკიდებულება იყო - ივანიშვილი მილიარდერია, ნახეთ, ჭორვილა როგორ ცხოვრობს, ფულს დაგვირიგებს და სამუშაო ადგილები შეიქმნებაო. განცდა იყო, რომ ივანიშვილს ამ ყველაფერის განხორციელებაში ხელს „ნაციონალური მოძრაობა“ და სააკაშვილი უშლიდნენ. ჩემი ბევრი თანაგუნდელისგან განსხვავებით, ციხეში არსებულ იმ სისასტიკეს არ გამოვრიცხავ, მაგრამ იმ პროცესებში ვიღაც-ვიღაცეების ხელი ერია, რადგან ვინც ამას აკეთებდა, ბედუკაძე და მისი გუნდი იყო, ვინც არ დასჯილა და პირიქით, ივანიშვილის მიერ დაფინანსებულ ფილმში მონაწილეობს.

კვესიტაძის გადაცემის შემდეგ, პროკურატურამ ის კი არ გამოიძია, ეს კადრები დადგმული იყო თუ არა და პატიმრებს ვინ აწამებდა, არამედ ბედუკაძესა და ადვოკატს შორის წარმოებული მიმოწერის სისწორე გამოარკვიეს. „ბასტი“ და „ბუბუს“ საპროცესო გარიგება აქვთ გაფორმებული და ისინი დღეს, გარეთ არიან.

გეთანხმებით, რომ ეს ადამიანები დასჯილები უნდა იყვნენ, მაგრამ ციხეში მიმდინარე პროცესებზე პასუხისმგებლობა თქვენი ხელისუფლების მაღალჩინოსნებს არ ეკისრებოდათ?

- თავად ფაქტი, რომ ჩვენს მიერ შექმნილ სისტემაში ასეთი რაღაც ხდებოდა, პრობლემაა და რაღაცეები შეგვეშალა. ბარბარე რაფალიანცის მკვლელობა უსინდისოდ დაგვაბრალეს, რომლის საქმეც დღემდე გამოუძიებელია. ვის დასჭირდა, ეს? - მათგან განსხვავებით, ამ მკვლელობას ვერავის დავაბრალებ. ეს ადამიანები დასჯილები რომ არ არიან, ეს ამათი პასუხისმგებლობაა. იმ ადამიანების სია მაქვს, ვინც საგადასახადო პოლიციაში მუშაობდა, ბიზნესს ატერორებდა და დღეს, პროკურატურაში მუშაობს. ამ ხელისუფლებამ ჩათვალა, რომ ყველა ის მავნებლობა უნდა გაიმეოროს, რაც ხდებოდა. დანაშაულს ვემიჯნები, რადგან იმ დანაშაულის მონაწილე არ ვარ.

იმ პირებს რატომ არ ემიჯნებით, ვის უწყებაშიც ეს დანაშაულები ხდებოდა?

- იმ პირებს კი არ ვემიჯნები, არამედ კონკრეტულ დამნაშავეებს.

თუმცა, რიგით დამნაშავეებს ხომ ზემდგომი პირები - ორგანიზატორები ჰყავდათ? სასჯელაღსრულების მინისტრი ხათუნა კალმახელიძე იყო და როცა მის უწყებაში პატიმრებს აწამებდნენ, პასუხისმგებლობა ვის ეკისრება?

- ხათუნა კალმახელიძეს ხელი ვერავინ დაადო, რომ ეს ყველაფერი მისი დავალებით ხდებოდა. პირობითად, პოლიტიკურად კალმახელიძის პასუხისმგებლობა მე ავიღე. ხათუნა კამლახელიძის მინისტრობის დროს, 2009-2010 წლებში, სასჯელაღსრულებისა და იურდიული დახმარების სამინისტროს გენერალური ინპექციის უფროსად გიორგი თვაური მუშაობდა, რომლის უშუალო ფუნქციაც კონტროლი იყო. ეს ადამიანი 2012 -2013 წლებში, შსს-ს გენერალური ინსპექციის უფროსის მოადგილე გახდა. თუკი 2009 წელს, ციხეში ცემა-გაუპატიურება და დანაშაული ხდებოდა, ეს ადამიანი სად იმყოფებოდა? იცით, დღეს, ეს ადამიანი სად მუშაობს? - ლევან სამხარაულის სახელობის ექსპერტიზის ბიუროს უფროსია. პოლიტიკური პასუხისმგებლობა ამ კაცის ნაცვლად, მე რატომ ავიღო?

ჩაგეკითხებით - ე.წ. სამართლიანობის აღდგენაზე უკმაყოფილებას თქვენ - „ნაციონალური მოძრაობაც“ გამოხატავთ?

- პოლიტიკურ პასუხისმგებლობაზე ვსაუბრობ. ვხედავ, რომ კონკრეტული ადამიანები არ დაისაჯენ და ეს ამ ხელისუფლებასთან გარიგების გამო მოხდა. ბედუკაძე წამებისა და არაადამიანური მოპყრობის სიმბოლოა, ის კი დღეს, ივანიშვილის პროექტში ხელფასს იღებს.

ახალი ხელისუფლების პირობებში, თქვენი ლიდერები დააკავეს, მათ ამა თუ იმ საქმეზე ბრალი წაუყენეს და მათ პოლიტპატიმრებად მიიჩნევთ. მონეტას იმ მხარით ხომ არ აჩვენებთ, როგორც გაწყობთ?

- რა თქმა უნდა, ისინი პოლიტპატიმრები არიან. „იმედის“ საქმეზე უგულავა გამართლდა და აღმოჩნდა, რომ ის მართალი იყო.

ვანო მერაბიშვილს ბრალი აჭარაში ბიზნესმენისთვის სახლის ჩამორთმევაზეც წაუყენეს. როგორ ფიქრობთ, შს მინისტრი ბიზნესმენებს სახლებს უნდა ართმევდეს?

- ეს საქმე ერთი ადამიანის ჩვენების საფუძველზე შეიქმნა, რომელიც აჭარის მაშინდელი უფროსი იყო. ის ერთ-ერთი პრობლემატური ადამიანი იყო, რომლის თაობაზეც ვანოს სულ ვეუბნებოდი, რომ ის პრობლემა იყო, რადგან ის როგორც პოლიტიკაში, ასევე აჭარაში ბევრ ბიზნესს საქმიანობაში ერეოდა. დღეს, ეს ადამიანი დაცვით დადის. მხოლოდ მან თქვა, რომ ამ სახლს მერაბიშვილი ოჯახისთვის იყენებდა, სხვებმა კი განაცხადეს, რომ ეს სახლი სხვადასხვა დონის სტუმრებთან შეხვედრებისთვის გამოიყენებოდა. პროცედურა ნამდვილად დარღვეული იყო, რადგან ეს სახლი სახელმწიფო საკუთრებაში მოქცეული არ იყო. წელიწადში 12 თვეა და შეიძლება, ეს სახლი მერაბიშვილის ოჯახმა რამდენიმე კვირა გამოიყენა. მოწმეებმა დაადასტურეს, რომ ამ სახლს შსს საჭიროებისამებრ იყენებდა.

ვანო მერაბიშვილის ოჯახს ეს სახლი თუნდაც რამდენიმე დღე რომ გამოეყენებინა, მათ ამის რა უფლება ჰქონდათ?

- მე პროცედურებზე გესაუბრებით. ელისაშვილმა უსინდისო ტყუილი თქვა, რომ უგულავა ციხეში უნდა იჯდეს თუნდაც იმის გამო, რაც განვითარების ფონდში ხდებოდაო. განვითარების ფონდის საქმეზე განაჩენი არ დამდგარა და ეს ელისაშვილმა საიდან იცის?

ელისაშვილი ხელისუფლებაში არ არის, მას სავარაუდოდ, გამოძიებაზე ხელი არ მიუწვდება და შესაძლოა, ეს მისი პოლიტიკური განცხადება იყო...

- მე თუ მკითხავთ, ის ხელისუფლების დანამატია.