„პატრიოტთა ალიანსის“ ლიდერები მთავრობის კანცელარიასთან შიმშილობის აქციას განაგრძობენ და თავდაცვისა და გარემოს დაცვის მინისტრების პოსტებიდან გადაყენებას ითხოვენ. ნაციონალები ირმა ინაშვილის პოზიციას იზიარებენ და აცხადებენ, რომ საგარეჯოში, შუალედური არჩევნები გაყალბდა.

შუალედური არჩევნების შედეგები თუ რა გზავნილი იყო ნაციონალებისთვის, ამის გარკვევას for.ge ოპოზიონერ დეპუტატ აკაკი ბობოხიძესთან შეეცადა:

„პატრიოტთა ალიანსის“ ლიდერები მიიჩნევენ, რომ საგარეჯოში, შუალედური არჩევნები გაყალბდა. მსგავსი შთაბეჭდილება თქვენც გრჩებათ?

- შუალედურ არჩევნებში მთელი სახელმწიფო აპარატი იყო ჩართული. როდესაც ხელისუფლება არჩევნებს აზერბაიჯანელი მოსახლეობის ხმების ხარჯზე იგებს, შეიძლება ითქვას, რომ არჩევნები გაყალბდა. საქართველოს ხელისუფლებამ პრორუსულ ძალასთან რაფინირებული კანდიდატის დამარცხება არჩევნების გაყალბების გარეშე ვერ მოახერხა, რაც ამ ხელისუფლების პასუხისმგებლობის საკითხია. ხელისუფლება ამ არჩევნებშიც და მომავალ საპარლამენტო არჩევნებშიც რომ დამარცხდება, ამაში ეჭვიც არ მეპარება, მაგრამ გააჩნია, სად და ვისთან მარცხდები. ეს მარცხი იმ პოლიტიკის შედეგია, რომელსაც სამი წლის მანძილზე, ხელისუფლება ახორციელებს. ძალიან ვწუხვარ, რომ ამ გაყალბებაში ყველაზე დიდი წვლილი მიუძღვის კოალიციის ე.წ. პროდასავლურ ძალას - „რესპუბლიკურ პარტიას“.

არჩევნების გაყალბება რაში იკვეთება?

- გაყალბება რაში იკვეთება, ეს იმ ადამიანებს უნდა ჰკითხოთ, ვინც არჩევნების პროცესს უშუალოდ აკვირდებოდა. მაშინ, როდესაც არჩევნებში სამხედრო ძალების ჩართვა მოხდა, ქართული სოფლები პრაქტიკულად წაგებულია, არჩევნებში სახელწმიფო აპარატი ჩაერთო და სუს-ი გამგებლებს ხვდებოდა, ამ ფონზე, საფუძვლიანი ეჭვი ჩნდება, რომ არჩევნები გაყალბდა, მაგრამ ჩვენ ამის კონკრეტული მტკიცებულებები არ გვაქვს, რადგან პროცესს ბოიკოტი გამოვუცხადეთ და მას არ დავაკვირდით. აზერბაიჯანელ მოსახლეობას შეუარცხყოფას არ ვაყენებ და მათი ხმები ნაკლებად წონიანი არ არის, ვიდრე ქართველების ხმები, მაგრამ ცნობილია, რომ ამ ადამიანების ხმებს ყოველთვის ხელისუფლება იმსახურებს.

საგარეჯოში არჩევნების პროცესს „ნაციონალური მოძრაობის“ წარმომადგენლები აკვირდებოდნენ და მათ დარღვევები ოქმებში არ მიუთითეს. როცა არჩევნების გაყალბებაზე საუბრობთ, ინფორმაციას საკუთარ წარმომადგენლებთან რატომ არ ამოწმებთ?

- ჩვენთვის საარჩევნო პროცესი ნაკლებად საინტერესო იყო, რადგან სხვა პროცესებზე გადართული ვიყავით. ჩემთვის განსაკუთრებით ტრაგიკული სხვა რაღაცაა.

რას გულისხმობთ?

- იმის მიუხედავად, რომ „ქართული ოცნება“ პრორუსულ ძალად მიმაჩნია, ის დეკლარირების დონეზე აცხადებს, რომ პროდასავლური ძალაა, მაგრამ ხელისუფლებამ არჩევნები საგარეჯოში პრორუსულ ძალას ვერ მოუგო, რაც ქვეყნის წინაშე დიდი დანაშაულია. ქართულ საზოგადოებაში რუსული ელემენტები რომ მომძლავრდა, ეს ახალია? - ეს ხელისუფლების დიდი დანაშაულია.

თამარ ხიდაშელმა ირმა ინაშვილს არჩევნები 500-ზე მეტი ხმით მოუგო და ეს თქვენთვის დამაჯერებელი შედეგი არ არის?

- რა თქმა უნდა არ არის, რადგან ამ რაოდენობიდან 500 ხმა ჯარისკაცებს ეკუთვნით. თავდაცვის მინისტრი გვეუბნება, რომ თურმე, ჯარისკაცების ერთსულოვანი გადაწყვეტილება გასაგებია, რადგან ინაშვილი პრორუსია და ქართველი ჯარისკაცები რუსული ორიენტაციის კანდიდატს ხმას არ მისცემდნენ. ხიდაშელს გავახსენებ, რომ მას მოადგილედ ის ქალბატონი ჰყავს, რომელმაც თქვა, რომ ქართველი ჯარისკაცები ავღანეთში ფულის გამო დადიან და მათ რწმენასთან და პატრიოტიზმთან არანაირი კავშირი არ აქვთო. ანუ, ეს ის მინისტრია და მას ასეთი მოადგილე ჰყავს. ეს ადამიანები იმას მეუბნებიან, რომ თურმე, ქართველი ჯარისკაცები ხმას პატრიოტულ ნიადაგზე აძლევენ.

ის ბაზა, რომელზეც თქვენ აპელირებთ, მუხროვანში 2015 წლის იანვარ-თებერვალში განთავსდა. ანუ, მაშინ, როცა თინა ხიდაშელი ჯერ კიდევ დეპუტატი იყო და მისი გამინისტრება არც იგეგმებოდა. სპეცუბნების თემით ხომ არ სპეკულირებთ?

- ძალიან ცუდია, როცა ჯარისკაცები ხმას მაჟორიტარულ ოლქებში აძლევენ. ეს ჯარისკაცები არჩევნებში მონაწილეობას 2012 წელსაც ღებულობდნენ და მაჟორიტარისთვის ხმა მიცემული სადღაც აქვთ. თუ ვინმე საუბარს დაგვიწყებს, რომ საარჩევნო კოდექსი ჩვენს მიერ მიღებულია, ახალ ხელისუფლებას სამი წელი ჰქონდა იმისთვის, რომ კანონი შეეცვალა.

ინაშვილის მოთხოვნას იზიარებთ, რომ პოსტები თავდაცვისა და გარემოს დაცვის მინისტრებმა - თინა ხიდაშელმა და გიგლა აგულაშვილმა უნდა დატოვონ?

- ხელისუფლება „ქართულმა ოცნებამ“ უნდა დატოვოს. პოსტებიდან ხიდაშელისა და აგულაშვილის გადაყენება ნაკლებად მნიშვნელოვანი მგონია. შუალედური არჩევნები „ქართულმა ოცნებამ“ გააყალბა და არა აგულაშვილმა. ძალიან ვწუხვარ, რომ ამ სპექტაკლში წამყვანი როლი „რესპუბლიკურმა პარტიამ“ იკისრა. ანუ, იმ პარტიამ, რომელიც თეორიულად, ყველაზე პროდასავლურ ძალად ითვლება. ინაშვილს იმაში ვერ დავეთანხმები, რომ მან პასუხისმგებლობის ტვირთი რესპუბლიკელებზე გადაიტანოს და ამ პროცესში „ქართული ოცნების“ მონაწილეობა გამორიცხოს, მათ შორის - ბიძინა ივანიშვილის. ინაშვილმა ძალიან კარგად იცის, რომ ამ პროცესების წარმმართველი ივანიშვილია. მოარული ხმები ძალიან კარგად მახსოვს, რომელიც იმას ეხებოდა, რომ ინაშვილი საკუთარ კანდიდატურას ივანიშვილს უთანხმებდა.

თუმცა, უმრავლესობა ირწმუნება, რომ ამ ხმებს სწორედ ინაშვილი ავრცელებდა...

- ამ ხმებს ვინ ყრიდა, ეს ნაკლებად მაინტერესებს. ივანიშვილის განცხადებები იმაზე მიუთითებს, რომ ამ გაყალბებაში მთავარი ფიგურა თავად ივანიშვილია. იმ მოთხოვნის მომხრე ვერ ვიქნები, რომ პოსტებიდან მხოლოდ აგულაშვილი და ხიდაშელი გადადგნენ.

არჩევნების გაყალბებაზე „ნაციონალური მოძრაობა“ რომ საუბრობს, ეს უხერხული არ არის?

- უხერხული არ არის. „ნაციონალურ მოძრაობას“ არჩევნები არასოდეს არ გაუყალბებია.

არც 2008 წლის საპრეზიდენტო არჩევნები? თქვენ ფიქრობთ, რომ გაჩეჩილაძეს სააკაშვილმა მოუგო?

- სააკაშვილმა გაჩეჩილაძეს არჩევნები თბილისის გარდა, ყველგან მოუგო. მაშინ, თინა ხიდაშელი სააკაშვილს აზერბაიჯანელების პრეზიდენტს ეძახდა და ახლა, როცა თამარ ხიდაშელმა არჩევნები იორმუღალოს ხმებით მოიგო, მისი აზრი მაინტერესებს. ამ თემის კონტექსტი სამარცხვინო მგონია, რადგან დაუშვებელია საუბარი - აზერბაიჯანის პრეზიდენტსა და დეპუტატზე. აზერბაიჯანელები საქართველოს ისეთივე სრულყოფილი მოქალაქეები არიან, როგორც ქართველები. იორმუღალოს ხმები როგორც მე არ გამიკვირდა, თავის დროზე, ასევე არ უნდა გაჰკვირვებოდა ხიდაშელს მარნეულისა და დმანისის ხმები.

რაც შეეხება „ნაციონალურ მოძრაობას“, პარლამენტის თავმჯდომარის თქმით, შუალედურმა არჩევნებმა აჩვენა, რომ თქვენ მთავარი ოპოზიციური ძალა არ ხართ...

- უსუფაშვილი ან უვიცია, რასაც ვერ დავაბრალებთ, ან დემაგოგობს. მას ერთი საარჩევნო ოლქის შედეგები რეალურ სურათს ვერ მისცემს. ხელისუფლების უბედურება ისაა, რომ არჩევნების მოგება გაყალბების გარეშე მაშინაც კი ვერ უზრუნველყო, როცა ამ პროცესში მთავარი ოპოზიციური ძალა არ მონაწილეობდა. არჩევნებში მონაწილეობა ჩვენც რომ მიგვეღო, ალბათ, ამ პროცესში მხოლოდ 500 ჯარისკაცს კი არ ჩართავდნენ, არამედ მუხროვანში ნახევარ არმიას განათავსებდნენ.

ანუ, თქვენ ინაშვილს თქვენი ძალის ალეტრნატივად, ან კონკურენტად არ აღიქვამთ?

- მას კონკურენტად არა მხოლოდ ხმების რაოდენობის თვალსაზრისით აღვიქვამთ, არამედ როგორც ჩვენგან რადიკალურად განსხვავებული ორიენტაციის ძალად.