ოპოზიციონერი დეპუტატი გოკა გაბაშვილი ირწმუნება, რომ „რუსთავი 2“-ს „ნაციონალური მოძრაობის“ წინაშე არანაირი ანგარიშვალდებულება არ აქვს. მისი მტკიცებით, უმცირესობის ინტერესია, რომ ხელისუფლების ალტერნატიული აზრი ხმამაღლა ისმოდეს. კანონმდებელი ფიქრობს, რომ ხელისუფლება ყველაზე მეტად „რუსთავი 2“-ს ებრძვის, რადგან ეს ტელევიზია არ მოსწონს.

აღნიშნული ტელეკომპანიის გარშემო განვითარებულ მოვლენებზე, for.ge გოკა გაბაშვილს ესაუბრა:

უმრავლესობამ „რუსთავი 2“-თან დაკავშირებით მომზადებული განცხადების პროექტი ჩააგდო. მათ გადაწყვეტილებას როგორ აფასებთ?

- უმრავლესობას პასუხისმგებლობა იმ ქმედებებზე ეკისრება, რომელიც ბიძინა ივანიშვილის დავალებით აღმასრულებელმა ხელისუფლებამ დაგეგმა. ყოფილ პრემიერს დავალება საჯაროდ აქვს გაცემული, რომ „რუსთავი 2“ უნდა დაადუმონ. კახი კალაძეს კი, მომხრეების წინაშე დაპირება აქვს გაცემული, რომ „რუსთავი 2“ უნდა დამთავრდეს. ამ დავალების შემსრულებლების სახით უმრავლესობა მოგვევლინა, რომელთა ნაწილმა საღი აზრის ტესტი ვერ ჩააბარა. ისინი ფიქრობენ, რომ ამ მეთოდით საზოგადოების გაჩუმება შეიძლება. მაღალრეიტინგული აზრი საზოგადოების ინტერესებს გამოხატავს და საზოგადოებისა და ხელისუფლების დაპირისპირება ყოველთვის ხელისუფლების პოლიტიკური ფასით სრულდება.

„ნაციონალური მოძრაობა“ „რუსთავი 2“-ს ასე გაშმაგებით რატომ იცავს? ამ ტელეკომპანიას თქვენთან რა ანგარიშვალდებულება აქვს?

- ამ ტელევიზიას არანაირი ანგარიშვალდებულება არ აქვს. ჩვენი ინტერესია, რომ ხელისუფლების ალტერნატიული აზრი ხმამაღლა ისმოდეს. ეს არის ტელევიზია, რომელიც ხელისუფლებას არ ექვემდებარება და მოვლენებს ისე არ აშუქებს, როგორც ბიძინას უნდა. ანუ, „რუსთავი 2“ მოვლენებს ისე არ აჩვენებს, როგორც „გადაცემა 20/30“. ქვეყნის განვითარებისთვის ასეთი ჟურნალისტების არსებობა მნიშვნელოვანია. ჩვენი პარტიული ინტერესია, რომ „რუსთავი 2“, ინგა გრიგოლიასა და ეკა მიშველაშის თოქ-შოუები არსებობდეს.

თუკი თქვენი ინტერესი მხოლოდ „ალტერნატიული აზრის“ მოსმენაა, ეს აზრი „მაესტროზე“, „იმედსა“ და „საზოგადოებრივ მაუწყებელზე“ არ ისმის?

- პრობლემატური როგორც „რუსთავი 2“-ის წინააღმდეგ გადადგმული ნაბიჯებია, ასევე მიუღებელია ეკა მიშველაძის სამსახურიდან გაგდება და მის მიმართ თვალთვალი. ასევე პრობლემაა, რომ ბატონ ბიძინას ვახო სანაიას გადაცემა არ მოეწონა და ერთ კვირაში დახურეს. არჩილ გამზარდიას მიმართაც კი გაილაშქრეს, რომელიც 20/30“-ში ივანიშვილის მითითებებს არ ასრულებდა. ხელისუფლება მზად არის, წინაღობები კრიმინალური მეთოდებით დაძლიოს, რაც საზოგადოებისთვის მიუღებელია.

„რუსთავი 2“ განსხვავებულ ვითარებაშია, რადგან ხელისუფლებამ მისი დირექტორი დაიჭირა, ტელევიზიაში სათვალთვალო კამერები დააყენეს და ფინანსურ ნაკადები შეუზღუდეს. ყველაზე მეტად „რუსთავი 2“-ს ებრძვიან, რადგან ეს ტელევიზია არ მოსწონთ.

როგორც ყოფილი ჟურნალისტი ფიქრობთ, რომ „რუსთავი 2“ ობიექტურად მუშაობს? პოლიტიკურ ინტერესებს არ ატარებს?

- არცერთი ტელევიზიის სარედაქციო პოლიტიკას არ განვიხილავ. ჟურნალისტური სტანდარტები როგორ არის დაცული, ამაზე შეიძლება, ვიდავოთ და დისკუსია იყოს. შეიძლება რაღაც მომწონდეს, ან პირიქით. ხელისუფლება დაჭერებითა და შეკვეთილი მკვლელობებით არ უნდა ცდილობდეს, რომ ისეთი გაშუქება იყოს, როგორიც სურს.

თქვენ რომ ხელისუფლებაში იყოთ, ნიკა გვარამიას მუქარას როგორ აღიქვამდით - „ჯოჯოხეთს მოგიწყობთო“? როცა ტელევიზიის ხელმძღვანელი ასეთ განცხადებას აკეთებს, ეს თქვენთვის მისაღებია? ეს ადამიანი არის თავისუფალი მედიის წარმომადგენელი, თუ პოლიტიკური ფიგურა?

- ხელისუფლებაში რომ ვიყო, შეიძლება, ასეთი განცხადება ძალიან არ მესიამოვნოს, მაგრამ თავისუფალი მედიის განადგურებას არ დავუშვებდი. საკუთარ შეცდომებზე ვსწავლობთ. მიუღებელი იყო ის, რაც „იმედის“ ეკრანებიდან გვესმოდა და უმდიდრესი ადამიანი ბადრი პატარკაციშვილი ამბობდა, რომ სააკაშვილის ხელისუფლების დამხობისთვის ბოლო თეთრს დახარჯავდა. მაშინ, ფართომასშტაბიანი დაპირისპირება აღვკვეთეთ, მაგრამ ის, რაც „იმედში“ მოხდა, შეცდომა იყო. ბადრი პატარკაციშვილის განცხადებები როგორც არ უნდა მოგვწონებოდა და რა ეჭვებიც არ უნდა გვქონოდა, რომ ეს ყველაფერი მეზობელი ქვეყნის მიერ მხარდაჭერილი იყო, რაც მოხდა, არასწორი იყო. ამჟამად, ოპოზიციის მხრიდან არც დაპირისპირება არ არის და არც რევოლუციის გზავნილი არ კეთდება, მაგრამ ხელისუფლება ამაზრზენ ნაბიჯებს დგამს. ეროსი კიწმარიშვილის ამბიდან დაწყებული, მოსამართლე ურთმელიძეზე განხორციელებული ზეწოლით დასრულებული, რაც ხდება, ამაზრზენია.

„იმედში“ შეჭრას შეცდომას უწოდებთ, მაგრამ კერძო ტელეკომპანიაში შესვლა და ჟურნალისტების იატაკზე დაყრა, ეს უფრო დანაშაულის ნიშნებს ხომ არ შეიცავს?

- როცა არჩეული პრეზიდენტი გადადგება, ეს პოლიტიკური კრიზისის აღიარებაა. აღიარებული იქნა, რომ მძიმე შეცდომა იქნა დაშვებული და მანდატის გადახედვა მოხდა. მაშინ, ამ შეცდომისთვის მარტივად არავის შეუხედავს. ხელისუფლების დაკარგვა ვარჩია იმას, რაც შეიძლება, ქვეყანაში მომხდარიყო. ქვეყნის პროვოცირება ხდებოდა, რომ სამოქალაქო დაპირისპირება მომხდარიყო. ეს უნდა აღკვეთილიყო, მაგრამ ფორმები მიუღებელი აღმოჩნდა. ხელისუფლებაც ამ პოლიტიკურ გზაზე დგას და მათ ფასის გადახდა რატომ სურთ, არ ვიცი.

თქვენ ამბობთ, რომ პოლიტიკური ფასი გადაიხადეთ, მაგრამ საქმიანობა ისევ ჩვეულ რეჟიმში გააგრძელეთ. ქვეყანაში ცენზურა იყო და შედარებით, თავისუფლების ხარისხს ბეჭდური პრესა აჩვენებდა...

- კრიტიკა გაზეთებიდანაც ისმოდა, ისევე როგორც რადიოებიდან, „მაესტროდან“ და „კავკასიიდან“. ძალიან ბევრი კრიტიკული აზრი მახსოვს. როცა ვამბობთ, რომ შეცდომებზე ვისწავლეთ, ჩვენი ხელისუფლების სხვადასხვა პერიოდებს ვგულისხმობ. თუკი 2007 წელს, მილიარდერი პატარკაცისშვილის წინააღმდეგ ამ მეთოდებით ვიბრძოლეთ, იგივე შეცდომა 2012 წელს, მილიარდერ ივანიშვილთან აღარ დაგვიშვია. მიუხედავად იმისა, რომ ისევ ყველაზე მდიდარი ადამიანი და რუსი ოლიგარქი გვებრძოდა, Must Carry-ს კანონი მივიღეთ და ოპონენტებს აზრის თავისუფლად გამოთქმის უფლება მივეცით. არჩევნების წინა ღამეს, თუნდაც პატარა ბავშვის მკვლელობას რომ გაბრალებდნენ, თუკი ასეთ სიტყვას შეზღუდავ, ქვეყანა ვერც ნატოს მიუახლოვდება და ვერც ევროკავშირს. წინსვლის დროს დაშვებული შეცდომები გვახსოვს და ამაში ცინიკური არაფერია. რომ გითხრათ, ყველაფერში მართალი ვიყავით-თქო, გულწრფელი არ ვიქნები.

თქვენ აპელირებას ხელისუფლების მიზნებზე აკეთებთ, მაგრამ ქიბარ ხალვაში როგორ უნდა მოიქცეს? მას ქონება ჩამოართვეს და მისი დაბრუნებისთვის არ უნდა იბრძოლოს? მან სასამართლოს რომ არ მიმართოს, რა გზას დაადგეს?

- ამ ვითარებაში ქიბარ ხალვაში არაფერ შუაშია. ეს ადამიანი შეთანხმებულია ხელისუფლებასთან, რომლის ოჯახის წევრი უმრავლესობაშია ჩასმული. ის სიგნალს ელოდებოდა, თუ როდის უნდა გააქტიურებულიყო. ეროსი ამბობდა, რომ ივანიშვილს „რუსთავი 2“ ჯიბეში ჩასმის თაობაზე სქემა ყველასთან აქვს დალაგებული. ყოფილ პრემიერს სრულიად ხელისუფლება ხელში ჰყავს და მას არანაირი პასუხისმგებლობა არ აქვს. ის ყველაფრის მეპატრონეა. ისეთი ბანკი გაგიგიათ, რომლის მოგება 17 პროცენტით იზრდება? - ივანიშვილი ამ ქვეყანას კომერციულ აქტივად თვლის და ის ხალვაშს იყენებს როგორც ერთ-ერთ რიგით ოპერაციას. ხალვაში როგორც ოქრუაშვილის დროს ასრულებდა მის ნებას, ასევე ხდება ივანიშვილის შემთხვევაშიც.

უხერხული არ არის, რომ ამ პროცესებში ფატი ხალვაშის სახელის გასვრას ცდილობთ? - ამ ადამიანს ქობულეთის 67 ათასმა ამომრჩეველმა ხმა მისცა და მაჟორიტარი დეპუტატი გახდა...

- ამ ადამიანის არჩევანია, რომ ის ინსტრუმენტად გამოიყენონ. „ქართულმა ოცნებამ“ არჩევნებში რომ გაიმარჯვა, ეს ძალიან კარგად მახსოვს. ადამიანებმა ხმა ისეთ პირებს მისცეს, რომლებიც თვალით არ უნახავთ. ეს მხოლოდ იმიტომ მოხდა, რომ მათ უფასო ფულს, გაზრდილ პენსიას, სამუშაო ადგილებს და იპოთეკური სესხების დაფარვას დაჰპირდნენ. შეცდომების კრიტიკული რაოდენობა დაგროვდა და ძალიან ნორმალური იყო, რომ წინა ხელისუფლება გამოიცვალა და ახალი მოვიდა. უბრალოდ, ახალი ხელისუფლება იმდენად ბრიყვი არ უნდა ყოფილიყო, რომ ყველა შეცდომა გაეგრძელებინა და ყველაფერი კარგი შეეწირა. ხალვაში ამ პროცესების ნაწილია და ბრმად მის დავალებებს ასრულებს.

თავის დროზე, როცა ქიბარ ხალვაში ირაკლი ოქრუაშვილმა „რუსთავი 2“-ის ყიდვა მოსთხოვა, მაშინ ეს ადამიანი თქვენი გუნდის წევრი არ იყო? ანუ, ქიბარ ხალვაში თქვენც გამოიყენეთ...

- ქვეყანა წინ მუდმივად უნდა მიდიოდეს. თუკი ტელევიზიის გარშემო შეკითხვები გვაქვს, რა და როგორ მოხდა, ყველაფერი გამოიკვეთება. მათ შორის ისიც, ივანიშვილი კიწმარიშვილს რას ერჩოდა და ხელს რაში უშლიდა. ბევრი რაღაც ითქმება და გამოიკვეთება.

როცა ხელისუფლებაში იყავით, არ მოგწონდათ როცა ამბობდნენ, რომ ზურაბ ჟვანია მოკლულია, მას თავში საფერფლე ჩაარტყეს და ა.შ. სამწუხაროა, რომ კიწმარიშვილის საქმის გამოძიების პროცესი ჭიანურდება და საქმე არ იხსნება, მაგრამ თქვენ კიწმარიშვილის მკვლელობაში ირიბად ხელისუფლებას რომ ადანაშაულებთ, ეს ნორმალურია?

- ხელისუფლებაზე ჟვანიას სიკვდილის დაბრალება ამორალური იყო და ახლა ინსინუაციებს არ ვამბობ. კიწმარიშვილი თავად აცხადებდა, რომ ის ხელისუფლებას ხელს უშლიდა და მას მოკლავდნენ. ამას მე არ ვამბობ და ეს არ მომიგონია. ამის შემდეგ, ის გარდაცვლილი იპოვეს და არც ერთ კრიმინალურ თეორიაში არ არსებობს, რომ ადამიანი ღვედს იკრავდეს, ფარებს ანთებდეს და თავს იკლავდეს. მე რომ ეს შეკითხვები არ დავსვა, სისულელე იქნება. ვერავის ვერაფერს დავაბრალებ და ღარიბაშვილივით და ბერიკაშვილივით ვერ მოვიქცევი. არ ვიცი, ვინ რა ჩაიფიქრა და ვინ რა განახორციელა იმისათვის, რომ ივანიშვილს „რუსთავი 2“-ის დათრევის გზა გახსნოდა, მაგრამ ვიცი, რომ კიწმარიშვილი ივანიშვილისთვის მიუღებელი იყო და მას თავი არ მოუკლავს. სხვა მხრივ, ხელს ვერსად გავიშვერ.