12 ოპოზიციური პარტია მთელი ქვეყნის მაშტაბით, მაჟორიტარული სისტემის გაუქმების და 2016 წლის საპარლამენტო არჩევნების პროპორციული წესით ჩატარების მოთხოვნით, ხელმოწერების შეგროვებას იწყებს. პარტიების წარმომადგენლების განცხადებით, ისინი ერთ თვეში 200 000 ხელმოწერის შეგროვებას შეეცდებიან და შემდეგ უკვე საარჩევნო რეფორმის მოთხოვნით პარლამენტში საკონსტიტუციო წინადადებას შეიტანენ. საინიციატივო ჯგუფში 10 არასაპარლამენტო და 2 საპარლამენტო ოპოზიციური პარტია -„ერთიანი ნაციონალური მოძრაობა“ და „თავისუფალი დემოკრატები“ შევიდა. მათ ასევე შეუერთდნენ არასამთავრობო ორგანიზაციები, მათ შორის „საია“ და „საერთაშორისო გამჭვირვალობა - საქართველო“. 

როგორც საპარლამენტო ფრაქცია „თავისუფალი დემოკრატების“ თავმჯდომარე ირაკლი ჩიქოვანი For.ge -სთან საუბარში აცხადებს, ამ ხელმოწერების შეგროვებას ძალიან დიდი მნიშვნელობა აქვს, მიუხედავად იმის, რომ საპარლამენტო უმრავლესობა საარჩევნო სისტემაში ცვლილების შეტანას 2020 წლის არჩევნებისთვის გეგმავს, რათა 2016 წლის არჩევნების მოგება „გააპრავოს“ .

„ისინი არანაირ საარჩევნო რეფორმის გატარებას არ აპირებენ. 2016 წელს რა იქნება, ეს არ არის მათი გადასაწყვეტი. პირდაპირ გეტყვით, დარწმუნებული ვარ, ამ უმრავლესობას უფრო ნაკლები ხმა ექნება, ვიდრე მას დღეს აქვს. მათი დაპირება, რაც 2020-ისთვის აქვთ დაგეგმილი, აბსოლუტურდ აბსუდულია და არ არის მართალი. ისინი ცდილობენ 2016 წელს ამ ფორმით ჩატარებული არჩევნების „გაპრავებას“ . ძალიან მარტივად შეიძლება ამ რეფორმის გატარება, თუმცა, „ქართულ ოცნებას“ საეთოდ წარმოდგენა არ აქვს როგორ უნდა უპასუხოს იმ გადაწყვეტილებას, რომელიც საკონსტიტუციო სასამართლოს აქვს მიღებული და შესაბამისად, ახლა ახალი ველოსიპედის გამოგონებას ცდილობენ“, - აცხადებს ჩიქოვანი და აღნიშნავს, რომ საპარლამენტო უმრავლესობა, პრაქტიკულად, ორჯერ სხვადასხვა არჩევნების ტიპს სთავაზობს საქართველოს მოსახლეობას და ეს პრობლემაა, თუმცა ისინი ამაზე არ საუბრობენ.

„ჩვენ დღესვე შეგვიძლია ვუპასუხოთ საკონსტიტუციო სასამართლოს გადაწყვეტილებას და მივიღოთ ისეთი სისტემა, რომელიც ყველამ იცის, რომ კარგია. თვითონ ხელისუფლებამაც იცის ეს, ოღონდ მათ უნდათ პროპორციული არჩევნები 2020 წელს იმიტომ, რომ მოიპოვონ ის დამატებითი მანდატები, რომელიც ბუნებრივად მმართველ ძალას მიაქვს წლების განმავლობაში. რეალურად მიღებული ხმების პროცენტული რაოდენობა 20%-ით უფრო ნაკლებია, ვიდრე მიღებული მანდატების რაოდენობა. შესაბამისად, 30-35%-იანი მხარდაჭერის პირობებში ისინი ცდილობენ 50% გაინაღდონ“,-ამბობს „თავისუფალი დემოკრატების“ წარმომადგენელი.

ზოგიერთი ექსპერტი და ხელისუფლების წარმომადგენელი „თავისუფალი დემოკრატების“ ამ მცდელობას წინასაარჩევნო პიარ-აქციად აფასებს, ვინაიდან თვლის, რომ რეალური შედეგი არ ექნება. ირაკლი ჩიქოვანი ამ მოსაზრებების ავტორებს საკუთარ პოლიტიკურ ისტორიაში ჩახედვას და ქვეყნისთვის სასარგებლო რაიმეს შექმნას ურჩევს.

„ვინც ირონიულად საუბრობს ამ თემაზე, შეხედოს საკუთარ პოლიტიკურ ისტორიას და მერე შეხედონ „თავისუფალი დემოკრატების“ ისტორიას, რომლებიც პოლიტიკაში მოვიდნენ მაშინ, როცა „ნაციონალური მოძრაობა“ გუგუნებდა და დავუპირისპირდით მათ იმიტომ, რომ ისინი არ მოგვწონდა. ჩვენს დნმ-ში დევს ის, რომ არ ვეთანხმებით „ნაციონალური მოძრაობის“ დანაშაულებრივ პოლიტიკას, რომელსაც ისინი ატარებდნენ.

ჩვენთვის საარჩევნო რეფორმა პირველივე დღიდან იყო პოლიტიკური რეფორმა, რომელსაც საზოგადოებას ვპირდებოდით და უკაცრავად და, არ დავხტივართ ჩვენ პოზიციებზე იმისდა მიხედვით, ვართ ხელისუფლებაში თუ არა. გარდა ამისა, ყველას, ვისაც ჰგონია, რომ ეს პრობლემა არ არის, ძალიან ცდება, ვინაიდან რაც უნდა თბილი იყოს ხელისუფლება, რაღაც პერიოდში მაინც მიდიან ხელისუფლებაიდან. იფიქრონ იმაზე, რომ ქვეყნისთვის რაღაც ნორმალური შექმნან“, - აცხადებს ჩიქოვანი.

საპარლამენტო უმრავლესობის ერთ-ერთი ლიდერი ლევან ბერძენიშვილი აცხადებს, რომ ყველანაირი კონსტიტუციური ცვლილება საქართველოში ითხოვს ძალიან მაღალ უმრავლესობას და ამიტომ, საჭიროა, ოპოზიციაც და პოზიციაც საქართველოს პარლამენტში რამენაირად შეთანხმდეს, რათა კომპრომისს მიაღწიონ.

„ამ ცვლილებას 150 კაციან პარლამენტში 113 ხმა სჭირდება. ვერც ერთი მხარე ცალკე, დამოუკიდებლად ერთმანეთისგან, თუ ერთმანეთს არ მოელაპარაკა, ამას ვერ აღწევს. ამიტომ, ეს ყველაფერი იქნება პროპაგანდისტული ნაბიჯები - ნახეთ, ჩვენ რა კარგი სისტემა გვინდა, რომელიც უმრავლესობასთან არ არის შეთანხმებული.

უმრავლესობა კი მივიდა იმ კომპრომისამდე ერთმანეთში, რომ ჩვენ შეგვიძლია შემოვიტანოთ ეს ცვლილები, ანუ მეტ-ნაკლებად შევასრულოთ საკონსტიტუციო სასამართლოს დავალება, რომ 2016 წლისთვის ოლქები გავუტოლოთ ერთმანეთს, ყველა შემდეგი არჩევნები კი ჩავატაროთ პროპორციული სისტემით. ეს არის ის კომპრომისი, რომელსაც მიაღწია უმრავლესობამ“, - აცხადებს ლევან ბერძენიშვილი For.ge-სთან და აღნიშნავს, რომ სამწუხაროდ, ოპოზიცია, როგორც საპარლამენტო, ასევე არასაპარლამენტო, ამას არ ითვალისწინებს და მოითხოვს, რომ ახლავე იქნას შეტნილი ის ცვლილება კონსტიტუციაში, რომელიც მათ მიაჩნიათ სწორედ, კომპრომისი კი პარლამენტში მხოლოდ ამ დონეზე მოხერხდა.

„მინდა აღვნიშნო, რომ მეც და „რესპუბლიკელებსაც“ პროპორციული სისტემა ყოველთვის სწორად მიგვაჩნდა. უბრალოდ, კომპრომისი მიღწეულ იქნა სხვა დონეზე. ახლა ამ წუთას ვერ ვაღწევთ იმას, რასაც ისინი ითხოვენ, თორემ ყველა შემდეგი არჩევნები იქნება პროპორციული. მაჟორიტარები, რომლებიც არიან პარლამენტში, თვლიან, რომ კიდევ უნდა იყვნენ პარლამენტში და ამაში განსაკუთრებული არაფერი არ არის და ფიქრობენ, რომ ამ პარლამენტმა არ უნდა მიიღოს ის გადაწყვეტილება, რომელიც მათ ეხებათ, მაგრამ შემდეგში მისი მიღება შეეძლება პარლამენტს - მოკლედ, კომპრომისი ამ დონეზე მოხერხდა.

ოპოზიციას რაც უნდა ის თქვას, ამას არავითარი მნიშვნელობა არ აქვს. არჩევნები არა მარტო თბილისში ტარდება მაჟორიტარულადაც და პროპორციულადაც და თუ ვერ გაიმარჯვებს „ქართული ოცნება“ პროპორციულად, მაგასაც ვნახავთ“, - აცხადებს საპარლამენტო უმრავლესობის ერთ-ერთი ლიდერი.