ევროინტეგრაციის კომიტეტის თავმჯდომარე ლევან ბერძენიშვილი ფიქრობს, რომ ქვეყანას ზუსტად ისეთი პროკურორები ჰყავს, როგორიც - პარლამენტის წევრები.  კანონმდებელი წინასწარი პატიმრობის ვადებთან დაკავშირებით, ევროპელი ლიდერების კრიტიკას იზიარებს და ამბობს, რომ პროკურატურამ უკეთ უნდა იმუშაოს.  დეპუტატის შეფასებით, წინასწარი დაპატიმრების საკითხი უნდა დამთავრდეს, გამოძიება უნდა დასრულდეს და ამა თუ იმ ადამიანს ან უნდა მიუსაჯონ, ან - უნდა გაუშვან.

ქვეყნის საგარეო პერსპექტივებთან დაკავშირებით, for.ge ლევან ბერძენიშვილს ესაუბრა.

საქართველოში ჩატარებულ საერთაშორისო კონფერენციაზე, შტეფან ფულემ პოლიტპატიმრებთან დაკავშირებით უკმაყოფილება გამოხატა და აღნიშნა, რომ  ამ საკითხთან  მიმართებაში კითხვები ისმის.  თქვენი შეფასებით, ევროპელი ლიდერის ეს განცხადება რას უნდა ნიშნავდეს?

-შექმნილი ვითარების გამო, ევროპა იძულებულია ახალ-ახალი გადაწყვეტილებები მიიღოს. განსაკუთრებით მნიშვნელოვანი მიგრანტების პრობლემაა, რომელმაც შეიძლება, სხვა ქვეყნების მისწრაფებები კითხვის ნიშნის ქვეშ დააყენოს. როცა ფულე შენიშვნას გვეუბნება, ეს არ უნდა გვეწყინოს, პირიქით, მას მადლობა უნდა ვუთხრათ, რადგან მან გაგვაფრთხილა, რომ ევროპული წარმოდგენები ასეთიაო.

ფაქტობრივად, მან ის ვერსიები გვაჩვენა, ევროპის მხრიდან რისი მომიზეზებაც შეიძლება. თქვენ იცით, რომ სექტემბერში, საქართველოში მისია უნდა ჩამოვიდეს, რომელმაც ვიზა-ლიბერალიზაციის მიმართულებით მთავრობისა და პარლამენტის მუშაობა უნდა შეაფასოს. დეკემბერში პოლიტიკური გადაწყვეტილება უნდა იყოს მიღებული. კერძოდ, მეოთხე შეფასება მომზადდება.

იმისათვის, რომ ქვეყანამ უვიზო მიმოსვლა მიიღოს, ეს შეფასებები საჭიროა. მოლდოვამ უვიზო მიმოსვლა ხუთი შეფასების შემდეგ მიიღო და ჩვენ არ ვიცით, ოთხი პოლიტიკური შეფასება გვეყოფა თუ არა. ფულე გვაფრთხილებს, რომ თუკი შეფასებები საკმარისი არ აღმოჩნდა, ევროპამ შესაძლოა, პრეტენზიები წამოგვიყენოს.

რასთან დაკავშირებით წამოგვიყენებს ევროპა პრეტენზიებს - პატიმრობაში მყოფი პოლიტიკოსების თაობაზე?

-ფულემ უპირველესყოვლისა, ის გვითხრა, სინამდვილეში რა ხდება. როცა ევროპაში ასეთი მიგრაციაა და უამრავი ხალხი შედის, ხელსაყრელი დრო არ არის, რომ ვინმეს ვიზა-ლიბერალიზაცია მისცენ. მეორე მხრივ, ევროპის მხრიდან იმის თქმა არ მოხდება, რომ თქვენ დავალება მოგეცით და ვერ შეასრულეთო. ფულემ გაგვაფრთხილა, რომ შეიძლება ის პრეტენზიები იქნეს წარმოდგენილი, რასაც ჩვენი ოპოზიცია აცხადებს. ამ შემთხვევაში, ფულე გულწრფელია და მას არ უთქვამს, რომ ოპოზიციის პრეტენზიების სჯერა, უბრალოდ, მან ხაზი იმას გაუსვა, თუ რა პრეტენზიებს წამოგვიყენებენ.  

„ნაციონალური მოძრაობის“ არგუმენტები ქვეყნის საწინააღმდეგოდ მუშაობს და მათ საკუთარი პოლიტიკური გეგმა აქვთ. ნაციონალები შერჩევით სამართალსა და წინასწარ დაპატიმრებებზე საუბრობენ და ამ მხრივ, ჩვენ სამუშაო გვაქვს. ნატო-სა და უვიზო მიმოსვლის გზა ია-ვარდით მოფენილი არ არის და საფრთხეები ფულემ დაგვანახა.

ჩვენი ოპოზიცია ძალიან ნაყოფიერად მუშაობს და ევროპას ეუბნება, საქმე ასე და ასეაო - თუკი არ მსურს, რომ ვიზა არ მოგცე, ოპოზიციის არგუმენტებს თითზე დავიხვევ.

ანუ, ევროპა მიზეზებს ეძებს, რომ საქართველოს უვიზო მიმოსვლა არ მისცეს?

-ფულემ გაგვაფრთხილა, რომ თუკი მიზეზების ძებნა გახდება საჭირო, აი ამ მიზეზებს წარმოადგენენო. ამის საპირისპიროდ რა უნდა გავაკეთოთ? - წინასწარი დაპატიმრების საკითხი უნდა დამთავრდეს, გამოძიება უნდა დასრულდეს და ამა თუ იმ ადამიანს ან უნდა მიუსაჯონ, ან - უნდა გაუშვან.

ამასთანავე, ჩვენ ჩვენი სიმართლე უნდა ვამტკიცოთ -  საქართველოში შერჩევითი სამართალი არ არის. თუკი შერჩევით სამართალს იმას არქმევენ, რომ ზოგიერთი დამნაშავე დაუსჯელი დარჩა, ამის აღიარება შეიძლება, მაგრამ იმას ნუ გვეტყვიან, რომ ვანო მერაბიშვილი ციხეში უდანაშაულოდ ზის.

ეს ვინც არ უნდა თქვას, ამას არავინ დაიჯერებს. მათ შორის, არც მერაბიშვილი. როცა წინა ხელისუფლების წარმომადგენლები ციხეებში სხედან, ეს ყოველთვის გაკვირვებას და გაოცებას იწვევს.

ევროპა ისეთ ქვეყანას ითხოვს, სადაც ხელისუფლება ხელისუფლებას არ აპატიმრებს, მაგრამ ასეთი ქვეყანა ჯერ არ აგვიშენებია. ევროპას სურს, რომ დემოკრატიის გზაზე ისე იქცეოდე, თითქოს, დემოკრატია უკვე გაქვს. ასე როგორ უნდა მოვიქცეთ, როცა მრავალი წლის მანძილზე, ქვეყანაში კანონი ფეხქვეშ ითელებოდა?!  ევროპის სასამართლო, ევროპული სტრუქტურები და თავად ფულე გვეუბნებოდნენ, რომ დანაშაული აღგვეკვეთა და დამნაშავე დაგვესაჯა.

ევროპის სასამართლომ გადაწყვეტილება მიიღო, რომ სააკაშვილი და მერაბიშვილი გირგვლიანის დანაშაულს ერთად ფარავდნენ. მათ შემოგვითვალეს, რომ ეს საქმე გამოგვეძიებინა და დამნაშავე დაგვესაჯა. გამოვიძიეთ, დავსაჯეთ და ახლა ვიღაც საპირისპიროს გვეუბნება.

ძალიან ხშირად ისეთი მეთოდი იქნება გამოყენებული, რომელიც არის - „ჭრელო პეპელა, ნურც მოფრინდები, ნურც გაფრინდები“. სინამდვილეში მიზეზები სულ სხვაა - რუსეთის ფაქტორი, მიგრანტების ფაქტორი და ა.შ. მაგრამ ფულემ გაგვაფრთხილა, სხვა მიზეზებსაც მოძებნიანო.

გასაგებია, ფულეს გაფრთხილება, მაგრამ საქართველო რა გზას უნდა დაადგეს - ის ყოფილი მაღალჩინოსნები პატიმრობიდან გაათავისუფლოს, რომელთაც სახელმწიფო სხვადასხვა დანაშაულებში სდებს ბრალს?

-ფულეს, ევროპას, ნაციონალებსა და პატიმრებს ვეთანხმები, რომ წინასწარი პატიმრობა უსასრულო არ უნდა იყოს. წინასწარი პატიმრობა საბჭოთა დროშიც კი ექვსთვიანი იყო. ჩემს შემთხვევაში წინასწარი პატიმრობა ცხრა თვე გაგრძელდა, მაგრამ შემდეგ ერთი დღის დამატების უფლებაც კი არ ჰქონდათ.

მოკლედ, პროკურატურამ უკეთ უნდა იმუშაოს.  სისუსტეა, როდესაც წლების მანძილზე, რაღაცას ვერ ვამტკიცებთ და ესა თუ ის პირი წინასწარ პატიმრობაში გვყავს.

წინასწარი პატიმრობის ვადებთან დაკავშირებით დარღვევები გიგი უგულავას საქმეში იყო...

-დიახ, ასეა. ეს საკითხი უნდა დასრულდეს როგორც საკანონმდებლო, ასევე პრაქტიკის დონეზე. მომავალში, უგულავას მსგავსი შემთხვევა აღარ უნდა განმეორდეს.

პროკურატურა რატომ არ ასრულებს ამ პროცესს?

-ასეთი საქმეების გამოძიება იოლი არ არის. თუკი ჩვენ ევროპული ტიპის სამართალი გვინდა, მაშინ ევროპული სტანდარტებით მომზადებული პროკურატურა გვჭირდება. ზუსტად ისეთი პროკურორები გვყავს, როგორიც - პარლამენტის წევრები. როგორც გაირკვა, კარგი მხოლოდ პოეტები გვყავს.

საქართველოს ხელისუფლებამ ყველაფერი გააკეთა, რაც მას ნატოს მიმართულებით და უვიზო მიმოსვლის თვალსაზრისით ჰქონდა დავალებული. საქართველო იდეალური ქვეყანა რომ იყოს, ევროკავშირში შესვლას არც მოითხოვდა. ევროპაში ყველაზე განვითარებული ქვეყნებიც არიან, რომლებიც ევროკავშირში შესვლაზე არც კი ფიქრობენ.

ჩვენ ეს ფუფუნება არ გვაქვს, ამიტომ, ფულეზე არ გავბრაზებულვარ და არ მითქვამს, რომ მაგის საქმე გაფართოება არის-თქო. მან ის საფრთხეები გაგვაცნო, რაც არსებობს.

ანუ, ფულე საქართველოს კეთილისმსურველად გვევლინება და არა ნაციონალების დამცველად? ევროპის მხრიდან ორმაგი სტანდარტი ხომ არ არის, როდესაც ისინი სააკაშვილის მმართველობაზე ხმას არ იღებდნენ, მას „დემოკრატიის შუქურად“ მოიაზრებდნენ და საქართველოს კრიტიკა ახლა დაიწყეს?

-ხელისუფლება შეიძლება მართალი და ეფექტიანი იყოს, ან უნიათოც და მტყუანიც. სააკაშვილი დასავლეთის მიმართულებით ძალიან ენერგიული იყო და მან დასავლეთში დემოკრატიისთვის და თავისუფლებისთვის მებრძოლი პიროვნების ხატი დახატა, რომელიც დასავლეთს თავში ძალიან კარგად ჩაებეჭდა. ამერიკიდან რომ გამოიხედავდნენ, ბათუმის ცათამბრჯენს დაინახავდნენ და სააკაშვილის ინგლისურს მოისმენდნენ, ჩანდა, რომ საქართველო - „დემოკრატიის შუქურა“ იყო.

სააკაშვილმა ეს იოლად და კარგად „გაყიდა“. სხვა ამბავია, რომ ამ ყველაფერის უკან დიდი ტყუილი და მრავალათასიანი პატიმართა ჯგუფი იდგა. სააკაშვილი თავის იმიჯს უფრო უკეთესად ყიდდა.

ვიდრე, დღევანდელი მთავრობა?

-ის უნამუსოდ იქცეოდა, დღევანდელი მთავრობა პატიოსანია. სააკაშვილის მხრიდან უნამუსოდ მოქცევა ეფექტიანი იყო, ნამუსიანად მოქცევა უფრო გრძელი და რთული გზაა.

შედარების მოყვანა არ მინდა, მაგრამ ხომ იცით, ეფექტიანი ქალები ვინ არიან? - ამის ნუ შეგვშურდება. ძალიან კარგია, თუკი ვინმე გვაკრიტიკებს და თუკი სადმე რაიმე ნაკლი გვაქვს, ამაზე ფულე მიგვითითებს თუ ჯუმბერი, ამას დიდი მნიშვნელობა არ აქვს. ფულეს გადასაწყვეტი რომ იყოს, საქართველო ევროკავშირის წევრი ხვალვე გახდებოდა. სინამდვილეში, ფულესნაირი ადამიანები ევროკავშირის გაფრთოების საკითხში საკუთარ ფუნქციასაც ხედავენ, მაგრამ შეფასებები წინ გვაქვს. ოპოზიციას  არ სძინავს. ევროსაბჭოში საპარლამენტო ანსამბლეა იქნება და ვიცით, რომ საქართველოზე რეზოლუცია მზადდება, სადაც რა წერია და კიდევ რას ჩაწერენ, ვიცით.

შეგიძლიათ გვითხრათ, აღნიშნულ რეზოლუციაში რა წერია?

-საქართველოს შესახებ უკვე ძალიან ბევრი კრიტიკული აზრია და მას რა დაემატება, არ ვიცით. ამ პროცესმა პანიკა არ უნდა გამოიწვიოს. სიმართლეს შეფუთვა, გავრცელება და გასაღება სჭირდება. სააკაშვილი ტყუილს კარგად „ფუთავდა“, ჩვენ სიმართლე უნდა „გავყიდოთ“.

თქვენ საუბრობთ, რომ საქართველოს მთავრობამ სიმართლე უნდა „შეფუთოს“ და ევროპაში მოკავშირები მოძებნოს. თუმცა, იგივე ფულემ განაცხადა, რომ ყოფილ პრემიერ-მინისტრს სამი კითხვით მიმართა და პასუხი არცერთზე არ მიუღია. რატომ?

-ვინ ვის რა ჰკითხა, არ ვიცი. ფულესთან კითხვები მეც მაქვს. როცა მას კითხვებით მივმართავდი, ის გაფართოების დირექტორი იყო და მისგან პასუხებს ვერც ჩვენ ვიღებდით.  წინასწარ ვიღაცეები შეეცდებიან, რომ ხელი დაიბანონ, მაგრამ ეს მომენტი ჩვენთვის უმნიშვნელოა. მაინც ევროპისკენ ვივლით და შინაურ გაბრაზებებს აზრი არ აქვს. შემიძლია, ფულე გავლანძღო და მას ყორღანი დავაყარო, მაგრამ ამას მნიშვნელობა არ აქვს. ეფექტიანები იქ უნდა ვიყოთ, სადაც გადაწყვეტილებებს იღებენ, ანუ - ევროპაში.  

როგორ ფიქრობთ, პატიმრობაში ყოფილი მაღალჩინოსნების ყოფნა,  საქართველოსთვის უვიზო მიმოსვლის მიღებას საფრთხის ქვეშ დააყენებს?

-მსგავსი საკითხი არავის გაუხმოვანებია. თუკი მეხუთე შეფასებას მოგვთხოვენ, ჩვენ ხელები არ უნდა ჩამოვყაროთ და არ უნდა ვთქვათ, რომ სიცოცხლე აღარ გვინდა. ამ პროცესით ოპოზიცია ისარგებლებს, რადგან საარჩევნო წელი მოდის. ფაქტია, რომ საქართველოს წარმატება ყველას გვჭირდება, მაგრამ ოპოზიციისთვის ქვეყნის წარუმარტებლობა სასარგებლო იქნება.

თუმცა, „ნაციონალური მოძრაობა“  მაშინდელ ოპოზიციას იმის გამო გაკრიტიკებდათ, რომ თქვენ ქვეყანაში მიმდინარე პროცესები საზღვრებს გარეთ გაგქონდათ. ყოფილი ხელისუფლება ოპოზიციას ბრალს სახელმწიფოსთვის ძირგამომთხრელი პოლიტიკის წარმოებაში სდებდა. როლები შეიცვალა?

-როდესაც ადამიანი ოპოზიციაშია, მას ჰგონია, რომ საკუთარი ამოცანები უკეთ იცის. დარწმუნებული ვარ, რომ „ნაციონალური მოძრაობა“ უპერსპექტივო ძალაა. ამ პარტიამ საკუთარი თავი თავად გაინადგურა. კანდელაკს რა შეუძლია? - ევროპაში ყურს აგვიწვენ? - ჩემი აზრით, ნაციონალები არასწორად მოქმედებენ, მაგრამ მათ ვერაფერს ვასწავლი. 

თუკი ნაციონალებს სიმართლე აქვთ, ის უნდა გაიტანონ, მაგრამ როცა ისინი ამბობენ, რომ ჩვენ „რუსთავი 2“ დავხურეთ და ჟურნალისტები დავხვრიტეთ, ეს სწორია?

ნაციონალები „თავისი სიმართლის“ გაყიდვას რომ ახდენენ, ეს ხელისუფლების სისუსტე არ არის?  საგარეო პოლიტიკაში უფრო აქტიურები რატომ არ ხართ?

-ტყუილი იოლად იყიდება, სიმართლის გაყიდვა - ძნელია. ძალიან ძნელია ევროპელებს ავუხსნათ, რეალურად რა ხდება. კაცი ჩივის, რომ ეს ტელევიზია მისია და ჩვენ რა შუაში ვართ? ის სასამართლოშიც არ მივიდეს? - ჩვენ „რუსთავი 2“-ისთვის პრობლემა არ შეგვიქმნია. საქართველოში პირველადაა ისეთი ხელისუფლება, რომლის მომხრე ერთი ჟურნალისტიც არ არის.

ხელისუფლება და ქვეყანა იდეალური არ არის, სააკაშვილის დროს, საგარეოდ კარგად გამოვიყურებოდით, შიგნით კი, ყველა ციხეში იჯდა.  ბრიტანეთის ელჩმა გვითხრა, რომ საქართველოს გვირაბის ბოლოს სინათლე უნდა აუნთონ. ეს კარგი ნათქვამია, მაგრამ მან თქვა, რომ ქართველებმა ისე იმოქმედეთ, როგორც ევროპელებმაო. ინგლისელ მეგობარს მინდა ვუთხრა, რომ მისი დემოკრატია 400 წლისაა და ინგლისში 400 წლის წინ როგორ იქცეოდნენ, ის არ მომაყოლოს, თორემ, შექსპირის ეპოქაც ვიცი და ისიც - ვინ როგორ იქცეოდა. საქართველო ნელ-ნელა ევროპულ ქვეყნად იქცევა.

მენტალურადაც ევროპულ გზას დავადექით?

-საქართველოში ქეიფის დრო შემცირდა. ადრე ქეიფი ათი საათის განმავლობაში გრძელდებოდა, ახლა ოთხი საათია. წესრიგი ქელეხში ვიცით და იქაც გვიჭირს. ათ წელიწადში ის გვინდა, რასაც ევროპამ 400 წელი მოანდომა. საქართველო 50 წლის შემდეგ იმ დონეზე იქნება, რომელზეც ახლა თურქეთია.

პარლამენტარიზმში თურქეთზე წინ ვართ, მაგრამ ამ პარლამენტს სახელმწიფო კონტროლი უნდა შეეძლოს და ეს სათანადოდ არ გვაქვს. საქართველოს პარლამენტს ცუდი თავმჯდომარეები არ ჰყავდა, მაგრამ დავით უსუფაშვილი გამორჩეულია.

დავით უსუფაშვილი გაწონასწორებული სპიკერია, მაგრამ ის არაფორმალურ მმართველობასთან დაკავშირებით გაკეთებული განცხადების გამო მკაცრად გააკრიტიკეს. თქვენ როგორ ფიქრობთ, ქვეყანას ივანიშვილი მართავს?

-უსუფაშვილის ძალა იმაში მდგომარეობს, რომ ის გაწონაწორებულია. კრიტიკოსები ითხოვენ, რომ ის გიჟი იყოს. უსუფაშვილი „რესპუბლიკური პარტიის“ განძია. საქართველოს ისეთი პარლამენტის თავმჯდომარე ჰყავს, რომელსაც 150 დეპუტატიდან გამარჯობას 149 დეპუტატი ეუბნება და ეს პირველი შემთხვევაა. მას ის დეპუტატებიც სცემენ პატივს, რომლებიც ამბობენ, რომ მისი ფრაქცია არ ვარგა და რესპუბლიკელები ქვეყანას ანგრევენ. ბედნიერებაა, რომ ასეთ ქვეყანაში ასეთი გაწონასწორებული და მიუკერძოვებელი სპიკერი გვყავს.

რაც შეეხება არაფორმალურ მმართველობას, ქვეყანაში არაფორმალური მმართველობა რომ იყოს, ინსტრუქციებს არაფორმალური კაცისგან მივიღებდით. ევროინტეგრაციის კომიტეტის მუშაობაში არაფორმალური ჩარევა არ ხდება. როცა არაფორმალური მმართველობაა, ამას კომიტეტი კი არა, მოქალაქე სახლშიც იგრძნობს.

ივანიშვილმა ჩაბეტონებული რეჟიმი ამოთხარა, მსოფლიო რეკორდი დაამყარა და მას ხანდახან, რაღაცას ეკითხებიან. ამერიკაში, ჯიმ კარტერს ჭკუას რატომ ეკითხებიან? რატომ ხდება, რომ ყოფილ პრეზიდენტებს რაღაცას ეკითხებიან? - ე.ი. გამოცდილ ადამიანებს რაღაცას ეკითხებიან. როცა ქვეყანაშია დიქტატურა ან არაფორმალური მმართველობა, ამას ყველა გრძნობს. რჩევის მიღებას ვერავინ ვერავის დაუშლის. თუკი ეჭვი გვაქვს, რომ ვინმე გადაწყვეტილებას დამოუკიდებლად ვერ იღებს, მას არჩევნებში ხმას ნუ მისცემთ.

ღარიბაშვილი მთავრობაში საკადრო ცვლილებებს ივანიშვილის რჩევის გარეშე იღებს?

-დარწმუნებული ვარ, ღარიბაშვილი აზრს არა მხოლოდ ივანიშვილს, არამედ ბევრ ვინმეს ეკითხება. როცა ობამა საკადრო გადაწყვეტილებას იღებს, კონსულტაციებს ისიც გადის. თუკი მიგაჩნიათ, რომ რომელიმე ძალა დამოუკიდებლად ვერ აზროვნებს, მას ნუ აირჩევთ.

თქვენ გგონიათ, რომ „ნაციონალურ მოძრაობაში“ გადაწყვეტილებებს - ბაქრაძე იღებს? ეს როგორი დამოკიდებულებაა, ყოფილი პრემიერი ცუდი მრჩეველია, ხოლო ყოფილი პრეზიდენტი - კარგი?

ყოფილი პრეზიდენტს უკრაინის პრემიერ-მინისტრობა სურს. სააკაშვილს საკუთარი სურვილის სისრულეში მოყვანის რა შანსი აქვს?

-უკრაინის პრეზიდენტი ფიქრობს, რომ მას ფეხებზე ჰკიდია, ქართველებს გამოდგა თუ არა სააკაშვილი, მთავარია - მას გამოადგეს. მას სააკაშვილი მოსწონს და იცის, რომ ის იმიჯის „გაყიდვის“ დიდოსტატია. ხომ ვიცით, ის ოდესის გუბერნატორად რომ არ გაჩერდება? - პოროშენკოს სიფრთხილეს ვურჩევდი, რადგან არ არის გამორიცხული, მის პოსტს დაუმიზნოს. მას ნაციონალური ბმა არ აქვს. ვერ წარმომიდგენია, რომ სხვა ქვეყანაში პოსტზე ვმუშაობდე. „ნაციონალური მოძრაობა“ გაკოტრებულია, რადგან მიშამ ეს ჩაიდინა.

ანუ, თქვენ ამბობთ, რომ სააკაშვილი თანამდებობის კაცია?

-რა თქმა უნდა, მიშა თანამდებობის კაცია. როგორ შეიძლება, ადამიანი უცხო ქვეყანაში იყოს და პატრიოტიზმზე მელაპარაკებოდეს?! სულელური დამოკიდებულებაა, რომ „საქართველოს ბედი უკრაინაში წყდება“. საქართველოს ბედი მოსკოვში და ვაშინგტონში კი არა, საგარეჯოში წყდება. თურმე, ირმა ინაშვილი სააკაშვილს მხოლოდ იმაში უჯერებს, რომ მე აგენტი ვიყავი და მიშას სწორად გამოვუცხადებივარ ჯაშუშად. ინაშვილი აგენტი არ არის, სჯობდა, რომ აგენტი ყოფილიყო, მაგრამ აგენტი სულ სხვა რამეს ნიშნავს. ის რუსულ სარტყელს ემსახურება და თუკი ეს უნებურად ხდება - ცუდია.  მას სამხილებელი არაფერი არ აქვს, რადგან ინაშვილს „დიდი რუსეთი“ და  ევრაზია შუბლზე აწერია.

საგარეჯოში თამარ ხიდაშელს გამარჯვების შანსი აქვს?

-ხიდაშელს სერიოზული ბრძოლა მოუწევს, რადგან ის კოალიციის ყველაზე უფრო დემოკრატიული ფრთის წარმომადგენელია. დემოკრატი ადამიანი ყველაფერზე ვერ მიდის და ტყუილებს არ იტყვის. ის ამ ბრძოლაში გაიმარჯვებს. ეს ჩვენი კოალიციისთვის საჩვენებლი ბრძოლაა - თუკი ამ ბრძოლას წესიერად არ ვიგებთ, ეს ნიშანი იქნება მომავალი საპარლამენტო არჩევნებისთვის, რა და როგორ იქნება. კარგია, რომ ერთ-ერთი მოწინააღმდეგე პარტია ლიდერის სახით იქნება წარმოგენილი. აბა, „ინაშვილის კაცი“ რა უბედურებაა? ინაშვილის ხათრით კოალიცია არ გაიყოფა.