„ჩემი ნება რომ იყოს, ბიძინა ივანიშვილს დავაბრუნებდი აქტიურ ქართულ პოლიტიკაში“, - ასე გამოეხმაურა თავდაცვის მინისტრი ბოლო დღეებში არაფორმალურ მმართველობასთან დაკავშირებით გაკეთებულ განცხადებებს. თინა ხიდაშელი ამბობს, რომ ბიძინა ივანიშვილის გავლენა გამოწვეულია მის მიმართ დიდი პატივისცემით, თუმცა გადაწყვეტილებების მიღების პროცესის მონაწილე არ არის.
„თავისთავად ის ფაქტი, რომ ადამიანს აქვს გავლენა, მის მიმართ არის დიდი პატივისცემა, ძალიან ნორმალურია, ეს პრაქტიკულად ყველგან ხდება, სადაც არსებობენ გავლენიანი ადამიანები. ივანიშვილმა ყველაზე კარგად იცის, რას ნიშნავს არაფორმალური მმართველობის ბოროტება, რადგან ჩვენ ამას დიდი ხნის განმავლობაში ვუყურებდით საქართველოში. კიდევ ერთხელ ხაზგასმით ვამბობ, რომ სამწუხაროდ ბიძინა ივანიშვილი არ არის თანამონაწილე გადაწყვეტილების მიღების პროცესის“, - აღნიშნა თინა ხიდაშელმა.
საქართველოში არაფორმალური მმართველობის შესახებ განცხადება „ევროპის ახალი გეოპოლიტიკური ლანდშაფტი - უსაფრთხოება, ეკონომიკური შესაძლებლობები, თავისუფლება და ადამიანური ღირსება ფრონტისპირა ქვეყნებში მიმდინარე კონფერენციაზე გაკეთდა. არაფორმალურ მმართველობასა და პოლიტიკური ოპონენტების დაპატიმრებებზე ყოფილმა ევროკომისარმა შტეფან ფულემ ისაუბრა.
„პრობლემა იმაში არ არის, რომ კითხვები მუდმივად ისმება, პრობლემა ისაა, რომ კოალიცია „ქართული ოცნების“ ყველა წევრი არ პასუხობს კითხვებს ისე ღიად და გულწრფელად, როგორც თქვენ (დავით უსუფაშვილს). ყოველთვის ვცდილობ ყურადღება გავამახვილო ამაზე. უნდა შეზღუდოთ თავის მართლება. თქვენი საქმეა, რომ წევრ ქვეყნებს გაუჭირდეთ, იპოვოს თქვენთან თავის მართლების შემთხვევები“, - მიმართა შტეფან ფულემ საქართველოს პარლამენტის თავმჯდომარეს.
თავად პარლამენტის თავმჯდომარე აცხადებს, რომ ის არ არის არაფორმალური ლიდერობის მომხრე, თუმცა არ მიიჩნევს, რომ ეს არის მთავარი პრობლემა, რომლის წინაშე დღეს ქართული საზოგადოება დგას. დავით უსუფაშვილის განცხადებით, მთავრობა მუშაობს სახელმწიფო ინსტიტუტების გაძლიერებაზე.
„არაფორმალური ლიდერობა ცუდია, არ არის კარგი, მე არ ვუჭერ ამას მხარს. უბრალოდ, არის ადამიანი, ვისაც აქვს პატივისცემა და ზეგავლენა საზოგადოებაზე. ფორმალურ ხელმძღვანელობას რაც შეეხება, მე კითხვის ნიშანს დავსვამდი არაფორმალური ლიდერის ზეგავლენის ხარისხზე. ფორმალური დიქტატურა სჯობს თუ არაფორმალური ზეგავლენის მქონე ადამიანი, მაგალითად მიხეილ სააკაშვილის პერიოდი, რომელიც ახლა სხვა ქვეყნის ერთ-ერთ რეგიონს ხელმძღვანელობს“, - აღნიშნა დავით უსუფაშვილმა.
დავით უსუფაშვილის მიდგომას არ იზიარებს თავდაცვის ყოფილი მინისტრი. ირაკლი ალასანიას თქმით, პატივს სცემს უსუფაშვილის პოლიტიკურ შეხედულებებს, მაგრამ ვერ დაუჭერს მხარს, როდესაც ის ძალიან ცდილობს ეს თემა გაამარტივოს.
„საქართველოში პირველად ხდება, როდესაც გვაქვს ასეთი ვითარება. არაფორმალური ლიდერის მხრიდან სრული კონტროლი მთავრობისა და პარლამენტის საქმიანობაზე და ამავდროულად, ნულოვანი ანგარიშვალდებულება. ამ მხრივ მომავალი წლის არჩევნები იქნება გადამწყვეტი, რათა არაფორმალური მმართველობა საქართველოში შეიცვალოს“, - აღნიშნა ირაკლი ალასანიამ.
ყოფილი პრემიერის ყოფილი მრჩეველი, გია ხუხაშვილი არ იზიარებს ხელისუფლების ოპონენტების განცხადებას ქვეყანაში არსებულ არაფორმალური მმართველობითი სისტემის შესახებ. როგორც ხუხაშვილი აცხადებს, „ნაციონალური მოძრაობა“ ლაპარაკობს ისეთ საკითხებზე რაც საქართველოში მოთხოვნადი არ არის, მაგრამ უცხოელებისთვის მნიშვნელოვანია.
„სამწუხაროდ, უნდა ითქვას, რომ შედეგს აღწევენ. უნდა ვაღიაროთ, ნაციონალებმა მოახერხეს ამ განცდის დამკვიდრება საერთაშორისო საზოგადოებაში. სამწუხაროდ, ამას მაქსიმალურად ხელს უწყობს ხელისუფლებაც. ჩვენ გვყავს მინისტრები, რომლებიც კაბინეტში სხედან, მინისტრობანას თამაშობენ და ამ დროს არაფერზე პასუხისმგებელი არ არიან. იღებენ გადაწყვეტილებას, მაგრამ ყველაფერი მაინც ივანიშვილს ბრალდება.
მრჩება შთაბეჭდილება, რომ კრიზისის შემთხვევაში ბევრი სახელმწიფო პოლიტიკური თანამდებობის პირი ხელს გაიშვერს ივანიშვილისკენ. სამწუხაროდ, მაქვს ამის მოლოდინი, რადგან ვინცობ ყველას და კარგად ვიცი, ვინ რაზეა ხელისმომწერი. მისივე თქმით, „ბიძინა ივანიშვილი ყველანაირად ცდილობს დისტანცირებული იყოს გადაწყვეტილების მიღებისას, მაგრამ თვითონ ხელისუფლება არ აძლევს ამის საშუალებას“.
„ოპენეტების ბრალდება ქვეყანაში არაფორმალურ მმართველობასთან დაკავშირებით, დასავლეთისთვის იფუთება, ისევე როგორც, თითქოს საქართველოში მედია პოლიტიკური ზეწოლის ქვეშ არის“, - აცხადებს პოლიტოლოგი რამაზ საყვარელიძე, რომლის განცხადებით, საზოგადოებას ნეგატიური განცდა არ აქვს იმაზე მმართველობა ფორმალურია, თუ არაფორმალური.
„ამაში არის ლოგიკაც, საზოგადოებას აწყობს, რომ იმაზე, რაც ხელისუფლებაში ხდება პასუხსმგებელი იყოს ის ადამიანი, ვისაც მათ მისცეს ხმა. ივანიშვილი ცდილობს, რომ კრიტიკულ მომენტებში მაინც, ის რაშიც ხალხი ენდო, გაამართლოს - ქვეყანაში ნორმალური ვითარება შეიქმნას.
პირადად მე, ასეთ პასუხისმგებლობას უფრო მივესალმები მისი მხრიდან. თუმცა, ფაქტია, რომ ცდილობს დისტანცირება მოახდინოს პროცესებისგან, რაც ბუნებრივია; ცდილობს, რომ ქვეყანაში ნორმალური მდგომარება შექმნან სწორედ იმ ადამიანებმა, ვისაც ხელსიუფლება გადააბარა. ივანიშვილის ხელისუფლებიდან დისტანცირების პროცესი დაწყებულია და ნელ-ნელა წინ მიდის“, - ამბობს რამაზ საყვარელიძე.
