პარლამენტის ევროინტეგრაციის კომიტეტის თავმჯდომარე, ლევან ბერძენიშვილი კოლეგა თამაზ მეჭიაურს აკრიტიკებს და ამბობს, რომ საკანონმდებლო ორგანოში მის გამოსვლას პირდაღებული უყურებდა. კანონმდებელი მიიჩნევს, რომ მეჭიაურმა პრეზიდენტის მისამართით გაკეთებული განცხადებით ლაფი ყველა დეპუტატს დაასხა.
ბერძენიშვილი პარტია „ქართული ოცნების“ საქმეებში არ ერევა, თუმცა, აცხადებს, რომ ამ პარტიის იმიჯს მეჭიაურის განცხადებების მსგავსი გამოსვლები ქმნის.
საკანონმდებლო ორგანოში განვითარებულ პროცესებზე for.ge რესპუბლიკელ ლევან ბერძენიშვილს ესაუბრა.
პარლამენტის ტრიბუნიდან თამაზ მეჭიაურმა პრეზიდენტი გააკრიტიკა და თქვა, რომ ივანიშვილმა „ენჯეოელ სოროსელს“ საქსოვი ჩხირები ხელიდან გააგდებინა და ვეტოთი აღჭურვა, რომლითაც ის ყველას ნერვებს უშლის. თქვენმა თანაგუნდელმა ამ განცხადებით შეურაცხყოფა მარგველაშვილს მიაყენა, თუ არასამთავრობო სექტორს?
-როგორც ჩანს, მას შეურაცხყოფის მიყენება არავისთვის უნდოდა, უბრალოდ, მას ჰგონია, რომ ეს კრიტიკის ფორმაა. ალბათ, მას შეურაცხყოფა დედის გინება ჰგონია და ეტყობა, მან ეს განცხადება ძალიან მახვილგონივრულ გამოსვლად ჩათვალა.
მის განცხადებაში იუმორის მთავარი ელემენტი ისაა, რომ ბიძინა ივანიშვილს საყვედური უთხრა და ის დამნაშავედ ცნო - ეს ხომ ნონსენსია? სინამდვილეში ივანიშვილი ის კაცია, რომელიც მეჭიაურს დაეხმარა, რომ ასეთ სიმაღლეზე ამოსულიყო.
თურმე, მეჭიაურს პრეზიდენტი ვეტოებით ნერვებს უშლის. ბატონ თამაზს ჰგონია, რომ რაკი პრეზიდენტი ცუდად იქცევა, მისი კრიტიკის ყველა საშუალება სწორია და ის კრიტიკაში თავისუფალია. მას მარგველაშვილის კრიტიკისას კანონი არ დაურღვევია, მაგრამ პრეზიდენტის იმიჯთან ერთად, საქართველოს პარლამენტი დაზარალდა, რომელიც თურმე, პრეზიდენტის ინსტიტუტს პატივს არ სცემს. აქ საუბარი მარგველაშვილის იმიჯზე კი არ არის, არამედ პრეზიდენტის ინსტიტუტზე.
მეჭიაურის პირით, თურმე, პარლამენტი არასამთავრობო სექტორს პატივს არ სცემს. არ ვიცი, არასამთავრობო სექტორი ვის უნდა შევადაროთ - პარტიულ მუშაკებს, რაისაბჭოს თანამშრომლებს, საგადასახადო ინსპექციას, თუ პრეფექტის თანაშემწეს?
სპეციალურად გისახელებთ იმ თანამდებობებს, სადაც მას უმუშავია. როგორც ჩანს, „ენჯეოშნიკობას“ ეს მიმართულებები სჯობს. მან გაუაზრებლად შეურაცხყოფა არა მხოლოდ არასამთავრობო სექტორს მიაყენა, არამედ იმ ხალხს, ვისთან ერთადაც მუშაობს.
მხედველობაში ის დეპუტატები გყავთ, რომელთაც არასამთავრობო სექტორში მუშაობის გამოცდილება აქვთ?
-საქართველოს პარლამენტში „ენჯეოშნიკები“ არიან - პარლამენტის თავმჯდომარე, დეპუტატთა ნახევარზე მეტს არასამთავრობო სექტორიდან გრანტი აქვს მიღებული, კანონმდებელთა მეოთხედი ნაწილი არასამთავრობო ორგანიზაციებში მუშაობდა, ჩემი ფრაქცია კი მთლიანად ჯდება განმარტებაში - „სოროსელი“ და „ენჯეოშნიკი“.
ამის გარდა, მეჭიაურმა ქსოვის უნარი მარგველაშვილის დიდ ნაკლად მიიჩნია. ბატონი თამაზი, გიტარასა და ფორტეპიანოზე დაკვრას როგორ უყურებს? მისი გამოსვლა ისეთი „ბუკეტი“ იყო, რომ პირდაღებული ვუყურებდი.
საკითხი „ეროვნული ბანკის შესახებ“ კანონპროექტს ეხებოდა - თემაზე მსჯელობისას, დეპუტატი როგორ იქცევა? - კვალიფიციურად ლაპარაკობს, პრეზიდენტის შენიშვნებს უარყოფს, ვეტოს ითხოვს და ამ ვეტოს წინ ერთსულოვნებას თანამოაზრეებს შორის ეძებს - მან შეურაცხყოფა სწორედ იმ ხალხს მიაყენა, ვინც ვეტო უნდა დაძლიოს.
კიდევ კარგი, საქვეყნო საკითხებსა და ვეტოს დაძლევაზე იმის მიხედვით არ ვმსჯელობთ, ჩვენი კოლეგა ამა თუ იმ საკითხზე რას იტყვის. თუკი მეჭიაური ასე ფიქრობს, იმ უმრავლესობაში რა უნდა, რომლის პარლამენტის თავმჯდომარე „სოროსელი“ და „ენჯეოშნიკია“?!
ასევე, „სოროსის ფონდის“ აღმასრულებელი საბჭოს წევრები იყვნენ - ვახტანგ ხმალაძე და ლევან ბერძენიშვილი, ხოლო „სოროსის ფონდის“ დირექტორი - დავით დარჩიაშვილი იყო. პარლამენტის შემადგენლობის ნახევარი „სოროსის ფონდის“ მიერ დაფინანსებულია და მეჭიაურმა უნდა იცოდეს - ის რომ თანამდებობაზე მუშაობდა, მაშინ მინისტრების ხელფასებს „სოროსის ფონდი“ გასცემდა.
მას შეუძლია, „ასავალ-დასავალისა“ და სიძულვილის ენაზე ილაპარაკოს, რაც მისი ნებაა. პეტიცია მომზადდა, რომ მეჭიაურმა ბოდიში მოიხადოს, მაგრამ ქალს რომ გააუპატიურებ და მერე ბოდიშს მოუხდი, ამით რა იცვლება? მან პარლამენტს ჩრდილი მიაყენა, თორემ, მე რომ „ენჯეოშნიკი“ ვარ, ეს შეურაცხყოფა არ არის.
პირველი შემთხვევა არ არის, როდესაც მეჭიაურმა მარგველაშვილს შეურაცხყოფა მიაყენა. დეპუტატი პრეზიდენტს ხან „კუ და მორიელის“ წაკითხვას ურჩევს, ხან მას „ერთი კაცის“ რჩეულად მიიჩნევს. ქვეყნის პირველი პირის ქილიკს სათავე ბიძინა ივანიშვილმა ხომ არ დაუდო?
-ივანიშვილმა მარგველაშვილი გააკრიტიკა და პრეზიდენტმა თქვა, რომ ის ყოფილი პრემიერის კრიტიკამ დააზიანა. ივანიშვილის კრიტიკა, ლექსიკა და აზროვნება ამ დონეზე არ დასულა. ივანიშვილი „სოროსელებზე“ და „ენჯეო“-ზე ასე რომ ფიქრობდეს, კოალიციის შექმნის დროს პირველ პარტიად „რესპუბლიკურ პარტიას“ და შემდეგ „თავისუფალ დემოკრატებს“ არ დაასახელებდა, რადგან ამ ლოგიკით, ერთიც და მეორეც „ღვთის პირიდან გადავარდნილები“ არიან. ალბათ, „სოროსელი“ დასავლური ორიენტაციის კაცს ნიშნავს. შესაძლოა, მეჭიაურის თვალში ასევე ნიშნავს - იეღოველს, მამათმავალს და ა.შ.
ანუ, „სოროსელი“ „იბიარდი“-ს რანგში გადის?
-„იბიარდი“ გაუაზრებელი ხუმრობა იყო, ხოლო აქ ადგილი შეურაცხყოფას ჰქონდა, რომელიც შეფარული ირონიით იყო სავსე. ბედის ირონია ისაა, რომ მთელი ეს ტალახი თავს ლაფად პარლამენტის ყველა წევრს დაესხა. ახლა ყველა შერცხვენილნი ვართ, რადგან ყველა ხედავს, რომ პარლამენტი ის ადგილია, სადაც იმ ენით ლაპარაკობენ, რომელსაც „ასავალ-დასავალი“ ამკვიდრებს. ანუ, ლაპარაკობენ - უბირი, გაუნათლებელი, ბნელი ადამიანების ენით; თუმცა, კი - ბატონი თამაზი არც უბირია, არც ბნელია და არც გაუნათლებელი.
მაშინ, მან ეს „ენა“ რატომ გამოიყენა?
-ეს მისი არჩევანია. მისი გამოსვლა ზომიერი არ იყო და შეწუხებული ვარ, მაგრამ არა იმით, რომ ვინმეს მორალი ვასწავლოთ. ის ბოდიშს არ მოიხდის, მაგრამ რომ მოიხადოს კიდეც, ეს უარესი იქნება.
როცა პარლამენტში ადგილი „გაუაზრებელ ხუმრობებს“ აქვს და ამით ტალახი პარლამენტს ესხმება, უმრავლესობა ამ საკითხებზე გუნდის შიგნით რატომ არ მსჯელობს?
-ეს უმრავლესობის საკითხი არ არის - პარტიული დისციპლინის საკითხია. მეჭიაურს პარტია აქვს და ყველა კითხვით მათ მიმართეთ. პარტიამ უნდა იცოდეს, მისთვის ასეთი წევრების გამოსვლები რამდენად მომგებიანია.
ფაქტია, რომ „ქართული ოცნებისთვის“ ასეთი გამოსვლები მომგებიანი არ არის, რადგან ამ სახის განცხადებებს საზოგადოება აღშფოთებული ხვდება...
-პარლამენტი მეჭიაურის დირექტორი არ არის. პარლამენტის თავმჯდომარე მეჭიაურს ვერ დაიბარებს და იცით, რატომ? - უსუფაშვილი პარლამენტის ისეთივე წევრია, როგორც - მეჭიაური. აქ უფროს-უმცროსობა არ გვაქვს. მეჭიაური კომიტეტის თავმჯდომარე რომ არის, ეს არ ნიშნავს, რომ ის ვინმეს უფროსია.
ეს ყველაფერი უმრავლესობის კი არა, იმ პარტიის საქმეა, რომელიც ხვალ არჩევნებზე გასვლას აპირებს და მის იმიჯს ასეთი სახის გამოსვლები ქმნის. ეს „ქართულ ოცნებას“ უნდა ჰკითხოთ.
როდესაც „რესპუბლიკური პარტიის“ წევრი ცუდად იქცევა, მას ან საყვედურს მოვარტყამთ, ან პარტიიდან ვრიცხავთ. „ქართული ოცნება“ როგორ იმოქმედებს, ჩვენ ვერ ვუკარნახებთ, რადგან მათი გადასაწყვეტია. თუკი ბატონი თამაზის გამოსვლები ასე მოსაწონია, მაშინ ის საარჩევნო სიაში კვლავ იქნება. რა უფლება მაქვს, ვინმეს „ასავალ-დასავალის“ წაკითხვა ავუკრძალო? „ობიექტივი“ არის ტელევიზია, საიდანაც ღვარძლის და რუსეთის ქების მეტი არაფერი მოდის.
თუმცა, ამ ტელევიზიაში თქვენი ლიდერებიც დადიან...
-ტელევიზია ეთერშიც უნდა იყოს და იქ ვიღაცეებმა უნდა იარონ კიდეც, რადგან ბოიკოტი სწორად არ მიმაჩნია. იქ პირადად მე, არ წავალ, მაგრამ თუ პარტია მიბრძანებს, მაგასაც კი ვიზამ.
საფინანსო-საბიუჯეტო კომიტეტის თავმჯდომარედ თამაზ მეჭიაურის დანიშვნას მხარი თქვენც დაუჭირეთ. მას მეტ-ნაკლებად იცნობდით, რადგან ის ამ მოწვევის პარლამენტში აუდიტის სამსახურის საქმიანობის შემსწავლელი კომისიის თავმჯდომარე იყო. ამ დროს, მან ისიც კი ვერ გაარკვია, დასკვნა პროკურატურისთვის გაეგზავნა, თუ საკანონმდებლო ორგანოს ვებ-გვერდზე დაედო... მისი დაწინაურებისთვის, პასუხისმგებლობა თქვენ არ გეკისრებათ?
-თქვენ მეუბნებით, რომ პარლამენტში დანიშვნების დროს, არის თუ არა პოლიტიკური თამაშები, გათვლები და ა.შ. მსოფლიოს ყველა პარლამენტში ხმას აძლევენ არა პიროვნებას, არამედ რაღაცის საფუძველზე გადაწყევტილებებს იღებენ. მეც მივეცი ხმა და მისი ხმა მეც მივიღე. პოლიტიკაში საქმე მეგობრების მიერ არ კეთდება. სანამ მეგობრების პარტია ვიყავით, მანამდე, პატარა პარტია ვიყავით; როცა „რესპუბლიკური პარტია“ მარტო ხალხის პარტია იქნება და არა ძმებისა და ცოლ-ქმრის, მაშინ ის დიდი პარტია იქნება. „ქართული ოცნება“ ახალი პარტიაა და ახლა ყალიბდება.
თავად „რესპუბლიკური პარტია“ ცვლილებებს მხარს რატომ უჭერს? - იმიტომ, რომ ამ გაუგებრობაში ნოდარ ებანოიძე შემთხვევით მოხვდა, თუ აღნიშნული ცვლილებები მიღება მართებულად მიგაჩნიათ?
-ამ კითხვაზე პოლიტიკურად გიპასუხებთ და არა ეკონომიკურად. როგორც წამიკითხავს, მსოფლიოში ბანკებზე ზედამხედველობის სააგენტოს ყველა მოდელი მუშაობს. პარტიაში ამ საკითხებში ექსპერტი ნოდარ ებანოიძეა, რომლიც ამ პროცესში შემთხვევით ნამდვილად არ მოხვდა.
ამ ცვლილებებს არასამთავროები ეწინააღმდეგებიან, რესპუბლიკელები კი, მხარს ვუჭერთ და ამით ცუდები არ ვხდებით. პრინციპებს არ ვღალატობთ. ერთსულოვნება პარტიაში გამიგია, თუმცა, ჩემს პარტიაში ჯერ ისეთი საკითხი არ განხილულა, რომელიც ერთხმად მიღებულა. პარტია რომ დაფუძნდა და მას სახელი დაერქვა, ერთსულოვნად ეს საკითხიც კი არ იყო მიღებული. ამის შემდეგ, პარტიაში სიმბოლურად, რაღაცის წინააღმდეგი ერთი კაცი მაინც იქნება. ახლა არასამთავრობო სექტორში რაც ხდება, ამით გაკვირვებული ვარ.
რა ხდება არასამთავრობო სექტორში?
-არცერთი ორგანიზაცია არცერთი სამთავრობო აზრის მომხრე არ არის. თუ ვიტყვით, რომ შსს გაიყოს-თქო, მაშინ, არასამთავროები ამბობენ, ეს რა სისულელე არისო. ეს რას ნიშნავს იცით? - არასამთავრობო სექტორში ერთსულოვნებაა და ბევრი ორგანიზაცია თვლის, რომ მთავრობასთან ყველა საკითხზე დაპირისპირებული უნდა იყოს.
არასამთავრობო სექტორსაც ცუდი დრო უდგას. სამწუხაროა, რომ ის ვიღაცეების საბურთაო გახდა, მაგრამ მეორე მხრივ, იქ აზრების კონკურენცია არ მიმდინარეობს და არ შეიძლება, რომ ყველას ყველა საკითხზე ერთი და იგივე პოზიცია ჰქონდეს. მათი დამოკიდებულებაა, რომ რასაც მთავრობა იტყვის, კარგია, რასაც არა - ცუდი. იქ პლურალიზმი უნდა იყოს.
მედიაში პლურალიზმია, მაგრამ ცოტა უცნაური. არცერთ მედიასაშუალებას სამთავრობო პოზიცია არ აქვს. გული მწყდება, რომ ზოგჯერ, მედიაში სოლიდარობა არ არის.
როდის ვერ დაინახეთ სოლიდარობა?
-აჭარაში ჟურნალისტი სცემეს და მერე რა მოხდა?
რადგან მედიაზე ჩამოვარდა საუბარი, როგორ ფიქრობთ, ინგა გრიგოლიას გადაცემის დახურვაში ხელისუფლების ხელი ურევია?
-გრიგოლიას მიაჩნია, რომ ამ საქმეში ხელისუფლების ხელი ურევია, მაგრამ მე ეს არ ვიცი. ხელისუფლების ინტერესი რა არის, ამას კარგად ვერ ვხედავ. „რუსთავი 2“ დაიხურა? როგორც ჩანს, „იმედი“-ს მფლობელთაგან ვიღაცამ ჩათვალა, რომ ამწუთას, ინგა გრიგოლია არ სჭირდებათ.
როგორც ამბობენ, გრიგოლიას გადაცემა რეიტინგული იყო. შესაბამისად, მომგებიანიც იყო და თუ არა პოლიტიკური გადაწყვეტილება, მენეჯმენტს მასზე უარი რატომ უნდა ეთქვა? რატომ არ სჭირდებათ, პრობლემებს უქმნით?
-ალბათ, მათ შინაგანი ცენზურა ჩართეს და ჩათვალეს, რომ სახიფათოა ხელისუფლებისთვის, ან იმისთვის, ან ამისთვის. ვერ დამარწმუნებთ, რომ „იმედი“-ს გადაცემა ხელისუფლებამ დახურა, რადგან ხელისუფლებები გადაცემებს კი არ ხურავენ, ისინი გადაცემებს ყიდულობენ.
ცუდის თქმა არ მინდა და გრიგოლიაზე ცუდს ვერ ვიტყვი, რადგან ის ჩემი სტუდენტი იყო და თან საყვარელი სტუდენტი, მაგრამ სხვა ხელისუფლებების დროს მინახავს, გრიგოლიაც პოზიციას როგორ შესანიშნავად იცვლიდა და ეს დიდ ტრაგედიად არ მიმაჩნია. გონიერი ხელისუფლება ჟურნალისტის დამოკიდებულების შეცვლას შეეცდებოდა.
ანუ, თქვენ ფიქრობთ, რომ ხელისუფლება გრიგოლიას პოზიციების დათბობა შეეძლო?
-თუ ხელისუფლებას უნდა, ვვარაუდობ, რომ ის ამ ჟურნალისტთან დამეგობრებას შეძლებდა. გრიგოლია ხელისუფლების ინეტერსებზე საუბრობს, მაგრამ ამას ვერ ამტკიცებს. თქვენ ფიქრობთ, რომ ივანიშვილმა პატარკაციშვილების ოჯახს უთხრა, გრიგოლია გააჩერეთო? - რეიტინგებით, ლიდერი „ქართული ოცნებაა“ და ის არავის საქმეებში არ ერევა.
