თავდაცვისა და უშიშროების კომიტეტის თავმჯდომარის, ირაკლი სესიაშვილის განცხადებით, პანკისის ხეობიდან სირიაში საბრძოლველად წასული ახალგაზრდების მთავარი ინტერესი მათი იდეოლოგიაა და არა ფინანსური მხარე. დეპუტატის მტკიცებით, ქართული მხარე, პანკისის ხეობიდან ახალგაზრდების გადინებების შეჩერების მიზნით, აქტიურად მუშაობს და შედეგი ძალიან დიდია, რადგან კანონმდებელის ცნობით, ფინანსური ნაკადები შეჩერებულია, ძირითადი მარშრუტები გაშიფრულია, ხეობაში ე.წ. ვერბორკა ვეღარ მიდის და ბავშვებზე ზეწოლა იმიტომ დაიწყო, რომ მათ მოწყვლადი ჯგუფები გამოაცალეს.

პანკისის ხეობაში მიმდინარე პროცესებზე for.ge ფრაქცია „ქართული ოცნების“ წევრს, ირაკლი სესიაშვილს ესაუბრა:

პანკისის ხეობიდან „ისლამური სახელმწიფოს“ რიგებში საბრძოლველად კიდევ ერთი ადგილობრივი 19 წლის ჯამლეტ ბორჩაშვილიც წავიდა. რა ხდება ხეობაში?

- მოცემულობას ვხედავთ, რომელიც გვაშფოთებს, მაგრამ ჩვენი ხელისუფლების ძალიან აქტიური მუშაობა რომ არა, ხეობიდან სირიაში წამსვლელთა კატასტროფული ციფრები გვექნებოდა. სხვა ქვეყნებთან შედარებით საქართველოს მონაცემები ყველაზე მინიმალურია. საუბარია ორ-სამ ათეულ ადამიანზე. ასზე მეტი ადამიანი უკან არის დაბრუნებული. უკან ზოგი ჩვენი მოქმედებით დაბრუნდა, ზოგი თავისი ნებით, ზოგს იქ ის არ დახვდა, რასაც ელოდა. გერმანიიდან „ისლამურ სახელმწიფოში“ 70 გოგოა წასული, რომელთა 70 პროცენტი ქრისტიანია. იგივე მდგომარეობაა დიდ ბრიტანეტთან მიმართებაშიც. რიგ პოლიტიკოსებს წამსვლელთა ისეთი ციფრები მოჰყავთ, რომელიც სიმართლეს არ შეესაბამება და ამით საზოგადოებას კიდევ უფრო ზაფრავენ. ქვეყნის საერთო ინტერესებიდან გამომდინარე, სანამ რიგი პოლიტიკოსები არსებულ ვითარებას თავისი ჭკუითა და ზოგადი შეხედულებით შეაფასებენ, სჯობს, ისინი სიტუაციას გაეცნონ და აზრი კომპეტენტურ ორგანოებს ჰკითხონ. საქმე ისე არ გეგონოთ, რომ ხელისუფლება არ მუშაობს და სკოლის ორი მოსწავლეც ამიტომ წაიყვანეს.

თქვენ ამბობთ, რომ ამ საკითხზე ხელისუფლება აქტიურად მუშაობს, შედეგი რაში გამოიხატება?

- საკითხზე სერიოზულად ვმუშაობთ. ხელისუფლებაში რომ მოვედით, ქვეყნის რელიგიური და ეთნიკური მიმართულება მოშიშვლებული იყო და მთავრობას უშიშროება და სპეცსამსახურები გადასროლილი პოლიტიკური ფრონტის ხაზზე ჰყავდა. სისტემა ავაწყვეთ, საერთაშორისო ურთიერთობები განვავითარეთ და ტერორიზმს ვებრძვით როგორც საერთაშორისო ანტიტერორისტული სამყაროს ნაწილი.

ტელეეთერის საშუალებით ერთ-ერთმა პანკისელმა განაცხადა, რომ ხელისუფლებას ვერ ვხედავთო. სპეცსამსახურები სწორედ ისე უნდა მუშაობდნენ, რომ მათ ეს ვერ უნდა დაინახონ. პანკისის ხეობის უხუცესებთან, რელიგიურ ჯგუფებთან და არასამთავროებთან სერიოზული ურთიერთობები გვაქვს. პანკისში ტრადიციული ისლამის და ჩვენი თანამოქალაქეების გაძლიერებას მხარს ვუჭერთ და სააგენტოცაა შექმნილი, რომელიც პანკისში მათ სპეციალურ პროგრამებს აფინანსებს.

თქვენ განაცხადეთ, რომ პანკისის ხეობიდან მოზარდების სირიაში გადინებასთან დაკავშირებით, ქართულ სპეცსამსახურებს ადგილობრივებისგან მეტი მხარდაჭერა უნდა ჰქონოდათ. რას გულისხმობდით?

- თუკი საერთო ინტერესის დაცვა გვინდა და ვთვლით, რომ ის რასაც ადგილი ჰქონდა, არასწორი ქმედება იყო, მაშინ უნდა შევთანხმდეთ, რომ პარტნიორები ვართ. თუკი იმაზე ვსაუბრობთ, რომ ადგილობრივები და სამართალდამცავები პარტნიორები არიან და ვიღაცის წინააღმდეგ გამოდიან, მაშინ საკითხზე თვალის დახუჭვა არ უნდა მოხდეს. სპეცსამსახურები ყველგან ვერ იმუშავებენ. ადგილობრივების გარკვეულ ნაწილს ინფორმაცია აქვს - ვინ, სად, როგორ და რას მოქმედებს, თუმცა, ისინი ამ საკითხზე თვალს სხვადასხვა მოტივის გამო ხუჭავენ. ეს შეიძლება ფინანსური დაინტერესება იყოს, ან - საიდუმლო არ გათქვან. თუ ერთი საქმე გვაქვს, მუშაობაც ერთი უნდა იყოს.

სირიაში პანკისელი ახალგაზრდების წასვლის მოტივაცია რა არის - ფინანსური მხარდაჭერა, თუ რელიგიური მიმართულებები და მათი იდეოლოგია?

- თუ ვინმე იტყვის, რომ მოზარდების მთავარი ინტერესი ფინანსური მხარეა, ის იტყუება, რადგან მათი ძირითადი მოტივაცია იდეოლოგიაა. ადამიანის კეთილდღეობისკენ სწრაფვა ბუნებრივი მოთხოვნილებაა, თუმცა, ამ ინტერესთან ერთად იდეოლოგიაც მძლავრობს. ე.წ. დამავერბოვკელები საკუთარი მიზნების განხორციელებას როგორ აღწევენ, ამას ვერ გეტყვით, მაგრამ მათ მთელი მეთოდოლოგია აქვთ შემუშავებული, რომელსაც მხოლოდ საქართველოში არ იყენებენ. ჩვენ ვსაუბრობთ, რომ პანკისის ხეობაში განათლების დონე დაბალია და მოზარდების დაინტერესება სპორტით ვერ ხდება, თუმცა, გერმანიაში ეს ყველაფერი ხომ არის? ტერორიზმი გლობალური საფრთხეა, რომელიც მსოფლიოს ებრძვის, რომელსაც დიდი დაფინანსება აქვს და რომელსაც იდელოგიური მიდგომები დამუშავებული აქვს. მზა რეცეპტი არ არსებობს, რომელსაც გამოიყენებ, რადგან ტერორიზმის მუდმივ ტრანსფორმაციას განიცდის.

შედეგი ძალიან დიდია, რადგან ფინანსური ნაკადები შეჩერებულია და ძირითადი მაშრუტები გაშიფრულია. პანკისის ხეობაში ე.წ. ვერბოვკა ვეღარ მიდის და ბავშვებზე ზეწოლა იმიტომ დაიწყო, რომ მათ მოწყვლადი ჯგუფები გამოვაცალეთ. სოციალურ ქსელებს იყენებენ და ყველაფრის კონტროლი შეუძლებელია, რადგან კანონით, მიყურადების უფლება არ გვაქვს. საზოგადოება თან გვთხოვს, რომ გადინებების პროცესი აღვკვეთოთ და თან გვეუბნებიან, რომ კანონი დავიცვათ.

„ისლამური სახელმწიფოს“ წინაშე არათუ საქართველო, არამედ მსოფლიოც უძლურია, თუმცა, პრობლემა ისაა, რომ ქვეყნის საზღვარი სკოლის მოსწავლეებმა უპრობლემოდ დატოვეს. სახელმწიფოს სისუსტე სწორედ ის ხომ არაა, რომ მოსწავლეებს პირადობის მოწმობები არ უნდა ჰქონოდათ?

- სამწუხაროდ, სერიოზული შეცდომა იქნა დაშვეული, რომლის გამოც სისხლის სამართლის საქმე აღძრულია და გენინსპექცია კონკრეტული მესაზღვრის საქმეს იკვლევს. ჩვენი პასუხი ის იქნება, რომ ეს ადამიანი აუცილებლად დაისჯება. ეს ფაქტი ამ კონკრეტულ საქმეში ერთი სერიოზული შეცდომა იყო, მაგრამ ეს რომ არ ყოფილიყო, პრობლემა მაინც იგივე დარჩებოდა. ხელისუფლების მიმართ ყველაფერზე თითის გაშვერა უპასუხისმგებლობაა და მეტი არაფერი. შედარების გაკეთება არ მინდა, მაგრამ პარლამენტში დიდი ყაყანის შემდეგ, თავდაცვის მინისტრი მოვიდა და მას ერთი ღირებული კითხვა არ დაუსვეს. „თავისუფალ დემოკრატებს“ ე.წ. კაბელების საქმე, საფრანგეთში გაფორმებული მემორანდუმი და ასევე ის აინტერესებდათ, ირაკლი ალასანია იყო თუ არა კარგი მინისტრი, ხოლო ირმა ნადირაშვილი იმით დაინტერესდა, ივანიშვილი ჯანელიძეს მოსკოვში უშვებდა თუ არა აგენტად, ან შუამავლად?! ასეთ ფანტაზიებს სად იგონებენ?

ინტერპოლმა წითელი ცირკულარით საძიებო სისტემიდან იუსტიციის ყოფილი მინისტრი ზურაბ ადეიშვილი ამოიღო. შესაბამისად, მასზე საერთაშორისო ძებნა აღარ გაგრძელდება. ეს ვისი ბრალია, თუ არა მთავარი პროკურატურის?

- ვინმე სუსტია, თუ ვინმეს გრძელი საცეცები აქვს, ამას ვერ გეტყვით. ძალიან ცუდია, რომ ინტერპოლმა საძიებო სისტემიდან ადეიშვილი ამოიღო, რადგან მის მიმართ სერიოზული ბრალდებებია წაყენებული. ყოფილი მინისტრის მიმართ სერიოზული ბრალდებები რომ არ ყოფილიყო წარდგენილი, მის ძებნას ინტერპოლი არ დაიწყებდა. ინტერპოლმა ეს ძებნა შეწყვიტა იმიტომ, რომ თავიდან არასწორი გადაწყვეტილება მიიღო? მას არასწორი გადაწყვეტილება არ მიუღია, რადგან სახელმწიფო ადეიშვილს ადამიანების წამებას, ქონების წართმევას და ბანკის გაკოტრების მცდელობას ედავება. ინტერპოლმა ადეიშვილი სიაში მართებულად ჩასვა, თუმცა, სიიდან ამოღების მიზეზად მისთვის ერთ-ერთი ქვეყნის მიერ პოლიტიკური თავშესაფრის მიღება დაასახელდა. თუკი ეს ინტერპოლის შიდაწესებით განსაზღვრულია, შეიძლება, ეს გასაგები იყოს, მაგრამ ჩემთვის გაუგებარია ის, ინტერპოლმა ეს გადაწყვეტილება ქართულ მხარესთან კომუნიკაციის გარეშე რატომ მიიღო? თუკი ინტერპოლი გადაწყვეტილებას ცვლის, ე.ი თავის დროზე მის მიერვე მიღებულ გადაწყვეტილებას უარყოფს. ალბათ, რაღაც უხილავ პროცესთან გვაქვს საქმე. პროკურატურა ამ საკითხით დაინტერესებულია და ინტერპოლთან მათი კომუნიკაცია შედგება, რადგან საქართველო ინტერპოლის სერიოზული პარტნიორია და ურთიერთპატივისცემა უნდა გვქონდეს.

ედუარდ შევარდნაძის ხელისუფლების ყოფილმა ვიცე-პრემიერმა, თემურ ბასილიამ განაცხადა, რომ მან ინტერპოლის ცენტრალური ოფისიდან ოფიციალური წერილი მიიღო, სადაც მას ბოდიშს უხდიან, რომ აშშ-ში პოლიტდევნილის სტატუსის მინიჭიების მიუხედავად, საქართველოს მთავრობის წინააღმდეგობის გამო, ძებნილთა სიიდან მისი ამოღება ვერ ხერხდება. პროკურატურა საქმის კურსში წინასწარ არ იყო ჩაყენებული?

- არ მგონია, რომ ასე ყოფილიყო, რადგან ასეთ შემთხვევაში, პროკურატურა შესაბამის განცხადებას გააკეთებდა.

გამორიცხავთ, რომ ინტერპოლის გადაწყვეტილებაზე პოლიტიკური ზეგავლენა მიხეილ სააკაშვილის პოლიტიკურ გავლენებს მოეხდინა?

- საკუთარ თავს იმის უფლებას არ მივცემ, რომ ინტერპოლის რეპუტაცია ეჭქვეშ დავაყენო. თუკი სამართლებრივად რაიმე მექანიზმი არსებობს, რომ პირს ძებნილობა მოეხსნას, ასეთ დეტალებში ვერ ვერკვევი. ამ საკითხზე პასუხისმგებელი პროკურატურაა, რომელიც სიტუაციაში გაერკვევა. როგორც ჩემთვის ცნობილია, ჯერ კიდევ, როდესაც სააკაშვილი პრეზიდენტი იყო, სახელმწიფო სამართალდამცავი ორგანოების წინააღმდეგ წავიდა, ინტერპოლს წერილებს წერდა და სთხოვდა, რომ კეზერაშვილი ძებნილთა სიაში არ ჩაესვათ. ეს ფაქტი იმას ადასტურებს, რომ მაშინდელმა პრეზიდენტმა საკუთარი ძალაუფლება სახელმწიფო ინსტიტუტების წინააღმდეგ გამოიყენა. სააკაშვილი ამ ბერკეტებს მაშინ იყენებდა და დარწმუნებული ვარ, რომ რესურსის გამოყენებას ახლაც შეეცდებოდა.

„ნაციონალური მოძრაობის“ ლიდერების ნაწილს სხვადასხვა ეპიზოდში ბრალი წაუყენეთ, რომელსაც რიგ შემთხვევაში,  პროკურატურა ვერ უმტკიცებს, მაგრამ მეორე მხრივ, ინტერპოლი ადეიშვილს აღარ მოძებნის. მაშინ, როდესაც სამართლიანობის აღდგენაზეა საუბარი, თქვენს ამომრჩევლის ამ პოლიტიკურ „ჩავარდნებს“ როგორ აუხსნით?

- ვისაც ბრალი წაუყენეს, ყველა სასჯელს იხდის. ისეთ ადამიანს ვერ დამისახელებთ, რომელსაც ბრალი წარედგინა და ციხეში არ არის. ვინც გაქცეულია, მას გაქცევის მიზეზი ჰქონდა და იმიტომ გაიქცა. ადრე თუ გვიან, მათ კითხვებზე პასუხის გაცემა მოუწევთ. საზოგადოებას სწორად უნდა ავუხსნათ, ხისტ პოლიტიკას რატომ არ ვიყენებთ და რატომ არ ვრისკავთ. ამ ვითარებაში ჩვენთვის პრიორიტეტი ქვეყნის მომავალია. სამწუხაროდ, საერთაშორისო პოლიტიკურ დონეზე წინა ხელისუფლებას გარკვეული დივიდენდები აქვს. ეს არის პიროვნული, ინდივიდვალური თუ ლობისტების მიერ მოტანილი შედეგი. როცა მილიონებს ხარჯავ და ამერიკას არასწორი ინფორმაციით „აბოლებ“, ამ ადამიანებმა უნდა აღიარონ, რომ თურმე, მხარს იმ პირებს უჭერდნენ, რომლებიც საკუთარ ქვეყანას სასტიკად ეპყრობოდნენ. სახელმწიფოს ინტერესები გაცილებით ძვირფასია და არ გვსურს, რომ ევროინტეგრაციის კუთხით პრობლემები გაჩნდეს. კანონის უზენაესობის პრინციპებზე უარს არ ვამბობთ და მართლმსაჯულება შედგება, მაგრამ მოთმინება ის მთავარი იარაღია, რომელიც გაგვაერთიანებს და შედეგამდე მიგვიყვანს. ჩვენ რევანშისტები არ ვართ და ეს იმ ადამიანების მხრიდან რთულად გასაგებია, რომლებიც მსხვერპლნი იყვნენ, მაგრამ სახელმწიფო ინტერესებზე წინ თუნდაც საკუთარი ემოციური წარმოდგენები არ უნდა დავაყენოთ.

რაც შეეხება ახალქალაქის მაჟორიტარი დეპუტატის, სამველ პეტროსიანის განცხადებას, რომ საქართველოს პარლამენტმა სომხების გენოციდი აღიაროს, ვის ინტერესში შედის ამ საკითხის გააქტიურება?

- იმ მოცემულობით მართლაც ვამაყობთ, რომ საქართველოს მეზობელ ქვეყნებთან - სომხეთთან, თურქეთთან და აზერბაიჯანთან სამაგალითო ურთიერთობა აქვს. ეს ქართული პოლიტიკის წარმატებაა. რეგიონში არსებული დაპირისპირების მიუხედავად, საზოგადოება მოწოდებულია, რომ ხალხებს შორის სერიოზულ კონფლიქტს ადგილი არ ჰქონდეს. სომეხმა, აზერბაიჯანელმა და თურქმა კოლეგებმა უნდა გაგვიგონ, რომ ამ საკითხს მანამდე გავექცევით, სანამ მხარეები ერთმანეთში არ მორიგდებიან.