ამერიკაში საქართველოს პარლამენტის ხუთკაციანი დელეგაციის შეხვედრები კამათის ფონზე წარიმართა. for.ge-ს ინფორმაციით, ამერიკაში ოფიციალური ვიზიტის ფარგლებში, ამერიკელ მაღალჩინოსნებთან გამართულ შეხვედრებზე ნაციონალებმა ყურადღება პოლიტდევნაზე და შერჩევით სამართალზე გაამახვილეს, „ქართულმა ოცნებამ“ აქცენტი წინა ხელისუფლების მმართველობაზე გააკეთა, თავად ამერიკელები კი, ქართველი პოლიტიკოსების კამათში არ ჩაერთვნენ და საარჩევნო რეფორმითა და საქართველოს შინაგან საქმეთა სამინისტროს რეორგანიზაციის საკითხით დაინტერესდნენ.

for.ge-ს ინფორმაციით, ამერიკის ეროვნული ინსტიტუტის (NDI) ორგანიზებით, 8-14 მარტის კვირაში, დეპუტატები - ზურაბ ჯაფარიძე, პეტრე ცისკარიშვილი, გია ვოლსკი, ლევან ბერძენიშვილი, გიორგი ცაგარეიშვილი და პარტია „ქართული ოცნების“ წევრი დიმიტრი ცქიტიშვილი ამერიკას ესტუმრნენ და დამაგვირგვინებელი შეხვედრა ვაშინგტონში, ამერიკის სახელმწიფო დეპარტამენტის აზიისა და კავკასიის საკითხთა დეპარტამენტის დირექტორ ჯონ მარკ პომერჰაიმთან გამართეს, სადაც მხარეებმა საკუთარი გამოსვლა ცხარე კამათის ფონზე წარმართეს.

თუ რა ვითარებაში ჩაიარა ქართველი დეპუტატების ვიზიტმა ამერიკაში, ამ საკითხით for.ge დაინტერესდა. ამერიკაში ქართველი კანონმდებლების გამოსვლები კამათის ფონზე რომ მიმდინარეობდა, ამას ყველა დეპუტატი გვიდასტურებს, თუმცა, ისინი ამბობენ, რომ ყველაფერი კონსტრუქციულ ფარგლებში წარიმართა.

for.ge-სთან საუბარში ცაგარეიშვილი აცხადებს, რომ დეპუტატებს შორის კამათი ანაპოლისის მუნიციპალიტეტიდან დაიწყო და ვაშინგტონის კულუარებსი გაგრძელდა, ცისკარიშვილი ამბობს, რომ ნაციონალებმა „ოცნების“ წარმომადგენლებს აჩვენეს, მათი მხრიდან უცხოეთში ამბების „ჩატანა“ როგორ ხდება, ბერძენიშვილი კი ირწმუნება, რომ „ოცნებას“ ამერიკაში წინა ხელისუფლების 9 წლიან, სისხლიან რეჟიმზე არ უსაუბრია და მათ ოპონენტებს მხოლოდ ის შეახსენეს, რომ მათი მმართველობის პირობებში 300 000 ადამიანი იყო ნასამართლევი.

for.ge-სთან საუბარში დელეგაციის წევრი ზურაბ ჯაფარიძე ამბობს, რომ მხარეებს შორის კამათი ყველა შეხვედრაზე იყო, სადაც კი საუბარი საქართველოში არსებულ პოლიტიკურ რეალობას შეეხებოდა.

კანონმდებელის ცნობით, შეხვედრები იყო როგორც ამერიკის სახელმწიფო დეპარტამენტის წარმომადგენლებთან, ასევე საერთაშორისო განვითარების სააგენტოსთან, არასამთავრობო ორგანიზაციების წარმომადგენლებთან და იმ ადამიანებთან, რომლებიც კონგრესში სხვადასხვა თემის ლობირებაზე მუშაობენ.

ჯაფარიძის ინფორმაციით, მათ ამერიკელებთან გამართულ შეხვედრებზე ყურადღება გაამახვილეს, რომ საქართველოში პოლიტიკური დევნა და შერჩევითი სამართალია.

„ჩვენს შორის კამათი ყველა შეხვედრაზე იყო, სადაც საუბარი საქართველოში არსებულ პოლიტიკურ რეალობას შეეხებოდა. ცხადია, საუბარი იყო, რომ საქართვლოში არის პოლიტიკური დევნა და შერჩევითი სამართალი. შეხვედრებზე „ნაციონალურმა მოძრაობამ“ საქართველოში არსებული რეალობა აღწერა, ვოლსკიმ კი წინააღმდეგობა გაგვიწია და განაცხადა, რომ ჩვენ ვართ პარტია, რომელმაც თურმე, 300 ათასი ადამიანი ციხეში ჩავსვით და ა.შ. მათი პასუხები სრულიად არადეკვატური იყო იმ კითხვებზე, რასაც ამერიკელები სვამდნენ“, - აცხადებს დეპუტატი.

ჯაფარიძის განცხადებით, ამერიკელების კითხვები შსს-ს რეორგანიზაციასა და საარჩევნო კოდექსის ცვლილებას ეხებოდა.

„სახელმწიფო დეპარტამენტის მხრიდან ინტერესი ძირითადად ორი საკიხთან დაკავშირებით იყო გამოთქმული. კითხვები შსს-ს რეფორმას და იმ პრობლემებს ეხებოდა, რომლებიც დაკავშირებულია ე.წ. სუსი-ს მუშაობასთან. ჩვენ კონკრეტული ფაქტები მოვიყვანეთ და ამერიკელებმა იკითხეს, უმრავლესობას აქვს თუ არა ვადა განსაზღვრული, ეს რეფორმები როდის უნდა გატარდეს და რას გულისხმობს?! ამ კითხვებზე უმრავლესობის წარმომადგენლებს პასუხი არ ჰქონდათ და მათ თქვეს, რომ რეფორმების გატარებას აპირებენ. ამასთანავე, ამერიკელები საარჩევნო სისტემით დაინტერესდნენ და იკითხეს, მომავალში თუ რა ტიპის სისტემა უნდა იყოს. მათ კონკრეტული ვადების დასახელება მოითხოვეს, თუმცა, ხელისუფლების წარმომადგენლებმა ეს თარიღი ვერ დაასახელეს. მათი პარტიის წევრმა აღნიშნა, რომ საკონსტიტუციო კომისია არსებობს და საკითხის განხილვა მის ფარგლებში უნდა მოხდეს. მათ დროის გაჭიანურების პრაქტიკას მიმართეს, რასაც ამერიკელების მხრიდან კონკრეტული კითხვები და ვადების დასახელების მოთხოვნა მოჰყვა“, - განაცხადა ჯაფარიძემ, რომლის მსგავსად, პეტრე ცისკარიშვილი ადასტურებს, რომ ამერიკელების განსაკუთრებულ ინტერესს შსს-ს რეორგანიზაცია და საარჩევნო კოდექსი წარმოადგენდა.

როგორც for.ge-ს ცისკარიშვილმა განუცხადა, ნაციონალებმა ამერიკელებს საქართველოში არსებული ვითარების თაობაზე ინფორმაცია მოაწოდეს და მათი ოპონენტები კი ცდილობდნენ, რომ უარყოფითად ესაუბრათ. ცისკარიშვილის განცხადებით, „ქართული ოცნების“ ერთ-ერთი „ბრალდებაა“, რომ ნაციონალები უცხოეთში მიდიან და იქ ამბები ჩააქვთ.

„ფაქტიურად, ჩვენი კოლეგები ლაივში დაესწრნენ იმას, პარტნიორებისთვის ინფორმაციის მიწოდება თუ როგორ ხდება, რაც ჯანსაღი და ნორმალური პროცესია. 9 წლის მანძილზე, თვითონაც მეტით არაფრით არ იყვნენ დაკავებულნი და ახლა აღარ მოსწონთ, რომ გარეთ ობიექტური ინფორმაცია გავიდეს. ხელისუფლება ამერიკელების ყურამდე ინფორმაციის მისვლას ნუ ემალება, რადგან ეს ქვეყანას მხოლოდ სიკეთეს მოუტანს“, - აცხადებს დეპუტატი.

ცისკარიშვილი ჯონ მარკ პომერჰაიმთან გამართულ შეხვედრაზე მასსა და ვოლსკის შორის გამართულ კამათის მიზეზსაც იხსენებს და ამბობს, რომ მან საკითხი დააყენა, რომ რეფორმების გატარება კარგია, თუმცა, ხელისუფლება ამ რეფორმებს ფურცელზე წერს და ამომრჩეველზე დაშინების გზით, არჩევნების შედეგებს არჩევნების დღემდე გააყალბებს.

„არჩევნები გაყალბებულია, სანამ ეს არჩევნები შედგება. ჩემს განცხადებას ვოლსკი გამოეხმაურა და თქვა, რომ თქვენს დროსაც ასე ხდებოდაო. ეს „თქვენს დროსაც ასე ხდებოდა“ როდემდე უნდა იძახონ? არაფერი არ უნდა გამოსწორდეს? შსს-ს გაყოფაზე ვისაუბრე და ვთქვი, რომ ეს პროცესი ხელოვნური იქნება-თქო და ოპოზიციის დევნა არ შეჩერდება-თქო. ამერიკელებმა ჩვენი კამათი ძალიან ჯანსაღად აღიქვეს და მათ არ უთქვამთ, ნუ კამათობთო. მსგავს პროცესებს ისინიც მიჩვეულნი არიან, რადგან ამერიკის პოლიტიკაც პოლარიზებულია“, - განაცხადა ცისკარიშვილმა, რომლისგან განსხვავებით თავად ვოლსკი ამბობს, რომ ამერიკაში გამართულ შეხვედრებზე მწვავე კამათი არ გამართულა და აზრთა გაცვლა-გამოცვლის დროს, „ნაციონალური მოძრაობის“ წარმომადგენლები ზრდილობიანად მოიქცენ.

for.ge-სთან საუბარში ვოლსკი აცხადებს, რომ ამერიკაში აკადემიური შეხვედრები გაიმართა. მათ შორის სახელმწიფო დეპარტამენტის წარმომადგენლებთან, სადაც აქცენტი გაკეთებული მმართველობის სისტემების შესწავლაზე იყო.

ვოლსკის მტკიცებით, შეხვედრებზე რეფორმებზე საუბარი იყო, მაგრამ მათ რაიმე პოზიცია არ განუხილავთ.

„ძალიან საინტერესო შეხვედრები იყო, საკმაოდ მაღალი დონის. ვერ ვიტყოდი, რომ მწვავე კამათი გაიმართა, იქ აზრთა გაცვლა-გამოცვლის დროს, „ნაციონალური მოძრაობის“ წარმომადგენლები ზრდილობიანად იქცევიან. ითქვა იმის თაობაზე, რომ მათ პოლიტიკური ნიშნით პატიმრები ჰყავთ, რაზეც პასუხი გავეცი, რომ მათი ხელისუფლების პირობებში 300 ათასი ადამიანი მსჯავდებული იყო, ხოლო 27 ათასი ციხეში იჯდა, რომელთათვის უცხო არც წამება იყო და არც ღირსების შელახვა. ასევე აღვნიშნე, რომ თუკი ამის ორგანიზატორებს - რამდენიმე ლიდერს პასუხი მოეთხოვა, ეს არანაირი ნიშნით არ არის დაკავშირებული პოლიტიკასთან“, - აღნიშნავს კანონმდებელი.

ვოლსკის თქმით, იმის თქმა გადაჭარბებულია, რომ ამერიკელები შსს-ს რეორგანიზაციითა და საარჩევნო კოდექსის რეფორმირებით ძალიან დაინტერესებულები იყვნენ.

„მათ აქ კომპეტენტური საელჩო აქვთ და ბევრი ინფორმაცია გააჩნიათ. რეფორმებზე საუბარი იყო, მაგრამ მათ რაიმე პოზიცია არ განუხილავთ. სხვა შეხვედრებისას საუბარი იყო იმაზე, თუ როგორ მუშაობს მაჟორიტარი, მათი ადგილობრივი ბიუროები და რამდენად მნიშვნელოვანია რეგიონალური სისტემიდან არჩეული ადამიანების არსებობა. საარჩევნო სისტემის განხორციელება თუ როდის დაიწყება, ამაზე საუბარი არ ყოფილა და საკითხზე ზოგადი საუბარი გაიმართა“, - აცხადებს ვოლსკი, რომლის მსგავსად, შეხვედრებს ესწრებოდა ლევან ბერძენიშვილი.

როგორც for.ge-ს ბერძენიშვილმა განუცხადა, როცა შეხვედრებზე საქართველოში არსებული ვითარების შეფასება ხდებოდა, უმრავლესობა-უმცირესობას შორის კამათი კორექტულად მიმდინარეობდა.

კანონმდებელის ცნობით, შეხვედრებზე ნაციონალები ბიძინა ივანიშვილზე როგორც „რუს ოლიგარქზე“ ისე საუბრობდნენ, თუმცა, ამის არსი ამერიკელებს არ ესმოდათ.

„მომეჩვენა, რომ ნაციონალების სავალდებულო პროგრამასავით ჰქონდათ „რუს ოლიგარქზე“ საუბარი, რათა მერე ვიღაცასთან ანგარიში ჩაებარებინათ. ასეთი კორექტული კამათი საქართველოში რომ ჩატარდეს, ტელევიზორს არავინ შეხედავს და იტყვიან, ესენი შეკრულები არიანო. ჩვენი დამოკიდებულება არავის გაუკვირდა, უფრო მეტიც ის მაღალი კულტურა გაუკვირდათ, რითაც ერთმანეთთან საუბარი შევძელით. ჩვენ სისხლიან 9 წელზე არ გვისაუბრია, რადგან ამერიკელებს ჩვენი კამათის მოსმენა არ უნდოდათ. მათი ამოცანა არც ჩვენი კამათი და არც ჩვენი გაზავება იყო“, - აცხადებს კანონმდებელი, რომელიც არ ფიქრობს, რომ კამათის გამო ქართველი დეპუტატები ამერიკელებთან ცუდად წარმოჩნდნენ.

ბერძენიშვილის მოსაზრებით, პოლიტიკურ ძალებს შორის თანხმობა ნებისმიერ ქვეყანას ცუდად წარმოაჩენს.

„ზოგიერთ შემთხვევაში ერთმანეთი ვერ დავხოცეთ, რადგან ამის არც საშუალება იყო და არც სურვილი. ამერიკელებს უნდოდათ ინფორმაცია და არა სიტყვების მოსმენა. გია ვოლსკის გამოსვლა იყო კორექტული და გაცილებით უკეთ გამოიყურებოდა, ვიდრე ჩვენი ოპონენტის გამოსვლა. სათქმელი ბევრი გვქონდა, მაგრამ არ გამოგვიყენებია. ორივე მხარემ რაღაც კლასი ვაჩვენეთ, მაგრამ უმრავლესობის კლასი უფრო კარგად გამოიყურებოდა. პეტრე ცისკარიშვილისა და გია ვოლსკის საუბრები მთლიანად პოზიტიური კამათის სფეროში ჯდებოდა. ამ კამათიდან გასვლის მცდელობა ზურაბ ჯაფარიძეს ჰქონდა, რომელმაც ბიძინა ივანიშვილი ახსენა როგორც „რუსი ოლიგარქი“. ამერიკელებისთვის მილიარდერი რაიმე უარყოფით შინაარს არ ატარებს, ხოლო ჯაფარიძის გამოსვლაზე მეცინებოდა“, - აღნიშნავს ბერძენიშვილი, რომელიც შეხვერებზე დიმიტრი ცქიტიშვილის გამოსვლებს პოზიტიურად აფასებს.

რაც შეეხება ამერიკაში გამართულ შეხვედრებში მონაწილე კიდევ ერთ პოლიტიკურ ძალას - „თავისუფალი დემოკრატებს“, for.ge-სთან საუბარში გიორგი ცაგარეიშვილი აცხადებს, რომ მხარეებს შორის კამათი პერმანენტულად მიმდინარეობდა, რომელიც ანაპოლისის მუნიციპალიტეტიდან დაიწყო და ვაშინგტონის კულუარებამდე გაგრძელდა.

„დავა ყველგან იყო, რაც არასერიოზულია, რადგან როცა ანაპოლისის კეთილმოწყობის საკითხებს ისმენ, იქ პოლიტიკურ ავ-კარგიანობაზე და პოლიტიკურ სიტუაციაზე საუბარი ცოტა უხერხულია. „თავისუფალმა დემოკრატებმა“ ნაციონალებისა და „ქართული ოცნების“ წარმომადგენლებს შორის გამართულ კამათში დისონანსი შევიტანეთ. შეხვედრაზე ორი მნიშვნელოვანი საკითხი გამოვყავით და ეს იყო საარჩევნო კოდექსი და სამართალდამცავი უწყებების რეფორმირების საკითხი. ეს თემები პირდაპირ გადაბმულია ერთმანეთთან. ამერიკელ პარტნიორებს ვუთხარი, რომ დრო გვეწურება და კოდექსზე მუშაობა მაქსიმუმ შემოდგომამდე უნდა დასრულდეს და თუკი ღარიბაშვილის მთავრობამ ძალმომრეობითი აპარატი შეინარჩუნა, მაშინ რა სხვაობა ამჟამინდელ ხელისუფლებასა და ყოფილ ხელისუფლებას შორის-თქო?!“, - აცხადებს ცაგარეიშვილი, რომელიც ამბობს, რომ შეხვედრაზე ამერიკელებმა ყველაფერი ჩაინიშნეს და ბევრი საინტერესო შეკითხვა დასვეს.

ცაგარეიშვილის ცნობით, ამერიკელები დაინტერესდნენ, საარჩევნო რეფორმა შემოდგომამდე რატომ არ გატარდება.

„მათ გვითხრეს, რომ ისინი პროცესს გულდასმით დააკვირდებიან, მუდმივი კონსულტაცია ექნებათ პოლიტიკურ ხელმძღვანელობასთან, ოპოზიციასთან, მედიასთან და არასამთავროებთან. მათ ასევე თქვეს, რომ საპოლიციო და საარჩევნო რეფორმა საშუალებას მოგვცემს არჩევნები მშვიდ გარემოში ჩავატაროთ. მათ პირდაპირ ვუთხარი, რომ თუკი ამას ახალი ხელისუფლება არ გააკეთებს, არ არის გამორიცხული, ქვეყანაში სიტუაცია დაიძაბოს, ეს როგორც ბევრს უნდა ქვეყნის შიგნით და გარეთ. მათ ვუთხარით, რომ „თავისუფალი დემოკრატები“ ფსევდო საარჩევნო რეფორმაში მონაწილეობას არ მივიღებთ“, - აცხადებს ცაგარეშვილი, რომელსაც for.ge-მ კითხვით მიმართა, „ქართველ დეპუტატებს შორის წარმოებული დებატები და ამერიკაში „ჩატანილი“ ამბები თუ რა გავლენას მოახდენდა ქვეყნის იმიჯზე?“.

ცაგარეიშვილი გვარწმუნებს, რომ მხარეებს შორის კამათს ისეთი ფორმა არ მიუღია, რომელიც ქვეყნის იმიჯს დააზიანებდა.

„ნორმალური დებატები იყო. ჩვენი პოზიცია გაცილებით დამაჯერებელი და არგუმენტირებული იყო, ვიდრე მათი. ამერიკელებს ვერ გავაკვირვებთ, რომ ოპოზიციურად განწყობილ გუნდს განსხვავებული ხედვები აქვს. ქვეყნის იმიჯს ეს არ შელახავდა. მათ გვითხრეს, რომ ბევრ ქვეყანას მოუსმინეს, მაგრამ ცოცხალი დებატი არ ყოფილაო. აბა, ეს ყველაფერი სად ვილაპარაკოთ, ბურჯანაძესავით „პაკლონნაია გარაზე“ მივბრძანდეთ და იქ პუტინტთან ვისაუბროთ? ჯონ მარკ პომერჰაიმთან გამართულ შეხვედრაზე, საათნახევრის მანძილზე, ნაციონალებს, ჩვენს და „ოცნებას“ შორის გაცხარებული დებატი იყო, ამერიკელებმა გვიყურეს და გვითხრეს, რომ ქართველები ფონს ვართ გასულები, როცა ასეთი დებატია. მათ თქვეს, რომ არ შეიძლება ეს ქვეყანა დაიღუპოს, რადგან პოლიტიკური პროცესი ცოცხალია“, - განაცხადა ცაგარეიშვილმა.