დავით გამყრელიძე არ ადასტურებს, რომ პოლიტიკაში ბრუნდება. „ახალი მემარჯვენეების“ ყოფილი ლიდერი კომენტარებს არც ქვეყანაში მიმდინარე პოლიტიკურ პროცესებზე აკეთებს. რატომ გავრცელდა გამყრელიძის პოლიტიკაში დაბრუნების შესახებ ინფორმაცია, ინფორმაცია არ აქვს, პარტიის ლიდერს, ფიქრია ჩიხრაძეს, რომლის განცხადებით, დავით გამყრელიძე ის პოლიტიკოსია, რომლის დარები ქართულ პოლიტიკაში არ არიან.

რატომ ვერ დაამყარეს კომუნიკაცია პარტია „ქართულ ოცნებასთან“, ვინ არიან ის ძალები, რომლებიც შენიღბული არიან პრორუსული პოლიტიკით და რატომ იკამათა ნინო ბურჯანაძესთან? ამ საკითხებთან დაკავშირებით for.ge ფიქრია ჩიხრაძეს ესაუბრა.

ოფიციალურად არ ადასტურებთ დავით გამყრელიძის პოლიტიკაში დაბრუნების შესახებ ინფორმაციას, მაგრამ ხომ არ ფიქრობთ, რომ ეს ეჭვები უკავშირდება იგივე, გიორგი მოსიძის „ქართულ ოცნებაში“ გაწევრიანების საკითხს. ფაქტია, რომ „ახალი მემარჯვენეების“ წევრები „ქართული ოცნების“ სახეები ხდებიან?

- როდესაც ეს ინფორმაცია გავრცელდა, დამირეკა ჟურნალისტმა, რომელსაც ძალიან კარგად ვიცნობ და მიცნობს თავადაც. ავუხსენი, რომ არავითარი სიმართლის მარცვალიც კი არ იყო ამ ინფორმაციაში. არ მგონია, რომ ჟურნალისტს ხელს უნდა აძლევდეს აბსოლუტურად სიცრუეზე დამყარებული ინფორმაციის გავრცელება. ვერ ვიტყვი, ვის ინტერესში შედიოდა და რატომ გავრცელდა, მაგრამ ერთი რამ დადასტურებით შემიძლია ვთქვა, რომ სამწუხაროდ, არაფერი განსაკუთრებული არ ხდება. დავით გამყრელიძე ის პოლიტიკოსია, რომლის დარები ქართულ პოლიტიკაში რბილად, რომ ვთქვათ, არ არიან. ჯობია, რომ ასეთი პოლიტიკოსები იყვნენ პოლიტიკაში.

რაც შეეხება რაიმე დაახლოებას „ქართულ ოცნებასთან“, ამაზე ლაპარაკი ანეკდოტების სფეროს განეკუთვნება. ჩვენ ეს რომ გვდომოდა, გავაკეთებდით მაშინ, როდესაც „ქართული ოცნება“ მოდიოდა ხელისუფლებაში, მაგრამ მაშინც გვქონდა ძალიან ბევრი შეკითხვა ბიძინა ივანიშვილთან და კოალიცია „ქართულ ოცნებასთან“, მითუმეტეს დღეს, როდესაც ქვეყანაში ძალიან რთული ვითარებაა შექმნილი. არ მგონია, რომ ასეთი ვერსიის განხილვა გონიერებასთან ახლოს იყოს.

თუ გაქვთ გადაწყვეტილი ვისთან ერთად ერთვება საარჩევნო ბრძოლაში „ახალი მემარჯვენეები“, თუ დამოუკიდებლად იბრძოლებთ?

- არა თუ ჩვენ, ან რომელიმე ცალკე მდგომი პოლიტიკური ძალა, არამედ „ქართულ ოცნებაში“ შემავალი პოლიტიკური ძალებიც ვერ გეტყვიან ვისთან ერთად მიიღებენ არჩევნებში მონაწილეობას. ტრადიციულად, საქართველოში არჩევნებამდე 2-3 თვით ადრეც ბუნდოვანია ვინ ვისთან ერთად იქნება არჩევნებში. დღეის მდგომარეობით შემიძლია გითხრათ, რომ საარჩევნო ბლოკის, ან საარჩევნო გაერთიანების შესახებ კონსულტაციები არავისთან არ გამართულა.

კონსულტაცია გვაქვს ერთადერთ საკითხზე, არა მარტო მსოფლმხედველობით ჩვენთან ახლოს მდგომ პოლიტიკურ ძალებთან, არამედ ყველა პოლიტილურ ძალასთან, ვინც აპირებს არჩევნებში მონაწილეობას, ეს არის საარჩევნო კანონმდებლობა, საარჩევნო სისტემის შეცვლა, რომელიც სასიცოცხლოდ მნიშვნელოვანია ქართული პოლიტიკური სპექტრისთვის. ამის თაობაზე კონსულტაციები გვქონდა როგორც პარლამენტს გარეთ მყოფ პოლიტიკურ ძალებთან, ასევე, საპარლამენტო ოპოზიციასთან, მმართველ კოალიციაში წარმოდგენილ პოლიტიკურ ძალასთან, პრეზიდენტთან, პარლამენტის თავმჯდომარესთან. ერთადერთი, ვისთანაც ვერ მოვახერხეთ კონსულტაცია, ეს არის პარტია „ქართული ოცნება“.

რატომ? თქვენთან შეხვედრის სურვილი არ აქვს მმართველ ძალას?

- ვფიქრობ, „ქართულ ოცნებაში“ არ მოიძებნება პიროვნება, რომელსაც შეუძლია აიღოს პასუხისმგებლობა, რომ დანარჩენ პოლიტიკურ ძალებამდე და საზოგადოებამდე მიიტანოს „ქართული ოცნების“ პოზიცია საარჩევნო საკითხებთან დაკავშირებით. დრო გადის, ამ ყველაფერს სჭირდება საკონსტიტუციო ცვლილებები და სჭირდება ფართო კონსენსუსი, რაც არსებობს დანარჩენ პოლიტიკურ სპექტრში. ცხადია, არის ნიუანსური განსხვავებები, მაგრამ ის, რომ მაჟორიტარული სისტემა აღარ უნდა იყოს, ამაზე ფართო კონსენსუსი არსებობს. ცხადია, ამ შემთხვევაში მნიშვნელოვანია „ქართული ოცნების“ პოზიცია, რადგან ეს არის სახელისუფლებო ძალა და ბუნებრივია, ამ ძალის გარეშე, ასეთი ცვლილება ვერ განხორციელდება. მეექვსე თვე გავიდა, რომ ვერ მოვახერხეთ პასუხის მიღებაც კი.

შეიძლება არც უნდა „ქართულ ოცნებას“ ეს ცვლილება? ფაქტია, რომ მაჟორიტარული სისტემა ხელისუფლებაში მყოფი ძალისთვის ძალიან სასრგებლოა...

- ...როგორც „ნაციონალური მოძრაობას“ არ უნდოდა შელეოდა მაჟორიტარულ სისტემას. რა თქმა უნდა, რაოდენობრივი თვალსაზრისით ძალიან სასარგებლოა და სწორედ ამ მიდომამ ჩამოაყალიბა მაჟორიტართა კორპუსი ძალიან მახინჯ მოვლენად საქართველოში. გარდამავალ დროშასავით გადადიოდნენ ერთი პოლიტიკური ძალიდან, მეორე პოლიტიკური ძალის ხელში და ამის მომსწრეც გავხდით უახლოეს წარსულში, როდესაც „ნაციონალური მოძრაობის“ მაჟორიტართა კორპუსის დიდი წილი გადაილოცა „ქართულმა ოცნებამ“ და მიითვალა რაოდენობაში, რომლითაც ინარჩუნებენ უმრავლესობას.

ცხადია, ალბათ, ამის სურვილი არ აქვთ, მაგრამ ეს წერია მათ წინასაარჩევნო პროგრამაში. ბიძინა ივანიშვილს ღიად აქვს ნათქვამი, რომ მაჟორიტარები ჩამოყალიბდნენ ფეოდალებად და ყველაფრის გაკონტროლებას ცდილობენ.

არ შეიძლება ქუთაისს და ყაზბეგს თანაბარი ხმა ჰქონდეს პარლამენტში, იმიტომ, რომ სრულიად სხვადასხვა რაოდენობის მოსახლეობას წარმოადგენენ და აუცილებლად გასასწორებელი მომენტია. ეს არის ყველა საერთაშორისო ორგანიზაციის რეკომენდაცია. ამ საკითხებთან დაკავშირებით კონსულტაციები ინტენსიურად მიმდინარეობს. ვცდილობთ, რომ ეს საკითხი მკვდარი წერტილიდან დავძრათ.

თქვენ ამბობთ, რომ კონსულტაციები გაიარეთ ყველა პარტიასთან, გარდა მმართველი პარტიისა. კონსულტაციები თუ გქონდათ ნინო ბურჯანაძესთან, მათ შორის თქვენი მერობის კანდიდატთან კახა კუკავასთან, რომლებსაც გამოკვეთილი პოლიტიკური პოზიცია აქვთ?

- საარჩევნო კანონმდებლობაზე კონსულტაციებს მსოფლმხედველობითი საკითხები ხელს არ უშლის. ბუნებრივია, ბურჯანაძესთანაც და „პატრიოტთა ალიანსთან“ იყო კონსულტაციები. რაც შეეხება სხვა ტიპის კონსულტაციებს, ეს არ ყოფილა, მაგრამ არჩევნების მოახლოებასთან ერთად, თუ იქნება ასეთი კონსულტაციები, ამ შემთხვევაში, უპირველესი იქნება მსოფლმხედველობითი საკითხი. საპარლამენტო არჩევნები, სწორედ ის არჩევნებია, როდესაც მსოფლმხედველობითი საკითხები არის გადამწყვეტი. ფუნდამენტური სხვაობაა ჩვენსა და ნინო ბურჯანაძის პოზიციას შორის, მათ შორის ჩვენსა და „პატრიოტთა ალიანსის“ პოზიციას შორის.

ამ ფუნდამენტური სხვაობის გადალახვას არ აპირებთ?

- არა, რა თქმა უნდა. საერთოდ, ძალიან მაწუხებს ის ვითარება, რომ საქართველოში ძალიან მომძლავრდა პრორუსული ფლანგი. საკუთარი თვალი ვიხილეთ ვალერი ხაბურძანია რომლის პოლიტიკურ კუთვნილებაში ეჭვის შეტანა ძნელია და არ მალავს თავის პოზიციას. მანაც კი თქვა, რომ იმდენად მძიმე ვითარება არის რუსეთში, რომ ამ ვითარებაში რუსეთთან საქართველოს არაფერი ესაქმებაო.

გაოგნებული ვარ საქართველოში არსებული პოლიტიკური ძალებით, რომლებიც იმ ვითარებაში, როდესაც მთელი მსოფლიო მობილიზებულია რუსეთის წინააღმდეგ, საქართველოს პრობლემების მოგვარების გასაღებს ხედავენ ძალაინ მძიმე მდგომარეობაში მყოფ ქვეყანასთან, ეს ჩემთვის ამოცანაა. ყოველთვის ეჭვი შემეპარება იმ ადამიანების გულწრფეობაში, რომლებიც ამ იდეებს აჟღერებენ და ამ გზის არჩევისაკენ მოუწოდებენ ქართულ საზოგადოებას.

გამოკვეთილი პოზიცია აქვს ნინო ბურჯანაძეს და ამის შესახებ ღიად საუბრობს, მაგრამ გარდა ბურჯანაძისა, ვინ არიან ის პრორუსი ძალები, რომლებიც აქტიურობენ საქართველოში?

- ამას თვითონაც არ მალავენ. იგივე ნინო ბურჯანაძესთან არაერთი კამათი მქონია პირადად ამ თემაზე, მან ძალიან კარგად იცის ჩემი პოზიცია ამასთან დაკავშირებით. არიან პოლიტიკური ძალები, რომლებიც თავის თავს არქმევენ ე.წ. პროქართულს და ამ პროქართულის უკან დგას შენიღბული პრორუსული პოლიტიკა.

ყველა ამბობს, რომ საქართველოში მრავლად არის პრორუსული ძალები, თუმცა კონკრეტიკაზე თავს იკავებენ. ვინ არიან პროქართული ძალები, რომელთა უკან, რეალურად, შენიღბული პრორუსული პოლიტიკა დგას?

- პროქართულის უკან დგას შენიღბული პრორუსული პოლიტიკა, ამ ტიპის ორგანიზაციად მოიაზრება იგივე „პატრიოტთა ალიანსი“. ძალიან ცოტა ხნის წინ ერთგავრი საზოგადოებრივი რეფერენფუმი ჰქონდათ მოწყობილი ნატო-ს წინააღმდეგ. გამოჩნდნენ რაღაცა ევრაზიული კავშირები, ევრაზიული არჩევნები და ა.შ. ორგანიზაციები, რომლებიც ამ მიმართულებით აქტიურობენ. იგივე ცალკეული პერსონები - ლევან ვასაძე, რომელიც გაუგონარ კლიშეებს ამკვიდრებს საზოგადოებაში. არ მგონია ასე ფიქრობდეს ლევან ვასაძე როდესაც თავის თავთან მარტო რჩება, რომ დასავლეთი, ევროპა და ამერიკა არის უბედურების და გარყვნილების ბუდე, ხოლო რუსეთი არის მართლმადიდებლური ოაზისი და სულიერი სათნოების სამყარო.

ცხადია, ასე არ ფიქრობენ ეს ადამიანები, მაგრამ რატომღაც ასე მოქმედებენ. დიდი ხანია პოლიტიკაში ვარ და ასეთი მოჭარბება პრორუსული ძალებისა, როგორც დღეს არის, არც ერთ ეტაპზე არ მახსოვს. ყველა პოზიციას აქვს არსებობის უფლება, მაგრამ მთელი ეს პრორუსული პოლიტიკური ძალები ლაპარაკობენ რუსული სახელმწიფო ინტერესებიდან გამომდინარე, ვიდრე ქართული სახელმწიფოს ინტერესებიდან და მისი ისტორიული არჩევანიდან გამომდინარე. ისედაც ძალიან მძიმე მდგომარეობაში მყოფი ჩვენი მოსახლეობისთვის, რომელიც ბევრჯერ მოატყუეს პოლიტიკოსებმა, დაბნეულია და ამ დროს, რაღაცა გაუგონარი კლიშეების მიწოდება და ანტიდასავლურობის გაღვივება, ვფიქრობ, რომ ანტისახელმწიფოებრივი ქმედებაა.