„თავისუფალი დემოკრატები“, რომლებმაც კომიტეტების თავმჯდომარის პოსტები დატოვეს, ხელისუფლებასთან აქტიური ოპონირების რეჟიმში გადადიან. თანამდებობები საკუთარი სურვილით დატოვეს საფინანსო-საბიუჯეტო კომიტეტის თავმჯომარე დავით ონოფრიშვილმა, ევროპასთან ინტეგრაციის კომიტეტის თავმჯდომარე ვიქტორ დოლიძემ და გარემოს დაცვისა და ბუნებრივი რესურსების კომიტეტის თავმჯდომარე გიორგი ცაგარეიშვილმა. ამ გადაწყვეტილებას წინ უსწრებდა ზურაბ აბაშიძის პარლამენტის ვიცე-სპიკერის პოსტიდან გადაყენება.
რას პასუხობს უმრვალესობის ლიდერს და რატომ არ აწყობდა პოლიტიკურ ხელმძღვანელობას საგარეო მიმართულებით „თავისუფალი დემოკრატების“ აქტიურობა? ამ საკითხებთან დაკავშირებით for.ge ვროპასთან ინტეგრაციის კომიტეტის ყოფილ თავმჯდომარეს, ვიქტორ დოლიძე ესაუბრა.
ვიქტორ დოლიძე: თანამდებობა არ არის ჩვენთვის ყველაზე მნიშვნელოვანი. არსებობს პრინციპები და ღირებულებები, ამიტომ, ჩვენ ამ პრინციპებს ვერასდროს ვერ გადავუხვევთ და ამაში უკომპრომისოები ვიქნებით. ჩვენ გვინდოდა და გახსოვთ, რომ გამოვიყენეთ ეს ბერკეტები და იმიტომაც არ წავედით თანამდებობიდან და ვაგრძელებდით იმ მნიშვნელოვანი საქმის კეთებას, რაც ქვეყნისთვის იყო მნიშვნელოვანი. მაგრამ, ზურას გაშვება და ჩვენი იქ ყოფნა არ მგონია, რომ სწორი ყოფილიყო. ამიტომ, ერთხმად იყო გადაწყვეტილება მიღებული. ჩვენ, ჩვენს საქმეს გავაგრძელებთ კომიტეტებიდან იგივე ძალისხმევით, უფრო მეტი ოპონირებით და პრინციპულობით.
რამდენად რთული იქნება ოპონირების რეჟიმში ყოფნა „ქართულ ოცნებასთან“?
- მართალი გითხრათ, ამათ ბოლო გადაწყვეტილებებს რომ ვუყურებ, მთლიან ეკონომიკურ ფონს, რომელიც ამ ბოლო პერიოდში „ქართულმა ოცნებამ“ ჩამოაყალიბა, ვერ ვიტყვი, რომ ძლიერი ოპონენტები გვყავს. ჩვენ რეალისტურად ვუყურებთ, ვაგრძელებთ ამ ბრძოლას და აბსოლუტურად დარწმუნებული ვართ გამარჯვებაში. ძალიან ბევრს დავდივართ რეგიონებში, ხალხთან გვაქვს ურთიერთობა და ვგრძნობთ როგორი მუხტი მიდის და როგორი მხარდაჭერა გვაქვს. ეს არის ძალიან მნიშვნელოვანი ჩვენთვის. ბუნებრივია გაგრძელდება ოპონირება ხელისუფლებაში.
მარტო ბოლო განცხადებები, რომ ავიღოთ, გნებავთ პარლამენტში, გნებავთ აღმასრულებელ ხელისუფლებაში, რომელიც გაკეთდა ევროპულ და ევროატლანტიკურ კურსთან მიმართებაში და რუსეთთან პირისპირ დიალოგზე, ჩვენ ამაზე არ გავჩერდებით. ჩვენ, „თავისუფალმა დემოკრატებმა“ ძალიან სერიოზული და მყარი საფუძველი ჩავუყარეთ ამ ჩვენს ევროპულ და ევროატლანტიკურ კურსს და არავის არ მივცემთ იმის საშუალებას, რომ ერთი ხელის მოსმით ეს ყველაფრი წაშალონ.
ალბათ, აბაშიძე-ქანთარიას განცხადებას გულისხმობთ, შესაძლებელია ეს განცხადებები ქვეყნისთვის საზიანო გახდეს?
- რა თქმა უნდა. ამ განცხადებას მარტო ჩვენ ხომ არ ვუსმენთ, ამას უსმენენ ჩვენი პარტნიორები, აკვირდებიან ამ პროცესებს. მინდა გითხრათ, როდესაც მივიღეთ ეს კონკრეტული გადაწყვეტილება, საქართველოში მოქმედი საელჩოები იქნებოდა, თუ ჩვენი ნატოელი მეგობრები, პირველი მათ დაგვირეკეს და ძალიან განიცდიან, რომ „თავისუფალი დემოკრატები“ აღარ არიან ხელისუფლებაში.
არ მახსოვს შემთხვევა, ჩამოსულიყო საერთაშორისო დელეგაცია და პირველი ეს თემა არ დაეყენებინათ პარლამენტში თუ აღმასრულებელ ხელისუფლებასთან. გამადიდებელი შუშით გვიყურებენ და ამგავრი განცხადებები ძალიან საზიანოა.
საქმე გვაქვს, ერთი მხრივ, ჩვენს სტრატეგიულ პარტნიორებთან ევროკავშირსა და ნატო-ში ინტეგრაციის ერთგულებაზე გაკეთებული განცხადებების ხელახალ დადასტურებასთან და მეორე მხრივ, როგორც ევროკავშირთან, ისე ნატო-სთან მიღწეული შეთანხმებების და ნაკისრი ვალდებულებების შესრულების გაჭიანურებასა და რუსეთთან პირისპირ დარჩენის ძალიან სახიფათო, ძალიან დინამიკურად მიმდინარე პროცესთან. ჩვენი პოლიტიკური ოპონენტების ასეთი მიდგომა ქვეყნისთვის დამღუპველი და შესაბამისად, ჩვენთვის სრულიად მიუღებელია.
როდესაც ზურაბ აბაშიძე გადააყენეს ვიცე-სპიკერის თანამდებობიდან თქვენ იმყოფებოდით ვენაში, როგორი რექაცია იყო ჩვენს პარტნიორებში, თუ გქონდათ მათთან ამ საკითხზე საუბარი?
- რასაკვირველია მქონდა საუბარი. ძალიან არ მოსწონთ ის რაც ხდება. ძალიან ადეკვატური რეაქცია ჰქონდათ. როდესაც პარლამენტის ვიცე-სპიკერს ასე სამარცხვინოდ გაათავისუფლებენ, რა უფლება მაქვს მე გავაგრძელო ვიზიტი ევროპაში, მაშინ როცა გადაწყვეტილებები მყისიერად არის მისაღები. ამის უფლება ჩემს თავს არ მივეცი და გავაკეთე ის, რაც უნდა გამეკეთებინა.
თუმცა, უმრავლესობის ლიდერი ამბობს, რომ აბაშიძის გათავისუფლება არ უნდა ყოფილიყო თქვენთვის მოულოდნელი. „გაურკვეველია რატომ შეწყვიტეს ვიზიტი, ეს არაა სწორი გადაწყვეტლება“, - ასე შეაფასა დავით საგანელიძემ თქვენი გადაწყვეტილება...
- საგანელიძისგან მე ცოტა სხვა განცხადებებიც მომისმენია. მართალი გითხრათ, ნაკლებად მნიშვნელოვანია მისი აზრი.
არც ის განცხადებაა თქვენთვის მნიშვნელოვანი, როდესაც ის აცხადებს, რომ როდესაც თავში კომბლებს მირტყამდნენ, მაშინ „თავისუფალი დემოკრატები“ ხელისუფლებაში იყვნენო?
- როგორ შეიძლება ამაზე განცხადება გავაკეთო. არ შევალ მასთან ახლა პოლემიკაში, თორემ ისეთი რაღაცეები მახსოვს, რომ ვერ წარმოიდგენთ, არ მინდა, რომ ასე დავკონკრეტდე. ეს მისი აზრია, ნაკლებად ლერევანტულია ჩემთვის. არ ვაპირებ მასთან პოლემიკაში შესვლას. მე ხელისუფლებაში ვიყავი და საგანელიძეს თავში კეტებს ურტყამდნენ? - ასეთი რამ არ მახსოვს და აბა რა გითხრათ. პირდაპირ გეტყვით, რომ არ ვაპირებ მასთან პოლემიკაში შესვლას. ალბათ, გახსოვთ მე და ზურაბ აბაშიძე საკრებულოდან რატომ და როგორ გაგვანთავისუფლეს. მერე ვინ დარჩა იქ და ვინ დაიკავა თანამდებობა, ესეც კარგად მახსოვს.
ვენაში ვიზიტისას შეიტყვეთ პარლამენტის უმრავლესობის გადაწყვეტიელბა ზურაბ აბაშიძესთან დაკავშირებით, არ ელოდით, რომ ასე განვითარდებოდა პროცესები?
- სამწუხაროდ, რასაც ყველანი ერთად ვებრძოდით, ვგულისხმობ „ქართული ოცნების“ კოალიციას, სწორედ იმას აკეთებს კოალიცია, რაც აბსოლუტურად მიუღებელია ჩვენთვის. ჩვენ ნამდვილად ვერ ვხედავთ ჩვენს ადგილს კოალიციაში და ამიტომაც არ ვართ.
ბატონო ვიქტორ, ზურაბ აბაშიძის განთავისუფლების საკითხი გახდა თუ არა თქვენსა და გია ვოლსკის შორის დაპირისპირების მიზეზი ვენაში?
- ვოლსკისთან რატომ უნდა მქონოდა დაპირისპირება. ამას ვერ დაგიდასტურებთ. დარწმუნებული ვარ, რომ იგივეს გეტყვით გიაც. არანაირი დაპირისპირება არ იყო. უბარლოდ, საჭიროდ ჩავთვალე, რომ საქმის კურსში ჩამეყენებინა გია ვოლსკი, თედო ჯაფარიძე, ჩვენი ელჩი კოტე ზალდასტანიშვილი, რომ მათ სცოდნოდათ ჩემი გადაწყვეტილების თაობაზე. ეს არის და ეს. მეტი არანაირი დაპირისპირება არ ყოფილა.
