პარლამენტში ზურა და იური ვაზაგაშვილების საქმეებზე ძალოვანი უწყებების წარმომადგენლების დაბარება შესაძლოა, ფრაქცია „ქართულ ოცნებაში“ განხეთქილების მიზეზი გახდეს. დეპუტატთა ნაწილი უწყებაში შინაგან საქმეთა სამინისტროსა და მთავარი პროკურატურის ხელმძღვანელებს იბარებს, მეორე ნაწილი კი, ამის წინააღმდეგია.

იურიდიულ საკითხთა კომიტეტის დახურულ სხდომაზე ძალოვანების მისვლას თამარ კორძაია, ზაქარია ქუცნაშვილი და ანი მიროტაძე ითხოვენ, მათ საპასუხოდ კი, ეკა ბესელია, ირაკლი სესიაშვილი, მანანა კობახიძე და გია ვოლსკი აცხადებენ, რომ ისინი პარლამენტში სამართალდამცავების მისვლის აუცილებელ მიზეზს ვერ ხედავენ და სჯობს, დეპუტატებმა ძალოვანებს საგამოძიებო მოქმედებების წარმართვის საშუალება მისცენ.

როგორც for.ge-ს ზაქარია ქუცნაშვილმა განუცხადა, იურიდიულ საკითხთა კომიტეტი უფლებამოსილია, რომ პროკურატურას ჰკითხოს, საგამოძიებო მოქმედებები როგორ მიმდინარეობს.

მისი თქმით, პარლამენტს უფლება აქვს, გამოძიების პროცედურულ ნაწილში ჩაერთოს და არა შინაარსში.

„კითხვა მაქვს, ჩვენს საგამოძიებო ორგანოებს ორი წელი რატომ დასჭირდათ, რომ ზურა ვაზაგაშვილის საქმის გახსნასთან ახლოს მისულიყვნენ?! ასევე გვაინტერესებს, ხელისშემშლელი ფაქტორი რა იყო და იური ვაზაგაშვილის სიკვდილი რატომ გახდა კატალიზატორი ზურა ვაზაგაშვილის მკვლელობის გახსნის?! ეს ლეგიტიმური კითხვაა, რომელსაც პასუხი უნდა გაეცეს“, - აღნიშნავს ქუცნაშვილი, რომლის პოზიციას იზიარებს თამარ კორძაია.

კორძაია მიიჩნევს, რომ იური ვაზაგაშვილის მკვლელობის საქმე ხელისუფლების ყველაზე მაღალი პასუხისმგებლობის საკითხია და პარლამენტმა თავისი უფლებამოსილების ფარგლებში კონტროლი უნდა განახორციელოს.

კორძაია ქუცნაშვილის მსგავსად, პარლამენტში დახურულ სხდომაზე ძალოვანი უწყებების წარმომადგენლების მისვლას და საგამოძიებო მოქმედებების თაობაზე ინფორმაციის მიწოდებას ითხოვს.

„ინფორმაცია მოგვაწოდონ, თუ რა ხდება?! დეპუტატებმა სულ მცირე ინფორმაცია პირველ წყაროდან უნდა მიიღონ“, - დასძენს კორძაია, რომლის პათოსს იზიარებს ანი მიროტაძე.

for.ge-სთან საუბარში მიროტაძე აღნიშნავს, რომ დეპუტატები ინფორმაციას უნდა ფლობდნენ, ვაზაგაშვილების საქმეებთან დაკავშირებით თუ რა ხდება.

„შესაძლოა, კონკრეტულ საკითხებზე პასუხი მაქვს, მაგრამ სრულფასვანი სურათი გვჭირდება თუ რა ხდება. კითხვები ვაზაგაშვილების საქმეებზე გვაქვს, რომელსაც პასუხები უნდა გაეცეს“, - ამბობს მიროტაძე.

კორძაია-ქუცნაშვილი-მიროტაძის მსგავსად, ვაზაგაშვილების საქმეებთან დაკავშირებით კითხვები „თავისუფალ დემოკრატებსაც“ აქვთ. for.ge-სთან საუბარში გარემოს დაცვის კომიტეტის თავმჯდომარე გიორგი ცაგარეიშვილი ინტერესდება, ზურა ვაზაგაშვილის საქმეს შინაგან საქმეთა სამინისტრო რატომ იძიებდა.

ცაგარეიშვილის ინფორმაციით, კორტებთან მოკლული ზურა ვაზაგაშვილის საქმეს გასული წლის სექტემბრამდე შსს იძიებდა და არა მთავარი პროკურატურა.

„გასული წლის სექტემბერში, პროკურატურამ დიდი ძალისხმევის შედეგად ეს საქმე შსს-ს ხელიდან გამოგლიჯა. მაინტერესებს, ამ საქმეს შსს რატომ იძიებდა და არა პროკურატურა?! მესმის, რომ პროკურატურა ამ საქმის გამოძიებაზე საპროცესო ზედამხედველობას აწარმოებდა, მაგრამ საგამოძიებო პროცესში უშუალოდ ჩართული რატომ არ იყო? ასევე კითხვა მაქვს, შსს-ში დღემდე ის ნაძირლები რატომ მუშაობენ, რომლებიც ადამიანებს ქუჩაში ხოცავდნენ? მათ შორის ზურა ვაზაგაშვილს! ამას გარდა, ის ნაძირლები რატომ არ არიან დასჯილები, რომლებაც ზურაბ აბაშიძე სასიკვდილოდ გაიმეტეს? ეს ადამიანები შსს-სა და პროკურატურაში დღესაც ხომ არ მუშაობენ? სამართლიანობის აღდგენის პროცესი, რატომ შეფერხდა? ამ კითხვებს უმრავლესბაში ვსვამდით, მაგრამ გვეუბნებოდნენ, გვადროვეთ და რაღაც კომისიებს შევქმნითო, მაგრამ მსგავსი არაფერი მოხდა. საქმეები მკვდარი წერტილიდან არ დაძრულა და ხელისუფლებას პასუხების გაცემა მოუწევს“, - აცხადებს ცაგარეიშვილი, რომლის მსგავსად ხელისუფლებას მისი თანაგუნდელი ნინო გოგუაძე მკაცრად აკრიტიკებს.

როგორც for.ge-ს გოგუაძემ განუცხადა, იური ვაზაგაშვილის მკვლელობა ძალიან რეზონანსულია და ეს ყველა ადამიანის შეშფოთებას იწვევს. მისი თქმით, ხელისუფლების ვალია გამოძიებას ხელი შეუწყოს, რადგან შეიძლება, იური ვაზაგაშვილის საქმემ ქვეყანაში უმართავი პროცესები გამოიწვიოს.

„იური ვაზაგაშვილი ჩვენი თანამებრძოლი იყო და ჩვენი ხელისუფლების ერთ-ერთი მთავარი პრიორიტეტი ზურა ვაზაგაშვილის მკვლელობის გამოძიება იყო. სამწუხაროდ, ეს ვერ მოხდა და ახლა ცინიკური მკვლელობა მივიღეთ. ინფორმაციის მიღება მიზანშეწონილად ყველანაირი ფორმატში მიმაჩნია, მაგრამ ალბათ, შსს-ს პოზიციას ის დეპუტატები გაახმოვანებენ, რომლებიც ამაში შემჩნეული არიან და პარლამენტში ძალოვანების მოსვლას შეეწინააღმდეგებიან“, - აღნიშნავს გოგუაძე.

თანაფრაქციელებისგან განსხვავებით, უმრავლესობის ლიდერი დავით საგანელიძე პარლამენტში ძალოვანი უწყებების წარმომადგენლების მისვლის მომხრეა. დეპუტატი for.ge-სთან საუბარში აღნიშნავს, რომ საგამოძიებო პროცესზე კანონმდებლებს მაქსიმალური ინფორმაცია უნდა ჰქონდეთ.

საგანელიძის განცხადებით, ქვეყანაში იური ვაზაგაშვილის მკვლელობის სახით გაუგონარი ფაქტი მოხდა.

„არ გამიგია, რომ მამა შვილის საფლავზე ააფეთქონ. საქართველოში ეს ვის ავადმყოფ თავში მოიხარშა, ამის წარმოადგენაც არ მინდა. კოლეგების პათოსი მესმის და შესაძლებელია, საკითხზე კომიტეტის სხდომა გაიმართოს“, - აღნიშნავს საგანელიძე, რომლისგან განსხვავებით, თავდაცვის კომიტეტის თავმჯდომარე ირაკლი სესიაშვილი ამ ეტაპზე, პარლამენტში ძალოვანების მისვლის წინააღმდეგია.

როგორც for.ge-ს სესიაშვილმა განუცხადა, რაღაც ეტაპმდე ინფორმაცია უნდა დაგროვდეს.

მისი მოსაზრებით, უმჯობესია, ამჟამად სამართალდამცავებმა იმუშაონ და რაღაც კვალი გამოიკვეთოს.

„წინააღმდეგი არ ვარ, რომ დეპუტატებმა მთავარ პროკურორს მოუსმინონ და ყველა მოვლენა ლუპის ქვეშ გაატაროს, მაგრამ სჯობს, ამ მოსმენებით ვიყოთ დაკავებული თუ სამართალდამცავებმა იმუშაონ?! უმჯობესია, ძალოვანებმა რაღაც კვალი გამოკვეთონ და საქმე გაკეთდეს. საქმე უფრო მაინტერესებს, ვიდრე კამერების წინ დგომა. სჯობს, რაღაც დრო გავიდეს, პროკურატურამ იმუშაოს და ხელმოსაკიდებელი რაღაც იყოს. ჯერ ექსპერტების დასკვნები არ არის და ბადაშვილს არ დაესიზმრება, რომ რაღაც თქვას“, - აცხადებს სესიაშვილი, რომლის პათოსს იზიარებს ვიცე-სპიკერი მანანა კობახიძე.

კობახიძე აღნიშნავს, რომ პარლამენტის თავმჯდომარე დავით უსუფაშვილსა და მთავარ პროკურორ გიორგი ბადაშვილს შორის შეხვედრა შედგა და ეს დასტურია იმისა, რომ პარლამენტი მაქსიმალურად იქნება ჩართული ამ პროცესებში.

დეპუტატის თქმით, პროკურტურამ გამოძიების ინტერესებიდან გამომდინარე, საზოგადოებას ინფორმაცია უნდა მიაწოდოს, თუ რა ვითარებაა.

„ყველა კანონიერი საშუალება იქნება გამოყენებული, რომ ეს საქმეები გაიხსნას. ეს ორი საქმე ერთმანეთთან კავშირშია. ამას დამნაშავეთა დადგენა და დასჯა სჭირდება. იმედს ვიტოვებ, რომ პროკურატურა ამას თავს გაართმევს. ამ ეტაპისთვის უნდა ვეცადოთ, რომ პროკურატურამ საქმის გამოძიება ხარისხიანად და ჯეროვნად წარმართოს“, - განაცხადა კობახიძემ.

ვიცე-სპიკერის მსგავსად, ფრაქცია „ქართული ოცნების“ თავმჯდომარე გია ვოლსკი პარლამენტში სამართალდამცავების დაბარების მომხრე არ არის და უფრო მეტიც, ის აცხადებს, რომ არ ეთანხმება იმას, რომ პარლამენტმა შსს, პროკურატურა, სასამართლო უნდა ჩაანაცვლოს და კომისიები შექმნას.

ვოლსკი მიიჩნევს, რომ ქვეყანაში ადგილი არაჯანსაღ პოლიტიკურ სპეკულაციებს აქვს.

„თუ ეს წინადადება მითუმეტეს ნაციონალების მხრიდან მოდის, ეს სპეკულაციებია. ეს ყველაფერი მიზნად საზოგადოებაში სტრესული სიტუაციის შექმნას ემსახურება. სამოქალაქო საზოგადოებასა და ქვეყნის სტაბილურობაზე უნდა ვიფიქროთ“, - აღნიშნა ვოლსკიმ.

პარლამენტში შსს-სა და პროკურატურის წარმომადგენლების მისვლას მიზანშეწონილად არ მიიჩნევს ადამიანის უფლებათა დაცვის კომიტეტის თავმჯდომარე ეკა ბესელია.

ბესელია აცხადებს, რომ მას შსს-სა და პროკურატურის ხელმძღვანებეთან კომუნიკაციის პრობლემა არ აქვს.

„პირადად მე, ინფორმაციის მიღების არანაირი პრობლემა არ მაქვს არც მთავარი პროკურორის მხრიდან და არც შინაგან საქმეთა სამინისტროს ხელმძღვანელებისგან. მათთან შეხვედრა იმდენჯერმე მაქვს, რამდენჯერაც ამის აუცილებლობაა. მთავარ პროკურორთან ბოლო საუბარი ვაზაგაშვილის საქმესთან დაკავშირებით მქონდა. ალბათ, ჩვენს კოლეგებსაც აქვთ ამის შესაძლებლობა და მათ მაგივრად ვერ ვისაუბრებ. რაც შეეხება კონკრეტულ სისხლის სამართლის საქმეს, საგამოძიებო მოქმედებებიდან გამომდინარე არის გარკვეული ჩარჩო, რა ფარგლებშიც ჩვენ ინფორმაციის მიღება შეგვიძლია. ეს ფარგლები პარლამენტის წევრების მხრიდან ზუსტად დასანახია. მთავარია არა ის, შეხვედრა რამდენჯერ შედგება და ვისთან, არამედ ის რომ პასუხი გაეცეს ვინ მოკლა იური ვაზაგაშვილი“, - აცხადებს ბესელია.

დეპუტატთა ნაწილის მსგავსად, რესპუბლიკელი თინა ხიდაშელი მიიჩნევს, რომ იური ვაზაგაშვილის საქმესთან დაკავშირებით პარლამენტში ამ ეტაპზე სხდომის ჩატარება არასწორია.

როგორც for.ge-ს ხიდაშელმა განუცხადა, ასეთი სხდომის ჩატარებას წინ არაფერი უდგას და ბევრ ქვეყანაში ეს დემოკრატიასთან თავსებადი პროცესია.

„ამ კონკრეტულ შემთხვევაში, დღეს, ხვალ, ან ზეგ სხდომის მოწვევის მომხრე არ ვიქნებოდი იმიტომ, რომ პარლამენტმა პაუზა უნდა აიღოს. მთავარი პროკურორი თავის მოადგილესთან ერთად პარლამენტის თავმჯდომარეს შეხვდა და თუკი დეპუტატებს პროკურატურასთან კითხვები აქვთ, ეს პარლამენტის თავმჯდომარესთან გაარკვიონ. არ მგონია, რომ პროკურატურა ყოველ დღე უნდა ვარბენინოთ. დღეს როცა ყოველი წუთი ძვრიფასია, ახლა ამ პროცედურის ჩატარება ძალიან არასწორია“, - განაცხადა ხიდაშელმა.

მართალია, ამ მოწვევის პარლამენტში ნაციონალების დამკვიდრებული მანკიერი ტრადიცია დაირღვა და უწყებას ძალოვანი მინისტრები რამდენჯერმე ეწვიენ, მაგრამ უკვე დიდი ხანია, რაც უმცირესობის არაერთი მოთხოვნის მიუხედავად, საკანონმდებლო ორგანოში შს მინისტრი ალექსანდრე ჭიკაიძე არ ცხადდება და იმედია, ნაციონალების ტრადიცია ისევ არ აღსდგება.