„როდესაც ჩვენ ვთქვით, რომ სუს–ი არ უნდა ერეოდეს თვითმმართველი ორგანოს საქმიანობაში, ეს არა მარტო ჩვენი საფიქრალი აღმოჩნდა, არამედ სხვამაც იფიქრა ამასთან დაკავშირებით და რაღაცა გადაწყვეტილებები მიიღო“, – აცხადებს for.ge-სთან საუბრისას „რესპუბლიკური პარტიის“ ერთ–ერთი ლიდერი ლევან ბერძენიშვილი, რომლის განცხადებით, ძალიან ხშირად ხდება, რომ რესპუბლიკელები აჟღერებენ იმას, რაც ისედაც ყველამ მშვენივრად იცის.
for.ge ლევან ბერძენიშვილს ესაუბრა.
თებერვლის ბოლოს ქვეყანას ახალი უზენაესი სასამართლოს თავმჯდომარე ეყოლება, თუმცა ვინ გახდება ქვეყნის პირველი მოსამართლე ამ დრომდე უცნობია. ვინ შეიძლება გახდეს ქვეყნის პირველი მოსამართლე?
- კონსულტაციები ჯერჯერობით არ გამართულა. შეიძლება, სადმე ვინმე საუბრობს, მაგრამ ჩემს დონეზე ეს საკითხი არ განხილულა. ვფიქრობ, რომ მართალია ის, რაც თქვა იუსტიციის მინისტრმა - მოსამართლე უნდა იყოს ისეთი კვალიფიციური მაღალი დონის, რომელიც განწყობილი იქნება რეფორმებისთვის. უზენაესი სასამართლოს ამჟამინდელი თავმჯდომარე პოლიტიკურად მაინც აფილირებული არის „ნაციონალურ მოძრაობასთან“. სწორედ ამის გათვალისწინებით სასურველია, რომ პოლიტიკურად მეტად დამოუკიდებელი, კვალიფიციური და გამოცდილი ადამიანი გახდეს პირველი მოსამართლე.
სოციალურ ქსელში აქტიურად მიდის მსჯელობა იმაზე, რომ ქვეყნის პირევლი მოსამართლე არ უნდა გახდეს ის ადამიანი, რომლის ლობირებასაც დაიწყებენ რესპუბლიკელები...
- „რესპუბლიკური პარტია“ არავის ლობირებას არ დაიწყებს. ამიტომ შეუძლია, სოციალური ქსელი მშვიდად იყოს.
რაც შეეხება პრეზიდენტის ყოველწლიურ მოხსენებას, როგორც მოსალოდნელი იყო ეს საკითხი გახდა მორიგი ღია დაპირისპირების მიზეზი. პრეზიდენტი ითხოვს მთავრობის დასწრებას, პრემიერი კი თვლის, რომ მოქმედი კონსტიტუცია არ ითვალისწინებს მთავრობის დასწრებას. აქვს თუ მნიშვნელობა საერთაშორისო გამოწვევების ფონზე მთავრობამ მოისმინოს პრეზიდენტის პოლიტიკური მესიჯები?
- დაესწრება თუ არა მთავრობა, ეს არ გახლავთ პარლამენტის გადასაწყვეტი. პარლამენტი ვერ უკარნახებს მთავრობას როგორ უნდა მოიქცეს. თუ რომელიმე პარალამენტარი გეტყვით როგორ უნდა მოიქცეს მთავრობა, ის უბრალაოდ არღვევს კონსტიტუციურ პრინციპს. კონსტიტუცია მთავრობას არ ავალდებულებს დასწრებას, მაგრამ არც ხელს არ უშლის. მისი გადასაწყვეტია დაესწრება თუ არა. არ გამოვრიცხავ, რომ მთავრობა შეიძლება ნაწილობრივ იყოს წარმოდგენილი. თქვეს, რომ ინდივიდუალურად გადავწყვეტთო. უკვე გასაგებია, რომ არ იქნება პრემიერ-მინისტრი. მაგრამ, მთავრობის წევრები შეიძლება იყვნენ, შეიძლება არა. ჩემი აზრით, ყველაზე მეტად მნიშვნელობა აქვს იმას, რას ეტყვის პრეზიდენტი პარლამენტს. დანარჩენი გემოვნების საკითხია. ვისაც უნდა დაესწროს, ვისაც უნდა არა.
ბატონო ლევან, ერთ-ერთ ინტერვიუში აღნიშნეთ, რომ კოალიციაში რესპუბლიკელებს მიგითითეს, რომ წახვიდეთ კოალიციიდან. ვინ მიგითითად რესპუბლიკელებს, რომ დატოვოთ კოალიცია?
- „რესპუბლიკური პარტია“ თვლის, რომ არ უნდა დატოვოს კოალიცია. ამიტომ, კონკრეტულად ვინ მიგვითითა ამაზე, ამას არ აქვს მნიშვნელობა. ასეთი აზრი ჰქონდა ცალკეულ ჩვენს კოლეგას. თუკი განსხვავებული აზრები გამოთქვა „რესპუბლიკურმა პარტიამ“ ეს ხომ არ ნიშნავს იმას, რომ ისინი უნდა წავიდნენ კოალიციიდან?! ვინც ეს მიგვითითა, მან მიიღო ძალიან მყარი პასუხი.
ჩვენ შეგვიძლია ერთმანეთი გავაკრიკიტიკოთ, მაგრამ ჩვენ კოალიციიდან არასად არ მივიდივართ. როდესაც ასეთი საკითხი დადგა, ჩვენ პატიოსნად ვუპასუხეთ, რომ ჩვენ არ გავალთ კოალიციიდან. მეტიც, როდესაც ასეთი საუბრები დაიწყო, საქართველოს პარლამენტის თავმჯდომარემ განაცხადა, რომ ჩვენ უკანასკენელები დავტოვებთ კოალიციას. ჩვენ ვართ კოალიციის დამფუძნებელი წევრები და არსად წასვლას არ ვაპირებთ. ესაა მთავარი ამ ამბავში და არა ის, ვინ სად მიგვითითა.
ვრცელდება ინფორმაცია, რომ ამ პროცესს კულუარებიდან მართავდა დავით საგანელიძე, რომელმაც რამდენიმეჯერ ღიად გააკრიტიკა რესპუბლიკებელი, იგივე, მოსმენების საკითხთან დაკავშირებით...
- ბატონმა დავით საგანელიძემ განაცხადა, რომ მოსმენების საკითხზე მას დრო არ ეყო, ჩვენთვის დაემტკიცებინა, რომ არ ვიყავით მართალი. ჩვენ ნორმალურად მიგვაჩნია, თუ ვინმე გაგვაკრიტიკებს, თუნდაც - საგანელიძე. ჩვენც შეგვიძლია გავაკრიტიკოთ საგანელიძე, ეს არაა პრობლემა. კოალიცია არის განსხვავებული პარტიებისგან შედგენილი და იქ ერთ ხმაში არ მღერიან, რაც სრულებით ნორმალურია. ამიტომ, ჩვენ არ აღვიქვამთ ამას ასე მტკივნეულად. მთავარია, რომ კოალიცია დღეს მტკიცეა, მიუხედავად იმისა, რომ „თავისუფალი დემოკრატები“ წავიდნენ, დანარჩენები ადგილზე ვართ და ერთად მუშაობას ვაპირებთ.
ფაქტია, რომ რესპუბლიკელების მიმართ კოალიციაში არ არსებობს ერთგვარი პოზიცია. ოპოზიციურ ძალად აღგიქვამენ კოალიციაში...
- მე ვიცი, რომ არის ასეთი მოსაზრებები კოალიციაში, მაგრამ მცდარია. რესპუბლიკელები კოალიციაში არიან ხელისუფლების წარმომადგენლები, მათ ჰყავთ პარლამენტის თავმჯდომარე და არანაირ ოპოზიციაში ჩვენ არ ვართ. უბრალოდ, ჩვენ ვართ ნორმალაური ადამიანები და კოლეგებიც გვინდა, რომ ასეთები იყვნენ. რასაც ვხედავთ კოალიციის შიგნით, სწორედ იმას ვლაპარაკობთ.
თუ ვინმეს მიაჩნია, რომ არაფერი არ უნდა დავინახოთ და არავინ არ უნდა გავაკრიტიკოთ, ეს სერიოზული ლაპარაკი არ არის. ასეთი ადამიანები პოლიტიკოსები არ არიან და მე მეზარება მათზე ლაპარაკი. ჩვენს უმრავლესობაში, ალბათ, არიან ასეთი ცალკეული ადამიანები, მაგრამ რეალურად, პარტიული თვალსაზრისით, რესპუბლიკელები მკვიდრი ძალაა ამ კოალიციაში. ასე რომ, ძალიან მყარად ვართ.
დავით ბერძენიშვილმა საჯაროდ რამდენჯერმე გააკრიტიკა ხელისუფლება პრემიებთან დაკავშირებით, მან ასევე ისაუბრა სუს-ის გავლენაზე ადგილობრივ თვითმართველობის ორგანოებში. ამ განცხადებების შემდეგ შეიცვალა რამე?
- შეიცვალა ის, რომ ბატონმა პრემიერმა შეცვალა ის ხალხი, ვინც ჩართული იყო მაგ საქმეებში. ჯანყარაშვილები და ჩხენკელები რომ წავიდნენ ეს იყო სწორედ ის...
ეს თქვენი დამსახურებაა?
- ჩვენი დამსახურება არაა, მე ვიცი ვისი დამსახურებაცაა. იმის დამსახურებაა ვინც გააკეთა. ეს გააკეთა პრემიერ-მინისტრმა და შესაძლოა, ყოფილ პრემიერ-მინისტრთან კონსულტაციის შემდეგ, მაგრამ ეს იყო სწორი მიმართულებით გადადგმული ნაბიჯი. ასე რომ, ჩვენი კრიტიკა იყო სწორი. სწორი არ იყო როდესაც ცალკეული პირები ჩხენკელები და ჯანყარაშვილები მართავდნენ სიტუაციას.
პრემიებთან დაკავშირებით არა მარტო დავით ბერძენიშვილმა, არამედ თინათინ ხიდაშელმაც ძალიან მკაცრად ილაპარაკა. ახლაც შემიძლია გითხრათ სამარცხვინოა, რომ საკრებულოს წევრებს უფრო მეტი ხელფასი ჰქონდეთ, ვიდრე მინისტრებს და პარლამენტის წევრებს. პრემიებთან დაკავშირებით ჯერ კიდევ გვაქვს კრიტიკული დამოკიდებულა ყველა იმ პირის მიმართ, ვისაც ფული უფრო უყვარს, ვიდრე საქმის კეთება.
თქვენ ზივად ჯანყარაშვილი ახსენეთ, როდესაც ის კოალიციის აღმასრულებელ მდივნად ინიშნებოდა „ქართული ოცნების“ წევრები აცხადებდნენ, რომ მისი პოლიტიკური გამოცდილება ხელს შეუწყობდა კოალიციას, თუმცა, დღეს ამ თემაზე არ საუბრობენ. რეალურად რა გახდა ჯანყარაშვილის განთავისუფლების მიზეზი?
- ის ჩვენს პარტიაში არასოდეს ყოფილა და ამიტომ მასზე არც კარგი და არც ცუდი არასოდეს არ გვითქვამს. ეს ეხებოდა პარტია „ქართულ ოცნებას“ და არა კოალიციას. პარტია „ქართული ოცნების“ წევრები მას აქებდნენ, მაგრამ ახლა არ აქებენ. ეს მათ უნდა ჰკითხოთ. ეს საკითხი ჩვენ არანაირად არ გვეხება, იმიტომ, რომ ჯანყარაშვილი რესპუბლიკელების დირექტორად არ დაუნიშნავთ, ჩვენ არ შევუწუხებივართ ჯანყარაშვილს, თუ ვინმე შეაწუხა მან, ისევ იქ შიგნითვე იყვნენ და თვითონ უნდა იცოდნენ რა და როგორ. მე მას არც კი ვიცნობ, ისიც არ ვიცი ახლა სადაა და რას აკეთებს.
ვიცი, რომ უბრალოდ, ეს ადამიანები ჯანყარაშვილები ჩხენკელები და სხვები, უფრო, სხვა საქმეებში ჩაერივნენ, ვიდრე მათ ევალეობოდათ. რამდენადაც მე ვიცი, ამ მოტივით არიან ისინი განთავისუფლებული, თუმცა, მთლიანობაში ითქვა, რომ ისინი წმინდანები იყვნენ და თვითონ წავიდნენ, მაგრამ ხომ ხვდებით, რომ რაღაცა პრობლემა იყო. კიდევ ერთხელ ვამბობ, რომ ჩვენ არავინ არ გვკითხა მისი დანიშვნა, თავის პარტიაში ვისაც უნდათ იმას დანიშნავენ და ეს ბუნებრივია. ფაქტია, რომ როდესაც ჩვენ ვთქვით, რომ სუს–ი არ უნდა ერეოდეს თვითმმართველი ორგანოს საქმიანობაში, ეს არა მარტო ჩვენი საფიქრალი აღმოჩნდა, არამედ სხვამაც იფიქრა ამასთან დაკავშირებით და რაღაცა გადაწყვეტილებები მიიღო.
ამბობენ, რომ ბიძინა ივანიშვილმა მიიღო ეს გადაწყვეტილება...
- ვერ გეტყვით რა გავალენა მოახდინა „რესპუბლიკურმა პარტიამ“ ამ საკითხზე, მაგრამ ჩვენ რასაც ვხედავდით, იმას ვამბობდით. ბევრი წუწუნებდა ამასთან დაკავშირებით, ხმები მივიდოდა იქ სადაც საჭიროა. მარტო ჩვენ არ ვართ, ძალიან ხშირად ხდება, რომ რესპუბლიკელები აჟღერებენ იმას, რაც ისედაც ყველამ მშვენივრად იცის. იმას, რასაც ჩვენ არ ვუჭერთ მხარს, სხვებიც არ უჭერენ მხარს, მაგრამ ჩვენ გვიწევს ამის ხმამაღლა თქმა და სხვები ჩუმად აკეთებენ. თუ ვინმე კარგად შეისწავლის კენჭისყრების საკითხს, იქ აღმოაჩენს, რომ მარტო რესპუბლიკელები არ იქცევიან თავისებურად კენჭისყრების დროს.
და ბოლოს, სიმართლეს შეესაბამება ინფორმაცია იმასთან დაკავშირებით, რომ ივანიშვილმა სთხოვა დავით უსუფაშვილს დაეტოვებინა „რესპუბლიკური პარტია“ და სათავეში ჩადგომოდა „ქართულ ოცნებას“?
- ეს უნდა ჰკითხოთ ბატონ ბიძინა ივანიშვილს და დავით უსუფაშვილს. ჩემთან ეს საკითხი არავის არ განუხილავს და მე ამის შესახებ არაფერი არ უნდა ვიცოდე. მე არ მჯერა, რომ ბატონი დავით უსუფაშვილი დატოვებს „რესპუბლიკურ პარტიას“. თუ ვინმეს აქვს ეს გეგმა, პირდაპირ გეტყვით, რომ ეს ძალიან უპრესპექტივო გეგმებია.
