საგარეო საქმეთა ყოფილი მინისტრის მაია ფანჯიკიძის განცხადებით, იმის თაობაზე, რომ ხელშეკრულება მზადდებოდა, რამდენიმე თვით ადრე იცოდა ხელისუფლებამ. მისივე განცხადებით, ხელშეკრულების არსებობის შესახებ, პრემიერის სპეციალურმა წარმომადგენლემა რუსეთთან ურთიერთობის საკითხებში, ზურაბ აბაშიძემ მაშინ შეიტყო, როდესაც ამის თაობაზე ინფორმაცია მედიით გავრცელდა. როგორც ფანჯიკიძე ამბობს, ამ ხელშეკრულების ტექსტი საქართველოს ხელისუფლებამ ანალიზისათვის 12-13 ოქტომბერს მიიღო.

გაიმართა თუ არა სარკინიგზო მიმოსვლის აღდგენაზე მოლაპარაკება და რატომ არ შედგა საქართველოსა და დიდი ბრიტანეთის პრემიერ-მინისტრების შეხვედრა, ამ საკითხებზე for.ge მაია ფანჯიკიძეს ესაუბრა.

ვლადიმერ პუტინი სოხუმი-თბილისი-ერევნის მიმართულებით სარკნიგზო მიმოსვლის აღდგენაზე ალაპარაკდა. რუსეთის პრეზიდენტის თანაშემწის, ვლადისლავ სურკოვის თქმით, თბილისი აფხაზეთის გავლით რკინიგზის აღდგენის წინააღმდეგი არასდროს ყოფილა. საქართველოს ხელისუფლების მხრიდან სარკინიგზო მიმოსვლის საკითხი იყო განხილული?

- ჩემი თანდასწრებით არასოდეს ეს საკითხი სერიოზულად განხილული არც ერთ დონეზე არ ყოფილა. ერთი-ორჯერ ეს საკითხი წამოიჭრა, მაგალითად პრემიერ-მინისტრ ბიძინა ივანიშვილს ეს შეკითხვა დაუსვეს ერევანში ვიზიტის დროს. მაგრამ, სახელმწიფო დონეზე, რომელიმე ფორმატში, იქნებოდა ეს უსაფრთხოების საბჭო, თუ რაიმე სხვა, არც ერთ ასეთ შეხვედრას, რომელზედაც ეს საკითხი ყოფილიყოს განხილული მე არ დავსწრებივარ. შესაბამისად, არ არსებობს არც ერთი საუბრის ჩანაწერი, სადაც თქვენ იპოვით, რომ ამაზე იყო მსჯელობა.

რაც შეეხება ქალბატონ ბერუჩაშვილის განცხადებას (ნებისმიერი სატრანსპორტო, თუ საკომუნიკაციო არხები განვითარდება მხოლოდ იმ ინტერესების გათვალისწინებით, რაც იქნება სახელმწიფოს ძირითადი ინტერესი - თ.ბ.),  არ ვიცი, ჩემს გარეშე იყო თუ არა სადმე, რაიმე სახის ლაპარაკი ამის თაობაზე. ყოველთვის ვამბობდი, რომ არ მიმდინარეობს საკითხის არანაირი განხილვა და თუ კი, სადმე რამე განხორციელდება, ეს იქნება საქართველოს ინტერესების გათვალისწინებით. მინისტრის დღევანდელი განცხადება კი ჩემშიც ბადებს კითხვას, ხომ არ შეიცვალა რამე, ხომ არ მიმდინარეობს საუბარი რამეზე, ხომ არ იყო ვინმეს შორის რაიმე შეთანხმება, ან საუბარი, რომელიც მე არ ვიცი და რომელიც ჩემს გარეშე სადმე მიმდინარეობდა. ეს მე არ ვიცი, მე არავის არ ჩავუყენებივარ საქმის კურსში.

კიდევ ერთხელ ვიმეორებ, ჩემი თანდასწრებით არასოდეს ამ საკითხის განხილვა არ ყოფილა. მე არ დავსწრებივარ არც ერთ ასეთ შეხვედრას. როდესაც სომხეთის პრეზიდენტი იყო ჩამოსული, მას ჰქონდა შეხვედრა პრემიერ-მინისტრთან, მე ვიყავი იმ შეხვედრაზე და ამაზე საუბარი არ ყოფილა. როდესაც ჩვენ ვიყავით ერევანში, არც იქ ყოფილა ამ საკითხზე საუაბარი, მითუმეტეს, სერიოზული განხილვა.

სომხეთის ტრანასპორტის მინისტრის მოადგილემ, დაადასტურა, რომ სარკინისგზო მიმოსვლის აღდგენაზე მიმდინარეობს მოლაპარაკებები. თქვენ ამბობთ, რომ თქვენი თანდასწრებით არ ყოფილა ამ თემაზე საუბარი, მაგრამ გამორიცხავთ, რომ თქვენს გარეშე ყოფილიყო ეს მოლაპარაკება?

- არ ვიცი. იმის დამადასტურებელი ფაქტი, რომ ვიღაცას რაღაცა მოლაპარაკება ჰქონდა არ მაქვს, ამ ვარაუდს ვერ გავაკეთებ.

მინისტრის განცხადებამ, რომ სახელმწიფო ინტერესებიდან გამომდინარე იქნება მიღებული გადაწყვეტილება, გაურკვევლობა გამოიწვია ექსპეტრებში. როგორც ყოფილი საგარეო საქმეთა მინისტრი შეგიძლიათ განმარტოთ, რას ნიშნავს სახელმწიფო ინტერესებიდან გამომდინარე მიღებული გადაწყვეტილება?

- როგორც ყოფილი საგარეო საქმეთა მინისტრი გეტყვით ერთ რამეს, რომ საგარეო საქმეთა მინისტრი ვალდებულია, მედიისთვის პერიოდულად განმარტოს მისი საქმიანობის შესახებ. პირადად მე ამას სისტემატურად ვაკეთებდი. ამიტომ, ვფიქრობ, რომ საგარეო საქმეთა მინისტრმა კეთილი უნდა ინებოს და მითუმეტეს, თუ კი, მისი განცხადება ბადებს რაიმე შეკითხვებს, გააკეთოს უფრო ვრცელი განმარტება და გვითხრას რა და როგორ ხდება. ეს არაა ერთადერთი საკითხი, რომელიც ჩვენ გვაინტერესებს. საკითხი კიდევ ბევრია.

ბრიუსელში გაიმართა ასოცირების პირველი საბჭო, გაიმართა პირველი შეხვედრა ევროკავშირის ახალ ხელმძღვანელობასთან, ასევე პირველი შეხვედრა გაიმართა ნატოს ახალ ხელმძღვანელობასთან, მაგრამ საზოგადოება არაა ინფორმირებული იმის თაობაზე, თუ რაზე იყო იქ საუბარი. არადა, როგორც ერთი, ისე მეორე მიმართულებით, ძალიან მნიშვნელოვანი თემებია, რომელზედაც ჩვენ ყველას გვაინტერესებს პასუხი. მაგალითად, - რაზე იყო საუბარი ნატოში? როგორ მდგომარეობაშია პაკეტი? რა ხდება ახლა? რა არის შემდეგი ნაბიჯი? იგივე ეხება ევროკავშირს. საქართველოს დელეგაცია ვალდებულია მოქალაქეების ამ კითხვებს გასცეს პასუხი, ისევე, როგორც მოვალეა, ახალი მინისტრი ევროპულ და ევროატლანტიკურ სტრუქტურებში ბ-ნ დავით ბაქარძე დაენახოს მედიას და გაააკეთოს განმარტებები მისი საქმიანობის შესახებ.

საქართველოსთვის ისეთ გადამწყვეტ მომენტში, როგორშიც დღეს ვართ, როდესაც რუსეთის მხრიდან არის ასეთი ღია აგრესია, როდესაც უმნიშვნელოვანესი საკითხები წყდება და მიღწეული გვაქვს განვითარების იმ ეტაპისთვის, რომ ახლა ეს ყველაფრი რეალობაში უნდა განხორციელდეს, კიდევ ერთხელ დასტურდება, რომ საქართველოს მთავრობის ხელმძღვანელობის მხრიდან, აბსოლუტური გულგრილობა იყო იმ საკითხების მიმართ, რის გამოც შეიქმნა პოლიტიკური კრიზისი და კოალიცია დატოვა საგარეო პოლიტიკურმა გუნდმა. როგორც ჩანს, სერიოზული პრობლემები იყო ახალი მინისტრების დანიშვნის საკითხში. მაგრამ, მე ვფიქრობ, რომ უპასუხისმგბელობაა დღევანდელ სიტუაციაში გამოუცდელი ხალხი დანიშნო ასეთ თანამდებობაზე, რომლებსაც ჯერ საქმეში გარკვევა სჭირდებათ.

სოხუმი-თბილისი-ერევნის მიმართულებით სარკნიგზო მიმოსვლის აღდგენის საკითხი, როგორი კუთხით უნდა იქნეს განხილული და საერთოდ, ამ პირობებში, როდესაც სახეზე გვაქვს აფხაზეთის ანექსია, გვაქვს ყირიმი, როგორ წარმოგიდგენიათ ამ საკითხის განხილვა?

- მე რომ ვერ წარმომედგინა, იმიტომაც არც წამომიჭრია ეს საკითხი განსახილველად. ისე, ზოგადად რომ ვთქვათ, ნებისმიერი საკითხი ადამიანმა შეიძლება განიხილო და საბოლოო ჯამში, მიხვიდე დასკვნამდე, რომ ეს არ ვარგა. ნებისმიერ საკითხზე წარმომიდგენია მსჯელობის დაწყება, თუ კი საკითხი გარკვეულწილად ისედაც დგას. კიდევ ერთხელ ვამბობ, რომ მე ასეთ განხილვაში მონაწილეობა არ მიმიღია, მე არ მომისმენია შესაძლო პროექტის ან დადებითი, ან უარყოფითი მხარეები. შესაბამისად, მე ამის თაობაზე ინფორმაცია არ მაქვს.

რუსეთთან ინტეგრაცია დასავლეთის მხრიდან შეფასდა, როგორც საქართველოს ანექსია. თუმცა, მთავრობის წევრი პაატა ზაქარეიშვილი ამბობს, რომ ეს არაა საბოლოო ანექსია და, რომ ანექსიისგან შორს ვართ...

- ეტყობა ზაქარეიშვილი თვლის, რომ სანამ რუსთაველის პროსპექტზე არ დაინახავს ტანკს, მანამდე კარგადაა ჩვენი საქმე. ის, რომ ხელშეკრულებას არ აქვს არანაირი სამართლებრივი ძალა, რადგანაც ის სამართლებრივ სუბიექტთან დადებული არ არის, არ ცვლის დე ფაქტო საქმის ვითარებას. ასე რომ, ეს არის ძალიან შემაშფოთებელი და ნებისმიერი სახის რიტორიკა, რომელიც შერბილებისკენ მიდის, ამ შემთხვევაში, არასწორია.

საქართველოს ტერიტორიული მთლიანობაზე უფრო მაღალი ღირებულება არ უნდა არსებობდეს. მთელი ამ დისკუსიის განმავლობაში არავის არ ახსენდება ეთნიკური წმენდის შედეგად საკუთარ ქვეყანაში დევნილად ქცეული ადამიანები და მათი ინტერესები. ზოგიერთი ისე მსჯელობს ამ ტერიტორიებზე, რომ თითქოს, აფხაზეში ხალხი არ ცხოვრობდა და ხალხი არ იყოს გამოყრილი.

რაც შეეხება დიდ ბრიტანეთში პრემიერის ვიზიტს, ცნობილია, რომ ირაკლი ღარიბაშვილს შეხვედრა არ ჰქონია დიდი ბრიტანეთის პრემიერ-მინისტრთან. თუ გაქვთ ინფორმაცია, რატომ არ შედგა ეს შეხვედრა და საერთოდ, იყო შეხვედრა დაგეგმილი?

- ეს შეხვედრა ჯერ კიდევ ჩემი მინისტრობის პერიოდში იგეგმებოდა. სამი კვირა გავიდა რაც წამოვედი სამინსიტროდან და მე უკვე აღარ ვიცი როგორ განვითარდა მოვლენები. ყოველ შემთხვევაში, სანამ მე ვიყავი სამინისტროში, ჩვენ ეს თხოვნა ბრიტანეთის მთავრობისთვის გაგზავნილი გვქონდა და ამაზე მუშაობა დაწყებული იყო. მერე რა მოხდა, ნამდვილად არ ვიცი. ვიზიტი დაემთხვა იმ დღეს, როდესაც ხელი მოეწერა ხელშეკრულებას და საერთოდ, ნებისმიერი ასეთი ვიზიტის დროს, რაც არ უნდა სხვა პროფილის იყოს ვიზიტი, ყოველთვის უნდა იყოს მცდელობა იმისა, რომ იგი იყოს პოლიტიკური და როგორც გითხარით, ამაზე მუშაობა დაწყებული იყო.