უმრავლესობის ერთ-ერთი ლიდერი თინა ხიდაშელი აცხადებს, რომ „რესპუბლიკური პარტია“ არსად არ მიდის და კოალიციას ბოლოს დატოვებს. დეპუტატის შეფასებით, 1-ელი ოქტომბრის გამარჯვებაში ბიძინა ივანიშვილის წვლილი უზარმაზარი და დაუფასებელია, მაგრამ საქმე ისე არ არის, რომ არავინ არაფერს არ აკეთებდა, ბედნიერად ცხოვრობდა და მერე შემთხვევით, ხელისუფლებაში გამოჩნდა.

ამას გარდა, დეპუტატისთვის უხერხულობას უმრავლესობაში ყოფილი ნაციონალების გადასვლა ქმნის, მაგრამ კანონმდებელი იმედს იტოვებს, რომ ამ ადამიანებისგან მინიმუმ პრობლემები არ შეიქმნება.

უმრავლესობაში თინა ხიდაშელს რა უქმნის დისკომფორტს და მოეწონა თუ არა მას პრეზიდენტის გამოსვლა, ამას for.ge-ს ინტერვიუდან შეიტყობთ:

როგორ შეაფასებთ, პარლამენტში პრეზიდენტ გიორგი მარგველაშვილის გამოსვლას და რა გზავნილები მიიღეთ?

- პრეზიდენტს ძალიან კარგი და საინტერესო გამოსვლა ჰქონდა. პრეზიდენტის გამოსვლაში ევროატლანტიკური კურსი არ დომინირებდა, რადგან აქ სათქმელი არაფერი იყო, ყველაფერი ნათელია და რაიმე კითხვები არ არსებობს. დიდი აჟიოტაჟის შემდეგ, რომ, თითქოს, დასავლეთის კურსს გადავუხვიეთ, პრეზიდენტმა პარლამენტს მომართა, მაგრამ დაპირებული გამოსვლა არ შედგა, ვინაიდან გასული კვირის მოვლენების დროს, ყველა ემოციის ქვეშ იყო, ახლა კი ყველაფერი თავის ადგილზე დადგა და დაბრუნდა. ვფიქრობ, რომ რამდენიმე მომენტი იყო, რომელსაც არ გავიზიარებდი და ვისურვებდი არ ყოფილიყო.

პრეზიდენტმა პარლამენტს რჩევები მისცა და კანონების ცალკეული ნორმების ამოქმედების გადავადების პრაქტიკის დასრულებისკენ მოუწოდა. მის შენიშვნას გაიზიარებთ?

- ეს მოხსენებიდან ამოვარდნილად გამოჩნდა და შემდეგ განმარტა, რომ კონკრეტულ თემას გულისხმობდა. მოსმენების კანონპროექტზე პარლამენტმა პრეზიდენტის ვეტო გაიზიარა და ჩვენი პოზიცია გასაგები იყო, რაც შეეხება ზოგადად ამ რჩევას, ეს რჩევა სწორი არ არის, რადგან ჩვეულებრივი მოვლენაა, როდესაც პარლამენტები კანონებს იღებენ და შემდეგ ეს კანონები ძალაში ნაწილ-ნაწილ შედის. თუკი ფუნდამეტურ და სერიოზულ რეფორმას აკეთებენ, ამ რეფორმებს მომზადება სჭირდება. მაგალითად, მოსმენების კანონპროექტი რომ ავიღოთ, საკანონმდებლო ინიციატივა 1-ელ დეკემბრამდე უნდა მივიღოთ, მაგრამ ის ძალაში დაუყოვნებლივ ვერ შევა. კერძოდ, თუ პარლამენტმა ცვლილებებს მხარი დაუჭირა, რომ ეს სისტემა შინაგან საქმეთა სამინისტროდან გამოვიდეს, მაშინ ეს კანონი ძალაში მეორე დღესვე ვერ შევა, რადგან დანადგარების გადატანა უნდა მოხდეს და ამისთვის დროა საჭირო. როცა პარლამენტი კანონს იღებს, ამით კურსს აჩვენებს, ოღონდ რეალობას ითვალისწინებს - რაღაცას მეტი დრო სჭირდება, რაღაცას ნაკლები.

როცა სიკვდილით დასჯას აუქმებ, კანონს მიღებისთანავე აამოქმედებ, მაგრამ როდესაც ამნისტიის კანონი მივიღეთ, მის ძალაში შესვლას გარკვეული დრო დასჭირდა, რადგან განაჩენებს სასამართლოს მიერ დადასტურება სჭირდებოდა. პრეზიდენტს სიტყვა გაექცა, როცა ზოგადად ამ საკითხზე ისაუბრა. კონკრეტულ შემთხვევაში კი, მართალი იყო.

პრეზიდენტი წინადადებით გამოვიდა, რომ შინაგან საქმეთა სამინისტროს უშიშროების სამსახური გამოეყოს. მის პოზიციას იზიარებთ?

- ეს მარგველაშვილის იდეა არ არის, ეს არის ამბავი, რომლის თაობაზეც საქართველოში მრავალათასიანი მიტინგები იმართებოდა. ასევე ეს არის ამბავი, რომელიც „ქართული ოცნების“ საარჩევნო პროგრამაშია. ამიტომ, იმედი მაქვს, რომ 2016 წლის ბოლომდე ამ საკითხის მოგვარებას შევძლებთ. სასურველია და იდეალური იქნება, თუ ეს საკითხი კონსტიტუციური თემა გახდება, რადგან ხვალ და ზეგ მოსულმა ხელისუფლებამ ის შეცდომა არ უნდა გაიმეოროს, რაც „ნაციონალურმა მოძრაობამ“ გააკეთა, როდესაც ქვეყანაში ბერიას დროინდელი „ენკავედე“ შემოვიდა.

საკონსტიტუციო ცვლილებისთვის საკმარისი უმრავლესობა არ გვაქვს, მაგრამ იდეალური იქნება, ეს საკითხი საკონსტიტუციო თემა გახდეს და საკითხი ერთხელ და სამუდამოდ დაიხუროს.

გიორგი მარგველაშვილმა გამოსვლისას თქვა, რომ „ორი ბატონის მსახურება ვერ მოხერხდება“. პრეზიდენტმა მოგვიანებით განმარტა, რომ ამ განცხადებაში ბიძინა ივანიშვილს არ გულისხმობდა. თქვენ რა შთაბეჭდილება დაგრჩათ?

- არცერთი მიზეზი არ გვაქვს, რომ ვიფიქროთ, ის სიმართლეს არ ამბობს. პრეზიდენტის სიტყვების კომენტატორი არ ვარ, მაგრამ როდესაც, განცხადება ორმაგი ან სამმაგი ინტერპრეტაციის შესაძლებლობას ტოვებს, ვერ გეტყვით, ის რას გულისმობდა. შთაბეჭდილებები არ მრჩება, როცა ადამიანი განცხადებას აკეთებს და შემდეგ იმ განცხადებას ორჯერ-სამჯერ განმარტავს.

რაც შეეხება კოალიციიდან „თავისუფალი დემოკრატების“ წასვლას, მოლოდინი იყო, რომ „ქართული ოცნების“ რიგებს, თქვენც დატოვებდით...

- ეს მოლოდინი ვის ჰქონდა, არ ვიცი. დედამიწის ზურგზე რესპუბლიკელების ნაცვლად გადაწყვეტილებებს არასოდეს არავინ არ იღებს. შესაბამისად, გადაწყვეტილებებზე პასუხს თავად ვაგებთ. უმრავლესობაში ვრჩებით და ყველაზე ბოლო ვიქნებით, ვინც უმრავლესობაში აღარ იქნება. ივანიშვილთან ერთად 2012 წლის 1-ელი ოქტომბერი ჩვენი მონაპოვარია. ამ გამარჯვებაში მისი წვლილი უზარმაზარი და დაუფასებელია, მაგრამ ამასობაში, საქმე ისე არ არის, რომ არავინ არაფერს არ აკეთებდა, ბედნიერად ცხოვრობდა და მერე შემთხვევითი ხალხი გამოჩნდა. ეს ასე არ იყო და ივანიშვილის პირველი განცხადებაც ამის დასტური იყო, როდესაც ალიანსში პირველები ჩვენ და „თავისუფალი დემოკრატები“ დაგვასახელა. არსად არ მივდივართ, რადგან კოალიცია შევქმენით და მიგვაჩნია, რომ ის საქმე ბოლომდეა მისაყვანი. კერძოდ, ის, რისთვის ბევრი წლის მანძილზე ვიბრძოდით და შემდეგ 1-ელი ოქტომბერი დადგა.

1-ელი ოქტომბრის გამარჯვებაში ივანიშვილის წვლილი დიდია, მაგრამ მისი სახელი ხელისუფლების ქმედებებთან ასოცირდება. ყოფილი პრემიერი უმრავლესობის იმ სხდომასაც ესწრებოდა, სადაც თავდაცვის მინისტრის პოსტიდან ირაკლი ალასანია გადააყენება გადაწყდა. რა სტატუსით დაესწრო სხდომას ივანიშვილი?

- ამ ერთი წლის მანძილზე, ივანიშვილი ერთხელ პოლიტსაბჭოს სხდომას დაესწრო, ხოლო ერთხელ უმრავლესობის სხდომასაც, სადაც ანტიდისკრიმინაციულ კანონპროექტზე ვმსჯელობდით. ადამიანი, რომელმაც კოალიცია შექმნა, შემდეგ ულიდერა და ხელისუფლებაში მოიყვანა, რა თქმა უნდა, ვითარების გადასარჩენად უმრავლესობის სხდომაზე უნდა ყოფილიყო, რათა რაციონალური მიდგომები შემუშავებულიყო. ეს საპარლამენტო ფორმატში ოფიციალური შეხვედრა არ იყო, არამედ ეს კოალიცია „ქართულ ოცნების“ შეხვედრა იყო და ჩემს ნათქვამს როგორი კუდებიც არ უნდა მოაყოლონ, გეტყვით, რომ გამიკვირდებოდა იქ ივანიშვილი რომ არ ყოფილიყო, რადგან ეს ის ადამიანი არ არის, რომლისთვისაც ასეთი თემები არაფერს არ ნიშნავს. როდესაც, ერთი კომპონენტი ამ ღერძს ეცლებოდა, ის სხდომაზე იმისთვის მოვიდა, რომ ვითარება გადაერჩინა, მაგრამ სამწუხაროდ, უმრავლესობის სხდომაზე „თავისუფალი დემოკრატები“ არ მოვიდნენ.

თუმცა, ყოფილმა პრემიერმა პროცესი ვერ გადაარჩინა და „თავისუფალმა დემოკრატებმა“ თქვენი რიგები დატოვეს. ეს გადაწყვეტილება კოალიციურ რეჟიმში მიიღეთ, თუ ეს ირაკლი ღარიბაშვილის ერთპიროვნული გადაწყვეტილება იყო?

- ამ გადაწყვეტილებას პრემიერი იღებს. პოსტიდან ალასანიას გათავისუფლება სრულიად წამებში მოხდა. მისი გათავისუფლების თაობაზე ბრძანება მისი პრესკონფერენციის შემდეგ დაიწერა. რომ გითხრათ, ამაზე დიდი მსჯელობა იყო-თქო, ეს ასე არ იყო, მაგრამ მსჯელობა გაიმართა. პრემიერმა იმ წუთას თქვა, რომ ამ გადაწყვეტილებას პირადად იღებდა და პასუხისმგებლობაც მას ეკისრება. ჩვენ ჩვენი აზრები გამოვთქვით, მაგრამ გადაწყვეტილება პრემიერმა პრესკონფერენციის შემდეგ მიიღო.

როგორც ფიქრობთ, ირაკლი ალასანიამ იჩქარა?

- ეს ჩემი შესაფასებელი არ არის, ისინი ჩემი მეგობრები არიან და ასეთებად დარჩებიან. ამიტომ, მათ პოლიტიკურ წარმატებას ვუსურვებ.

შესაძლოა, ზურაბ აბაშიძეს ვიცე-სპიკერის პოსტი ჩამოართვან, ასევე თანამდებობებიდან წასვლა მოუწიოთ - გიორგი ცაგარეიშვილს, ვიქტორ დოლიძეს და დავით ონოფრიშვილს, რომლებიც კომიტეტებს ხელმძღვანელობენ. ამ საკითხზე რესპუბლიკელებში რას ფიქრობენ?

- ამ საკითხზე არც პარტიაში და არც ფრაქციაში არ გვისაუბრია, კომიტეტების თავმჯდომარეები კი თავიანთ თანამდებობებზე რჩებიან და ეს ნორმალურია. აბაშიძესთან დაკავშირებით პროცედურული პრობლემაა, მაგრამ ვისურვებდი, რომ ის პოსტზე დარჩეს. ეს გადაწყვეტილება უმრავლესობამ უნდა მიიღოს და ათი დეპუტატის აზრი მნიშვნელოვანი არ იქნება. ეს უმრავლესობის კვოტაა და ვნახოთ, უმრავლესობა რა გადაწყვეტილებას მიიღებს. რაც შეეხება კომიტეტის თავმჯდომარეებს, მათი კვოტა არავის არ ეკუთვნის და მათ პარლამენტი ირჩევს. კომიტეტების თავმჯდომარეებს ქვეყნისთვის პრობლემა არც ერთი წამით არ შეუქმნიათ - პირიქით. შესაბამისად, აუცილებლობას ვერ ვხედავ, ამ გადაწყვეტილების გადასინჯვა მოხდეს.

„თავისუფალი დემოკრატები“ ოპოზიციურ ფლანგზე „ნაციონალური მოძრაობის“ კონკურენტი გახდა. როგორ ფიქრობთ, მათ რესურსი აქვთ, რომ ოპოზიციაში პირველები იყვნენ?

- ასეთ დროს მთავარი რესურსი ინტელექტუალური რესურსია და ასევე მნიშვნელოვანია, წარსული. ორივე შემთხვევაში, მათ „ნაციონალურ მოძრაობასთან“ შედარებით, უზარმაზარი რესურსი აქვთ.

უმრავლესობაში „თავისუფალი დემოკრატები“ ყოფილი ნაციონალებით ჩაანაცვლეთ. მაშინ, როდესაც 9 წლის მანძილზე „ნაციონალურ მოძრაობას“ ებრძოდით, ახლა არ გეუხერხულებათ, რომ ეს ადამიანები თქვენს რიგებში გადაიყვანეთ?

- ეს ჩემთვის უხერხულობას ქმნის და კეკლუცობას არ დავიწყებ, მაგრამ უხერხულობას ასევე ის ქმნის, როდესაც უმრავლესობის სხდომებზე, სადაც „ქართული ოცნების“ თანამებრძოლები ერთმანეთთან ვსაუბრობთ და გეგმებს ვაწყობთ, ეს ადამიანები ესწრებიან. მე ეს დიკომფორტს მიქმნის, მაგრამ სამწუხაროდ, ეს პოლიტიკაში ბევრს არაფერს არ ნიშნავს, რადგან საკანონმდებლო ორგანოში უმრავლესობა უნდა იყოს და ასე გამოვიდა, რომ ამ ადამიანებმა უმრავლესობა შეავსეს. იმედს ვიტოვებ, რომ ამ ადამიანებისგან სიურპიზები არ იქნება და მინიმუმ პრობლემები არ შეიქმნება. ამას გარდა, მნიშვნელოვანია, რომ პარლამენტის წევრებმა ფრაქციის წარმომადგენლობის მიუხედავად პარლამენტში სიარული ისწავლონ და მუდმივად ქვორუმის პრობლემა არ იყოს. ამასთან, მუდმივად საუბარი იმაზე არ უნდა იყოს, ამ კანონპროექტს კენჭი ახლა ეყაროს თუ არა. თუ იმ საქმეს პასუხისმგებლობით მოვეკიდებით, რასაც ვაკეთებთ და ვემსახურებით, ყველაფერი დალაგდება.