მიმდინარე წლის მესამე კვარტალში მსოფლიოს ქვეყნების უმეტესობაში უძრავი ქონება უფრო იაფია, ვიდრე გასული  წლის ანალოგიურ პერიოდში.

უძრავი ქონების ფასების გლობალური ინდექსის თანახმად, რომელიც კონსალტინგურმა კომპანია „ნაით ფრანკმა“ შეადგინა, ამ პერიოდში უძრავი ქონების ფასები საშუალოდ 3,1 პროცენტით გაიზარდა.

ფასების ზრდის ტენდენციის მიხედვით აზია-წყნარი ოკეანის ქვეყნები ლიდერობენ. ამ მხრივ ყველაზე უარესი შედეგები ევროპაშია, სადაც უძრავი ქონება მხოლოდ 0,8 პროცენტით გაძვირდა.

აღსანიშნავია, რომ უძრავი ქონების ღირებულება 14 სახელმწიფოში მკვეთრად დაეცა და მათი უმეტესობა ევროპაში მდებარეობს. კომპანია „ნაით ფრანკის“ წარმომადგენლების მტკიცებით, 2012 წლის შემდეგ პირველად გაიზარდა უძრავი ქონების ღირებულება მთელ მსოფლიოში – აზია-წყნარი ოკეანის აუზის ქვეყნებში 9,9 პროცენტით, ახლო აღმოსავლეთში – 5,1 პროცენტით, ჩრდილოეთ ამერიკაში – 4,2 პროცენტით, სამხრეთ ამერიკაში – 3,5 პროცენტით, აფრიკაში – 3 პროცენტით, ევროპაში კი, როგორც აღვნიშნეთ, მხოლოდ 0,8 პროცენტით.

საინტერესოა, რომ ზოგიერთ ქვეყანაში, სადაც 2013 წლის დასაწყისში უძრავი ქონება ძვირდებოდა, მესამე კვარტალში მაინც ვარდნა მოხდა. ამ ქვეყნებს შორისაა: საბერძნეთი, ისლანდია, ნიდერლანდები, ნორვეგია, პორტუგალია, სლოვენია და დიდი ბრიტანეთი.