„ერთიანი ნაციონალური მოძრაობის“ ინფორმაციით, „ქართული ოცნების“ ადგილობრივმა აქტივისტებმა ცაგერში მათი შეხვედრის ჩაშლა სცადეს. გიგა ბოკერია, გიგი უგულავა და პარტიის სხვა წარმომადგენლები ამომრჩევლებთან შეხვედრას მართავდნენ, რა დროსაც მათ კვერცხები ესროლეს. აშშ-ის ელჩი რიჩარდ ნორლანდი აცხადებს, რომ როდესაც ვხედავთ კანდიდატს დასისხლიანებული სახით, მიდის ინფორმაცია დაშინების შესახებ ან აგრესია საარჩევნო კომისიის მუშაკის მიმართ, ეს არ არის ნამდვილად კარგი ნიშანი, როგორც საარჩევნო გარემოსთვის, ასევე ზოგადად საქართველოსთვის. უმრავლესობის წევრი, ზაქარია ქუცნაშვილი აცხადებს, რომ კონფლიქტი, ძალადობა, დაპირისპირება და ამაზე ტივტივი სწორედ „ნაციონალაური მოძრაობის“ სტილია.

For.ge ზაქარია ქუცნაშვილს ესაუბრა.

ოპოზიცია აცხადებს, რომ არათანაბარ პირობებში მიმდინარეობს საარჩევნო პროცესი. აშშ-ის საელჩო ხელისუფლებას მოუწოდებს უზრუნველყოს მშვიდი საარჩევნო გარემო, მათ შორის ზეწოლებზე განცხადება გააკეთ თომას ჰამერბერგმა. როგორ ფიქრობთ, რა დასკვნას დაწერს საერთაშორისო ორგანიაზაცია? ექსპერტები აცხადებენ, რომ ბევრად უფრო ნეგატიური დასკვნა დაიწერება, ვიდრე საპრეზიდენტო არჩევნების დროს...

- ის, რომ ადგილობრივ თვითმმართველობის არჩევნებში რამდენიმე კანდიდატი იღებს მონაწილეობას, ეს თავისთავად ზრდის კომუნიკაციას და ინციდენტობის რაოდენობას. ეს არაა საპრეზიდენტო არჩევნები როდესაც ერთი, ორი ან სამი ადამიანი ეჯიბრება ერთმანეთს. აქ ათი ათასობით ადამიანი ეჯიბრება ერთმანეთს, რაც ინციდენტების შემხებლობის და სხვა კავშირებს მკვეთრად ზრდის.

აქედან გამომდინარე, ბუნებრივია, რომ ადგილობრივი არჩევნები თავისი ინტენსიური ხასიათიდან გამომდინარე ბევრად ცოცხალია ვიდრე საპრეზიდენტო, ან თუნდაც საპარლამენტო არჩევნები. რაც შეეხება შედარებას, რა თქმა უნდა, ადგილობრივი ინიციატივა არის, მათ შორის ძველი რეციდივიდან გამომდინარე, მაგრამ მე მომწონს და მივესალმები იმას, რომ ხელისუფლების მხრიდან არაა მართული და წახალისებული ეს პროცესი.

თუმცა, მამუკა კაციტაძე აცხადებს, რომ შსს-ს სუს-ის დეპარტამენტს აქვს არჩევნები ჩაბარებული და სწორედ მათ მიერ ხდება კანდიდატებზე ზეწოლა...

- თუ არ ვცდები მთელი საქართველოს მასშტაბით ეს სტრუქტურა 300 თუ 400 მუშაკისგან შედგება. 300 და 400 კაცი, რომელიც კაბინეტებშია გამოკეტილი, ვერ მოიგებს არჩევნებს. ასე რომ, თუ ვინმე თვლის, რომ სუსი იბრძვის ან სუსი იგებს არჩევნებს, ეს არასწორია. შეუძლებელია, რომ 300 თუ 400 ადამიანი მოერიოს იმ 10 ათასობით აქტივისტს, ვინც ჩართულია წინასაარჩევნო კამპანიაში.

ეს უფრო ძველი რეციდივია, ძველი შიშების გამოვლინებაა, რაც იყო ძველი შსს-ს კუდ-ის და სოდ-ის არსებობის პირობებში, როცა პატრული, კრიმინალური პოლიცია, სახანძრო სამსახურებიც კი ჩართული იყვნენ წინასაარჩევნო კამპანიაში. სად ხედავთ ამის მსგავს, ან მასთან მიახლოებულს - პოლიცია, პატრული, კრიმინალური პოლიცია ან სახანძრო ჩართულია საარჩევნო კამპანიაში? ამას მე ვერ ვხედავ, ხოლო სუსის იმ 300 თუ 400 თანამშრომელს სურვილიც რომ ჰქონდეს, ვერ შექმნის ვერანაირ ამინდს.

ამერიკის ელჩი ამბობს, რომ როდესაც ვხედავთ კანდიდატებს დასისხლიანებული სახით, ეს ნამდვილად არ არის კარგის ნიშანი...

- დასისხლიანებული მე ვნახე მხოლოდ ზურაბ ჭიაბერაშვილი, რომელსაც შეურაცხყოფა მიაყენა მოქალაქემ. სხვა რომელ დასისხლიანებულ ამომრჩეველს გულისხმობს ელჩი, მე არ ვიცი.

თუნდაც ჭიაბერაშვილის ცემა მიგაჩნიათ, რომ სწორია?

- არავის მიმართ არ უნდა იყოს ძალადობა გამოყენებული. ეს უნდა იყოს არა ზოგადი რიტორიკა, არამედ ცხოვრების წესი, ამიტომაც ნორლანდის განცხადების იმ ნაწილს, რომელშიც ის ამბობს, რომ უნდა ჩატარდეს გამოძიება და დადგინდეს დამნაშავე პირები, მე მხარს ვუჭერ და მივესალმები. სახელმწიფოს პოზიციური ვალდებულებაა, რომ დავიცვათ მათ შორის ჩვენი ოპონენტები, კანდიდატი იქნება თუ არა კანდიდატი, ყველა უნდა იყოს დაცული.

რაც შეეხება მარნეულის ფაქტს, მოვუწოდებ ყველას „მაესტროს“ ეთერში ნახონ მარნეულის გამგებლობის კანდიდატის გამოსვლა, სადაც ის ამბობს, რომ არანაირ ზეწოლას და მუქრას ჩემზე ადგილი არ ჰქონიაო. ეს ადამიანი თავად ამბობს, რომ ზეწოლა არ ყოფილა ჩემზეო და ამავე დროს „ნაციონალური მოძრაობა“ ამბობს, რომ კი ზეწოლა იყო.

ის, რაც მოხდა მარნეულში და შემდეგ უკვე ბათუმში, როდესაც პარლამენტის წევრმა გიორგი ბარამიძემ სიტყვიერი და ფიზიკური შეურაცხოფა მიაყენა „ქართული ოცნების“ აქტივიტს, როდესაც ცაგერში კვერცები ესროლეს გიგა აბოკერიას და გიგი უგულავას, რამ განაპირობა ეს ფაქტები, სპეციალურად, პროვოცირება ხომ არ ხდება?

- არაა გამორიცხული, მაგრამ მე ასე დავსვამდი საკითხს - „ნაციონალაური მოძრაობა“ ეს ის ვამპირია, რომელმაც თუ სისხლი არ მიიღო საკვებად, არსებობა ისე არ შეუძლია. ეს რომ ასეა, დადასტურდა მათი ხელისუფლებაში ყოფნით და უკვე ოპოზიციაში ყოფნითაც. მათ უყვართ კონფლიქტი, ძალადობა, დაპირისპირება და ამაზე ტივტივი. იგივე ხელწერა ჰქონდათ ხელისუფლებაში ყოფნის დროს, იგივე ხელწერა აქვთ ოპოზიციაში ყოფნის დროს.

ძალადობა და დაპირისპირება მათი მართვის სტილია. ამით ახდენენ თავიანთი თავის აქტუალიზაციას. ამ დროს ვერ აცნობიერებენ, რომ იმ გამარჯვებას აქვს ფასი, რა გამარჯვებაც „ქართულმა ოცნებამ“ ყოველგავრი ძალადობის და დაპირისპირების გარეშე მოიპოვა 1 ოქტომბერს. აგრესია ჩვენი მხრიდან არ მოდიოდა და ჩვენ თავს ვიცავდით, თავს არავის არ ვესხმოდით. „ნაციონალური მოძრაობა“ ძალადობს, თავს ესხმის სხვას, მიუხედავად იმისა, ხელისუფლებაში იქნება თუ ოპოზიციაში. იგივე მაგალითი რაც თქვენ მოიყვანეთ ბარამიძესთან დაკავშირებით, იგივე უგულავასთან მიმართებაში, ადასტურებს როგორ ძალადობენ. მერე გამოდიან და ბოდიშებს იხდიან, ასე არ უნდა მოვქეულვიყავით. წინა დღეს ჩხუბობენ, მეორე დღეს ბოდიშებს იხდიან. ასეთ ხალხთან გვაქვს ჩვენ საქმე.

გიორგი ბარამიძის მიმართ, რომელსაც იცავს დეპუტატის იმუნიტეტი, ამ შემთხვევაში რა ზომები შეიძლება გატარდეს?

- მე მხარს ვუჭერ ბატონ ნორლანდის განცხადებას, მხარ ვუჭერ იმ გაგებით, რომ იმას არ უგულისხმია მხოლოდ ერთი მხარე. მან იგულისხმა ყველა პირი, ვინც კი ჩართულია ამ პროცესში. მათ შორის ის ხალხი, ვინც ოპოზიციაშია. მე ასე აღვიქვი ბატონი ნორლანდის განცხადება, რომ ეს ყველას ეხება და არა რომელიმე ჯგუფს.

შესაძლებელია, საარჩევნო შედეგების გამოცხადების შემდეგ „ნაციონალური მოძრაობა“ არჩევნების შედეგების გასაპროტესტებლად ქუჩაში გამოვიდეს, ამისთვის ემზადება ოპოზიცია?

- „ნაციონალაურ მოძრაობას“ არ აქვს მორალური პოტენციალი, რომ ხალხი ქუჩაში გამოიყვანოს. ხელისუფლებას არ ჩაუდენია უპატიებელი შეცდომა. აქედან გამომდინარე, ამას გამოვრიცხავ.