გამოცემა „იზვესტია“ წერს, რომ უკრაინაში გასაგზავნად საქართველოში ე.წ. ბოევიკების გადამზადება ხდება. ამ ინფორმაციას რუსულ გამოცემას პარლამენტის წევრზე დაყრდნობით აქვეყნებს. თუმცა რომელმა პარლამეტარმა დაუდასტურა ეს ინფორმაცია, გამოცემა მის ვინაობას არ ასახელებს. სტატიაში ასევე გამოყენებულია ქართულ სამხედრო ფორმაში გადაცმული პიროვნება. იურისტები ამბობენ, რომ ამ შემთხვევაში თავად ფოტოსურათზე გამოსახულ სამხედროს შეუძლია რეაგირების მოთხოვნა, რამდენადაც მისი ფოტო გამოყენებული იქნა ამ ტიპის დეზინფორმაციაში.

ექსპერტი უსაფრთხოების საკითხებში თეონა აქუბარდია ამბობს, რომ ამ ტიპის განცხადებები ზიანს აყენებს ქვეყნის ინტერესებს. მისი თქმით, სტატია თავის არსით პროვოკაციულია.

„თითქოს ის ფაქტი, რომ „ნაციონალური მოძრაობა“ ამზადებს მებრძოლებს უკრაინაში გასაგზავნად, აბსურდულია. აქ საყურადღებოდ მიმაჩნია თავად არჩილ ჭყოიძის განცხადება, რომელსაც, თითქოს, აქვს ინფორმაცია. საიდან - ერთი საკითხია და ვფიქრობ, მის მიმართ უნდა არსებობდეს შესაბამისი კითხვები შესაბამისი სამსახურებიდან, როცა ის ამ ტიპის განცხადებებს აკეთებს.

ანალოგიური განცხადება გააკეთა ტრისტან წითელაშვილმაც, რაც შეიძლება ერთიან კონტექსტში იქნას განხილული. ამ ტიპის განცხადებები მხოლოდ რუსეთს აძლევს ხელს. მე პირადად, როგორც მოქალაქეს, მართლაც მაინტერესებს რა წყაროებით ფინასდება „ევრაზიული არჩევანი“. როდესაც საუბარია „მეხუთე კოლონის“ საფრთხეზე, შესაბამისი სამსახურები ამ კუთხით უნდა მუშაობდნენ და იმედი ვიქონიოთ რომ ასეც არის“, - განაცხადა for.ge-სთან საუბრისას თეონა აქუბარდიამ.

გეოპოლიტიკური კვლევების ცენტრის თავმჯდომარე, თენგიზ ფხალაძე ამბობს, რომ სახელმწიფომ ნებისმიერი ამ ტიპის განცხადებებიდან მომდინარე საფრთხეები უნდა გააანალიზოს და შეისწავლოს. მისივე განცხადებით, როდესაც ღიად ხდება ოკუპანტი სახელმწიფოს ინტერესების გატარება და საკუთარი ქვეყნის დადანაშაულება, ეს სერიოზული საზრუნავი უნდა იყოს იმ ორგანიზაციების, რომლებსაც ევალებათ სახელმწიფოს უსაფრთხოებაზე ზრუნვა.

For.ge. თენგიზ ფხალაძეს ესაუბრა.

გამოცემა „იზვესტიას“ წერილი სადაც არჩილ ჭყოიძე ამბობს, რომ უკრაინაში გასაგზავნად საქართველოში ე.წ. ბოევიკების გადამზადება ხდება, შეიძლება შეფასდეს როგორც

საინფორმაციო ომი, რომელიც დაიწყო რუსეთმა საქართველოსთან მიმართებაში ქართველების გამოყენებით?

თენგიზ ფხალაძე: ამას აქვს რამდენიმე სამიზნე. პირველი ეს არის თვითონ უკრაინა. დღეს რუსეთის პოლიტიკა აწყობილია იმაზე, რომ უკრაინაში არიან „ბოევიკები“. სინამდვილეში ჩვენ ვიცით, რომ ეს „ბოევიკები“ არიან რუსეთის „გრუს“ სპეცრაზმის წარმომადგენლები. რუსეთი ამბობს, რომ უკრაინაში არიან „ბოევიკები“, რომლებიც ებრძვიან მშვიდობიან მოსახლეობას, რომ ესენი არიან ფაშისტი უკრაინელები, მაგრამ ეს იმდენად სუსტი მითია, როგორც ჩანს, ამას რუსული პროპაგანდისთვის ის ღირებულება არ აქვს, რაც მათ უნდათ. ამიტომ, სჭირდებათ ამის კიდევ უფრო გაძლიერება.

გაძლიერება იმ კუთხით, რომ ამ პროგანადაში ჩართული იყოს საქართველო?

- რა თქმა უნდა, მაგრამ ჯერ ლაპარაკია მხოლოდ უკრაინაზე. ვინც იბრძვის რუსულენოვანი მოსახლეობის წინააღმდეგ, ესენი არიან „ბოევიკები“, მაგრამ ვინ არიან ეს „ბოევიკები“? - ის სცენარი, რომ ისინი არიან არაბული ჯგუფები, ან კიდევ ისლამური დაჯგუფების წევრები, არ გამოვა. მაშინ, ვინ შეიძლება იყოს ყველაზე კარგი ვარიანტი? - რა თქმა უნდა - საქართველო. საქართველოც ის ქვეყნაა, რომელიც რუსეთის თავლსაზრისით, ცუდად იქცევა, რომელიც ასევე ცდილობს გასცდეს იმ სფეროს, რომელსაც კრემლი ეძახის თავის ექსკლუზიურ ინტერესებს და თავისი გავლენის სფეროებს.

ისინი ფიქრობენ ერთი გასროლით ორი კურდღელი მოკლან. ერთი ის, რომ უკრაინაში არიან ვიღაცა „ბოევიკები“ და მეორე, ამ ყველაფერში დაადანაშაულონ საქართველო და ამოწიონ ძველი თემა. იცით, რომ რუსეთის საყვარელი თემაა - საქართველოში მზადდებიან ბოევიკები, რომლებიც ხან ჩრდილოეთ კავკასიაში იბრძვიან და ხან კიდევ სად.

ამ ინტერვიუში მთავარი წყარო არის არჩილ ჭყოიძე, რომელიც გაუკრვეველ წყაროებზე დაყრდნობით საუბრობს, მაგრამ არც ერთი ადამიანის სახელი და გვარი არ არის დასახელებული...

- მეც შემიძლია ვთქვა, რომ ჩემმა წყარომ კრემლიდან მომაწოდა ინფორმაცია, რუსული პრესის მუშაობის სტილი არის ასეთი. უნდა შეიქმნას ვიღაცა ექსპერტი და ამ შემთხვევაში სრულიად ოდიოზური ფიგურებია დასახელებული, ჭყოიძე და მის ორგანიზაციას საქართველოში რეიტინგი არ აქვს, მაგრამ ყველაზე ციტირებადი არიან რუსულ მედიაში. ეს „ევრაზიული კავშირი“ და მსგავსი ორგანიზაციები, ფინანსდებიან რუსეთიდან. შემდგომ ხდება მათი გაპიარება რუსულ პრესაში. მკითხველისთვის ყველაზე მთავარია, რომ ვიღაცაზე იყოს ციტირება და ეს ციტირებადი „ექსპერტი“ არჩილ ჭყოიძე ამბობს, რომ მას სხვადასხვა წყაროებმა (აბსლუტურად გაუგებარია რა წყაროებია) აცნობეს ეს ინფორმაცია და დაუდასტურეს პარლამენტში.

ასე იქმნება დეზინფორმაცია. ეს ინფორმაცია მარტო რუსეთში არ მიდის, ეს მიდის ყველგან, სადაც კითხულობენ რუსულენოვან პრესას. იქ კი არავინ არ დაიწყებს გარკვევას, ვინ არის ჭყოიძე. მთავარია, რომ საქართველო კიდევ ერთხელ დასახელდა იმ ქვეყნად, სადაც, თურმე, ხდება „ბოევიკების“ გადამზადება. ნელ-ნელა და გეგმაზომიერად ხდება საზოგადოებრივი აზრის მოწამვლა. საბოლოო ჯამში, როცა დასჭირდებათ, ამ ბერკეტებს სრული სიმძლავრით აამოქმედებენ, რომ შედეგ მოხდეს რაღაც-რაღაცეების გამართლება, რასაც რუსეთი ეძახის თავისი ინტერესების დაცვას უცხო ქვეყნის ტერიტორიაზე და, რასაც ახლა ჩვენ ვხედავთ უკრანიაში.

რუსეთის მოსახლეობის უდიდესი ნაწილი დარწმუნებულია იმაში, რომ რუსული ჯარები უკრაინას ფაშისტი დამპყრობლებისგან ანთავისუფლებს, რომლებმაც დაიპყრეს კიევი. როგორც ჩანს, მსგავი რამ იქმნება საქართველოსთან მიმართებაში. ძალიან სამწუხაროა, რომ საქართველოში არიან ისეთი ადამიანები, რომლებსაც ნადვილად ვერ დავარქმევ ქართველებს, ვერც ქართული საზოგადოების ნაწილს. ესენი არიან „მეხუთე კოლონის“ წარმომადგენლები, რომელიც ახლა თამაშობენ იმ ჭანჭიკის როლს, რომელიც ძალიან სჭირდება იმ ძალებს, რომლებიც მათ უკან დგანან.

საქართველოს ხელისუფლება აცხადებს, რომ სიტუაციას აკონტროლებენ, მაგრამ ფაქტია, რომ საინფორმაციო ომი დაწყებულია. როგორ ფიქრობთ, როგორი უნდა იყოს ხელისუფლების რეაგირება, განსხვავებული პოლიტიკური აზრის მქონე ადამიანებთან მიმართებაში?

- განსხვავებული აზრი და მათ შორის განსხვავებული პოლიტიკური აზრის გამოთქმა არანაირ პრობლემას არ წარმოადგენს, მაგრამ ეს არაა განსხვავებული აზრი. ეს არის მიზანმიმართული კამპანია სახელმწიფოს წინააღმდეგ. ამაზე სხვანაირი რეაგირება უნდა იყოს. როდესაც ღიად და აშკარად ხდება ოკუპანტი სახელმწიფოს ინტერესების გატარება და საკუთარი ქვეყნის დადანაშაულება, ეს იმ ორგანიზაციების სერიოზული საზრუნავი უნდა იყოს, რომლებსაც სახელმწიფოს უსაფრთხოებაზე ზრუნვა ევალებათ.

ხშირად თავს ვიმშვიდებთ იმით, რომ ამათ მომხრე მაინც არ ჰყავთ. საქმე ის არა, მომხრე ჰყავთ თუ არა, საქართველში ბევრი მომხრე, თავის დროზე, არც ბოლშევიკებს ჰყავდათ, მაგრამ შულავერის კომიტეტის შექმნა საკმარისი იყო იმისათვის, რომ მერე ის მოვლენები სხვანიარად განვითარებულიყო. თქვენ თუ ნახვათ იმდროინდელ პრესას, როდესაც პირველად გამოჩნდნენ ეს მომავალი რევოლუციონრები, მათ ასევე ეძახდნენ სულელებს, არანორმალურებს და არ აქცევდნენ ყურადღებას. მერე ამ სულელებმა იმდენი მოახერხეს, რომ ჭკვიანებს წაართვეს ქვეყანა.

ამიტომ, ყურადღება უნდა მივაქციოთ იმას, როდესაც ანტისახელმწიფოებრივი ქმედება ხორციელდება. ეს არ ნიშნავს, რომ იმ მეთოდებით დაიწყოს ბრძოლა მათ წინააღმდეგ, როგორც ამას რუსეთის ფედერაცია აკეთებს. ყველაფერი უნდა იყოს კანონის ფარგლებში. ამ ადამიანებმა უნდა იცოდნენ, რომ ანტისახელმწიფოებრივი ქმედება კანონით დასჯადია. როდესაც გორში, საოკუპაციო ხაზთან ახლოს ატარებ ტელეხიდს, რომელშიც ერთვება დუგინი და დარბაზში სხედან საქართველოს მოქალაქეები, ეს უკვე არის მოსახლეობის მოწამვლა. ის, რაც მოხდა კინოსახლში, ეს უკვე არის მოსახლეობის მოწამვლა.

ეს არის საწამლავი და ჩვენ ვამბობთ, რომ არაუშავს, რადგან საწამლავი არის ცოტა. ხვალ, რომ ბევრი მოიწამლოს, მერე რას ვიზამთ? მე ვამბობ, რომ ეს არის მოსახლეობის მოწამვლა, მათი შეცდომაში შეყვანა, მიზანმიმართული პროპაგანდა, რომელიც ანგრევს ქართულ სახელმწიფოს. თავის დამშვიდება იმით, რომ დღეს თურმე ცოტაა ამით მოწამლული, არასერიოზულია. სანამ ინკუბაციის პერიოდშია, მანამდე უნდა მოხდეს ამ დაავადებისგან საზოგადოების განკურნება.

მაისის ბოლოს ჩამოდიან რუსი დეპუტატები. როგორ ფიქრობთ, ეს არის ქვეყანაში ვითარების არევისთვის ნიადაგის მომზადების მცდელობა?

- ფაქტია, რომ ამ ადამინებს საქართველოს სიყვარული არ ამოძრავებთ. ძალიან აქტიურად მიდის რუსეთის ფედერაციაში საუბარი პოსტსაბჭოთა ქვეყნების შეზღუდულ სუვერენიტეტზე, ამაზე ის ადამიანები ლაპარაკობენ, რომელთა ჩამოყვანასაც აპირებენ საქართველოში. რაზე უნდა ელაპარაკონ ეს ბატონები საქართველოს მოსახლეობას? ასოცირების ხელშეკრულებაზე, ატლანტიკურ სივრცეზე, თუ რაზე? რისთვის უნდა მივცეთ აუდიტორია, იმისთვის, რომ ეს აუდიტორია მოწამლონ? გამომდინარე საკითხის დელიკატურობიდან, შეიძლება ამაზე სპეცსამსახურები ხმამაღლა ვერ საუბრობენ, ინფორმაცია რაც მათ აქვთ, საჯარო ვერ იქნება, მაგრამ მე, როგორც მოქალაქეს, მაინტერესებს რამდენად ვართ მზად იმისათვის, რომ ეს სენი საბოლოოდ მოვიცილოთ.

ამაში იგულისხმება სპეცსამსახურების მუშაობა, ინფორმაციული შემოტევიდან სახელმწიფოს დაცვა. საზოგადოება უნდა იყოს მობილიზებული; იმ შეხვედრაზე არ უნდა მიდიოდეს საზოგადოება; ასეთ ორგანიზაციებზე ოფისებს არ უნდა აქირავებდნენ; ასეთ ადამიანებს პრესაში გამოსვლის საშუალებას არ უნდა აძლევდნენ, ეს არის საზოგადოებრივი პროტესტი. მტერს უნდა დაარქვა მტერი, სხვანაირად არ შეიძლება. სახელმწიფო, რომელიც შენს წინააღმდეგ ახორციელებს ოკუპაციას, ვისთანაც საომარ მდგომარეობაში იმყოფები, იმას ჰქვია მტერი.

იმ სახელმწიფოს დაფინანსებული ორგანიზაცია, რომელიც აქ ეწევა სისულელეების პროპაგანდას, რაც ეწინააღმდეგება საქართველოს სახელმწიფოებრიობას, ამას ასევე, ქვია მტრული პროპაგანდა. ამიტომ ვამბობ, რომ საზოგადოებამ ხმა უნდა ამოიღოს. ეს არ ნიშნავს, რომ სადაც დავიჭერ იქ ვცემ, არა ბატონო, ესენი სწორედ, რომ ცდილობენ მსგავსი პროვოკაციებით და სკანდალებით დაიმკვიდრონ ადგილი. სრული იგნორი საზოგადეობისგან, ისინი უნდა გრძნობდნენ, რომ ამათ აქ არ დაედგომებათ. თუ უნდათ რუსეთი, კეთილი მგზავრობა... დიდი სიამოვნებით მისცემენ ვიზას. თუ რუსული პასპორტი არა, მარავლჯერადი ვიზა ექნებათ.

საინტერესოა ჭყოიძე საიდან ფლობს ამ ინფორმაციას, როდესაც აშშ-ს სახელმწიფო მდივანი აცხადებს, რომ არის უტყუარი მტკიცებულება იმისა, რომ აღმოსავლეთ უკრაინაში მოვლენებს სწორედ რუსეთი მართავს...

- რაშიც თვითონ არის დამნაშევე, ზუსტად ის უნდა დააბრალოს სხვას. ამიტომაც, ახლა ცდილობს ამტკიცოს, რომ იქ არის სხვა „ბოევიკები“. ეს კრემლის პროპაგანდის ავადმყოფური შედეგია, რომელიც უბრალოდ ხორციელდება ქართველების ხელით. მეტად უნდა ვიმუშავოთ ადამიანებთან. მეტად უნდა ველაპარაკოთ მათ არა ტელევიზიით, არამედ ადგილზე.

რა უნდა რუს დეპუტატს გორში, ჩავიდეს ჩვენი დეპუტატი და ის დაელაპარაკოს. მათთვის საქართველოში სივრცე არ უნდა დარჩეს. როგორ შეიძლება რუსეთის დუმის წევრს მისცე იმის საშუალება, რომ შეხვდეს შენს მოსახლეობას. ჩავიდეს საქართველოს პარლამენტის წევრი და მოაწყოს შეხვედრა რუსეთის მოსახლეობასთან, დაუშვებენ? ამიტომ ვამბობ, რომ საკუთარ მოსახლეობასთან ჩვენ უნდა ვიმუშავოთ. ამ ძალების მანევრებისათვის სივრცე არ უნდა დავტოვოთ.