ბოლო პერიოდში, საქართველოში მიმდინარე მოვლენები სულ უფრო ხშირად ხვდება საერთაშორისო ყურადღების ცენტრში, განსაკუთრებით, დასავლელი პარტნიორების მხრიდან. თეთრი სახლის ყოფილი მაღალჩინოსნის, მაიკლ კარპენტერის მკვეთრი შეფასება, სადაც ის საქართველოს „ბნელ დროს“ და „ავტორიტარიზმისკენ სვლას“ უწინასწარმეტყველებს, მოვლენების კრიტიკული განვითარების მაჩვენებელია. კარპენტერი, „ინდიფენსის ავენიუ მედიასთან“ ინტერვიუში, აცხადებს, რომ „ქართული ოცნების“ შეცვლილი კურსის გამო, რეგიონში მოწინავე ქვეყანა ახლა „გარიყვის კანდიდატია“ და აშშ-სთვის ასეთ ქვეყანასთან პარტნიორობა შეუძლებელი იქნება, თუ გეოპოლიტიკური და პოლიტიკური მდგომარეობა არ შეიცვლება.

„ქართული ოცნების“ მმართველი გუნდი კი ამ განცხადების გამო, მწვავედ აკრიტიკებს მაიკლ კარპენტერს და მას თეთრი სახლის იმ ყოფილ მაღალჩინოსნებს შორის ასახელებს, რომლებიც საქართველოს ომში ჩართვას აიძულებდნენ. „ქართული ოცნების“ წევრის, ირაკლი ქადაგიშვილის განცხადებით, პარტიას მშვიდობის შენარჩუნებისთვის აკრიტიკებენ. ის უარყოფს ავტორიტარიზმის ბრალდებებს და აცხადებს, რომ ქვეყანაში სრული დემოკრატიაა.

„ჩვენ იმედს ვამყარებთ, რომ ამდაგვარი ბატონები აღარ იქნებიან ამერიკული პოლიტიკის განმსაზღვრელები. თუ ისევ ესენი იქნებიან ამერიკული პოლიტიკის განმსაზღვრელები, რა თქმა უნდა, მათი კურსი რა იყო, რომ საქართველო ომში ჩართულიყო რუსეთის წინააღმდეგ, ჩვენ ეს არ გავაკეთეთ, მშვიდობა შევინარჩუნეთ. მათთვის ეს მშვიდობა მიუღებელი იყო მათი გეოპოლიტიკური მიზნებისთვის. გამომდინარე აქედან, თუ კიდევ ასეთი ტიპის მოთხოვნები იქნება, რა თქმა უნდა, ჩვენი გზები ვერ იქნება თანხვედრილი. ჩვენ კურსი კი არ შეგვიცვლია, ანუ 2008 წელს რომ ომში ასე გავეხვიეთ, იგივე კურსი ახლა არ გამოვა და ეს არის მათთვის კურსის შეცვლა. ავტორიტარიზმი, იცით, რა არის? - თქვენი ტელეკომპანია და არცერთი მედია არ უნდა არსებობდეს, ამიტომ აქ ავტორიტარიზმი კი არა დემოკრატიაა“, - აცხადებს ქადაგიშვილი.

„ქართული ოცნების“ გზავნილი ნათელია - ისინი დასავლურ კრიტიკას განიხილავენ, როგორც საქართველოს ომში ჩათრევის მცდელობას, რასაც პარტია მტკიცედ ეწინააღმდეგება. მათი აზრით, მშვიდობის შენარჩუნება ქვეყნის უმთავრესი პრიორიტეტია, ხოლო დემოკრატიის ხარისხი საქართველოში უმაღლეს დონეზეა, რისი დასტურიც მედიის თავისუფლებაა.

ოპოზიცია კატეგორიულად არ ეთანხმება მმართველი გუნდის შეფასებებს და მაიკლ კარპენტერის განცხადებას საქართველოს დასავლური ინტეგრაციის პროცესის შეფერხების კიდევ ერთ ნათელ ინდიკატორად მიიჩნევს. ოპოზიციური პარტიების ლიდერები აცხადებენ, რომ „ქართული ოცნება“ შეგნებულად უხვევს დასავლური კურსიდან და ქვეყანას რუსეთის გავლენის ორბიტისკენ უბიძგებს. მათი აზრით, ავტორიტარიზმის ნიშნები აშკარაა და გამოიხატება მედიაზე ზეწოლაში, სამოქალაქო საზოგადოების დისკრედიტაციასა და პოლიტიკური ოპონენტების დევნაში.

ოპოზიცია მიიჩნევს, რომ მმართველი გუნდის ქმედებები არა მხოლოდ ქვეყნის დემოკრატიულ განვითარებას აფერხებს, არამედ საფრთხეს უქმნის საქართველოს ევროატლანტიკურ მომავალს, რასაც ქართველი ხალხის უმრავლესობა უჭერს მხარს. ისინი მოუწოდებენ დასავლელ პარტნიორებს, გააძლიერონ ზეწოლა „ქართულ ოცნებაზე“, რათა ქვეყანა კვლავ დემოკრატიული განვითარების გზას დაუბრუნდეს.

საერთაშორისო ურთიერთობების ანალიტიკოსი, თამარ კიკნაძე for.ge-თან, მაიკლ კარპენტერის განცხადებას საქართველოს საშინაო საქმეებში ჩარევის მცდელობად და დასავლეთის მხრიდან „ორმაგი სტანდარტების“ გამოყენებად აფასებს.  

„საქართველო სუვერენული სახელმწიფოა და აქვს უფლება, თავად განსაზღვროს საკუთარი საგარეო და საშინაო პოლიტიკური კურსი. დასავლელი პარტნიორების კრიტიკა ხშირად მიზნად ისახავს საქართველოსთვის გარკვეული გადაწყვეტილებების თავს მოხვევას, რაც არ შეესაბამება ქვეყნის ეროვნულ ინტერესებს. „ქართული ოცნების“ მთავარი პრიორიტეტი ქვეყნის მშვიდობა და სტაბილურობაა, რაც რეგიონში არსებული რთული გეოპოლიტიკური ვითარების ფონზე განსაკუთრებულ მნიშვნელობას იძენს. არ დავეთანხმები ავტორიტარიზმის ბრალდებებს. საქართველოში ფუნქციონირებს მრავალპარტიული სისტემა, თავისუფალი მედია და სამოქალაქო საზოგადოება. დასავლეთის შეშფოთებას,  შესაძლოა, საფუძვლად ედოს არა რეალური დემოკრატიული პრობლემები, არამედ განსხვავებული შეხედულებები გეოპოლიტიკურ საკითხებზე, განსაკუთრებით კი რუსეთთან მიმართებაში. საქართველო განაგრძობს დასავლურ ვექტორს, თუმცა საკუთარი ინტერესების გათვალისწინებით და არ დაუშვებს ქვეყნის ჩათრევას რამე სახის კონფლიქტში“, - ამბობს ანალიტიკოსი.

მისი თქმით, საქართველო ნამდვილად გზაგასაყარზე დგას. ხოლო დასავლური ნარატივი ხშირად იგნორირებს საქართველოს უნიკალურ გეოპოლიტიკურ მდგომარეობას და იმ რეალურ საფრთხეებს, რომელთა წინაშეც ქვეყანა დგას.

„კრიტიკა ხშირად ზედაპირულია და არ ითვალისწინებს კომპლექსურ შიდაპოლიტიკურ კონტექსტს, რაც ხელს უშლის კონსტრუქციულ დიალოგს“, -ამბობს კიკნაძე.