როგორ წამოეგო აშშ-ის პრეზიდენტი რუსი ჩინოვნიკის პროვოკაციულ პოსტებს და რა დგას ამერიკელი ლიდერის ბირთვული მუქარის უკან? 2 აგვისტოს, აშშ-ის პრეზიდენტმა, დონალდ ტრამპმა სოციალურ ქსელში დაწერა, რომ მან ბრძანა, ორი ბირთვული წყალქვეშა ნავის „შესაბამის რეგიონებში“ გადაყვანა, რუსეთის ყოფილი პრეზიდენტის, დიმიტრი მედვედევის „უკიდურესად პროვოკაციული განცხადებების“ საპასუხოდ. ამით დასრულდა ონლაინ-დაპირისპირების კიდევ ერთი რაუნდი ზესახელმწიფოს ლიდერსა და დაბალი რანგის რუს ჩინოვნიკს შორის.

ციფრული დუელის ანატომი

ისტორია ულტიმატუმით დაიწყო. ტრამპმა, რომელიც სულ უფრო მეტად იყო გაღიზიანებული უკრაინის სამშვიდობო მოლაპარაკებებში პროგრესის არარსებობით, კრემლს მკაცრი გადაწყვეტილება გამოცხადა: 8 აგვისტომდე, ცეცხლის შეწყვეტაზე თანხმობა, ან ეკონომიკური სანქციების ახალი რაუნდის დაწყება.

მედვედევმა, ტრამპს სოციალურ მედიაში სწრაფად უპასუხა. „ყოველი ახალი ულტიმატუმი მუქარაა და ომისკენ გადადგმული ნაბიჯი“, - წერდა ის X-ზე და მისთვის დამახასიათებელი ხუმრობით დასძინა: „ნუ წახვალ მძინარე ჯოს გზით!“ - მინიშნება იმ მეტსახელზე, რომელიც ტრამპმა თავის წინამორბედ ბაიდენს დაარქვა.

თუმცა მედვედევი ამით არ შემოიფარგლა. Telegram- ზე მან ტრამპს შესთავაზა, „ხელახლა უყუროს ცოცხალ მკვდრებზე საყვარელ ფილმებს და გაიხსენოს, რამდენად საშიში შეიძლება იყოს მითიური „მკვდარი ხელი“. ის საუბრობდა ცივი ომის დროინდელი საბჭოთა ავტომატური ბირთვული შურისძიების სისტემაზე, მექანიზმზე, რომელსაც შეეძლო შურისძიება რუსეთის ხელმძღვანელობის განადგურების შემთხვევაშიც კი.

ტრამპის მხირდან პასუხმაც არ დააგვიანა: „მედვედევს, რუსეთის წარუმატებელ ყოფილ პრეზიდენტს, რომელიც თავს ჯერ კიდევ პრეზიდენტად თვლის, უთხარით, რომ სიტყვებს ფრთხილად მოეკიდოს. ის ძალიან საშიშ ტერიტორიაზე შედის!“

შეუსაბამობის პარადოქსი

ამ ბირთვულ დუელში არის რაღაც, თითქმის აბსურდული. ერთ მხარეს მსოფლიოში ყველაზე ძლიერი არმიის მეთაურია, მეორე მხარეს კი ადამიანი, რომელსაც ანალიტიკოსები „იდეალურ სამიზნეს“ უწოდებენ ზუსტად იმიტომ, რომ მას რეალური ძალაუფლება არ გააჩნია. ეს თავად კრემლმაც აღნიშნა. ოფიციალურმა მოსკოვმა ნათლად განაცხადა, ყურადღება არ მიაქციოთ მედვედევს, ის კრემლის სახელით არ საუბრობს.

 ყოფილი ლიბერალის მეტამორფოზა

მედვედევი, რომელიც 2008 წლიდან 2012 წლამდე, პრეზიდენტობის დროს, პროდასავლურ ლიბერალად ასახელებდა თავს, უკრაინაში ომის დაწყების შემდეგ, დრამატული ტრანსფორმაცია განიცადა. ის ხშირად ბირთვული აპოკალიფსით უფრო ღიად იმუქრებოდა, ვიდრე თავად პუტინი.

აგირების ფსიქოლოგია

„ისმის კითხვა: საერთოდ, რატომ ერთვება ტრამპი იმ განცხადებებში, რასაც ის „სულელურს“ უწოდებს,“ - კითხულობს CNN . შესაძლოა, რამდენიმე ახსნა არსებობდეს, რომელთაგან თითოეული ტრამპის სტრატეგიის ასპექტებს ავლენს.

პირველი ვერსია ტაქტიკურია: მედვედევზე თავდასხმით, ტრამპს შეუძლია რუსეთის მიმართ სიმკაცრის დემონსტრირება, პუტინთან პირდაპირი დაპირისპირების გარეშე, რომელთანაც ის, უკრაინასთან დაკავშირებით, შეთანხმების მიღწევას იმედოვნებს.

მეორე ვერსია ყურადღების გადატანის მანევრია: რუსული ნავთობის შეძენის გამო, ჩინეთისა და ინდოეთის წინააღმდეგ სანქციების მუქარის ფონზე. რუსეთის წინააღმდეგ ბირთვულმა რიტორიკამ, ასევე, შეიძლება დაჩრდილოს მცირე შიდა პრობლემები.

ყველაფერი ლოგიკურად გამოიყურება: როდესაც შენს წინააღმდეგ PR ომი მიმდინარეობს, ლოგიკურია, რომ ყველაზე იაფი მონეტით დაიწყო გადახდა - ასევე, PR-ით.

ბლეფი თუ მუქარა?

რამდენად სერიოზულია ტრამპის წყალქვეშა ნავის მანევრი? ეს უფრო რიტორიკული ესკალაციაა, ვიდრე სამხედრო.

შეერთებულ შტატებს უკვე აქვს ატომური წყალქვეშა ნავები, რომლებიც პატრულირებენ ოკეანეებში და შეუძლიათ რუსეთში სამიზნეების დარტყმა. აშშ-ის საზღვაო ძალებს ჰყავს 71 წყალქვეშა ნავი, ყველა ატომური ძრავით აღჭურვილი, მათ შორის, 14 ოჰაიოს კლასის სტრატეგიული სარაკეტო მატარებელი. შედარებისთვის, რუსეთს 30-ზე ნაკლები ატომური წყალქვეშა ნავი ჰყავს. ამერიკული ბირთვული წყალქვეშა ნავები ყოველთვის განლაგებულია, მათ შორის, ატლანტიკაში და რუსეთმა ეს კარგად იცის.

პენტაგონმა და აშშ-ის საზღვაო ძალებმა, წყალქვეშა ნავების გადაადგილების შესახებ ტრამპის განცხადებების კომენტირებაზე უარი განაცხადეს, რაც სტანდარტული პრაქტიკაა ბირთვული შეკავების ასეთ მგრძნობიარე საკითხებში.

პროვოკაციების სიმბიოზი

გარკვეული გაგებით, ტრამპსა და მედვედევს შორის უცნაური სიმბიოზია. მედვედევს შანსი ეძლევა, ამერიკის პრეზიდენტთან კამათით, დაამტკიცოს თავისი მნიშვნელობა და ერთგულება. ტრამპს კი შანსი ეძლევა, პუტინის შეურაცხყოფის გარეშე აჩვენოს თავისი გადაწყვეტილება.

მედვედევისთვის ეს არის გზა, რომ ხელახლა წარმოაჩინოს თავი, როგორც უკომპრომისო ქვეითმა ჯარისკაცმა და ერთგვარმა ქორმა, დასავლეთთან დაპირისპირებაში. ტრამპისთვის ეს არის შანსი, რომ გამოიყურებოდეს, როგორც მკაცრი, ძლიერი ლიდერი და ამავდროულად, თავიდან აიცილოს რეალური დაპირისპირება.

დასკვნა: აბსურდის თეატრი

ჩვენ ვხედავთ ერთგვარ აბსურდის თეატრს: მსოფლიოში ყველაზე გავლენიანი ადამიანი ბირთვულ დუელშია ჩართული პოლიტიკოსთან, რომელსაც, ფაქტობრივად, უარყოფს მისივე ხელმძღვანელობა. ეს მეტყველებს, როგორც თანამედროვე გეოპოლიტიკის არასტაბილურობაზე, ასევე სოციალური მედიის ეპოქის სპეციფიკაზე, როდესაც ერთ „ტვიტს“ შეუძლია, სტრატეგიული იარაღის ხელახლა განლაგების პროვოცირება.

წყარო: https://trt.global/russian/article/81df62fc5413