ოპოზიციონერი ლიდერების დაკავებების ფონზე, კონკრეტული პოლიტიკოსების მხრიდან უფრო მეტად გააქტიურდა საუბარი საქართველოს მეხუთე პრეზიდენტის, სალომე ზურაბიშვილის ირგვლივ გაერთიანების შესახებ. მეტიც, თვითმმართველობის არჩევნებში მის კანდიდატურას დადებითად აფასებენ. „ლელო - ძლიერი საქართველოს“ ერთ-ერთ ლიდერს, ალეკო ელისაშვილს მიაჩნია, რომ უნდა ჰქონდეთ ერთიანი პოზიცია, ან ერთად უნდა შევიდნენ არჩევნებში ან არჩევნებში არ უნდა იყვნენ წარმოდგენილნი. თუმცა, საბოლოოდ რას იზამს ოპოზიციური სპექტრი, ამ ეტაპზე უცნობია.

ანალიტიკოსი ედიშერ გვენეტაძე თვლის, რომ ოპოზიცია თავის აზრს თავშივე ეწინააღმდეგება: ჩატარებულ საპარლამენტო არჩევნებს არალეგიტიმურად ცნობს, თუმცა ადგილობრივ არჩევნებში მონაწილეობისთვის ემზადება. თავად მიესალმება თუკი ოპოზიციის ნაწილი, თბილისის მერობის არჩევნებში, ყოფილ პრეზიდენტის, სალომე ზურაბიშვილის კანდიდატურას წამოაყენებს.

„არავინ არაფერს არ უშლის - თუ უნდათ გაერთიანდნენ. ეს ათქმევინეს ახალ ელისაშვილს, რომელიც არის დახვეწილი არამზადა. 26 ოქტომბრის საღამოდან ელისაშვილი იძახის არჩევნები გაყალბდა და ხელისუფლებაში არის არალეგიტიმური ძალაო - თუ არალეგიტიმურია ხელისუფლება, მის მიერ დანიშნულ არჩევნებში როგორ იღებს მონაწილეობას და როგორ უნდა წამოაყენოს სალომე ზურაბიშვილის კანდიდატურა?! თუმცა, მე მივესალმები თუ წამოაყენებენ.

ოპოზიციონერი პოლიტიკოსები ციხეში იმიტომ ზიან, რომ ისინი დაუპირისპირდნენ ქართულ სახელმწიფოს - მათ სთხოვდნენ ელემენტარულ რაღაცას: მისულიყვნენ საგამოძიებო კომისიაში და ეპასუხათ კითხვებზე - მაშინ იძახდნენ არალეგიტიმურ საგამოძიებო კომისიაზე არ მივალთო. მათ საკუთარ თავს მოუწყვეს ხარაკირი. თუ ისინი მართლები არიან, სტრასბურგში გაასაჩივრონ და მოიგონ. რამდენჯერაც შეიტანეს საჩივარი სტრასბურგში, იმდენჯერ კუდამოძუებული გამობრუნდნენ.

საუკეთესო კანდიდატი ოგბუნუჯუ იქნებოდა, რომელმაც ვაშაძეს მოუგო წინა მერობის არჩევნებში - ამიტომ, მისი კანდიდატის წამოყენება უკეთესი იქნებოდა, მაგრამ საკითხავია ეს კაცი დღეს იქნება თუ არა თანახმა ოპოზიციამ მისი კანდიდატურა წამოაყენოს“, - განაცხადა ედიშერ გვენეტაძემ For.ge-სთან.

ალეკო ელისაშვილის განცხადებით კი, ახლა დაპირისპირების დრო არ არის, რადგან ახლა ერთობა ძალიან მნიშვნელოვანია.

„მზად ვარ, ნებისმიერის გვერდით დავდგე დიდი ერთობისთვის. შერიგების ხელს ვუწვდი ეკა ბესელიასაც. მე ამ ნაბიჯს ვდგამ, ჭკუას არავის ვარიგებ, უბრალოდ ამ ბრძოლაში ერთობის გარეშე სათითაოდ დაგვლეწავენ, დაგვნაყავენ, ასეც ხდება. გუგავასაც, შალვა ნათელაშვილსაც, ბოკერიასაც, ყველას ვუწვდი შერიგების ხელს, ვინც პოლიტიკურად აქტიურია. მზად ვარ, რომ რაღაცები გვერდზე გადავდოთ, მე ვდგამ ამ ნაბიჯს თითოეული მათგანისკენ. ვისთანაც დანაშაულზე და კორუფციაზე მქონდა დავა, როდესაც დამოუკიდებელ სასამართლოს შევქმნით ოდესმე, იქ გავარჩიოთ ჩვენი დავები, მაგრამ ეს წყენები, ეს ჯავრი, ეს დაპირისპირება გადავდოთ გვერდზე, იმიტომ რომ სააკაშვილიც კარგავს ქვეყანას, მეც ვკარგავ ქვეყანას, ბესელიაც კარგავს ქვეყანას, ყველა ნორმალური ქართველი ამ ქვეყანას ვკარგავთ. დიქტატურას ამყარებენ, „ფეისბუქის“ პოსტის გამო ხალხს იჭერენ, ქალებს იჭერენ და ციხეში ყრიან და ახლა არ არის რაღაცების გარჩევის დრო, ერთობა არის ძალიან მნიშვნელოვანი.

მე მიმაჩნია, რომ უნდა გვქონდეს ერთიანი პოზიცია, ან ერთად უნდა შევიდეთ არჩევნებში ან არჩევნებში არ უნდა შევიდეთ. თუმცა ბოლო დროს, მას შემდეგ, რაც ჩემი პარტნიორები, ჩემი პოლიტიკური მეგობრები, მამუკა და ბადრი დააკავეს, მე გუშინ ვთქვი და ახლაც გავიმეორებ, აქამდე ვფიქრობდი, რომ მაინც ბრძოლაში შესვლა ღირს და უბრძოლველად როგორ უნდა დავუთმოთ, მერე ვფიქრობდი, რომ წინასწარ წაგებულ თამაშში შესვლა სიბრიყვეა, თან ხალხი ციხეშია, ამ ყველაფერს ვფიქრობდი, მაგრამ ბადრის და მამუკას დაკავება ჩემთვის იყო გადამწყვეტი ამბავი... მესამე დღეა გადავწყვიტე, რომ თვითმმართველობის არჩევნებში შესვლა უფრო სწორია“, - განაცხადა ალეკო ელისაშვილმა.

ალეკო ელისაშვილის განცხადებით, ოპოზიცია სალომე ზურაბიშვილის ირგვლივ უნდა დაირაზმოს რადგან ის „მერობის ცუდი კანდიდატი არ იქნებოდა“.

„დავსხდეთ, დავილაპარაკოთ და დავირაზმოთ სალომე ზურაბიშვილის გარშემო, ნუ გვეშინია ამის თქმის, ამოვღერღოთ. მერობის ცუდი კანდიდატი არ იქნებოდა. დიდი ხანია არ მქონია კომუნიკაცია სალომე ზურაბიშვილთან. იმედია მალე ოპოზიცია შევიკრიბებით და რაღაც საერთო პოზიციაზე შევჯერდებით. არ მერიდება არაფრის თქმის, იმიტომ რომ საქართველო არის ძალიან მძიმე განსაცდელში“, - დასძინა ალეკო ელისაშვილმა.